ܡܦܩܢܐ 31

ܐܘܼܡܵܢܹ̈ܐ ܡܗܝܼܪܹ̈ܐ ܦܝܵܫܵܐ ܩܸܪܝܹܐ ܠܦܘܼܠܚܵܢܵܐ

1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 2”ܚܙܝܼ، ܩܸܪܝܵܐ ܝܘܸܢ ܒܫܸܡܵܐ ܠܒܲܨܠܝܼܐܹܝܠ ܒܪܘܿܢܵܐ ܕܐܘܼܪܝܼ، ܒܪܘܿܢܵܐ ܕܚܘܿܪ، ܡ̣ܢ ܫܲܒ݂ܛܵܐ ܕܝܼܗܘܼܕܵܐ، 3ܘܡܸܠܝܵܐ ܝܘܸܢ ܐܸܠܹܗ ܡ̣ܢ ܪܘܼܚܵܐ ܕܐܲܠܵܗܵܐ، ܒܚܸܟ݂ܡܬܵܐ، ܘܒܦܲܪܡܵܝܬܵܐ، ܘܒܝ݇ܕܲܥܬܵܐ، ܘܒܟܠ ܐܘܼܡܵܢܘܼܬܵܐ، 4ܠܡܲܠܚܘܼܡܹܐ ܦܘܼܠܚܵܢܹ̈ܐ ܕܐܘܼܡܵܢܘܼܬܵܐ، ܠܸܦܠܵܚܵܐ ܒܕܲܗܒ݂ܵܐ، ܘܒܣܹܐܡܵܐ، ܘܒܢܚܵܫܵܐ، 5ܘܒܦܪܵܡܬܵܐ ܕܟܹܐܦܹ̈ܐ ܩܵܐ ܒܢܵܝܬܵܐ، ܘܒܢܩܵܪܬܵܐ ܕܩܲܝܣܵܐ، ܠܸܦܠܵܚܵܐ ܒܟܠ ܦܘܼܠܚܵܢܵܐ ܕܐܘܼܡܵܢܘܼܬܵܐ. 6ܐܘܼܦ ܓܘܼܒܝܵܐ ܝܘܸܢ ܥܲܡܹܗ ܠܐܲܗܵܠܝܼܐܲܒ݂ ܒܪܘܿܢܵܐ ܕܐܲܚܝܼܣܡܲܟ݂، ܡ̣ܢ ܫܲܒ݂ܛܵܐ ܕܕܵܢ. ܘܡܘܼܬܒ݂ܵܐ ܝܘܸܢ ܚܸܟ݂ܡܬܵܐ ܒܠܸܒܵܐ ܕܟܠܲܝܗܝ ܚܲܟܝܼܡܹ̈ܐ، ܕܥܵܒ݂ܕܝܼ ܡܸܢܕܝܼ ܕܦܩܝܼܕܵܐ ܝܘܸܢ ܐܸܠܘܼܟ݂ ܠܸܥܒ݂ܵܕܵܐ: 7ܠܡܲܫܟܲܢ ܘܲܥܕܵܐ، ܠܩܹܒ݂ܘܼܬܵܐ ܕܣܵܗܕܘܼܬܵܐ، ܘܠܟܲܣܵܝܬܵܐ ܕܚܘܼܣܵܝܵܐ ܕܝܼܠܵܗ̇ ܥܲܠܘܼܗ̇، ܘܠܟܠܲܝܗܝ ܡܵܐܢܹ̈ܐ ܕܡܲܫܟܢܵܐ، 8ܘܠܦܵܬܘܿܪܵܐ ܘܠܡܵܐܢܘܼ̈ܗܝ، ܘܠܡܢܵܪܬܵܐ ܕܟ݂ܝܼܬܵܐ ܘܠܟܠܲܝܗܝ ܡܵܐܢܘܼ̈ܗ̇، ܘܠܡܲܕܒܚܵܐ ܕܒܸܣܡܵܐ، 9ܘܠܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ، ܘܠܟܠܲܝܗܝ ܡܵܐܢܘܼ̈ܗܝ، ܘܠܠܲܩܢܵܐ، ܘܠܟܲܢܹܗ، 10ܘܠܠܒ݂ܘܼܫܹ̈ܐ ܠܸܩܛܵܢܹ̈ܐ، ܘܠܠܒ݂ܘܼܫܹ̈ܐ ܩܘܼܕܫܹ̈ܐ ܕܐܲܗܪܘܿܢ ܟܵܗܢܵܐ، ܘܠܠܒ݂ܘܼܫܹ̈ܐ ܕܒܢܘܿܢܘܼ̈ܗܝ ܟܲܕ ܥܵܒ݂ܕܝܼ ܟܵܗܢܘܼܬܵܐ، 11ܘܠܡܸܫܚܵܐ ܕܡܫܵܚܬܵܐ، ܒܸܣܡܵܐ ܪܹܝܚܵܢܵܐ ܩܵܐ ܡܲܩܕܫܵܐ. ܥܵܒ݂ܕܝܼ ܟܠ ܡܸܢܕܝܼ ܐܲܝܟ݂ ܕܦܩܝܼܕ ܠܝܼ ܐܸܠܘܼܟ݂.“

ܦܘܼܩܕܵܢܵܐ ܒܘܼܬ ܫܲܒܬܵܐ

12ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، 13”ܐ݇ܡܘܿܪ ܠܒܢܲܝ̈ ܝܼܣܪܵܝܹܠ، ’ܢܵܛܪܝܼܬܘܿܢ ܠܫܲܒܵܬܝܼ̈، ܣܵܒܵܒ ܐܵܗܵܐ ܢܝܼܫܲܢܩܵܐ ܝܠܹܗ ܒܹܝܠܝܼ ܘܒܹܝܠܵܘܟ݂ܘܿܢ ܡ̣ܢ ܕܵܘܪܵܐ ܠܕܵܘܪܵܐ، ܕܝܵܕܥܝܼܬܘܿܢ ܕܐܵܢܵܐ ܝܘܸܢ ܡܵܪܝܵܐ ܩܲܕܫܵܢܵܘܟ݂ܘܿܢ. 14ܢܵܛܪܝܼܬܘܿܢ ܠܫܲܒܬܵܐ، ܣܵܒܵܒ ܩܘܼܕܸܫܬܵܐ ܝܠܵܗ̇ ܐܸܠܵܘܟ݂ܘܿܢ. ܗ̇ܘ ܕܫܵܚܹܡ ܠܵܗ̇، ܡܝܵܬܵܐ ܒܸܬ ܦܵܐܹܫ ܡܘܼܡܝܸܬܵܐ. ܟܠ ܕܦܵܠܹܚ ܒܗ̇ܘ ܝܵܘܡܵܐ، ܦܵܝܫܵܐ ܩܛܝܼܥܬܵܐ ܗ̇ܝ ܓܵܢܵܐ ܡ̣ܢ ܓܵܘ ܛܵܝܸܦܘܼܗ̇. 15ܐܸܫܬܵܐ ܝܵܘܡܵܢܹ̈ܐ ܦܵܐܹܫ ܥܒ݂ܝܼܕܵܐ ܦܘܼܠܚܵܢܵܐ، ܘܝܵܘܡܵܐ ܕܫܲܒ݂ܥܵܐ ܫܲܒܬܵܐ ܝܠܹܗ، ܝܵܘܡܵܐ ܕܡܲܢܝܲܚܬܵܐ ܓܡܝܼܪܬܵܐ، ܩܘܼܕܸܫܬܵܐ ܠܡܵܪܝܵܐ. ܟܠ ܕܦܵܠܹܚ ܒܝܵܘܡܵܐ ܕܫܲܒܬܵܐ ܡܝܵܬܵܐ ܒܸܬ ܦܵܐܹܫ ܡܘܼܡܝܸܬܵܐ. 16ܢܵܛܪܝܼ ܒܢܲܝ̈ ܝܼܣܪܵܝܹܠ ܠܝܵܘܡܵܐ ܕܫܲܒܬܵܐ، ܘܡܝܲܩܪܝܼ ܠܹܗ ܡ̣ܢ ܕܵܘܪܵܐ ܠܕܵܘܪܵܐ، ܘܲܥܕܵܐ ܠܥܵܠܲܡ. 17ܐܵܗܵܐ ܢܝܼܫܲܢܩܵܐ ܝܠܹܗ ܒܹܝܠܝܼ ܘܒܹܝܠ ܒܢܲܝ̈ ܝܼܣܪܵܝܹܠ ܠܥܵܠܲܡ، ܣܵܒܵܒ ܒܐܸܫܬܵܐ ܝܵܘܡܵܢܹ̈ܐ ܒܪܹܐ ܠܹܗ ܡܵܪܝܵܐ ܠܫܡܲܝܵܐ ܘܠܐܲܪܥܵܐ، ܘܒܝܵܘܡܵܐ ܕܫܲܒ݂ܥܵܐ ܫܠܹܐ ܠܹܗ ܘܡܘܼܢܝܸܚ ܠܹܗ.‘“

18ܟܲܕ ܦܪܝܼܩ ܠܹܗ ܡܵܪܝܵܐ ܡ̣ܢ ܠܗܲܡܙܘܼܡܹܐ ܥܲܡ ܡܘܼܫܹܐ ܥܲܠ ܛܘܼܪܵܐ ܕܣܝܼܢܲܝ، ܝܘܼܗ݇ܒܸܠ ܠܹܗ ܠܡܘܼܫܹܐ ܬܪܹܝ ܠܘܼܚܹ̈ܐ ܕܣܵܗܕܘܼܬܵܐ، ܠܘܼܚܹ̈ܐ ܕܟܹܐܦܵܐ، ܟܬܝܼܒܹܐ ܒܨܸܒܥܵܐ ܕܐܲܠܵܗܵܐ.

Currently Selected:

ܡܦܩܢܐ 31: ABTAB

Highlight

Copy

Compare