ܡܦܩܢܐ 30

ܬܵܪܲܨܬܵܐ ܕܡܲܕܒܚܵܐ ܕܒܸܣܡܵܐ

1”ܬܲܪܨܸܬ ܡܲܕܒܚܵܐ ܡ̣ܢ ܩܲܝܣܵܐ ܕܐܵܩܵܩܝܼܵܐ ܠܡܲܩܘܼܕܹܐ ܒܸܣܡܵܐ ܥܲܠܘܼܗܝ. 2ܗܵܘܹܐ ܡܪܲܒܥܵܐ، ܚܕܵܐ ܝܲܡܝܼܢܵܐ ܗܵܘܝܵܐ ܝܘܼܪܟ݂ܘܼܬܹܗ ܘܚܕܵܐ ܝܲܡܝܼܢܵܐ ܦܸܬܝܘܼܬܹܗ، ܘܬܲܪܬܹܝ ܝܲܡܝܼܢܹ̈ܐ ܪܵܡܘܼܬܹܗ؛ ܘܩܵܪ̈݇ܢܵܢܘܼܗܝ ܗܵܘܝܼ ܒܚܲܕ ܩܸܛܥܵܐ ܡܸܢܹܗ. 3ܘܩܵܪܡܹܬ ܕܲܗܒ݂ܵܐ ܨܸܦܝܵܐ ܠܐ݇ܓܵܪܹܗ، ܠܓܘܼܕܵܢܘܼ̈ܗܝ ܕܚܵܕܸܪ̈ܘܵܢܘܼܗܝ، ܘܠܩܵܪ̈݇ܢܵܢܘܼܗܝ؛ ܘܥܵܒ݂ܕܹܬ ܟܠܝܼܠܵܐ ܕܕܲܗܒ݂ܵܐ ܠܚܵܕܸܪ̈ܘܵܢܘܼܗܝ. 4ܬܲܪܨܸܬ ܐܸܠܹܗ ܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ ܠܠܬܸܚܬ ܡ̣ܢ ܟܠܝܼܠܵܐ، ܥܲܠ ܬܸܪܘܲܝܗܝ ܓܹܒܵܢܹ̈ܐ، ܩܵܐ ܕܝܼܘܲܢܝܵܬܹ̈ܐ ܕܦܵܐܹܫ ܛܥܝܼܢܵܐ ܒܝܼܲܝܗܝ. 5ܬܲܪܨܸܬ ܠܗܘܿܢ ܕܝܼܘܲܢܝܵܬܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܩܵܪܡܹܬ ܠܗܘܿܢ ܒܕܲܗܒ݂ܵܐ، 6ܘܡܲܬܒܸܬ ܠܹܗ ܡܲܕܒܚܵܐ ܕܒܸܣܡܵܐ ܠܟܸܣ ܣܸܬܪܵܐ ܕܝܼܠܹܗ ܩܵܕ݇ܡ ܩܹܒ݂ܘܼܬܵܐ ܕܣܵܗܕܘܼܬܵܐ، ܩܵܕ݇ܡ ܟܲܣܵܝܬܵܐ ܕܚܘܼܣܵܝܵܐ، ܕܝܼܠܹܗ ܥܲܠ ܣܵܗܕܘܼܬܵܐ. ܬܵܡܵܐ ܒܸܬ ܬܵܦܩܹܢ ܒܝܼܘܼܟ݂.

7ܡܲܩܸܕ ܥܲܠܘܼܗܝ ܐܲܗܪܘܿܢ ܒܸܣܡܵܐ ܪܹܝܚܵܢܵܐ، ܟܠ ܩܵܝܕܲܡܬܵܐ ܟܲܕ ܗܲܕܸܪ ܫܪ̈ܵܓ݂݇ܝܵܬܹܐ. 8ܘܒܪܲܡܫܵܐ ܟܲܕ ܗܲܕܸܪ ܐܲܗܪܘܿܢ ܫܪ̈ܵܓ݂݇ܝܵܬܹܐ، ܡܲܩܸܕ ܒܸܣܡܵܐ، ܕܐܲܡܝܼܢܵܐܝܼܬ ܗܵܘܹܐ ܒܸܣܡܵܐ ܩܵܕ݇ܡ ܡܵܪܝܵܐ ܡ̣ܢ ܕܵܘܪܵܐ ܠܕܵܘܪܵܐ. 9ܠܵܐ ܡܲܩܪܸܒ݂ܝܼܬܘܿܢ ܥܲܠ ܐܵܗܵܐ ܡܲܕܒܚܵܐ ܒܸܣܡܵܐ ܠܵܐ ܩܘܼܕܫܵܐ، ܘܠܵܐ ܕܸܒ݂ܚܵܐ ܡܘܼܩܕܵܐ، ܘܐܵܦܠܵܐ ܕܸܒ݂ܚܵܐ ܕܕܲܚܠܵܐ، ܘܠܵܐ ܨܲܢܨܸܠܝܼܬܘܿܢ ܥܲܠܘܼܗܝ ܢܘܼܩܵܝܵܐ. 10ܘܥܵܒܹܕ ܚܘܼܣܵܝܵܐ ܐܲܗܪܘܿܢ ܥܲܠ ܩܵܪ̈݇ܢܵܢܘܼܗܝ ܚܕܵܐ ܓܵܗܵܐ ܒܫܹܢ݇ܬܵܐ، ܡ̣ܢ ܕܸܡܵܐ ܕܕܸܒ݂ܚܵܐ ܩܘܼܕܫܵܐ ܠܚܘܼܣܵܝܵܐ ܕܚܛܝܼܵܬܹ̈ܐ. ܐܵܗܵܐ ܦܵܐܹܫ ܥܒ݂ܝܼܕܵܐ ܡ̣ܢ ܕܵܘܪܵܐ ܠܕܵܘܪܵܐ، ܩܕܘܿܫ ܩܘܼܕܫܹ̈ܐ ܝܠܹܗ ܠܡܵܪܝܵܐ.

ܦܘܼܪܩܵܢܵܐ ܕܓܵܢܵܬܹ̈ܐ

11ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 12”ܐܝܼܡܲܢ ܕܫܵܩܠܹܬ ܡܸܢܝܵܢܵܐ ܕܒܢܲܝ̈ ܝܼܣܪܵܝܹܠ، ܟܠ ܚܲܕ ܕܦܵܐܹܫ ܡܸܢܝܵܐ ܝܲܗ݇ܒܸܠ ܠܡܵܪܝܵܐ ܒܘܼܬ ܦܵܪܲܩܬܵܐ ܕܓܵܢܹܗ، ܕܠܵܐ ܗܵܘܝܵܐ ܓܵܘܲܝܗܝ ܡܚܘܿܬܵܐ ܟܲܕ ܦܵܝܫܝܼ ܡܸܢܝܹܐ. 13ܟܠ ܚܲܕ ܕܦܝܼܫܵܐ ܝܠܹܗ ܡܸܢܝܵܐ ܝܲܗ݇ܒܸܠ ܦܲܠܓܵܐ ܕܡܲܬܩܵܠܵܐ، ܒܬܩܘܼܠܬܵܐ ܕܒܹܝܬ ܩܘܼܕܫܵܐ. (ܟܠ ܡܲܬܩܵܠܵܐ ܥܸܣܪܝܼ ܓܹܪܹ̈ܐ ܝܠܹܗ.) ܐܵܗܵܐ ܦܲܠܓܵܐ ܕܡܲܬܩܵܠܵܐ ܕܸܒ݂ܚܵܐ ܝܠܹܗ ܠܡܵܪܝܵܐ. 14ܟܠ ܚܲܕ ܕܝܼܠܹܗ ܥܸܣܪܝܼ ܫܸܢܹ̈ܐ ܘܠܥܸܠܸܠ، ܘܦܝܼܫܵܐ ܝܠܹܗ ܡܸܢܝܵܐ، ܘܵܠܹܐ ܝܠܵܗ̇ ܕܦܵܪܹܥ ܐܵܗܵܐ ܕܸܒ݂ܚܵܐ ܠܡܵܪܝܵܐ. 15ܥܲܬܝܼܪܵܐ ܠܵܐ ܦܵܪܹܥ ܙܵܘܕܵܐ، ܘܡܸܣܟܹܢܵܐ ܠܵܐ ܦܵܪܹܥ ܒܵܨܘܿܪܵܐ ܡ̣ܢ ܦܲܠܓܵܐ ܕܡܲܬܩܵܠܵܐ، ܟܲܕ ܥܵܒ݂ܕܝܼܬܘܿܢ ܕܸܒ݂ܚܵܐ ܠܡܵܪܝܵܐ ܒܘܼܬ ܚܘܼܣܵܝܵܐ ܩܵܐ ܓܵܢܵܬܵܘ̈ܟ݂ܘܿܢ. 16ܫܵܩܠܹܬ ܐܲܢܹܐ ܙܘܼܙܹ̈ܐ ܕܚܘܼܣܵܝܵܐ ܡ̣ܢ ܒܢܲܝ̈ ܝܼܣܪܵܝܹܠ ܘܡܲܦܠܸܚܸܬ ܠܗܘܿܢ ܩܵܐ ܚܸܠܡܲܬ ܕܡܲܫܟܲܢ ܘܲܥܕܵܐ. ܗܲܕܟ݂ܵܐ ܕܦܵܝܫܝܼ ܕܟ݂ܝܼܪܹܐ ܒܢܲܝ̈ ܝܼܣܪܵܝܹܠ ܩܵܕ݇ܡ ܡܵܪܝܵܐ، ܘܕܦܵܐܹܫ ܥܒ݂ܝܼܕܵܐ ܚܘܼܣܵܝܵܐ ܠܓܵܢܵܬܵܘ̈ܟ݂ܘܿܢ.“

ܡܵܐܢܵܐ ܕܚܵܠܲܠܬܵܐ

17ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 18”ܬܲܪܨܸܬ ܠܲܩܢܵܐ ܡ̣ܢ ܢܚܵܫܵܐ ܩܵܐ ܚܵܠܲܠܬܵܐ، ܘܐܘܼܦ ܟܲܢܹܗ ܡ̣ܢ ܢܚܵܫܵܐ. ܡܲܬܒܸܬ ܠܹܗ ܒܹܝܠ ܡܲܫܟܲܢ ܘܲܥܕܵܐ ܘܒܹܝܠ ܡܲܕܒܚܵܐ، ܘܕܵܪܹܝܬ ܓܵܘܹܗ ܡ̈ܝܼܵܐ. 19ܐܲܗܪܘܿܢ ܘܒܢܘܿܢܘܼ̈ܗܝ ܚܲܠܸܠܝܼ ܬܵܡܵܐ ܐܝܼܕܵܬܲܝ̈ܗܝ ܘܐܲܩܠܵܬܲܝ̈ܗܝ. 20ܟܲܕ ܥܵܒ݂ܪܝܼ ܠܡܲܫܟܲܢ ܘܲܥܕܵܐ ܚܲܠܸܠܝܼ ܒܡ̈ܝܼܵܐ ܕܠܵܐ ܡܵܝܬܝܼ. ܘܟܲܕ ܩܲܪܒܸܢܝܼ ܠܡܲܕܒܚܵܐ ܠܸܥܒ݂ܵܕܵܐ ܚܸܠܡܲܬ، ܠܡܲܩܘܼܕܹܐ ܕܸܒ݂ܚܵܐ ܒܝܲܕ ܢܘܼܪܵܐ ܠܡܵܪܝܵܐ، 21ܗܲܕܟ݂ܵܐ ܚܲܠܸܠܝܼ ܐܝܼܕܵܬܲܝ̈ܗܝ ܘܐܲܩܠܵܬܲܝ̈ܗܝ ܕܠܵܐ ܡܵܝܬܝܼ. ܐܵܗܵܐ ܩܵܢܘܿܢܵܐ ܝܠܹܗ ܠܥܵܠܲܡ ܠܐܲܗܪܘܿܢ ܘܠܝܵܠܕ݇ܘܼ̈ܗܝ ܡ̣ܢ ܕܵܘܪܵܐ ܠܕܵܘܪܵܐ.“

ܡܸܫܚܵܐ ܕܡܫܵܚܬܵܐ

22ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 23”ܫܩܘܿܠ ܠܘܼܟ݂ ܒܸܣܡܹ̈ܐ ܪܹ̈ܫܵܝܹܐ: ܡܘܼܪܵܐ ܕܸܟ݂ܝܵܐ، ܚܲܡܸܫܡܵܐܐ ܡܲܬܩܵܠܹ̈ܐ، ܘܕܵܪܟ̰ܝܼܢ، ܦܲܠܓܵܐ ܕܐܵܗܵܐ، ܬܪܲܝܡܵܐܐ ܘܚܲܡܫܝܼ ܡܲܬܩܵܠܹ̈ܐ، ܘܩܲܢܝܵܐ ܒܲܣܝܼܡܵܐ، ܬܪܲܝܡܵܐܐ ܘܚܲܡܫܝܼ ܡܲܬܩܵܠܹ̈ܐ، 24ܘܚܲܡܸܫܡܵܐܐ ܡܲܬܩܵܠܹ̈ܐ ܕܩܲܣܝܵܐ، ܟܠܲܝܗܝ ܒܬܩܘܼܠܬܵܐ ܕܒܹܝܬ ܩܘܼܕܫܵܐ، ܘܡܸܫܚܵܐ ܕܙܲܝܬܵܐ ܐܲܪܒܥܵܐ ܠܝܼܛܪܹ̈ܐ. 25ܬܲܪܨܸܬ ܡܸܢܲܝܗܝ ܡܸܫܚܵܐ ܩܘܼܕܫܵܐ ܕܡܫܵܚܬܵܐ، ܥܸܛܪܵܐ ܡܙܝܼܓ݂ܵܐ، ܦܘܼܠܚܵܢܵܐ ܕܬܲܪܨܵܢܵܐ ܕܥܸܛܪܹ̈ܐ. ܗܵܘܹܐ ܡܸܫܚܵܐ ܩܘܼܕܫܵܐ ܕܡܫܵܚܬܵܐ. 26ܡܵܫܚܹܬ ܒܝܼܹܗ ܠܡܲܫܟܲܢ ܘܲܥܕܵܐ ܘܠܩܹܒ݂ܘܼܬܵܐ ܕܣܵܗܕܘܼܬܵܐ، 27ܘܠܦܵܬܘܿܪܵܐ ܘܠܟܠܲܝܗܝ ܡܵܐܢܘܼ̈ܗܝ، ܘܠܡܢܵܪܬܵܐ ܘܠܡܵܐܢܘܼ̈ܗ̇، ܘܠܡܲܕܒܚܵܐ ܕܒܸܣܡܵܐ، 28ܘܠܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ ܘܠܟܠܲܝܗܝ ܡܵܐܢܘܼ̈ܗܝ، ܘܠܲܩܢܵܐ ܘܠܟܲܢܹܗ. 29ܩܲܕܫܸܬ ܠܗܘܿܢ، ܕܗܵܘܝܼ ܓܡܝܼܪܵܐܝܼܬ ܩܘܼܕܫܹ̈ܐ؛ ܘܟܠ ܕܕܵܩܹܪ ܒܝܼܲܝܗܝ ܦܵܐܹܫ ܩܘܼܕܫܵܐ.

30ܘܡܵܫܚܹܬ ܠܐܲܗܪܘܿܢ ܘܠܒܢܘܿܢܘܼ̈ܗܝ ܘܩܲܕܫܸܬ ܠܗܘܿܢ ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. 31ܘܐܵܡܪܹܬ ܠܒܢܲܝ̈ ܝܼܣܪܵܝܹܠ، ’ܐܵܗܵܐ ܒܸܬ ܗܵܘܹܐ ܐܸܠܝܼ ܡܸܫܚܵܐ ܩܘܼܕܫܵܐ ܕܡܫܵܚܬܵܐ ܡ̣ܢ ܕܵܘܪܵܐ ܠܕܵܘܪܵܐ. 32ܠܵܐ ܨܲܢܨܸܠܝܼܬܘܿܢ ܡܸܢܹܗ ܥܲܠ ܦܲܓ݂ܪܵܐ ܕܒܲܪܢܵܫܵܐ، ܘܠܵܐ ܬܲܪܨܝܼܬܘܿܢ ܓܒ݂ܝܼܠܬܵܐ ܐܲܝܟ݂ ܕܝܼܹܗ؛ ܩܘܼܕܫܵܐ ܝܠܹܗ، ܘܗܵܘܹܐ ܩܘܼܕܫܵܐ ܐܸܠܵܘܟ݂ܘܿܢ. 33ܟܠ ܡ̇ܢ ܕܬܲܪܸܨ ܐܲܝܟ݂ ܕܝܼܹܗ، ܝܲܢ ܡܲܬܸܒ݂ ܡܸܢܹܗ ܥܲܠ ܢܘܼܟ݂ܪܵܝܵܐ، ܦܵܐܹܫ ܩܛܝܼܥܵܐ ܡ̣ܢ ܛܵܝܸܦܹܗ.‘“

ܒܸܣܡܵܐ ܩܵܐ ܡܵܪܝܵܐ

34ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܫܩܘܿܠ ܠܘܼܟ݂ ܒܸܣܡܵܐ ܪܹܝܚܵܢܵܐ: ܢܛܵܦܬܵܐ، ܘܫܸܚܠܸܬ، ܘܚܸܠܒ݂ܵܢܝܼܬܵܐ، ܘܠܒ݂ܘܿܢ݇ܬܵܐ ܕܟ݂ܝܼܬܵܐ؛ ܣܵܗܡܵܐ ܕܟܠܲܝܗܝ ܗܵܘܹܐ ܐܲܝܟ݂ ܚܕܵܕܹ̈ܐ. 35ܘܬܲܪܨܸܬ ܡܸܢܲܝܗܝ ܒܸܣܡܵܐ، ܥܸܛܪܵܐ، ܦܘܼܠܚܵܢܵܐ ܕܬܲܪܨܵܢܵܐ ܕܥܸܛܪܹ̈ܐ؛ ܡܘܼܡܠܸܚܵܐ، ܨܸܦܝܵܐ، ܘܩܘܼܕܫܵܐ. 36ܕܵܝܩܸܬ ܠܹܗ ܐܲܝܟ݂ ܢܸܚܠܵܐ، ܘܡܲܬܒܸܬ ܡܸܢܹܗ ܩܵܕ݇ܡ ܩܹܒ݂ܘܼܬܵܐ ܕܣܵܗܕܘܼܬܵܐ ܓܵܘ ܡܲܫܟܲܢ ܘܲܥܕܵܐ، ܒܕܘܼܟܵܐ ܕܬܵܦܩܹܢ ܒܝܼܘܼܟ݂، ܗ̇ܝ ܒܸܬ ܗܵܘܝܵܐ ܓܡܝܼܪܵܐܝܼܬ ܩܲܕܝܼܫܬܵܐ ܐܸܠܵܘܟ݂ܘܿܢ. 37ܒܸܣܡܵܐ ܕܬܲܪܨܝܼܬܘܿܢ ܠܹܗ ܒܗܲܕܟ݂ܵܐ ܓܒ݂ܝܼܠܬܵܐ، ܠܵܐ ܡܲܦܠܸܚܝܼܬܘܿܢ ܠܹܗ ܩܵܐ ܓܵܢܵܘܟ݂ܘܿܢ، ܣܵܒܵܒ ܩܘܼܕܫܵܐ ܝܠܹܗ ܐܸܠܵܘܟ݂ܘܿܢ ܠܡܵܪܝܵܐ. 38ܐ݇ܢܵܫܵܐ ܕܬܲܪܸܨ ܐܲܝܟ݂ ܕܝܼܹܗ ܠܡܲܦܠܘܼܚܹܗ ܐܲܝܟ݂ ܥܸܛܪܵܐ، ܦܵܐܹܫ ܩܛܝܼܥܵܐ ܡ̣ܢ ܛܵܝܸܦܹܗ.“

Currently Selected:

ܡܦܩܢܐ 30: ABTAB

Highlight

Copy

Compare