ܡܦܩܢܐ 35
35
ܦܘܼܩܕܵܢܹ̈ܐ ܒܘܼܬ ܫܲܒܬܵܐ
1ܓ̰ܘܼܡܸܥ ܠܹܗ ܡܘܼܫܹܐ ܠܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ، ܘܐ݇ܡܝܼܪܹܗ ܐܸܠܲܝܗܝ، ”ܐܲܢܹܐ ܝܢܵܐ ܗܹܡܸܙܡܵܢܹ̈ܐ ܕܦܩܝܼܕ ܠܹܗ ܡܵܪܝܵܐ ܠܸܥܒ݂ܵܕܵܐ. 2ܒܐܸܫܬܵܐ ܝܵܘܡܵܢܹ̈ܐ ܦܵܐܹܫ ܥܒ݂ܝܼܕܵܐ ܟܠ ܦܘܼܠܚܵܢܵܐ، ܐܝܼܢܵܐ ܝܵܘܡܵܐ ܕܫܲܒ݂ܥܵܐ ܝܵܘܡܵܐ ܩܘܼܕܫܵܐ ܝܠܹܗ ܐܸܠܵܘܟ݂ܘܿܢ، ܫܲܒܬܵܐ ܝܠܵܗ̇ ܠܡܵܪܝܵܐ. ܟܠ ܕܥܵܒܹܕ ܦܘܼܠܚܵܢܵܐ ܒܗ̇ܘ ܝܵܘܡܵܐ ܦܵܐܹܫ ܡܘܼܡܝܸܬܵܐ. 3ܠܵܐ ܫܵܝܪܝܼܬܘܿܢ ܢܘܼܪܵܐ ܓܵܘ ܟܠܲܝܗܝ ܒܵܬܵܘ̈ܟ݂ܘܿܢ ܒܝܵܘܡܵܐ ܕܫܲܒܬܵܐ.“
ܕܸܒ݂ܚܹ̈ܐ ܠܡܵܪܝܵܐ
4ܘܐ݇ܡܝܼܪܹܗ ܡܘܼܫܹܐ ܠܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ، ”ܐܵܗܵܐ ܡܸܢܕܝܼ ܦܩܝܼܕ ܠܹܗ ܡܵܪܝܵܐ، ܒܹܐܡܵܪܵܐ، 5’ܫܩܘܿܠܘܼܢ ܡ̣ܢ ܓܵܘܵܘܟ݂ܘܿܢ ܕܸܒ݂ܚܵܐ ܠܡܵܪܝܵܐ، ܟܠ ܚܲܕ ܐܲܝܟ݂ ܕܠܸܒܹܗ ܛܵܠܹܒ، ܘܡܲܝܬܹܐ ܠܹܗ ܠܡܵܪܝܵܐ: ܕܲܗܒ݂ܵܐ، ܣܹܐܡܵܐ، ܢܚܵܫܵܐ، 6ܘܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܟܸܬܵܢܵܐ ܢܵܙܸܟ، ܘܣܲܥܪܵܐ ܕܥܸܙܹ̈ܐ، 7ܓܸܠܕܹ̈ܐ ܡܘܼܣܡܸܩܹ̈ܐ ܕܒܲܪ̈ܥܵܢܹܐ، ܓܸܠܕܹ̈ܐ ܕܟܲܠܒܹ̈ܐ ܕܝܵܡܵܐ، ܘܩܲܝܣܹ̈ܐ ܕܐܵܩܵܩܝܼܵܐ، 8ܘܡܸܫܚܵܐ ܩܵܐ ܡܢܵܪܬܵܐ، ܘܒܸܣܡܹ̈ܐ ܩܵܐ ܡܸܫܚܵܐ ܕܡܫܵܚܬܵܐ ܘܩܵܐ ܒܸܣܡܵܐ ܒܸܣܡܹ̈ܐ، 9ܘܟܹܐܦܹ̈ܐ ܕܫܘܼܗܲܡ، ܘܟܹܐܦܹ̈ܐ ܛܝܼܡܵܢܹ̈ܐ ܕܦܵܝܫܝܼ ܚܪܝܼܙܹܐ ܥܲܠ ܐܸܦܘܿܕܵܐ ܘܥܲܠ ܒܪܵܬ݇ ܨܲܕܪܵܐ.
ܡܸܢܕܝܼܵܢܹ̈ܐ ܕܓܵܘ ܡܲܫܟܢܵܐ
10ܘܟܠ ܐܘܼܡܵܢܵܐ ܓܵܘܵܘܟ݂ܘܿܢ ܐܵܬܹܐ، ܘܦܵܠܹܚ ܒܟܠ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ: 11ܒܘܼܬ ܡܲܫܟܢܵܐ ܘܡܲܟܲܣܬܹܗ، ܟܪ̈ܘܿܠܘܼܗܝ، ܕܲܦܘܼ̈ܗܝ، ܩܲܝܣܹ̈ܐ ܕܐ݇ܓܵܪܹܗ، ܣܛܘܼܢܘܼ̈ܗܝ، ܘܣܵܡܟܘܼ̈ܗܝ، 12ܩܹܒ݂ܘܼܬܵܐ ܘܕܝܼܘܲܢܝܵܬܹ̈ܗ، ܟܲܣܵܝܬܵܐ ܕܚܘܼܣܵܝܵܐ، ܘܠܣܸܬܪܵܐ ܕܡܲܟܲܣܬܵܐ، 13ܘܦܵܬܘܿܪܵܐ ܘܕܝܼܘܲܢܝܵܬܹ̈ܗ، ܘܟܠܲܝܗܝ ܡܵܐܢܘܼ̈ܗܝ، ܘܠܲܚܡܵܐ ܕܦܵܬܘܿܪܵܐ، 14ܘܡܢܵܪܬܵܐ ܩܵܐ ܒܲܗܪܵܐ ܘܡܵܐܢܘܼ̈ܗܝ، ܘܫܪ̈ܵܓ݂݇ܝܵܬܹܗ، ܘܡܸܫܚܵܐ ܩܵܐ ܡܢܵܪܬܵܐ، 15ܘܡܲܕܒܚܵܐ ܕܒܸܣܡܵܐ، ܘܕܝܼܘܲܢܝܵܬܹ̈ܗ، ܘܡܸܫܚܵܐ ܕܡܫܵܚܬܵܐ، ܘܒܸܣܡܵܐ ܪܹܝܚܵܢܵܐ، ܘܦܲܪܕܵܐ ܕܬܲܪܥܵܐ ܕܡܲܫܟܢܵܐ، 16ܘܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ ܘܩܲܪܩܸܠ ܕܢܚܵܫܵܐ ܕܥܲܠܘܼܗܝ، ܘܕܝܼܘܲܢܝܵܬܹ̈ܗ ܘܟܠܲܝܗܝ ܡܵܐܢܘܼ̈ܗܝ، ܘܠܲܩܢܵܐ ܘܟܲܢܹܗ، 17ܣܸܬܪܹ̈ܐ ܕܕܵܪܬܵܐ ܘܣܛܘܼܢܘܼ̈ܗ̇ ܘܣܵܡܟܘܼܗ̇، ܘܦܲܪܕܵܐ ܕܬܲܪܥܵܐ ܕܕܵܪܬܵܐ، 18ܣܸܟܵܟܹ̈ܐ ܕܡܲܫܟܢܵܐ ܘܕܕܵܪܬܵܐ، ܘܬܵܢܵܦܲܝ̈ܗܝ، 19ܠܒ݂ܘܼܫܹ̈ܐ ܕܚܸܠܡܲܬ ܕܦܵܝܫܝܼ ܡܘܼܦܠܸܚܹܐ ܓܵܘ ܡܲܩܕܫܵܐ، ܠܒ݂ܘܼܫܹ̈ܐ ܩܘܼܕܫܹ̈ܐ ܕܐܲܗܪܘܿܢ ܟܵܗܢܵܐ، ܘܠܒ݂ܘܼܫܹ̈ܐ ܕܒܢܘܿܢܘܼ̈ܗܝ ܠܸܥܒ݂ܵܕܵܐ ܟܵܗܢܘܼܬܵܐ.‘“
ܥܲܡܵܐ ܡܲܩܪܘܼܒܹܐ ܕܸܒ݂ܚܲܝ̈ܗܝ
20ܦܠܝܼܛ ܠܗܘܿܢ ܟܠܲܝܗܝ ܟܸܢܫܹ̈ܐ ܕܒܢܲܝ̈ ܝܼܣܪܵܝܹܠ ܡ̣ܢ ܠܟܸܣ ܡܘܼܫܹܐ. 21ܘܐ݇ܬܹܐ ܠܗܘܿܢ ܟܠܲܝܗܝ، ܟܠ ܚܲܕ ܐܲܝܟ݂ ܚܘܼܦܵܛܵܐ ܕܠܸܒܹܗ، ܘܟܠ ܚܲܕ ܐܲܝܟ݂ ܡܲܪܥܲܫܬܵܐ ܕܪܘܼܚܹܗ، ܘܡܘܼܐܬܹܐ ܠܗܘܿܢ ܕܸܒ݂ܚܹ̈ܐ ܠܡܵܪܝܵܐ ܩܵܐ ܦܘܼܠܚܵܢܵܐ ܕܡܲܫܟܲܢ ܘܲܥܕܵܐ، ܘܩܵܐ ܟܠܹܗ ܚܸܠܡܲܬܹܗ، ܘܩܵܐ ܠܒ݂ܘܼܫܹ̈ܐ ܩܘܼܕܫܹ̈ܐ. 22ܐ݇ܬܹܐ ܠܗܘܿܢ ܓܲܒ݂ܪܹ̈ܐ ܘܒܲܟ݂ܬܵܬܹ̈ܐ، ܟܠ ܕܠܸܒܹܗ ܒܥܹܐ ܠܹܗ، ܘܡܘܼܐܬܹܐ ܠܗܘܿܢ ܟܠ ܦܸܨܠܵܐ ܕܕܲܗܒ݂ܵܐ: ܫܸܒܸܪ̈ܝܵܬܹܐ، ܩܢܲܫܝܵܬܹ̈ܐ، ܥܸܙܲܩܝܵܬܹ̈ܐ، ܘܬܵܘܩܹ̈ܐ؛ ܟܠ ܚܲܕ ܡܘܼܩܪܸܒ݂ ܠܹܗ ܕܸܒ݂ܚܵܐ ܕܕܲܗܒ݂ܵܐ ܠܡܵܪܝܵܐ. 23ܘܟܠ ܚܲܕ ܕܐܝܼܬ ܗ݇ܘܵܐ ܠܹܗ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܟܸܬܵܢܵܐ ܢܵܙܸܟ، ܣܲܥܪܵܐ ܕܥܸܙܹ̈ܐ، ܓܸܠܕܹ̈ܐ ܡܘܼܣܡܸܩܹ̈ܐ ܕܒܲܪ̈ܥܵܢܹܐ، ܘܓܸܠܕܹ̈ܐ ܕܟܲܠܒܹ̈ܐ ܕܝܵܡܵܐ، ܡܘܼܝܬܲܝ ܠܗܘܿܢ. 24ܘܟܠ ܕܐܝܼܬ ܗ݇ܘܵܐ ܠܹܗ ܣܹܐܡܵܐ ܘܢܚܵܫܵܐ، ܡܘܼܩܪܸܒ݂ ܠܹܗ ܠܡܵܪܝܵܐ، ܘܗ̇ܘ ܕܐܝܼܬ ܗ݇ܘܵܐ ܠܹܗ ܩܲܝܣܹ̈ܐ ܕܐܵܩܵܩܝܼܵܐ ܩܵܐ ܚܸܠܡܲܬ، ܡܘܼܩܪܸܒܲܝ ܠܹܗ. 25ܟܠ ܒܲܟ݂ܬܵܐ ܕܡܵܨܝܵܐ ܗ݇ܘܵܐ ܥܵܙܠܵܐ ܗ݇ܘܵܐ ܥܸܙܠܵܐ، ܘܡܘܼܐܬܹܐ ܠܵܗ̇ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܟܸܬܵܢܵܐ ܢܵܙܸܟ. 26ܟܠܲܝܗܝ ܒܲܟ݂ܬܵܬܹ̈ܐ ܕܠܸܒܲܝܗܝ ܩܲܡ ܚܲܦܸܛ ܠܗܘܿܢ ܒܚܸܟ݂ܡܬܵܐ ܥܙܝܼܠ ܠܗܘܿܢ ܣܲܥܪܵܐ ܕܥܸܙܹ̈ܐ ܘܡܘܼܐܬܹܐ ܠܗܘܿܢ. 27ܘܓܘܼܪ̈ܵܢܹܐ ܡܘܼܐܬܹܐ ܠܗܘܿܢ ܟܹܐܦܹ̈ܐ ܕܫܘܼܗܲܡ، ܘܟܹܐܦܹ̈ܐ ܕܦܵܝܫܝܼ ܡܘܼܠܚܸܡܹܐ ܥܲܠ ܐܸܦܘܿܕܵܐ ܘܥܲܠ ܒܪܵܬ݇ ܨܲܕܪܵܐ، 28ܘܒܸܣܡܹ̈ܐ، ܡܸܫܚܵܐ ܩܵܐ ܡܢܵܪܬܵܐ، ܡܸܫܚܵܐ ܕܡܫܵܚܬܵܐ، ܘܒܸܣܡܹ̈ܐ ܪܹ̈ܝܚܵܢܹܐ. 29ܟܠ ܐܘܼܪܙܵܐ ܘܒܲܟ݂ܬܵܐ ܡ̣ܢ ܒܢܲܝ̈ ܝܼܣܪܵܝܹܠ ܕܠܸܒܹܗ ܬܠܹܐ ܠܹܗ ܕܡܲܝܬܹܐ ܡܸܢܕܝܼ ܩܵܐ ܦܘܼܠܚܵܢܵܐ ܕܡܵܪܝܵܐ، ܡܘܼܐܬܹܐ ܠܗܘܿܢ ܕܸܒ݂ܚܵܐ ܕܨܸܒ݂ܝܵܢܵܐ ܠܡܵܪܝܵܐ، ܐܲܝܟ݂ ܕܦܩܝܼܕܵܐ ܝܗ݇ܘܵܐ ܡܵܪܝܵܐ ܒܝܲܕ ܡܘܼܫܹܐ ܕܠܸܥܒ݂ܵܕܵܐ.
ܒܲܨܠܝܼܐܹܝܠ ܘܐܲܗܵܠܝܼܐܲܒ݂ ܦܝܵܫܵܐ ܩܸܪܝܹܐ ܠܦܘܼܠܚܵܢܵܐ
30ܘܐ݇ܡܝܼܪܹܗ ܡܘܼܫܹܐ ܠܒܢܲܝ̈ ܝܼܣܪܵܝܹܠ، ”ܚܙܹܝܡܘܼܢ، ܩܪܹܐ ܠܹܗ ܡܵܪܝܵܐ ܠܒܲܨܠܝܼܐܹܝܠ، ܒܪܘܿܢܵܐ ܕܐܘܼܪܝܼ، ܒܪܘܿܢܵܐ ܕܚܘܿܪ، ܡ̣ܢ ܫܲܒ݂ܛܵܐ ܕܝܼܗܘܼܕܵܐ، 31ܘܡܠܹܐ ܠܹܗ ܐܸܠܹܗ ܡ̣ܢ ܪܘܼܚܵܐ ܕܐܲܠܵܗܵܐ، ܒܚܸܟ݂ܡܬܵܐ، ܘܒܦܲܪܡܵܝܬܵܐ، ܘܒܝ݇ܕܲܥܬܵܐ، ܘܒܟܠ ܐܘܼܡܵܢܘܼܬܵܐ، 32ܠܡܲܠܚܘܼܡܹܐ ܦܘܼܠܚܵܢܹ̈ܐ ܕܐܘܼܡܵܢܘܼܬܵܐ ܠܸܦܠܵܚܵܐ ܒܕܲܗܒ݂ܵܐ، ܘܒܣܹܐܡܵܐ ܘܒܢܚܵܫܵܐ، 33ܘܒܦܪܵܡܬܵܐ ܕܟܹܐܦܹ̈ܐ ܩܵܐ ܒܢܵܝܬܵܐ، ܘܒܢܩܵܪܬܵܐ ܕܩܲܝܣܵܐ، ܠܸܦܠܵܚܵܐ ܒܟܠ ܦܘܼܠܚܵܢܵܐ ܕܐܘܼܡܵܢܘܼܬܵܐ. 34ܘܡܘܼܬܒ݂ܵܐ ܠܹܗ ܡܵܪܝܵܐ ܒܠܸܒܹܗ، ܘܐܘܼܦ ܒܠܸܒܵܐ ܕܐܲܗܵܠܝܼܐܲܒ݂، ܒܪܘܿܢܵܐ ܕܐܲܚܝܼܣܡܲܟ݂، ܡ̣ܢ ܫܲܒ݂ܛܵܐ ܕܕܵܢ، ܕܡܲܠܦܝܼ ܠܐ݇ܚܹܪ̈݇ܢܹܐ. 35ܘܡܸܠܝܲܝ ܠܹܗ ܚܸܟ݂ܡܬܵܐ ܠܸܥܒ݂ܵܕܵܐ ܟܠ ܦܘܼܠܚܵܢܵܐ ܕܢܵܓܪܵܢܵܐ ܘܐܘܼܡܵܢܵܐ، ܘܠܵܩܛܵܢܵܐ ܕܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܕܒܟܸܬܵܢܵܐ ܢܵܙܸܟ؛ ܘܦܘܼܠܚܵܢܵܐ ܕܙܲܩܵܪܵܐ، ܘܟܠ ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܘܼܬܵܐ.
Currently Selected:
ܡܦܩܢܐ 35: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
