ܡܦܩܢܐ 33
33
ܡܵܪܝܵܐ ܦܲܩܘܼܕܹܐ ܠܒܢܲܝ̈ ܝܼܣܪܵܝܹܠ ܕܟܵܘܟ̰ܝܼ ܡ̣ܢ ܛܘܼܪܵܐ ܕܣܝܼܢܲܝ
1ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܙܹܠ݇ ܐ݇ܣܘܿܩ ܡܐܲܟ݂ܵܐ، ܐܲܢ݇ܬ ܘܥܲܡܵܐ ܕܡܘܼܐܣܸܩ ܠܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ، ܠܐܲܪܥܵܐ ܕܝ݇ܡܹܐ ܠܝܼ ܕܝܵܗ݇ܒܹܢܵܗ̇ ܠܐܲܒ݂ܪܵܗܵܡ، ܠܐܝܼܣܚܵܩ، ܘܠܝܲܥܩܘܿܒ݂، ܒܹܐܡܵܪܵܐ، ’ܠܙܲܪܥܘܼܟ݂ ܒܸܬ ܝܵܗ݇ܒܹܢܵܗ̇.‘ 2ܘܒܸܬ ܫܲܕܪܸܢ ܡܲܠܲܐܟ݂ܵܐ ܩܵܕ݇ܡܘܼܟ݂، ܘܒܸܬ ܛܵܪܹܕ ܠܟܢܲܥܢܵܝܹ̈ܐ، ܠܐܵܡܘܿܪ̈ܵܝܹܐ، ܠܚܹܝܬܵܝܹ̈ܐ، ܠܦܲܪ̈ܙܵܝܹܐ، ܠܚܵܘܵܝܹ̈ܐ، ܘܠܝܵܒ݂ܘܿܣܵܝܹ̈ܐ. 3ܐ݇ܣܘܿܩ ܠܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ݂ܵܐ ܘܕܸܒ݂ܫܵܐ. ܐܝܼܢܵܐ ܠܹܐ ܐܵܙܹܠ݇ܢ ܐܵܢܵܐ ܥܲܡܵܘܟ݂ܘܿܢ، ܣܵܒܵܒ ܥܲܡܵܐ ܩܕܵܠܹܗ ܩܸܫܝܵܐ ܝܬܘܿܢ، ܘܠܵܐ ܗܵܘܝܵܐ ܕܬܵܝܡܹܢܵܘܟ݂ܘܿܢ ܒܐܘܼܪܚܵܐ.“ 4ܟܲܕ ܫܡܝܼܥ ܠܹܗ ܥܲܡܵܐ ܠܐܵܗܵܐ ܚܲܒܪܵܐ ܣܸܟܪܵܢܵܐ، ܥܒ݂ܝܼܕ ܠܗܘܿܢ ܬܵܥܙܝܼ، ܘܐܘܼܦ ܚܲܕ ܠܵܐ ܠܒ݂ܝܼܫ ܠܹܗ ܣܸܩܠܹܗ، 5ܣܵܒܵܒ ܐ݇ܡܝܼܪܵܐ ܝܗ݇ܘܵܐ ܡܵܪܝܵܐ ܠܡܘܼܫܹܐ، ”ܐ݇ܡܘܿܪ ܠܒܢܲܝ̈ ܝܼܣܪܵܝܹܠ، ’ܐܲܚܬܘܿܢ ܥܲܡܵܐ ܩܕܵܠܹܗ ܩܸܫܝܵܐ ܝܬܘܿܢ. ܐܸܢ ܗܵܘܹܝܢ ܓܵܘܵܘܟ݂ܘܿܢ ܐܲܚܟ̰ܝܼ ܩܵܐ ܚܕܵܐ ܛܲܦܛܲܦܬܵܐ ܕܥܲܝܢܵܐ، ܒܸܬ ܬܵܝܡܹܢܵܘܟ݂ܘܿܢ؛ ܐܵܕܝܼܵܐ ܫܲܠܚܘܼܢ ܣܸܩܠܵܘܟ݂ܘܿܢ ܕܝܵܕܥܹܢ ܡܘܿܕܝܼ ܒܸܬ ܥܵܒ݂ܕܹܢ ܐܸܠܵܘܟ݂ܘܿܢ.‘“ 6ܗܲܕܟ݂ܵܐ ܗܵܐ ܡ̣ܢ ܥܕܵܢܵܐ ܕܒܢܲܝ̈ ܝܼܣܪܵܝܹܠ ܫܒ݂ܝܼܩ ܠܗܘܿܢ ܠܛܘܼܪܵܐ ܕܚܘܿܪܝܼܒ݂، ܠܵܐ ܠܒ݂ܝܼܫ ܠܗܘܿܢ ܣܸܩܠܲܝܗܝ.
ܡܲܫܟܲܢ ܘܲܥܕܵܐ
7ܘܟܹܐ ܫܵܩܹܠ ܗ݇ܘܵܐ ܡܘܼܫܹܐ ܠܡܲܫܟܢܵܐ، ܘܢܵܨܹܒ݂ ܗ݇ܘܵܐ ܠܹܗ ܠܒܲܕܲܪ، ܪܸܚܩܵܐ ܡ̣ܢ ܡܲܫܪܝܼܬܵܐ، ܘܩܲܡ ܩܵܪܹܐ ܠܹܗ، ”ܡܲܫܟܲܢ ܘܲܥܕܵܐ.“ ܘܗܘܹܐ ܠܵܗ̇ ܗܲܕܟ݂ܵܐ ܕܟܠ ܡ̇ܢ ܕܒܵܥܹܐ ܗ݇ܘܵܐ ܠܡܵܪܝܵܐ ܟܹܐ ܐܵܙܹܠ ܗ݇ܘܵܐ ܠܟܸܣ ܡܲܫܟܲܢ ܘܲܥܕܵܐ، ܕܝܼܗ݇ܘܵܐ ܠܒܲܕܲܪ ܡ̣ܢ ܡܲܫܪܝܼܬܵܐ. 8ܟܠ ܐܝܼܡܲܢ ܕܟܹܐ ܐܵܙܹܠ ܗ݇ܘܵܐ ܡܘܼܫܹܐ ܕܥܵܒܹܪ ܗ݇ܘܵܐ ܠܡܲܫܟܢܵܐ، ܟܠܹܗ ܛܵܝܸܦܵܐ ܟܹܐ ܩܵܐܹܡ ܗ݇ܘܵܐ، ܟܠ ܚܲܕ ܟܹܐ ܟܵܠܹܐ ܗ݇ܘܵܐ ܩܵܕ݇ܡ ܬܲܪܥܵܐ ܕܡܲܫܟܢܹܗ، ܘܟܹܐ ܚܵܐܹܪ ܗ݇ܘܵܐ ܒܵܬ݇ܪ ܡܘܼܫܹܐ ܗܲܠ ܕܥܵܒܹܪ ܗ݇ܘܵܐ ܓܵܘ ܡܲܫܟܲܢ ܘܲܥܕܵܐ. 9ܘܟܠ ܐܝܼܡܲܢ ܕܟܹܐ ܥܵܒܹܪ ܗ݇ܘܵܐ ܡܘܼܫܹܐ ܓܵܘ ܡܲܫܟܲܢ ܘܲܥܕܵܐ، ܟܹܐ ܨܵܠܹܐ ܗ݇ܘܵܐ ܣܛܘܼܢܵܐ ܕܥܢܵܢܵܐ ܘܟܹܐ ܟܵܠܹܐ ܗ݇ܘܵܐ ܩܵܕ݇ܡ ܬܲܪܥܵܐ ܕܡܲܫܟܢܵܐ، ܘܟܹܐ ܗܲܡܙܸܡ ܗ݇ܘܵܐ ܡܵܪܝܵܐ ܥܲܡ ܡܘܼܫܹܐ. 10ܟܲܕ ܚܵܙܹܐ ܗ݇ܘܵܐ ܥܲܡܵܐ ܣܛܘܼܢܵܐ ܕܥܢܵܢܵܐ ܒܸܟܠܵܝܵܐ ܩܵܕ݇ܡ ܬܲܪܥܵܐ ܕܡܲܫܟܢܵܐ، ܟܹܐ ܟܵܠܹܐ ܗ݇ܘܵܐ ܟܠܹܗ ܥܲܡܵܐ، ܘܟܠ ܐ݇ܢܵܫܵܐ ܡܲܟܸܦ ܗ݇ܘܵܐ ܪܹܫܹܗ ܘܣܵܓܹܕ ܗ݇ܘܵܐ ܩܵܕ݇ܡ ܬܲܪܥܵܐ ܕܡܲܫܟܢܹܗ. 11ܟܹܐ ܗܲܡܙܸܡ ܗ݇ܘܵܐ ܡܵܪܝܵܐ ܥܲܡ ܡܘܼܫܹܐ ܦܵܬܵܐ ܓܵܘ ܦܵܬܵܐ، ܕܵܐܟ݂ܝܼ ܕܐ݇ܢܵܫܵܐ ܗܲܡܙܸܡ ܥܲܡ ܚܲܒ݂ܪܹܗ. ܟܲܕ ܕܵܐܹܪ ܗ݇ܘܵܐ ܡܘܼܫܹܐ ܠܡܲܫܪܝܼܬܵܐ، ܥܵܒ݂ܕܵܢܵܐ ܕܚܸܠܡܲܬܹܗ ܝܼܫܘܿܥ ܒܲܪ ܢܘܿܢ، ܥܠܲܝܡܵܐ، ܟܹܐ ܦܵܐܹܫ ܗ݇ܘܵܐ ܓܵܘ ܡܲܫܟܢܵܐ.
ܡܘܼܫܹܐ ܒܸܚܙܵܝܵܐ ܚܸܩܪܵܐ ܕܐܲܠܵܗܵܐ
12ܐ݇ܡܝܼܪܹܗ ܡܘܼܫܹܐ ܠܡܵܪܝܵܐ، ”ܚܙܝܼ، ܐܲܢ݇ܬ ܒܹܐܡܵܪܵܐ ܝܘܸܬ ܐܸܠܝܼ، ’ܡܲܐܣܸܩ ܠܐܵܗܵܐ ܛܵܝܸܦܵܐ،‘ ܐܝܼܢܵܐ ܠܹܐ ܝܘܸܬ ܡܲܕܘܼܥܝܼ ܡܵܢܝܼ ܒܸܬ ܫܲܕܪܸܬ ܥܲܡܝܼ. ܐܘܼܦ ܐ݇ܡܝܼܪܘܼܟ݂ ܐܸܠܝܼ، ’ܟܹܐ ܝܵܕܥܹܢܘܼܟ݂ ܒܫܸܡܵܐ، ܘܐܘܼܦ ܡܘܼܫ݇ܟ̰ܚܵܐ ܝܘܸܬ ܫܵܦܵܩܲܬ ܒܥܲܝܢܝܼ̈.‘ 13ܘܐܵܕܝܼܵܐ ܐܸܢ ܡܘܼܫ݇ܟ̰ܚܵܐ ܝܘܸܢ ܫܵܦܵܩܲܬ ܒܥܲܝܢܘܼ̈ܟ݂، ܦܲܪܦܘܼܠܹܐ ܝܘܸܢ، ܡܲܕܸܥ ܠܝܼ ܐܘܼܪܚܘܼܟ݂ ܕܝܵܕܥܹܢܘܼܟ݂ ܘܕܡܲܫ݇ܟ̰ܚܸܢ ܫܵܦܵܩܲܬ ܒܥܲܝܢܘܼ̈ܟ݂. ܘܐܘܼܦ ܚܙܝܼ، ܛܵܝܸܦܘܼܟ݂ ܝܼܠܵܗ̇ ܐܵܗܵܐ ܐܘܼܡܬܵܐ. 14ܐ݇ܡܝܼܪܹܗ ܡܵܪܝܵܐ، ”ܒܓܵܢܝܼ ܒܸܬ ܐܵܙܹܠ݇ܢ ܥܲܡܘܼܟ݂ ܘܒܸܬ ܡܲܢܝܸܚܸܢܘܼܟ݂.“ 15ܐ݇ܡܝܼܪܹܗ ܡܘܼܫܹܐ، ”ܐܸܢ ܒܓܵܢܘܼܟ݂ ܠܵܐ ܐܵܙܹܠ݇ܬ ܥܲܡܲܢ، ܠܵܐ ܡܲܐܣܩܸܬ ܠܲܢ ܡܐܲܟ݂ܵܐ. 16ܐܸܢ ܠܵܐ ܐܵܙܹܠ݇ܬ ܥܲܡܲܢ، ܕܵܐܟ݂ܝܼ ܒܸܬ ܝܵܕܥܝܼ ܐ݇ܢܵܫܹ̈ܐ ܕܐܵܢܵܐ ܘܛܵܝܸܦܘܼܟ݂ ܡܘܼܫ݇ܟ̰ܚܹܐ ܝܘܲܚ ܫܵܦܵܩܲܬ ܒܥܲܝܢܘܼ̈ܟ݂؟ ܐܲܚܟ̰ܝܼ ܒܐܵܗܵܐ ܐܘܼܪܚܵܐ ܒܸܬ ܗܵܘܲܚ ܦܪܝܼܫܹܐ، ܐܵܢܵܐ ܘܛܵܝܸܦܘܼܟ݂، ܡ̣ܢ ܟܠܲܝܗܝ ܥܲܡܡܹ̈ܐ ܕܝܼܢܵܐ ܥܲܠ ܦܵܬܵܐ ܕܐܲܪܥܵܐ.“ 17ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܒܸܬ ܥܵܒ݂ܕܹܢ ܐܘܼܦ ܐܵܗܵܐ ܡܸܢܕܝܼ ܕܛܠܝܼܒ ܠܘܼܟ݂، ܣܵܒܵܒ ܡܘܼܫ݇ܟ̰ܚܵܐ ܝܘܸܬ ܫܵܦܵܩܲܬ ܒܥܲܝܢܝܼ̈ ܘܟܹܐ ܝܵܕܥܹܢܘܼܟ݂ ܒܫܸܡܵܐ.“ 18ܐ݇ܡܝܼܪܹܗ ܡܘܼܫܹܐ، ”ܦܲܪܦܘܼܠܹܐ ܝܘܸܢ، ܡܲܚܙܝܼ ܠܝܼ ܫܘܼܒ݂ܚܘܼܟ݂.“ 19ܘܐ݇ܡܝܼܪܹܗ ܐܸܠܹܗ ܡܵܪܝܵܐ، ”ܐܵܢܵܐ ܒܸܬ ܡܲܥܒܸܪܸܢ ܟܠܵܗ̇ ܫܵܦܵܩܲܬܝܼ ܡ̣ܢ ܩܵܕ݇ܡ ܦܵܬܘܼܟ݂، ܘܒܸܬ ܩܵܪܹܝܢܹܗ ܩܵܕ݇ܡܘܼܟ݂ ܫܸܡܝܼ، ’ܡܵܪܝܵܐ؛‘ ܘܒܸܬ ܥܵܒ݂ܕܹܢ ܚܢܵܢܵܐ ܥܲܠ ܡ̇ܢ ܕܥܵܒ݂ܕܹܢ ܚܢܵܢܵܐ، ܘܒܸܬ ܥܵܒ݂ܕܹܢ ܪ̈ܲܚܡܹܐ ܥܲܠ ܡ̇ܢ ܕܥܵܒ݂ܕܹܢ ܪ̈ܲܚܡܹܐ. 20ܐܝܼܢܵܐ ܦܵܬܝܼ ܠܹܐ ܡܵܨܹܝܬ ܚܵܙܹܝܬ ܠܵܗ̇، ܣܵܒܵܒ ܐܘܼܦ ܚܲܕ ܠܹܐ ܚܵܙܹܐ ܠܵܗ̇ ܦܵܬܝܼ ܘܚܵܝܹܐ.“ 21ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ، ”ܗܵܐ، ܕܘܼܟܵܐ ܠܟܸܣ ܠܝܼ. ܟܠܝܼ ܠܐܲܟ݂ܵܐ ܥܲܠ ܐܵܗܵܐ ܩܵܝܵܐ، 22ܘܟܲܕ ܥܵܒܹܪ ܫܘܼܒ݂ܚܝܼ، ܒܸܬ ܡܲܬܒܸܢܘܼܟ݂ ܓܵܘ ܟ̰ܸܠܦܵܐ ܕܩܵܝܵܐ ܘܡܲܟܣܸܝܢܘܼܟ݂ ܒܐܝܼܕܝܼ ܗܲܠ ܕܥܵܒ݂ܪܹܢ. 23ܗ̇ܝܓܵܗ ܒܸܬ ܫܵܩܠܹܢܵܗ̇ ܐܝܼܕܝܼ، ܘܒܸܬ ܚܵܙܹܝܬ ܠܹܗ ܚܲܨܝܼ، ܐܝܼܢܵܐ ܦܵܬܝܼ ܠܹܐ ܦܵܝܫܵܐ ܚܙܝܼܬܵܐ.“
Currently Selected:
ܡܦܩܢܐ 33: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
