ܡܦܩܢܐ 32
32
ܡܘܼܓ̰ܵܐ ܕܕܲܗܒ݂ܵܐ
1ܟܲܕ ܚܙܹܐ ܠܹܗ ܥܲܡܵܐ ܕܥܘܼܪܩܸܠ ܠܹܗ ܡܘܼܫܹܐ ܠܸܨܠܵܝܵܐ ܡ̣ܢ ܛܘܼܪܵܐ، ܓ̰ܡܝܼܥ ܠܹܗ ܥܲܡܵܐ ܠܟܸܣ ܐܲܗܪܘܿܢ، ܘܐ݇ܡܝܼܪܗܘܿܢ ܐܸܠܹܗ، ”ܩܘܼܡ، ܥܒ݂ܘܿܕ ܠܲܢ ܐܲܠܵܗܹ̈ܐ ܕܐܵܙܠ݇ܝܼ ܩܵܕ݇ܡܲܢ، ܣܵܒܵܒ ܠܹܐ ܝܘܲܚ ܒܝܼܕܵܥܵܐ ܡܘܿܕܝܼ ܗܘܹܐ ܠܹܗ ܠܐܵܗܵܐ ܡܘܼܫܹܐ، ܐ݇ܢܵܫܵܐ ܕܡܘܼܐܣܸܩ ܠܹܗ ܐܸܠܲܢ ܡ̣ܢ ܐܲܪܥܵܐ ܕܡܸܨܪܹܝܢ.“ 2ܐ݇ܡܝܼܪܹܗ ܐܲܗܪܘܿܢ ܐܸܠܲܝܗܝ، ”ܦܲܠܛܘܼܢ ܩܢܲܫܝܵܬܹ̈ܐ ܕܕܲܗܒ݂ܵܐ ܕܝܼܢܵܐ ܒܢܵܬܝܵܬܹ̈ܐ ܕܒܲܟ݂ܬܵܬܵܘ̈ܟ݂ܘܿܢ، ܘܕܒܢܘܿܢܵܘ̈ܟ݂ܘܿܢ، ܘܕܒܢܵܬܵܘ̈ܟ݂ܘܿܢ، ܘܡܲܝܬܸܝܡܘܼܢ ܠܗܘܿܢ ܠܟܸܣ ܠܝܼ.“ 3ܘܦܘܼܠܸܛ ܠܹܗ ܟܠܹܗ ܥܲܡܵܐ ܩܢܲܫܝܵܬܹ̈ܐ ܕܕܲܗܒ݂ܵܐ ܕܝܼܗ݇ܘܵܘ ܒܢܵܬܝܵܬܲܝ̈ܗܝ، ܘܡܘܼܐܬܲܝ ܠܗܘܿܢ ܠܟܸܣ ܐܲܗܪܘܿܢ. 4ܫܩܝܼܠ ܠܹܗ ܐܲܗܪܘܿܢ ܕܲܗܒ݂ܵܐ ܡ̣ܢ ܐܝܼܕܵܬܲܝ̈ܗܝ، ܡܘܼܦܫܸܪܹܗ، ܘܬܘܼܪܸܨ ܠܹܗ ܨܲܠܡܵܐ ܕܡܘܼܓ̰ܵܐ ܪܸܡܝܵܐ. ܘܐ݇ܡܝܼܪܗܘܿܢ ܒܢܲܝ̈ ܝܼܣܪܵܝܹܠ، ”ܐܲܢܹܐ ܝܢܵܐ ܐܲܠܵܗܘܼ̈ܟ݂، ܝܵܐ ܝܼܣܪܵܝܹܠ، ܕܡܘܼܐܣܸܩ ܠܗܘܿܢ ܐܸܠܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ.“
5ܟܲܕ ܚܙܹܐ ܠܹܗ ܐܲܗܪܘܿܢ ܐܵܗܵܐ، ܒܢܹܐ ܠܹܗ ܡܲܕܒܚܵܐ ܩܵܕ݇ܡ ܡܘܼܓ̰ܵܐ. ܗ̇ܝܓܵܗ ܩܪܹܐ ܠܹܗ ܠܥܲܡܵܐ ܘܐ݇ܡܝܼܪܹܗ، ”ܩܵܝܕܲܡܬܵܐ ܥܹܐܕܵܐ ܝܠܹܗ ܠܡܵܪܝܵܐ.“ 6ܒܩܵܝܕܲܡܬܵܐ ܓ̰ܲܠܕܹܐ ܩܝܼܡ ܠܗܘܿܢ ܐ݇ܢܵܫܹ̈ܐ، ܡܘܼܐܣܸܩ ܠܗܘܿܢ ܕܸܒ݂ܚܹ̈ܐ ܡܘܼܩܕܹ̈ܐ، ܘܡܘܼܩܪܸܒ݂ ܠܗܘܿܢ ܩܘܼܪ̈ܒܵܢܹܐ ܕܫܠܵܡܵܐ؛ ܡ̣ܢ ܒܵܬ݇ܪ ܗܵܕܵܐ ܝ݇ܬܝܼܒ݂ ܠܗܘܿܢ ܠܹܐܟ݂ܵܠܵܐ ܘܠܸܫܬܵܝܵܐ، ܘܩܝܼܡ ܠܗܘܿܢ ܠܛܲܐܘܼܠܹܐ.
7ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، ”ܙܹܠ݇ ܘܨܠܝܼ، ܣܵܒܵܒ ܡܘܼܚܪܸܒ݂ܵܐ ܝܠܹܗ ܓܵܢܹܗ ܛܵܝܸܦܘܼܟ݂ ܕܩܲܡ ܡܲܐܣܩܸܬ ܠܹܗ ܡ̣ܢ ܐܲܪܥܵܐ ܕܡܸܨܪܹܝܢ، 8ܩܠܝܼܒ ܠܗܘܿܢ ܓ̰ܲܠܕܹܐ ܡ̣ܢ ܐܘܼܪܚܵܐ ܕܦܩܝܼܕܲܝ ܠܝܼ ܕܐܵܙܠ݇ܝܼ ܒܝܼܘܼܗ̇. ܬܘܼܪܸܨ ܠܗܘܿܢ ܐܸܠܲܝܗܝ ܡܘܼܓ̰ܵܐ ܪܸܡܝܵܐ، ܘܣܓ݂ܝܼܕ ܠܗܘܿܢ ܐܸܠܹܗ، ܘܥܒ݂ܝܼܕ ܠܗܘܿܢ ܕܸܒ݂ܚܵܐ ܐܸܠܹܗ، ܘܐ݇ܡܝܼܪܗܘܿܢ، ’ܐܲܢܹܐ ܝܢܵܐ ܐܲܠܵܗܘܼ̈ܟ݂، ܝܵܐ ܝܼܣܪܵܝܹܠ، ܕܡܘܼܐܣܸܩ ܠܗܘܿܢ ܐܸܠܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ.‘“
9ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܚܙܹܐ ܠܝܼ ܠܐܵܗܵܐ ܥܲܡܵܐ، ܘܗܵܐ، ܥܲܡܵܐ ܩܕܵܠܹܗ ܩܸܫܝܵܐ ܝܠܹܗ؛ 10ܐܵܕܝܼܵܐ ܫܒ݂ܘܿܩ ܠܝܼ ܕܚܵܝܡܵܐ ܟܲܪܒܝܼ ܒܝܼܲܝܗܝ، ܘܬܵܝܡܹܢܗܘܿܢ؛ ܗ̇ܝܓܵܗ ܒܸܬ ܥܵܒ݂ܕܹܢ ܐܸܠܘܼܟ݂ ܠܥܲܡܵܐ ܓܘܼܪܵܐ.“ 11ܐܝܼܢܵܐ ܦܘܼܪܦܸܠ ܠܹܗ ܡܘܼܫܹܐ ܒܡܵܪܝܵܐ ܐܲܠܵܗܹܗ، ܘܐ݇ܡܝܼܪܹܗ، ”ܩܵܡܘܿܕܝܼ، ܝܵܐ ܡܵܪܝܵܐ، ܚܵܝܡܵܐ ܟܲܪܒܘܼܟ݂ ܒܥܲܡܘܼܟ݂ ܕܦܘܼܠܸܛ ܠܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ، ܒܚܲܝܠܵܐ ܓܘܼܪܵܐ ܘܒܐܝܼܕܵܐ ܙܲܪܒܵܢܬܵܐ؟ 12ܩܵܡܘܿܕܝܼ ܐܵܡܪܝܼ ܡܸܨܪ̈ܵܝܹܐ، ’ܠܒܝܼܫܬܵܐ ܦܘܼܠܛܲܝ ܠܹܗ ܐܲܠܵܗܵܐ ܠܸܩܛܵܠܲܝ ܒܛܘܼܪ̈ܵܢܹܐ، ܠܸܬܝܵܡܲܝ ܡܥܲܠ ܦܵܬܵܐ ܕܐܲܪܥܵܐ‘؟ ܕܘܼܪ ܡ̣ܢ ܚܸܡܬܵܐ ܕܟܲܪܒܘܼܟ݂، ܘܫܲܚܠܸܦ ܪܸܥܝܵܢܘܼܟ݂ ܡ̣ܢ ܠܸܥܒ݂ܵܕܵܐ ܐܵܗܵܐ ܒܝܼܫܬܵܐ ܠܥܲܡܘܼܟ݂. 13ܕܟ݂ܘܿܪ ܠܐܲܒ݂ܪܵܗܵܡ، ܠܐܝܼܣܚܵܩ ܘܠܝܼܣܪܵܝܹܠ، ܥܲܒ݂ܕܘܼ̈ܟ݂، ܕܝ݇ܡܹܐ ܠܘܼܟ݂ ܐܸܠܲܝܗܝ ܒܓܵܢܵܐ ܕܓܵܢܘܼܟ݂، ܘܐ݇ܡܝܼܪܘܼܟ݂، ’ܒܸܬ ܡܲܙܝܸܕܸܢ ܠܙܲܪ̈ܥܵܘܟ݂ܘܿܢ ܐܲܝܟ݂ ܟܵܘܟ݂ܒܹ̈ܐ ܕܫܡܲܝܵܐ، ܘܒܸܬ ܝܵܗ݇ܒܹܢܵܗ̇ ܐܸܠܲܝܗܝ ܟܠܵܗ̇ ܐܲܪܥܵܐ ܕܐ݇ܡܝܼܪܝܼ ܒܸܬ ܝܵܗ݇ܒܹܢܵܗ̇ ܐܸܠܲܝܗܝ، ܘܐܵܢܝܼ ܒܸܬ ܝܵܪܬܝܼ ܠܵܗ̇ ܠܥܵܠܲܡ.‘“ 14ܘܦܫܝܼܡ ܠܹܗ ܡܵܪܝܵܐ ܒܘܼܬ ܒܝܼܫܬܵܐ ܕܐ݇ܡܝܼܪܵܐ ܝܗ݇ܘܵܐ ܕܒܸܬ ܥܵܒܹܕ ܗ݇ܘܵܐ ܠܥܲܡܹܗ.
15ܕܝܼܪܹܗ ܡܘܼܫܹܐ ܘܨܠܹܐ ܠܹܗ ܡ̣ܢ ܛܘܼܪܵܐ، ܘܬܸܪܘܲܝܗܝ ܠܘܼܚܹ̈ܐ ܕܣܵܗܕܘܼܬܵܐ ܒܐܝܼܕܵܬܹ̈ܗ. ܠܘܼܚܹ̈ܐ ܟܬܝܼܒܹܐ ܝܗ݇ܘܵܘ ܥܲܠ ܬܸܪܘܲܝܗܝ ܓܹܒܵܢܹ̈ܐ، ܡ̣ܢ ܕܐܵܗܵܐ ܓܹܒܵܐ ܘܡ̣ܢ ܕܗ̇ܘ ܓܹܒܵܐ. 16ܠܘܼܚܹ̈ܐ ܦܘܼܠܚܵܢܵܐ ܕܐܲܠܵܗܵܐ ܝܗ݇ܘܵܐ، ܘܟܬܝܼܒ݂ܬܵܐ ܟܬܝܼܒ݂ܬܵܐ ܕܐܲܠܵܗܵܐ ܝܗ݇ܘܵܐ، ܢܩܝܼܪܬܵܐ ܥܲܠܲܝܗܝ. 17ܫܡܝܼܥ ܠܹܗ ܝܼܫܘܿܥ ܒܲܪ ܢܘܿܢ ܩܵܠܵܐ ܕܥܲܡܵܐ ܡܲܩܘܘܼܚܹܐ، ܘܐ݇ܡܝܼܪܹܗ ܠܡܘܼܫܹܐ، ”ܩܵܠܵܐ ܕܦܠܵܫܵܐ ܝܠܹܗ ܓܵܘ ܡܲܫܪܝܼܬܵܐ.“ 18ܓ̰ܘܼܘܸܒ ܠܹܗ ܡܘܼܫܹܐ، ”ܐܵܗܵܐ ܠܹܐ ܝܠܹܗ ܩܵܠܵܐ ܕܡܲܩܘܲܚܬܵܐ ܕܙܕܘܼܥܬܵܐ، ܘܐܵܦܠܵܐ ܩܵܠܵܐ ܕܡܲܩܘܲܚܬܵܐ ܕܚܲܠܵܫܘܼܬܵܐ. ܩܵܠܵܐ ܕܙܡܵܪܵܐ ܒܸܫܡܵܥܵܐ ܝܘܸܢ ܐܵܢܵܐ.“
19ܟܲܕ ܩܘܼܪܒܸܢܹܗ ܡܘܼܫܹܐ ܠܡܲܫܪܝܼܬܵܐ ܘܚܙܹܐ ܠܹܗ ܠܡܘܼܓ̰ܵܐ ܘܠܪܸ̈ܩܕܹܐ، ܚܝܼܡ ܠܵܗ̇ ܟܲܪܒܹܗ ܘܪܘܼܦܝܲܝ ܠܹܗ ܠܘܼܚܹ̈ܐ ܡ̣ܢ ܐܝܼܕܵܬܹ̈ܗ، ܘܬܒ݂ܝܼܪܲܝ ܠܹܗ ܬܚܘܿܬ ܛܘܼܪܵܐ. 20ܗ̇ܝܓܵܗ ܫܩܝܼܠ ܠܹܗ ܠܡܘܼܓ̰ܵܐ ܕܬܘܼܪܨܹܐ ܝܗ݇ܘܵܘ، ܘܡܘܼܩܸܕ ܠܹܗ ܒܢܘܼܪܵܐ، ܘܛܚܝܼܢܹܗ ܗܲܠ ܕܗܘܹܐ ܠܹܗ ܕܲܩܝܼܩܵܐ، ܒܘܼܪܒܸܙ ܠܹܗ ܥܲܠ ܦܵܬܵܐ ܕܡ̈ܝܼܵܐ، ܘܡܘܼܫܬܹܐ ܠܹܗ ܠܒܢܲܝ̈ ܝܼܣܪܵܝܹܠ. 21ܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ، ”ܡܘܿܕܝܼ ܥܒ݂ܝܼܕ ܠܹܗ ܐܸܠܘܼܟ݂ ܐܵܗܵܐ ܥܲܡܵܐ، ܕܡܘܼܐܬܹܐ ܠܘܼܟ݂ ܥܲܠܘܼܗܝ ܗܲܕܟ݂ܵܐ ܚܛܝܼܬܵܐ ܓܘܼܪܬܵܐ؟“ 22ܓ̰ܘܼܘܸܒ ܠܹܗ ܐܲܗܪܘܿܢ، ”ܠܵܐ ܚܵܝܡܵܐ ܟܲܪܒܵܐ ܕܡܵܪܝܼ. ܐܲܢ݇ܬ ܟܹܐ ܝܵܕܥܹܬ ܕܐܵܗܵܐ ܥܲܡܵܐ ܒܵܬ݇ܪ ܒܝܼܫܬܵܐ ܝܠܹܗ. 23ܣܵܒܵܒ ܐ݇ܡܝܼܪܗܘܿܢ ܐܸܠܝܼ، ’ܥܒ݂ܘܿܕ ܐܸܠܲܢ ܐܲܠܵܗܹ̈ܐ ܕܐܵܙܠ݇ܝܼ ܩܵܕ݇ܡܲܢ، ܣܵܒܵܒ ܠܹܐ ܝܘܲܚ ܒܝܼܕܵܥܵܐ ܡܘܿܕܝܼ ܗܘܹܐ ܠܹܗ ܠܐܵܗܵܐ ܡܘܼܫܹܐ، ܐ݇ܢܵܫܵܐ ܕܡܘܼܐܣܸܩ ܠܹܗ ܐܸܠܲܢ ܡ̣ܢ ܐܲܪܥܵܐ ܕܡܸܨܪܹܝܢ.‘ 24ܘܐܵܢܵܐ ܐ݇ܡܝܼܪܝܼ ܐܸܠܲܝܗܝ، ’ܡ̇ܢ ܕܐܝܼܬ ܠܹܗ ܕܲܗܒ݂ܵܐ ܦܲܠܸܛ ܠܹܗ.‘ ܘܝܘܼܗ݇ܒܸܠ ܠܗܘܿܢ ܐܸܠܝܼ ܕܲܗܒܲܝܗܝ، ܘܐܵܢܵܐ ܕܪܹܐ ܠܝܼ ܓܵܘ ܢܘܼܪܵܐ، ܘܦܠܝܼܛ ܠܹܗ ܐܵܗܵܐ ܡܘܼܓ̰ܵܐ.“
25ܚܙܹܐ ܠܹܗ ܡܘܼܫܹܐ ܠܥܲܡܵܐ ܣܪܝܼܚܵܐ، ܣܵܒܵܒ ܥܒ݂ܝܼܕܲܝ ܝܗ݇ܘܵܘ ܐܲܗܪܘܿܢ ܐܲܝܟ݂ ܐ݇ܢܵܫܹ̈ܐ ܣܪ̈ܝܼܚܹܐ ܠܡܲܣܚܲܪܬܵܐ ܒܥܲܝܢܹ̈ܐ ܕܕܸܫܡܸܢܲܝ̈ܗܝ، 26ܘܟܠܹܐ ܠܹܗ ܡܘܼܫܹܐ ܒܬܲܪܥܵܐ ܕܡܲܫܪܝܼܬܵܐ، ܘܐ݇ܡܝܼܪܹܗ، ”ܟܠ ܡ̇ܢ ܕܝܼܠܹܗ ܠܓܹܒܵܐ ܕܡܵܪܝܵܐ ܐܵܬܹܐ ܠܟܸܣ ܠܝܼ.“ ܘܓ̰ܡܝܼܥ ܠܗܘܿܢ ܠܟܸܣ ܠܹܗ ܟܠܲܝܗܝ ܒܢܲܝ̈ ܠܹܘܝܼ. 27ܘܐ݇ܡܝܼܪܹܗ ܐܸܠܲܝܗܝ، ”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ، ’ܟܠ ܐ݇ܢܵܫܵܐ ܕܵܪܹܐ ܣܲܝܦܹܗ ܥܲܠ ܥܸܛܡܹܗ، ܘܥܵܒܹܪ ܘܕܵܐܹܪ ܡ̣ܢ ܬܲܪܥܵܐ ܠܬܲܪܥܵܐ ܓܵܘ ܡܲܫܪܝܼܬܵܐ، ܘܟܠ ܐ݇ܢܵܫܵܐ ܩܵܛܹܠ ܠܐܲܚܘܿܢܘܼܗܝ، ܘܠܚܲܒ݂ܪܹܗ، ܘܠܫܒ݂ܵܒܹܗ.‘“ 28ܥܒ݂ܝܼܕ ܠܗܘܿܢ ܒܢܲܝ̈ ܠܹܘܝܼ ܒܚܲܒܪܵܐ ܕܡܘܼܫܹܐ، ܘܢܦܝܼܠ ܠܗܘܿܢ ܡ̣ܢ ܥܲܡܵܐ ܒܗ̇ܘ ܝܵܘܡܵܐ ܐܲܝܟ݂ ܬܠܵܬܵܐ ܐܲܠܦܹ̈ܐ ܐ݇ܢܵܫܹ̈ܐ. 29ܘܐ݇ܡܝܼܪܹܗ ܡܘܼܫܹܐ ܠܒܢܲܝ̈ ܠܹܘܝܼ، ”ܐܸܕܝܘܿܡ ܝܵܘܡܵܐ ܦܝܼܫ ܠܵܘܟ݂ܘܿܢ ܩܘܼܕܫܹܐ ܠܚܸܠܡܲܬ ܕܡܵܪܝܵܐ، ܣܵܒܵܒ ܟܠ ܚܲܕ ܒܛܝܼܡܵܐ ܕܒܪܘܿܢܹܗ ܘܐܲܚܘܿܢܘܼܗܝ ܝܠܹܗ. ܒܘܼܬ ܐܵܗܵܐ ܡܵܪܝܵܐ ܒܸܬ ܝܲܗ݇ܒܸܠ ܠܵܘܟ݂ܘܿܢ ܒܘܼܪܟܬܵܐ ܐܸܕܝܘܿܡ ܝܵܘܡܵܐ.“
ܡܘܼܫܹܐ ܦܲܪܦܘܼܠܹܐ ܒܘܼܬ ܝܼܣܪܵܝܹܠ
30ܒܝܵܘܡܵܐ ܐ݇ܚܹܪ݇ܢܵܐ ܐ݇ܡܝܼܪܹܗ ܡܘܼܫܹܐ ܠܥܲܡܵܐ، ”ܐܲܚܬܘܿܢ ܚܛܹܐ ܠܵܘܟ݂ܘܿܢ ܚܛܝܼܬܵܐ ܓܘܼܪܬܵܐ، ܐܝܼܢܵܐ ܐܵܕܝܼܵܐ ܒܸܬ ܐܵܣܩܹܢ ܠܟܸܣ ܡܵܪܝܵܐ، ܩܵܘܡܵܐ ܕܡܵܨܹܝܢ ܥܵܒ݂ܕܹܢ ܚܘܼܣܵܝܵܐ ܒܘܼܬ ܚܛܝܼܬܵܘܟ݂ܘܿܢ.“ 31ܘܕܝܼܪܹܗ ܡܘܼܫܹܐ ܠܟܸܣ ܡܵܪܝܵܐ، ܘܐ݇ܡܝܼܪܹܗ، ”ܐܘܿܚ، ܚܛܹܐ ܠܹܗ ܐܵܗܵܐ ܥܲܡܵܐ ܚܛܝܼܬܵܐ ܓܘܼܪܬܵܐ؛ ܥܒ݂ܝܼܕ ܠܗܘܿܢ ܐܸܠܲܝܗܝ ܐܲܠܵܗܹ̈ܐ ܕܕܲܗܒ݂ܵܐ. 32ܐܵܕܝܼܵܐ ܐܸܢ ܫܵܒ݂ܩܹܬ ܚܛܝܼܬܲܝܗܝ، ܨܦܵܝܝܼ؛ ܐܝܼܢܵܐ ܐܸܢ ܠܵܐ، ܦܲܪܦܘܼܠܹܐ ܝܘܸܢ، ܓܪܘܿܕ ܠܹܗ ܫܸܡܝܼ ܡ̣ܢ ܟܬܵܒ݂ܘܼܟ݂ ܕܟܬܝܼܒ݂ܵܐ ܝܘܸܬ.“ 33ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܡܵܢܝܼ ܕܚܸܛܝܵܐ ܝܠܹܗ ܐܸܠܝܼ، ܒܸܬ ܓܵܪܕܹܢܹܗ ܫܸܡܹܗ ܡ̣ܢ ܟܬܵܒ݂ܝܼ. 34ܐܵܕܝܼܵܐ ܙܹܠ݇، ܠܲܒܸܠ ܠܹܗ ܥܲܡܵܐ ܠܕܘܼܟܵܐ ܕܐ݇ܡܝܼܪܝܼ ܐܸܠܘܼܟ݂، ܘܡܲܠܲܐܟ݂ܝܼ ܒܸܬ ܐܵܙܹܠ ܩܵܕ݇ܡܘܼܟ݂. ܐܝܼܢܵܐ ܟܲܕ ܣܲܚܒܸܪܸܢܵܘܟ݂ܘܿܢ، ܒܸܬ ܬܲܥܠܸܡܸܢܗܘܿܢ ܒܘܼܬ ܚܛܝܼܬܲܝܗܝ.“ 35ܘܡܚܹܐ ܠܹܗ ܡܵܪܝܵܐ ܡܚܘܿܬܵܐ ܠܛܵܝܸܦܵܐ، ܣܵܒܵܒ ܡܘܼܬܪܸܨ ܠܗܘܿܢ ܡܘܼܓ̰ܵܐ ܕܥܒ݂ܝܼܕ ܠܹܗ ܐܲܗܪܘܿܢ.
Currently Selected:
ܡܦܩܢܐ 32: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
