ܡܦܩܢܐ 34

ܚܵܕܲܬܬܵܐ ܕܠܘܼܚܹ̈ܐ

1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܨܸܠ ܠܘܼܟ݂ ܬܪܹܝ ܠܘܼܚܹ̈ܐ ܕܟܹܐܦܵܐ، ܐܲܝܟ݂ ܐܵܢܝܼ ܩܲܕ݇ܡܵܝܹ̈ܐ، ܘܐܵܢܵܐ ܒܸܬ ܟܵܬܒܹܢ ܥܲܠܲܝܗܝ ܗܹܡܸܙܡܵܢܹ̈ܐ ܕܝܼܗ݇ܘܵܘ ܥܲܠ ܠܘܼܚܹ̈ܐ ܩܲܕ݇ܡܵܝܹ̈ܐ، ܐܲܝܢܝܼ ܕܬܒ݂ܝܼܪܲܝ ܠܘܼܟ݂. 2ܘܗܲܕܸܪ ܓܵܢܘܼܟ݂ ܒܨܲܦܪܵܐ، ܘܐ݇ܣܘܿܩ ܠܛܘܼܪܵܐ ܕܣܝܼܢܲܝ، ܘܡܲܚܙܸܝܬ ܠܵܗ̇ ܓܵܢܘܼܟ݂ ܐܸܠܝܼ ܬܵܡܵܐ ܥܲܠ ܪܹܫܵܐ ܕܛܘܼܪܵܐ. 3ܐ݇ܢܵܫܵܐ ܠܵܐ ܐܵܣܹܩ ܥܲܡܘܼܟ݂، ܘܠܵܐ ܦܵܐܹܫ ܚܸܙܝܵܐ ܐ݇ܢܵܫܵܐ ܒܟܠܹܗ ܛܘܼܪܵܐ؛ ܐܘܼܦ ܥܸܪ̈ܒܹܐ ܘܬܵܘܪܹ̈ܐ ܠܵܐ ܪܵܥܝܼ ܩܵܕ݇ܡ ܛܘܼܪܵܐ.“ 4ܘܦܘܼܨܸܠ ܠܹܗ ܡܘܼܫܹܐ ܬܪܹܝ ܠܘܼܚܹ̈ܐ ܕܟܹܐܦܵܐ، ܐܲܝܟ݂ ܕܐܵܢܝܼ ܩܲܕ݇ܡܵܝܹ̈ܐ. ܘܩܝܼܡ ܠܹܗ ܓ̰ܲܠܕܹܐ ܒܨܲܦܪܵܐ ܘܐ݇ܣܝܼܩ ܠܹܗ ܠܛܘܼܪܵܐ ܕܣܝܼܢܲܝ، ܕܵܐܟ݂ܝܼ ܕܦܩܝܼܕ ܠܹܗ ܐܸܠܹܗ ܡܵܪܝܵܐ، ܘܫܩܝܼܠ ܠܹܗ ܒܐܝܼܕܘܼ̈ܗܝ ܬܸܪܘܲܝܗܝ ܠܘܼܚܹ̈ܐ ܕܟܹܐܦܹ̈ܐ.

5ܗ̇ܝܓܵܗ ܨܠܹܐ ܠܹܗ ܡܵܪܝܵܐ ܓܵܘ ܥܢܵܢܵܐ، ܘܟܠܹܐ ܠܹܗ ܬܵܡܵܐ ܠܟܸܣ ܠܹܗ، ܘܩܪܹܐ ܠܹܗ ܒܫܸܡܹܗ، ”ܡܵܪܝܵܐ.“ 6ܘܥܒ݂ܝܼܪܹܗ ܡܵܪܝܵܐ ܡ̣ܢ ܩܵܕ݇ܡ ܡܘܼܫܹܐ، ܘܩܪܹܐ ܠܹܗ، ”ܡܵܪܝܵܐ، ܡܵܪܝܵܐ، ܐܲܠܵܗܵܐ ܡܪܲܚܡܵܢܵܐ ܘܚܲܢܵܢܵܐ، ܝܲܪܝܼܟ݂ܬܵܐ ܒܹܐܢܹܗ، ܡܸܠܝܵܐ ܫܵܦܵܩܲܬ ܘܡܗܘܼܡܢܘܼܬܵܐ، 7ܢܵܛܪܵܢܵܐ ܕܫܵܦܵܩܲܬ ܠܐܲܠܦܹ̈ܐ، ܦܲܚܠܵܢܵܐ ܕܥܵܘܠܵܐ ܘܓܢܵܗܵܐ، ܘܚܛܝܼܬܵܐ؛ ܐܝܼܢܵܐ ܗ̇ܘ ܕܠܹܐ ܥܵܒܹܪ ܡ̣ܢ ܚܛܝܼܬܵܐ، ܘܒܸܬ ܬܲܥܠܸܡ ܥܵܘܠܵܐ ܕܐܲܒ݂ܵܗܹ̈ܐ ܥܲܠ ܒܢܘܿܢܹ̈ܐ ܘܥܲܠ ܒܢܘܿܢܹ̈ܐ ܕܒܢܘܿܢܹ̈ܐ، ܗܲܠ ܬܵܘܠܲܕܬܵܐ ܕܬܠܵܬ ܘܕܐܲܪܒܲܥ.“

8ܡܘܼܠܝܸܙ ܠܹܗ ܡܘܼܫܹܐ، ܘܟܝܼܦ ܠܹܗ ܠܐܲܪܥܵܐ ܘܣܓ݂ܝܼܕ ܠܹܗ، 9ܘܐ݇ܡܝܼܪܹܗ، ”ܝܵܐ ܡܵܪܝܵܐ، ܐܸܢ ܐܵܕܝܼܵܐ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܘܼ̈ܟ݂، ܦܲܪܦܘܼܠܹܐ ܝܘܸܢ ܒܝܼܘܼܟ݂ ܕܐܵܙܹܠ݇ܬ ܥܲܡܲܢ. ܐܵܦܸܢ ܕܐܵܗܵܐ ܥܲܡܵܐ ܩܕܵܠܹܗ ܩܸܫܝܵܐ ܝܠܹܗ، ܐܝܼܢܵܐ ܦܲܚܸܠ ܥܵܘܠܲܢ ܘܚܛܝܼܬܲܢ؛ ܘܥܒ݂ܘܿܕ ܠܲܢ ܝܵܪܬܘܼܬܵܐ ܐܸܠܘܼܟ݂.“

ܫܸܡܵܐ ܕܡܵܪܝܵܐ ܦܝܵܫܵܐ ܡܘܼܕܸܥܵܐ

10ܘܐ݇ܡܝܼܪܹܗ ܡܵܪܝܵܐ، ”ܗܵܐ، ܐܵܢܵܐ ܒܸܩܛܵܥܵܐ ܝܘܸܢ ܩܵܘܠܵܐ، ܩܵܕ݇ܡ ܟܠܹܗ ܛܵܝܸܦܘܼܟ݂ ܒܸܬ ܥܵܒ݂ܕܹܢ ܥܵܓ̰ܸܒܘܵܬܹ̈ܐ، ܐܵܢܝܼ ܕܠܹܐ ܝܢܵܐ ܦܝܼܫܹܐ ܥܒ݂ܝܼܕܹܐ ܒܟܠܵܗ̇ ܐܲܪܥܵܐ ܘܓܵܘ ܟܠܲܝܗܝ ܛܵܝܸܦܹ̈ܐ. ܘܟܠܲܝܗܝ ܐ݇ܢܵܫܹ̈ܐ ܕܝܼܘܸܬ ܓܵܘܲܝܗܝ ܒܸܬ ܚܵܙܝܼ ܦܘܼܠܚܵܢܵܐ ܕܡܵܪܝܵܐ، ܣܵܒܵܒ ܣܲܗܡܵܢܵܐ ܝܠܹܗ ܡܸܢܕܝܼ ܕܐܵܢܵܐ ܥܵܒ݂ܕܹܢ ܥܲܡܘܼܟ݂. 11ܐܝܼܢܵܐ ܢܛܘܿܪ ܐܲܢ݇ܬ ܡܸܢܕܝܼ ܕܦܵܩܕܹܢܘܼܟ݂ ܐܸܕܝܘܿܡ، ܘܐܵܢܵܐ ܒܸܬ ܛܵܪܕܹܢ ܡ̣ܢ ܩܵܕ݇ܡܘܼܟ݂ ܐܵܡܘܿܪ̈ܵܝܹܐ، ܟܢܲܥܢܵܝܹ̈ܐ، ܚܹܝܬܵܝܹ̈ܐ، ܦܲܪ̈ܙܵܝܹܐ، ܚܵܘܵܝܹ̈ܐ، ܘܝܵܒ݂ܘܿܣܵܝܹ̈ܐ. 12”ܗܘܝܼ ܗܸܫܝܵܪ، ܠܵܐ ܥܵܒ݂ܕܹܬ ܩܵܘܠܵܐ ܥܲܡ ܥܵܡܪ̈ܵܢܹܐ ܕܐܲܪܥܵܐ ܕܐܲܢ݇ܬ ܒܸܥܒ݂ܵܪܵܐ ܝܘܸܬ ܓܵܘܘܼܗ̇، ܕܠܵܐ ܗܵܘܝܼ ܩܘܼܠܬܵܐ ܒܓܵܘܵܘܟ݂ܘܿܢ. 13ܐܝܼܢܵܐ ܡܲܕܒܚܲܝ̈ܗܝ ܬܵܠܚܹܬ ܠܗܘܿܢ، ܘܩܵܝܸܡܝܵܬܲܝ̈ܗܝ ܬܵܒ݂ܪܹܬ ܠܗܘܿܢ، ܘܐܸܫܪ̈ܲܝܗܝ ܛܲܚܛܸܚܸܬ ܠܗܘܿܢ. 14ܠܵܐ ܣܵܓ݂ܕܹܬ ܠܐܲܠܵܗܹ̈ܐ ܐ݇ܚܹܪ̈݇ܢܹܐ، ܣܵܒܵܒ ܡܵܪܝܵܐ، ܕܝܼܠܹܗ ܫܸܡܹܗ ܛܲܢܵܢܵܐ، ܐܲܠܵܗܵܐ ܛܲܢܵܢܵܐ ܝܠܹܗ. 15ܕܠܵܐ ܗܵܘܹܐ ܕܩܵܛܥܹܬ ܩܵܘܠܵܐ ܥܲܡ ܥܵܡܪ̈ܵܢܹܐ ܕܐܲܪܥܵܐ، ܣܵܒܵܒ ܟܲܕ ܙܵܢܝܼ ܒܵܬ݇ܪ ܐܲܠܵܗܲܝ̈ܗܝ ܘܕܵܒ݂ܚܝܼ ܠܐܲܠܵܗܲܝ̈ܗܝ، ܒܸܬ ܟ̰ܵܐܹܕ ܠܘܼܟ݂ ܚܲܕ، ܘܒܸܬ ܐܵܟ݂ܠܹܬ ܡ̣ܢ ܕܸܒ݂ܚܹܗ. 16ܘܒܸܬ ܫܵܩܠܹܬ ܡ̣ܢ ܒܢܵܬܲܝ̈ܗܝ ܩܵܐ ܒܢܘܿܢܘܼ̈ܟ݂، ܘܒܸܬ ܙܵܢܝܼ ܒܢܵܬܲܝ̈ܗܝ ܒܵܬ݇ܪ ܐܲܠܵܗܲܝ̈ܗܝ، ܘܡܲܥܒܸܕܝܼ ܐܘܼܦ ܠܒܢܘܿܢܘܼ̈ܟ݂ ܕܙܵܢܝܼ ܒܵܬ݇ܪ ܐܲܠܵܗܲܝ̈ܗܝ. 17ܠܵܐ ܬܲܪܨܸܬ ܠܘܼܟ݂ ܐܲܠܵܗܹ̈ܐ ܕܨܲܠܡܵܐ.

ܦܘܼܩܕܵܢܹ̈ܐ ܒܘܼܫ ܙܵܘܕܵܐ

18ܢܵܛܪܹܬ ܥܹܐܕܵܐ ܕܦܲܛܝܼܪܹ̈ܐ. ܫܲܒ݂ܥܵܐ ܝܵܘܡܵܢܹ̈ܐ ܐܵܟ݂ܠܹܬ ܦܲܛܝܼܪܹ̈ܐ ܒܥܕܵܢܵܐ ܪܫܝܼܡܬܵܐ، ܒܝܲܪܚܵܐ ܕܐܵܒܝܼܒ، ܕܵܐܟ݂ܝܼ ܕܦܩܝܼܕ ܠܝܼ ܐܸܠܘܼܟ݂، ܣܵܒܵܒ ܒܐܵܗܵܐ ܝܲܪܚܵܐ ܦܠܝܼܛ ܠܘܼܟ݂ ܡ̣ܢ ܡܸܨܪܹܝܢ.

19ܟܠ ܦܵܬܚܵܢܵܐ ܕܡܲܪܒܥܵܐ ܕܝܼܝܼ ܝܠܹܗ، ܘܟܠ ܒܘܼܟ݂ܪܵܐ ܕܬܵܘܪ̈ܘܼܟ݂ ܘܕܥܸܪ̈ܒܘܼܟ݂ ܕܦܵܐܹܫ ܝ݇ܠܝܼܕܵܐ ܐܘܼܪܙܵܐ. 20ܒܘܼܟ݂ܪܵܐ ܕܚܡܵܪܵܐ ܦܲܪܩܸܬ ܒܦܹܐܪܵܐ، ܘܐܸܢ ܠܵܐ ܦܲܪܩܸܬ ܠܹܗ، ܬܵܒ݂ܪܹܬ ܩܕܵܠܹܗ. ܘܟܠ ܒܘܼܟ݂ܪܵܐ ܕܒܢܘܿܢܘܼ̈ܟ݂ ܦܲܪܩܸܬ. ܐܘܼܦ ܚܲܕ ܠܵܐ ܦܵܐܹܫ ܚܸܙܝܵܐ ܩܵܕ݇ܡܝܼ ܐܝܼܕܵܐ ܣܦܝܼܩܬܵܐ.

21ܐܸܫܬܵܐ ܝܵܘܡܵܢܹ̈ܐ ܦܵܠܚܹܬ ܘܒܝܵܘܡܵܐ ܕܫܲܒ݂ܥܵܐ ܡܲܢܝܸܚܸܬ؛ ܐܘܼܦ ܒܙܲܒ݂ܢܵܐ ܕܙܪܵܥܬܵܐ ܘܚܸܨܕܵܐ ܡܲܢܝܸܚܸܬ.

22ܢܵܛܪܹܬ ܥܹܐܕܵܐ ܕܫܵܒ݂ܘܿܥܹ̈ܐ، ܒܥܕܵܢܵܐ ܕܓ̰ܵܡܲܥܬܵܐ ܕܛܥܘܼܢܬܵܐ ܩܵܕ݇ܡܵܝܬܵܐ ܕܚܸܛܹ̈ܐ، ܘܥܹܐܕܵܐ ܕܓ̰ܵܡܲܥܬܵܐ ܕܛܥܘܼܢܬܵܐ ܐ݇ܚܵܪܵܝܬܵܐ ܒܚܘܼܬܵܡܵܐ ܕܫܹܢ݇ܬܵܐ. 23ܬܠܵܬ ܓܵܗܹ̈ܐ ܒܫܹܢ݇ܬܵܐ ܦܵܐܹܫ ܚܸܙܝܵܐ ܟܠ ܐܘܼܪܙܘܼܟ݂ ܩܵܕ݇ܡ ܡܵܪܝܵܐ ܐܲܠܵܗܵܐ، ܐܲܠܵܗܵܐ ܕܝܼܣܪܵܝܹܠ. 24ܣܵܒܵܒ ܒܸܬ ܛܵܪܕܹܢ ܠܛܵܝܸܦܹ̈ܐ ܡ̣ܢ ܩܵܕ݇ܡܘܼܟ݂، ܘܒܸܬ ܡܲܪܘܸܚܹܢ ܠܬܚܘܼܡܘܼ̈ܟ݂، ܘܐ݇ܢܵܫܵܐ ܠܹܐ ܫܲܗܘܸܬ ܠܐܲܪܥܘܼܟ݂ ܟܲܕ ܐܵܣܩܹܬ ܬܠܵܬ ܓܵܗܹ̈ܐ ܒܫܹܢ݇ܬܵܐ ܕܦܵܝܫܹܬ ܚܸܙܝܵܐ ܩܵܕ݇ܡ ܡܵܪܝܵܐ ܐܲܠܵܗܘܼܟ݂.

25ܠܵܐ ܡܲܩܪܸܒܸܬ ܐܸܠܝܼ ܕܸܡܵܐ ܕܕܸܒ݂ܚܵܐ ܥܲܡ ܠܲܚܡܵܐ ܚܡܝܼܥܵܐ؛ ܘܕܸܒ݂ܚܵܐ ܕܥܹܐܕܵܐ ܕܦܸܨܚܵܐ ܠܵܐ ܦܵܐܹܫ ܫܒ݂ܝܼܩܵܐ ܗܲܠ ܨܲܦܪܵܐ.

26ܡܲܝܬܸܝܬ ܪܹܫܝܼܬܵܐ ܕܛܥܘܼܢܬܵܐ ܩܵܕ݇ܡܵܝܬܵܐ ܕܐܲܪܥܘܼܟ݂ ܠܒܲܝܬܵܐ ܕܡܵܪܝܵܐ ܐܲܠܵܗܘܼܟ݂. ܠܵܐ ܡܲܪܬܸܚܸܬ ܓܸܕܝܵܐ ܓܵܘ ܚܲܠܒ݂ܵܐ ܕܝܸܡܹܗ.“

27ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܟܬܘܿܒ݂ ܠܐܲܢܹܐ ܗܹܡܸܙܡܵܢܹ̈ܐ، ܣܵܒܵܒ ܥܲܠ ܕܐܲܢܹܐ ܗܹܡܸܙܡܵܢܹ̈ܐ ܥܒ݂ܝܼܕ ܠܝܼ ܘܲܥܕܵܐ ܥܲܡܘܼܟ݂ ܘܥܲܡ ܝܼܣܪܵܝܹܠ.“ 28ܘܗܘܹܐ ܠܹܗ ܡܘܼܫܹܐ ܬܵܡܵܐ ܥܲܡ ܡܵܪܝܵܐ ܐܲܪܒܥܝܼ ܝܵܘܡܵܢܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ؛ ܠܵܐ ܐ݇ܟ݂ܝܼܠ ܠܹܗ ܠܲܚܡܵܐ، ܘܠܵܐ ܫܬܹܐ ܠܹܗ ܡ̈ܝܼܵܐ. ܘܟܬܝܼܒ݂ ܠܹܗ ܥܲܠ ܠܘܼܚܹ̈ܐ ܗܹܡܸܙܡܵܢܹ̈ܐ ܕܘܲܥܕܵܐ، ܥܸܣܪܵܐ ܦܘܼܩܕܵܢܹ̈ܐ.

ܦܵܬܵܐ ܕܡܘܼܫܹܐ ܒܲܗܪܘܼܢܹܐ

29ܟܲܕ ܨܠܹܐ ܠܹܗ ܡܘܼܫܹܐ ܡ̣ܢ ܛܘܼܪܵܐ ܕܣܝܼܢܲܝ، ܘܬܪܹܝ ܠܘܼܚܹ̈ܐ ܕܣܵܗܕܘܼܬܵܐ ܒܐܝܼܕܹܗ، ܘܠܵܐ ܝ݇ܕܝܼܥ ܠܹܗ ܦܵܬܹܗ ܠܲܓ̰ܠܘܼܓ̰ܹܐ ܝܗ݇ܘܵܐ، ܟܲܕ ܗܘܼܡܙܸܡ ܠܹܗ ܥܲܡ ܐܲܠܵܗܵܐ. 30ܟܲܕ ܚܙܹܐ ܠܗܘܿܢ ܐܲܗܪܘܿܢ ܘܟܠܲܝܗܝ ܒܢܲܝ̈ ܝܼܣܪܵܝܹܠ ܠܡܘܼܫܹܐ، ܗܵܐ، ܦܵܬܹܗ ܠܲܓ̰ܠܘܼܓ̰ܹܐ، ܘܙܕܝܼܥ ܠܗܘܿܢ ܕܩܲܪܒܸܢܝܼ ܗ݇ܘܵܘ ܠܟܸܣ ܠܹܗ. 31ܐܝܼܢܵܐ ܩܸܪܝܲܝ ܠܹܗ ܡܘܼܫܹܐ، ܘܕܝܼܪܗܘܿܢ ܠܟܸܣ ܠܹܗ ܐܲܗܪܘܿܢ ܘܟܠܲܝܗܝ ܓܘܼܪ̈ܵܢܹܐ ܕܟܸܢܫܵܐ، ܘܗܘܼܡܙܸܡ ܠܹܗ ܥܲܡܲܝܗܝ. 32ܡ̣ܢ ܒܵܬ݇ܪ ܗܵܕܵܐ ܩܘܼܪܒܸܢܗܘܿܢ ܟܠܲܝܗܝ ܒܢܲܝ̈ ܝܼܣܪܵܝܹܠ، ܘܦܘܼܩܕܲܝ ܠܹܗ ܡܘܼܫܹܐ ܟܠ ܡܸܢܕܝܼ ܕܗܘܼܡܙܸܡ ܠܹܗ ܥܲܡܹܗ ܡܵܪܝܵܐ ܒܛܘܼܪܵܐ ܕܣܝܼܢܲܝ.

33ܐܝܼܡܲܢ ܕܦܪܝܼܩ ܠܹܗ ܡܘܼܫܹܐ ܡ̣ܢ ܠܗܲܡܙܘܼܡܹܐ ܥܲܡܲܝܗܝ، ܡܘܼܬܸܒ݂ ܠܹܗ ܥܲܠ ܦܵܬܹܗ ܟܲܣܵܝܬܵܐ. 34ܐܝܼܢܵܐ ܟܲܕ ܥܵܒܹܪ ܗ݇ܘܵܐ ܡܘܼܫܹܐ ܩܵܕ݇ܡ ܡܵܪܝܵܐ ܠܗܲܡܙܘܼܡܹܐ ܥܲܡܹܗ، ܟܹܐ ܡܲܥܒܸܪ ܗ݇ܘܵܐ ܠܵܗ̇ ܟܲܣܵܝܬܵܐ ܗܲܠ ܕܦܵܠܹܛ ܗ݇ܘܵܐ. ܘܟܲܕ ܕܦܵܠܹܛ ܗ݇ܘܵܐ، ܟܹܐ ܐܵܡܹܪ ܗ݇ܘܵܐ ܠܒܢܲܝ̈ ܝܼܣܪܵܝܹܠ ܟܠ ܡܸܢܕܝܼ ܕܡܵܪܝܵܐ ܦܩܝܼܕܵܐ ܝܗ݇ܘܵܐ ܐܸܠܹܗ. 35ܘܟܹܐ ܚܵܙܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ ܠܦܵܬܵܐ ܕܡܘܼܫܹܐ ܕܠܲܓ̰ܠܘܼܓ̰ܹܐ ܝܗ݇ܘܵܐ ܓܸܠܕܹܗ، ܘܟܹܐ ܡܲܕܸܪ ܗ݇ܘܵܐ ܡܘܼܫܹܐ ܠܟܲܣܵܝܬܵܐ ܥܲܠ ܦܵܬܹܗ ܗܲܠ ܕܥܵܒܹܪ ܗ݇ܘܵܐ ܡܸܢܕܪܸܫ ܠܟܸܣ ܡܵܪܝܵܐ ܠܗܲܡܙܘܼܡܹܐ ܥܲܡܹܗ.

Currently Selected:

ܡܦܩܢܐ 34: ABTAB

Highlight

Copy

Compare