ܡܦܩܢܐ 29
29
ܩܵܕܲܫܬܵܐ ܕܟܵܗܢܹ̈ܐ
1”ܐܵܗܵܐ ܝܠܹܗ ܡܸܢܕܝܼ ܕܥܵܒ݂ܕܹܬ ܠܩܲܕܘܼܫܹܐ ܠܐܲܗܪܘܿܢ ܘܠܒܢܘܿܢܘܼ̈ܗܝ، ܕܥܵܒ݂ܕܝܼ ܠܝܼ ܚܸܠܡܲܬ ܐܲܝܟ݂ ܟܵܗܢܹ̈ܐ: ܫܵܩܠܹܬ ܚܲܕ ܡܘܼܓ̰ܵܐ ܘܬܪܹܝ ܒܲܪ̈ܥܵܢܹܐ ܕܠܵܐ ܠܲܟܵܐ. 2ܘܬܲܪܨܸܬ ܠܲܚܡܵܐ ܠܵܐ ܚܡܝܼܥܵܐ، ܘܟܵܕܹ̈ܐ ܠܵܐ ܚܡܝܼܥܹ̈ܐ ܓܒ݂ܝܼܠܹܐ ܒܡܸܫܚܵܐ، ܘܦܲܛܝܼܪܹ̈ܐ ܪ̈ܲܩܝܼܩܹܐ ܡܫܝܼܚܹ̈ܐ ܒܡܸܫܚܵܐ. ܬܲܪܨܸܬ ܠܗܘܿܢ ܒܢܫܝܼܦܵܐ ܕܚܸܛܹ̈ܐ. 3ܡܲܬܒܸܬ ܠܗܘܿܢ ܓܵܘ ܚܲܕ ܣܵܠܵܐ ܘܡܲܝܬܸܝܬ ܠܗܘܿܢ ܒܣܵܠܵܐ ܥܲܡ ܡܘܼܓ̰ܵܐ ܘܬܸܪܘܲܝܗܝ ܒܲܪ̈ܥܵܢܹܐ.
4ܘܡܲܝܬܸܝܬ ܠܐܲܗܪܘܿܢ ܘܠܒܢܘܿܢܘܼ̈ܗܝ ܠܬܲܪܥܵܐ ܕܡܲܫܟܲܢ ܘܲܥܕܵܐ ܘܡܲܣܚܸܝܬ ܠܗܘܿܢ ܒܡ̈ܝܼܵܐ. 5ܗ̇ܝܓܵܗ ܫܵܩܠܹܬ ܠܒ݂ܘܼܫܹ̈ܐ ܘܡܲܠܒܸܫܸܬ ܠܐܲܗܪܘܿܢ ܨܘܼܕܪܵܐ، ܘܩܒ݂ܵܝܬܵܐ ܕܐܸܦܘܿܕܵܐ، ܘܐܸܦܘܿܕܵܐ، ܘܒܪܵܬ݇ ܨܲܕܪܵܐ؛ ܘܐܵܣܪܹܬ ܥܲܠܘܼܗܝ ܙܘܼܢܵܪܵܐ ܕܐܸܦܘܿܕܵܐ. 6ܡܲܬܒܸܬ ܠܵܗ̇ ܟܪܵܟ݂ܬܵܐ ܥܲܠ ܪܹܫܹܗ، ܘܡܲܬܒܸܬ ܟܠܝܼܠܵܐ ܩܘܼܕܫܵܐ ܥܲܠ ܟܪܵܟ݂ܬܵܐ. 7ܘܫܵܩܠܹܬ ܠܵܗ̇ ܡܸܫܚܵܐ ܕܡܫܵܚܬܵܐ ܘܨܲܢܨܸܠܸܬ ܥܲܠ ܪܹܫܹܗ ܕܡܵܫܚܹܬ ܠܹܗ. 8ܗ̇ܝܓܵܗ ܡܲܝܬܸܝܬ ܠܒܢܘܿܢܘܼ̈ܗܝ ܘܡܲܠܒܸܫܸܬ ܠܗܘܿܢ ܨܘܼܕܪ̈ܵܬܹܐ، 9ܐܵܣܪܹܬ ܥܲܠܲܝܗܝ ܚܘܼܪܵܪܹ̈ܐ، ܘܡܲܬܒܸܬ ܒܪܹ̈ܫܲܝܗܝ ܟܪ̈ܵܟ݂ܝܵܬܹܐ. ܗܵܘܝܵܐ ܟܵܗܢܘܼܬܵܐ ܐܸܠܲܝܗܝ ܠܥܵܠܲܡ. ܗܲܕܟ݂ܵܐ ܣܵܝܡܹܬ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ.
10ܗ̇ܝܓܵܗ ܡܲܝܬܸܝܬ ܠܡܘܼܓ̰ܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ. ܡܲܬܒ݂ܝܼ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܵܐ ܕܡܘܼܓ̰ܵܐ. 11ܦܵܪܡܹܬ ܠܹܗ ܡܘܼܓ̰ܵܐ ܩܵܕ݇ܡ ܡܵܪܝܵܐ، ܒܬܲܪܥܵܐ ܕܡܲܫܟܲܢ ܘܲܥܕܵܐ. 12ܫܵܩܠܹܬ ܡ̣ܢ ܕܸܡܵܐ ܕܡܘܼܓ̰ܵܐ ܒܨܸܒܥܘܼܟ݂ ܘܡܲܬܒܸܬ ܠܹܗ ܥܲܠ ܩܵܪ̈݇ܢܵܢܹܐ ܕܡܲܕܒܚܵܐ، ܘܣܵܗܡܵܐ ܦܝܼܫܵܐ ܕܕܸܡܵܐ ܫܲܦܟܸܬ ܠܹܗ ܥܲܠ ܐܲܪܥܵܐ ܕܡܲܕܒܚܵܐ. 13ܫܵܩܠܹܬ ܠܟܠܹܗ ܬܲܪܒܵܐ ܕܟܹܐ ܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ، ܘܠܚܨܵܪ ܟܲܒ݂ܕܵܐ، ܘܠܬܲܪܬܹܝ ܟܸܠܝܵܬܹ̈ܐ، ܘܠܬܲܪܒܵܐ ܕܝܼܠܹܗ ܥܲܠܲܝܗܝ، ܘܡܲܩܕܸܬ ܠܗܘܿܢ ܥܲܠ ܡܲܕܒܚܵܐ. 14ܐܝܼܢܵܐ ܒܸܣܪܵܐ ܕܡܘܼܓ̰ܵܐ، ܓܸܠܕܹܗ ܘܦܸܪܬܹܗ، ܡܲܩܕܸܬ ܠܗܘܿܢ ܒܢܘܼܪܵܐ ܠܒܲܕܲܪ ܡ̣ܢ ܡܲܫܪܝܼܬܵܐ. ܐܵܗܵܐ ܕܸܒ݂ܚܵܐ ܝܠܹܗ ܒܘܼܬ ܚܛܝܼܬܵܐ.
15ܫܵܩܠܹܬ ܚܲܕ ܒܲܪܥܵܢܵܐ، ܘܡܲܬܒ݂ܝܼ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܹܗ، 16ܘܦܵܪܡܹܬ ܠܹܗ ܒܲܪܥܵܢܵܐ، ܘܫܵܩܠܹܬ ܕܸܡܹܗ ܘܡܲܪܝܸܣܸܬ ܠܹܗ ܠܚܵܕܸܪ̈ܘܵܢܹܐ ܕܡܲܕܒܚܵܐ. 17ܗ̇ܝܓܵܗ ܩܲܛܩܸܛܸܬ ܠܹܗ ܒܲܪܥܵܢܵܐ ܠܩܸܛܥܵܛܹ̈ܐ، ܘܚܲܠܸܠܸܬ ܠܗܲܕܵܡܘܼ̈ܗܝ ܓܵܘܵܝܹ̈ܐ ܘܠܫܵܩܵܢܘܼ̈ܗܝ، ܘܡܲܬܒܸܬ ܠܗܘܿܢ ܥܲܡ ܩܸܛܥܵܛܹ̈ܐ ܘܥܲܡ ܪܹܫܹܗ، 18ܘܡܲܩܕܸܬ ܠܹܗ ܟܠܹܗ ܒܲܪܥܵܢܵܐ ܥܲܠ ܡܲܕܒܚܵܐ؛ ܐܵܗܵܐ ܕܸܒ݂ܚܵܐ ܡܘܼܩܕܵܐ ܝܠܹܗ ܠܡܵܪܝܵܐ؛ ܪܹܝܚܵܐ ܒܲܣܝܼܡܵܐ ܝܠܹܗ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ. 19ܘܫܵܩܠܹܬ ܠܗ̇ܘ ܒܲܪܥܵܢܵܐ ܐ݇ܚܹܪ݇ܢܵܐ، ܘܡܲܬܒ݂ܝܼ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܹܗ. 20ܦܵܪܡܹܬ ܠܹܗ ܒܲܪܥܵܢܵܐ، ܘܫܵܩܠܹܬ ܡ̣ܢ ܕܸܡܹܗ ܘܡܲܬܒܸܬ ܠܹܗ ܥܲܠ ܛܲܪܦܵܐ ܕܢܵܬܵܐ ܕܝܲܡܝܼܢܵܐ ܕܐܲܗܪܘܿܢ، ܘܥܲܠ ܛܲܪܦܵܐ ܕܢܵܬܵܐ ܕܝܲܡܝܼܢܵܐ ܕܒܢܘܿܢܘܼ̈ܗܝ، ܘܥܲܠ ܩܘܼܟ̰ܵܐ ܕܐܝܼܕܲܝܗܝ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܲܝܗܝ ܕܝܲܡܝܼܢܵܐ، ܘܡܲܪܝܸܣܸܬ ܠܹܗ ܕܸܡܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ. 21ܗ̇ܝܓܵܗ ܫܵܩܠܹܬ ܡ̣ܢ ܕܸܡܵܐ ܕܥܲܠ ܡܲܕܒܚܵܐ، ܘܡ̣ܢ ܡܸܫܚܵܐ ܕܡܫܵܚܬܵܐ، ܘܡܲܪܝܸܣܸܬ ܠܗܘܿܢ ܥܲܠ ܐܲܗܪܘܿܢ ܘܥܲܠ ܠܒ݂ܘܼܫܘܼ̈ܗܝ، ܥܲܠ ܒܢܘܿܢܘܼ̈ܗܝ ܘܥܲܠ ܠܒ݂ܘܼܫܲܝ̈ܗܝ ܥܲܡܹܗ. ܗܲܕܟ݂ܵܐ ܒܸܬ ܦܵܐܹܫ ܩܘܼܕܫܵܐ ܗ̇ܘ ܘܠܒ݂ܘܼܫܘܼ̈ܗܝ، ܘܒܢܘܿܢܘܼ̈ܗܝ ܘܠܒ݂ܘܼܫܲܝ̈ܗܝ ܥܲܡܹܗ.
22ܗ̇ܝܓܵܗ ܫܵܩܠܹܬ ܬܲܪܒܵܐ ܕܒܲܪܥܵܢܵܐ ܘܠܐܹܠܝܼܬܵܐ، ܘܬܲܪܒܵܐ ܕܟܹܐ ܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ، ܘܠܚܨܵܪ ܟܲܒ݂ܕܵܐ، ܘܠܬܲܪܬܹܝ ܟܸܠܝܵܬܹ̈ܐ ܘܠܬܲܪܒܵܐ ܕܝܼܠܹܗ ܥܲܠܲܝܗܝ، ܘܠܥܸܛܡܵܐ ܕܝܲܡܝܼܢܵܐ، ܣܵܒܵܒ ܒܲܪܥܵܢܵܐ ܕܣܝܵܡܬܵܐ ܝܠܹܗ، 23ܘܚܕܵܐ ܓܸܪܕܲܝܵܐ ܕܠܲܚܡܵܐ، ܘܚܲܕ ܟܵܕܵܐ ܕܠܲܚܡܵܐ ܡܸܫܚܵܢܵܐ، ܘܚܲܕ ܪܲܩܝܼܩܵܐ، ܡ̣ܢ ܣܵܠܵܐ ܕܦܲܛܝܼܪܹ̈ܐ ܕܝܼܠܹܗ ܩܵܕ݇ܡ ܡܵܪܝܵܐ. 24ܡܲܬܒܸܬ ܠܗܘܿܢ ܟܠܲܝܗܝ ܓܵܘ ܐܝܼܕܵܬܹ̈ܐ ܕܐܲܗܪܘܿܢ ܘܓܵܘ ܐܝܼܕܵܬܹ̈ܐ ܕܒܢܘܿܢܘܼ̈ܗܝ، ܘܫܵܥܫܹܬ ܠܗܘܿܢ ܐܲܝܟ݂ ܫܥܵܫܵܐ ܕܕܸܒ݂ܚܵܐ ܩܵܕ݇ܡ ܡܵܪܝܵܐ. 25ܗ̇ܝܓܵܗ ܫܵܩܠܹܬ ܠܗܘܿܢ ܡ̣ܢ ܐܝܼܕܵܬܲܝ̈ܗܝ ܘܡܲܩܕܸܬ ܠܗܘܿܢ ܥܲܠ ܡܲܕܒܚܵܐ، ܥܲܡ ܕܸܒ݂ܚܵܐ ܡܘܼܩܕܵܐ. ܪܹܝܚܵܐ ܒܲܣܝܼܡܵܐ ܠܡܵܪܝܵܐ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ. 26ܘܫܵܩܠܹܬ ܨܲܕܪܵܐ ܕܒܲܪܥܵܢܵܐ، ܕܝܼܠܹܗ ܣܝܵܡܬܵܐ ܕܐܲܗܪܘܿܢ، ܘܫܵܥܫܹܬ ܠܗܘܿܢ ܐܲܝܟ݂ ܫܥܵܫܵܐ ܕܕܸܒ݂ܚܵܐ ܩܵܕ݇ܡ ܡܵܪܝܵܐ. ܗ̇ܘ ܗܵܘܹܐ ܣܵܗܡܘܼܟ݂.
27ܩܲܕܫܸܬ ܠܨܲܕܪܵܐ ܕܕܸܒ݂ܚܵܐ ܕܦܝܼܫ ܠܹܗ ܫܥܝܼܫܵܐ، ܘܥܸܛܡܵܐ ܕܕܸܒ݂ܚܵܐ ܕܦܝܼܫ ܠܵܗ̇ ܡܘܼܪܸܡܬܵܐ ܡ̣ܢ ܒܲܪܥܵܢܵܐ، ܣܝܼܡܬܵܐ ܠܐܲܗܪܘܿܢ ܘܠܒܢܘܿܢܘܼ̈ܗܝ. 28ܐܵܗܵܐ ܗܵܘܹܐ ܩܵܢܘܿܢܵܐ ܠܥܵܠܲܡ ܠܐܲܗܪܘܿܢ ܘܠܒܢܘܿܢܘܼ̈ܗܝ ܡ̣ܢ ܒܢܲܝ̈ ܝܼܣܪܵܝܹܠ؛ ܣܵܒܵܒ ܦܘܼܪܫܵܢܵܐ ܝܠܹܗ ܡܘܼܩܪܸܒ݂ܵܐ ܠܒܢܲܝ̈ ܝܼܣܪܵܝܹܠ ܡ̣ܢ ܕܸܒ݂ܚܲܝܗܝ ܕܫܠܵܡܵܐ ܕܝܼܠܹܗ ܕܸܒ݂ܚܲܝܗܝ ܠܡܵܪܝܵܐ.
29ܠܒ݂ܘܼܫܹ̈ܐ ܩܘܼܕܫܹ̈ܐ ܕܐܲܗܪܘܿܢ ܗܵܘܝܼ ܠܒܢܘܿܢܘܼ̈ܗܝ ܡ̣ܢ ܒܵܬ݇ܪ ܡܸܢܹܗ، ܕܦܵܝܫܝܼ ܡܫܝܼܚܹܐ ܘܣܝܼܡܹܐ ܒܝܼܲܝܗܝ. 30ܒܪܘܿܢܹܗ ܕܗܵܘܹܐ ܟܵܗܢܵܐ ܠܫܵܘܦܹܗ، ܠܵܒܹܫ ܠܗܘܿܢ ܫܲܒ݂ܥܵܐ ܝܵܘܡܵܢܹ̈ܐ، ܐܝܼܡܲܢ ܕܥܵܒܹܪ ܠܡܲܩܕܫܵܐ ܕܡܲܫܟܲܢ ܘܲܥܕܵܐ ܠܸܥܒ݂ܵܕܵܐ ܚܸܠܡܲܬ.
31ܫܵܩܠܹܬ ܠܒܲܪܥܵܢܵܐ ܕܣܝܵܡܬܵܐ ܘܒܲܫܠܸܬ ܠܹܗ ܒܸܣܪܹܗ ܒܕܘܼܟܵܐ ܩܲܕܝܼܫܬܵܐ، 32ܘܐܵܟ݂ܠܝܼ ܐܲܗܪܘܿܢ ܘܒܢܘܿܢܘܼ̈ܗܝ ܒܸܣܪܵܐ ܕܒܲܪܥܵܢܵܐ، ܘܠܲܚܡܵܐ ܕܝܼܠܹܗ ܓܵܘ ܣܵܠܵܐ، ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ. 33ܐܵܟ݂ܠܝܼ ܠܐܵܢܝܼ ܕܒܝܼܲܝܗܝ ܦܝܼܫ ܠܹܗ ܥܒ݂ܝܼܕܵܐ ܚܘܼܣܵܝܵܐ ܠܣܝܵܡܬܲܝܗܝ ܘܠܩܵܕܲܫܬܲܝܗܝ. ܢܘܼܟ݂ܪܵܝܵܐ ܠܵܐ ܐܵܟܹܠ ܡܸܢܲܝܗܝ، ܣܵܒܵܒ ܩܘܼܕܫܹܐ ܝܢܵܐ. 34ܘܐܸܢ ܙܵܐܹܕ ܡܸܢܕܝܼ ܡ̣ܢ ܒܸܣܪܵܐ ܕܣܝܵܡܬܵܐ ܘܡ̣ܢ ܠܲܚܡܵܐ ܗܲܠ ܨܲܦܪܵܐ، ܡܲܩܕܸܬ ܠܹܗ ܒܢܘܼܪܵܐ؛ ܠܵܐ ܦܵܐܹܫ ܐ݇ܟ݂ܝܼܠܵܐ، ܣܵܒܵܒ ܩܘܼܕܫܵܐ ܝܠܹܗ.
35ܗܲܕܟ݂ܵܐ ܥܵܒ݂ܕܹܬ ܠܐܲܗܪܘܿܢ ܘܠܒܢܘܿܢܘܼ̈ܗܝ، ܐܲܝܟ݂ ܕܒܸܦܩܵܕܵܐ ܝܘܸܢ ܐܸܠܘܼܟ݂. ܣܵܝܡܹܬ ܠܗܘܿܢ ܒܫܲܒ݂ܥܵܐ ܝܵܘܡܵܢܹ̈ܐ. 36ܟܠ ܝܵܘܡܵܐ ܕܵܒ݂ܚܹܬ ܚܲܕ ܡܘܼܓ̰ܵܐ، ܕܸܒ݂ܚܵܐ ܕܚܛܝܼܬܵܐ ܠܚܘܼܣܵܝܵܐ. ܘܕܲܟܸܝܬ ܠܹܗ ܡܲܕܒܚܵܐ ܒܥܒ݂ܵܕܬܵܐ ܕܚܘܼܣܵܝܵܐ ܐܸܠܹܗ، ܘܡܵܫܚܹܬ ܠܹܗ ܕܩܲܕܫܸܬ ܠܹܗ. 37ܫܲܒ݂ܥܵܐ ܝܵܘܡܵܢܹ̈ܐ ܥܵܒ݂ܕܹܬ ܚܘܼܣܵܝܵܐ ܥܲܠ ܡܲܕܒܚܵܐ ܘܩܲܕܫܸܬ ܠܹܗ، ܗܲܕܟ݂ܵܐ ܒܸܬ ܗܵܘܹܐ ܡܲܕܒܚܵܐ ܓܡܝܼܪܵܐܝܼܬ ܩܘܼܕܫܵܐ. ܘܟܠ ܕܕܵܩܹܪ ܒܝܼܹܗ ܒܸܬ ܦܵܐܹܫ ܩܘܼܕܫܵܐ.
ܕܸܒ݂ܚܹ̈ܐ ܝܵܘܡܵܝܹ̈ܐ
38”ܐܵܗܵܐ ܝܠܹܗ ܡܸܢܕܝܼ ܕܡܲܩܪܸܒܸܬ ܥܲܠ ܡܲܕܒܚܵܐ: ܟܠ ܝܵܘܡܵܐ ܐܲܡܝܼܢܵܐܝܼܬ ܡܲܩܪܸܒܸܬ ܬܪܹܝ ܦܹܐܪܹ̈ܐ ܕܒܢܲܝ̈ ܚܕܵܐ ܫܹܢ݇ܬܵܐ. 39ܚܲܕ ܦܹܐܪܵܐ ܡܲܩܪܸܒܸܬ ܠܹܗ ܒܨܲܦܪܵܐ، ܘܗ̇ܘ ܐ݇ܚܹܪ݇ܢܵܐ ܡܲܩܪܸܒܸܬ ܠܹܗ ܒܪܲܡܫܵܐ. 40ܥܲܡ ܦܹܐܪܵܐ ܩܲܕ݇ܡܵܝܵܐ ܡܲܩܪܸܒܸܬ ܬܪܹܝ ܠܝܼܛܪܹ̈ܐ ܩܲܡܚܵܐ ܢܚܝܼܠܵܐ، ܚܒ݂ܝܼܛܵܐ ܒܚܲܕ ܠܝܼܛܪܵܐ ܡܸܫܚܵܐ ܚܫܝܼܠܵܐ. ܘܡܲܩܪܸܒܸܬ ܚܲܕ ܠܝܼܛܪܵܐ ܚܲܡܪܵܐ ܩܵܐ ܢܘܼܩܵܝܵܐ. 41ܦܹܐܪܵܐ ܐ݇ܚܹܪ݇ܢܵܐ ܡܲܩܪܸܒܸܬ ܠܹܗ ܒܪܲܡܫܵܐ، ܥܲܡ ܩܲܡܚܵܐ ܘܚܲܡܪܵܐ، ܗܲܪ ܐܲܝܟ݂ ܗ̇ܘ ܕܡܘܼܩܪܸܒ݂ ܠܘܼܟ݂ ܒܨܲܦܪܵܐ، ܕܗܵܘܹܐ ܪܹܝܚܵܐ ܒܲܣܝܼܡܵܐ، ܕܸܒ݂ܚܵܐ ܒܝܲܕ ܢܘܼܪܵܐ ܠܡܵܪܝܵܐ.
42ܐܵܗܵܐ ܒܸܬ ܗܵܘܹܐ ܐܲܡܝܼܢܵܐܝܼܬ ܕܸܒ݂ܚܵܐ ܡܘܼܩܕܵܐ ܩܵܕ݇ܡ ܡܵܪܝܵܐ ܡ̣ܢ ܕܵܘܪܵܐ ܠܕܵܘܪܵܐ ܒܬܲܪܥܵܐ ܕܡܲܫܟܲܢ ܘܲܥܕܵܐ، ܐܲܝܟܵܐ ܕܒܸܬ ܬܵܦܩܹܢ ܒܝܼܵܘܟ݂ܘܿܢ ܘܗܲܡܙܸܡܸܢ ܥܲܡܘܼܟ݂ ܬܵܡܵܐ. 43ܘܒܸܬ ܬܵܦܩܹܢ ܬܵܡܵܐ ܒܒܢܲܝ̈ ܝܼܣܪܵܝܹܠ، ܘܒܸܬ ܦܵܐܹܫ ܡܩܘܼܕܫܵܐ ܒܐܝܼܩܵܪܝܼ.
44ܒܸܬ ܩܲܕܫܸܢ ܠܡܲܫܟܲܢ ܘܲܥܕܵܐ، ܘܠܡܲܕܒܚܵܐ؛ ܘܠܐܲܗܪܘܿܢ ܘܠܒܢܘܿܢܘܼ̈ܗܝ ܒܸܬ ܩܲܕܫܸܢ ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. 45ܘܒܸܬ ܫܵܪܹܝܢ ܓܵܘ ܒܢܲܝ̈ ܝܼܣܪܵܝܹܠ، ܘܒܸܬ ܗܵܘܹܝܢ ܐܲܠܵܗܵܐ ܐܸܠܲܝܗܝ. 46ܘܒܸܬ ܝܵܕܥܝܼ ܕܐܵܢܵܐ ܝܘܸܢ ܡܵܪܝܵܐ ܐܲܠܵܗܲܝܗܝ ܕܦܘܼܠܛܲܝ ܠܝܼ ܡ̣ܢ ܐܲܪܥܵܐ ܕܡܸܨܪܹܝܢ ܕܫܵܪܹܝܢ ܓܵܘܲܝܗܝ. ܐܵܢܵܐ ܝܘܸܢ ܡܵܪܝܵܐ ܐܲܠܵܗܲܝܗܝ.
Currently Selected:
ܡܦܩܢܐ 29: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
