ܡܦܩܢܐ 28

ܓ̰ܘܼܠܹ̈ܐ ܕܟܵܗܢܹ̈ܐ

1”ܡܲܝܬܝܼ ܠܹܗ ܠܟܸܣ ܠܘܼܟ݂ ܐܲܗܪܘܿܢ ܐܲܚܘܿܢܘܼܟ݂، ܘܒܢܘܿܢܘܼ̈ܗܝ ܢܵܕܵܒ݂، ܐܲܒ݂ܝܼܗܘܿ، ܐܹܠܝܼܥܵܙܲܪ، ܘܐܝܼܬܵܡܵܪ ܥܲܡܹܗ، ܡ̣ܢ ܓܵܘ ܒܢܲܝ̈ ܝܼܣܪܵܝܹܠ، ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. 2ܘܥܵܒ݂ܕܹܬ ܠܒ݂ܘܼܫܹ̈ܐ ܩܘܼܕܫܹ̈ܐ ܩܵܐ ܐܲܗܪܘܿܢ ܐܲܚܘܿܢܘܼܟ݂، ܠܫܘܼܦܪܵܐ ܘܠܫܘܼܒ݂ܚܵܐ. 3ܘܗܲܡܙܸܡܸܬ ܥܲܡ ܟܠܲܝܗܝ ܚܲܟܝܼܡܹ̈ܐ، ܕܡܸܠܝܲܝ ܝܘܸܢ ܪܘܼܚܵܐ ܕܚܸܟ݂ܡܬܵܐ، ܘܬܲܪܨܝܼ ܠܒ݂ܘܼܫܹ̈ܐ ܩܘܼܕܫܹ̈ܐ ܠܐܲܗܪܘܿܢ، ܩܵܐ ܕܥܵܒܹܕ ܟܵܗܢܘܼܬܵܐ ܐܸܠܝܼ. 4ܘܐܲܢܹܐ ܝܢܵܐ ܠܒ݂ܘܼܫܹ̈ܐ ܕܬܲܪܨܝܼ ܠܗܘܿܢ: ܒܪܵܬ݇ ܨܲܕܪܵܐ، ܘܐܸܦܘܿܕܵܐ، ܩܒ݂ܵܝܬܵܐ، ܨܘܼܕܪܵܐ ܡܢܘܼܩܸܫܬܵܐ، ܟܪܵܟ݂ܬܵܐ، ܘܚܘܼܪܵܪܵܐ. ܬܲܪܨܝܼ ܠܒ݂ܘܼܫܹ̈ܐ ܩܘܼܕܫܹ̈ܐ ܠܐܲܗܪܘܿܢ ܐܲܚܘܿܢܘܼܟ݂، ܘܠܒܢܘܿܢܘܼ̈ܗܝ، ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. 5ܐܲܢܹܐ ܦܵܝܫܝܼ ܥܒ݂ܝܼܕܹܐ ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ.

ܬܵܪܲܨܬܵܐ ܕܐܸܦܘܿܕܵܐ

6”ܘܬܲܪܨܝܼ ܐܸܦܘܿܕܵܐ ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 7ܬܪܹܝ ܩܸܛܥܵܛܹ̈ܐ ܕܐܸܦܘܿܕܵܐ ܗܵܘܝܼ ܐ݇ܣܝܼܪܹܐ ܡ̣ܢ ܬܪܹܝ ܡܲܪ̈ܙܵܢܘܼܗܝ، ܬܪܝܼܩܹܐ ܒܥܘܼܕܵܠܹ̈ܐ ܥܲܠ ܪ̈ܘܼܦ̮ܫܵܢܹܐ.

8ܘܙܘܼܢܵܪܵܐ ܕܐܵܣܪܹܬ ܐܸܦܘܿܕܵܐ ܒܝܼܹܗ ܗܵܘܹܐ ܗܲܪ ܡ̣ܢ ܗ̇ܘ ܦܘܼܠܚܵܢܵܐ، ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 9ܘܫܵܩܠܹܬ ܬܪܹܝ ܟܹܐܦܹ̈ܐ ܕܫܘܼܗܲܡ، ܘܢܵܩܪܹܬ ܥܲܠܲܝܗܝ ܫܸܡܵܢܹ̈ܐ ܕܒܢܲܝ̈ ܝܼܣܪܵܝܹܠ، 10ܐܸܫܬܵܐ ܫܸܡܵܢܹ̈ܐ ܥܲܠ ܚܲܕ ܟܹܐܦܵܐ، ܘܐܵܢܝܼ ܐܸܫܬܵܐ ܕܦܵܝܫܝܼ ܥܲܠ ܕܗ̇ܘ ܟܹܐܦܵܐ ܐ݇ܚܹܪ݇ܢܵܐ، ܐܲܝܟ݂ ܪܹܐܙܵܐ ܕܬܵܘܠܕܵܬܲܝ̈ܗܝ، 11ܕܵܐܟ݂ܝܼ ܕܐܘܼܡܵܢܵܐ ܡܗܝܼܪܵܐ ܢܵܩܹܪ ܚܵܬܡܹ̈ܐ، ܗܲܕܟ݂ܵܐ ܢܵܩܪܹܬ ܠܗܘܿܢ ܬܸܪܘܲܝܗܝ ܟܹܐܦܹ̈ܐ ܥܲܡ ܫܸܡܵܢܹ̈ܐ ܕܒܢܲܝ̈ ܝܼܣܪܵܝܹܠ ܥܲܠܲܝܗܝ. ܫܵܘܦܵܦܹ̈ܐ ܕܛܲܒ݂ܥܹ̈ܐ ܬܲܪܨܸܬ ܠܗܘܿܢ ܡ̣ܢ ܕܲܗܒ݂ܵܐ. 12ܡܲܬܒܸܬ ܬܸܪܘܲܝܗܝ ܟܹܐܦܹ̈ܐ ܥܲܠ ܬܪܹܝ ܩܸܛܥܵܛܹ̈ܐ ܕܐܸܦܘܿܕܵܐ ܕܝܼܢܵܐ ܥܲܠ ܪ̈ܘܼܦ̮ܫܵܢܹܐ؛ ܐܲܝܟ݂ ܟܹܐܦܹ̈ܐ ܕܡܲܕܟ݂ܪܵܢܘܼܬܵܐ ܕܒܢܲܝ̈ ܝܼܣܪܵܝܹܠ. ܘܐܲܗܪܘܿܢ ܒܸܬ ܛܵܥܹܢ ܫܸܡܵܢܲܝ̈ܗܝ ܥܲܠ ܬܸܪܘܲܝܗܝ ܪ̈ܘܼܦ̮ܫܵܢܘܼܗܝ ܩܵܕ݇ܡ ܡܵܪܝܵܐ ܩܵܐ ܡܲܕܟܲܪܬܵܐ. 13ܫܵܘܦܵܦܹ̈ܐ ܕܛܲܒ݂ܥܹ̈ܐ ܗܵܘܝܼ ܬܘܼܪܨܹܐ ܡ̣ܢ ܕܲܗܒ݂ܵܐ. 14ܘܬܲܪܬܹܝ ܫܹܫܠܵܬܹ̈ܐ ܕܕܲܗܒ݂ܵܐ ܨܸܦܝܵܐ. ܬܲܪܨܸܬ ܠܗܘܿܢ ܒܦܘܼܠܚܵܢܵܐ ܕܓܸܕܠܵܐ. ܡܲܬܒܸܬ ܠܗܘܿܢ ܫܹܫܠܵܬܹ̈ܐ ܓܕܝܼܠܹܐ، ܥܲܠ ܫܵܘܦܵܦܹ̈ܐ ܕܛܲܒ݂ܥܹ̈ܐ.

ܬܵܪܲܨܬܵܐ ܕܒܪܵܬ݇ ܨܲܕܪܵܐ

15”ܘܬܲܪܨܸܬ ܒܪܵܬ݇ ܨܲܕܪܵܐ ܕܕܲܝܵܢܘܼܬܵܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ، ܐܲܝܟ݂ ܦܘܼܠܚܵܢܵܐ ܕܐܸܦܘܿܕܵܐ ܬܲܪܨܸܬ ܠܵܗ̇؛ ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 16ܗܵܘܝܵܐ ܡܪܲܒܥܵܐ ܘܬܪܹܝ ܬܵܩܹ̈ܐ؛ ܚܲܕ ܨܝܼܛܵܐ ܝܘܼܪܟ݂ܘܼܬܘܼܗ̇ ܘܚܲܕ ܨܝܼܛܵܐ ܦܸܬܝܘܼܬܘܼܗ̇. 17ܡܲܬܒܸܬ ܓܵܘܘܼܗ̇ ܐܲܪܒܥܵܐ ܣܸܕܪܹ̈ܐ ܕܟܹܐܦܹ̈ܐ ܛܝܼܡܵܢܹ̈ܐ. ܒܣܸܕܪܵܐ ܩܵܕ݇ܡܵܝܵܐ: ܣܘܼܡܵܩܵܐ، ܙܵܪܓܵܐ، ܘܒܵܪܩܵܐ. 18ܒܣܸܕܪܵܐ ܕܬܪܹܝ: ܙܸܡܪܘܼܕ، ܦܝܼܪܘܼܙܵܐ، ܘܐܲܠܡܵܣ. 19ܒܣܸܕܪܵܐ ܕܬܠܵܬܵܐ: ܠܹܫܸܡ، ܘܲܫܡܵܐ، ܘܐܲܚܠܵܡܵܐ. 20ܘܒܣܸܕܪܵܐ ܕܐܲܪܒܥܵܐ: ܬܲܪܫܝܼܫ، ܫܘܼܗܲܡ، ܘܝܲܫܦܹܗ. ܟܠ ܚܲܕ ܡ̣ܢ ܐܲܢܹܐ ܟܹܐܦܹ̈ܐ ܛܝܼܡܵܢܹ̈ܐ ܗܵܘܝܼ ܡܘܼܕܒܸܩܹܐ ܒܕܲܗܒ݂ܵܐ ܒܚܪܵܙܬܲܝܗܝ. 21ܒܸܬ ܗܵܘܹܐ ܡܸܢܝܵܢܵܐ ܕܟܹܐܦܹ̈ܐ ܬܪܸܥܣܲܪ، ܐܲܝܟ݂ ܫܸܡܵܢܹ̈ܐ ܕܒܢܲܝ̈ ܝܼܣܪܵܝܹܠ، ܟܠ ܚܲܕ ܢܩܝܼܪܵܐ ܐܲܝܟ݂ ܚܵܬܡܵܐ، ܥܲܠܘܼܗܝ ܫܸܡܵܐ ܕܚܲܕ ܫܲܒ݂ܛܵܐ.

22ܘܬܲܪܨܸܬ ܥܲܠ ܒܪܵܬ݇ ܨܲܕܪܵܐ ܫܹܫܠܵܬܹ̈ܐ ܦܬܝܼܠܹ̈ܐ، ܐܲܝܟ݂ ܓܕܵܠܹ̈ܐ، ܡ̣ܢ ܕܲܗܒ݂ܵܐ ܨܸܦܝܵܐ، 23ܘܬܲܪܨܸܬ ܥܲܠ ܒܪܵܬ݇ ܨܲܕܪܵܐ ܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ، ܘܐܵܣܪܹܬ ܠܗܘܿܢ ܚܵܠܲܩܝܵܬܹ̈ܐ ܒܬܸܪܘܲܝܗܝ ܡܲܪ̈ܙܵܢܹܐ ܕܒܪܵܬ݇ ܨܲܕܪܵܐ. 24ܘܡܲܥܒܸܪܸܬ ܬܸܪܘܲܝܗܝ ܫܹܫܠܵܬܹ̈ܐ ܕܕܲܗܒ݂ܵܐ ܒܬܸܪܘܲܝܗܝ ܚܵܠܲܩܝܵܬܹ̈ܐ ܡ̣ܢ ܡܲܪ̈ܙܵܢܹܐ ܕܒܪܵܬ݇ ܨܲܕܪܵܐ. 25ܘܐܵܣܪܹܬ ܬܸܪܘܲܝܗܝ ܪܹ̈ܫܵܢܹܐ ܕܬܸܪܘܲܝܗܝ ܫܹܫܠܵܬܹ̈ܐ ܒܫܵܘܦܵܦܹ̈ܐ ܕܛܲܒ݂ܥܹ̈ܐ، ܘܡܲܡܛܸܝܬ ܠܗܘܿܢ ܥܲܠ ܩܸܛܥܵܐ ܕܪܘܼܦ̮ܫܵܐ ܕܐܸܦܘܿܕܵܐ ܡ̣ܢ ܠܵܩܵܕ݇ܡܵܐ. 26ܘܬܲܪܨܸܬ ܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ ܘܡܲܬܒܸܬ ܠܗܘܿܢ ܥܲܠ ܬܸܪܘܲܝܗܝ ܪܹ̈ܫܵܢܹܐ ܕܒܪܵܬ݇ ܨܲܕܪܵܐ، ܥܲܠ ܣܸܦܬܵܐ ܕܝܼܠܵܗ̇ ܠܓܹܒܵܐ ܕܐܸܦܘܿܕܵܐ ܡ̣ܢ ܠܓܵܘܵܐ. 27ܘܬܲܪܨܸܬ ܬܲܪܬܹܝ ܚܵܠܲܩܝܵܬܹ̈ܐ ܐ݇ܚܹܪ̈݇ܢܹܐ ܕܕܲܗܒ݂ܵܐ، ܘܡܲܬܒܸܬ ܠܗܘܿܢ ܥܲܠ ܬܸܪܘܲܝܗܝ ܪ̈ܘܼܦ̮ܫܵܢܹܐ ܕܐܸܦܘܿܕܵܐ، ܡ̣ܢ ܠܠܬܸܚܬ، ܠܵܩܵܕ݇ܡܵܐ، ܠܟܸܣ ܬܪ̈ܵܩܝܵܬܹܗ، ܥܸܠܸܠ ܡ̣ܢ ܙܘܼܢܵܪܵܐ ܕܐܸܦܘܿܕܵܐ. 28ܘܐܵܣܪܝܼ ܚܵܠܲܩܝܵܬܹ̈ܐ ܕܒܪܵܬ݇ ܨܲܕܪܵܐ ܒܚܵܠܲܩܝܵܬܹ̈ܐ ܕܐܸܦܘܿܕܵܐ ܒܓܸܕܵܐ ܡܝܼܠܵܐ، ܕܢܵܦܠܵܐ ܒܪܵܬ݇ ܨܲܕܪܵܐ ܥܲܠ ܙܘܼܢܵܪܵܐ ܕܐܸܦܘܿܕܵܐ، ܘܠܵܐ ܫܵܪܝܵܐ ܒܪܵܬ݇ ܨܲܕܪܵܐ ܡ̣ܢ ܐܸܦܘܿܕܵܐ.

29ܘܗܲܕܟ݂ܵܐ ܟܲܕ ܥܵܒܹܪ ܐܲܗܪܘܿܢ ܠܡܲܩܕܫܵܐ ܒܸܬ ܛܵܥܹܢ ܫܸܡܵܢܹ̈ܐ ܕܒܢܲܝ̈ ܝܼܣܪܵܝܹܠ ܒܒܪܵܬ݇ ܨܲܕܪܵܐ ܕܕܲܝܵܢܘܼܬܵܐ ܥܲܠ ܠܸܒܹܗ، ܠܡܲܕܟ݂ܘܼܪܲܝ ܩܵܕ݇ܡ ܡܵܪܝܵܐ ܐܲܡܝܼܢܵܐܝܼܬ. 30ܘܓܵܘ ܒܪܵܬ݇ ܨܲܕܪܵܐ ܕܕܲܝܵܢܘܼܬܵܐ ܡܲܬܒܸܬ ܐܘܼܪܝܼܡ ܘܬܘܼܡܝܼܡ#28‏:30 ܟܹܐܦܹ̈ܐ ܡܘܼܬܒܹ̈ܐ ܒܐܸܦܘܿܕܵܐ (ܫܸܪܝܵܢܵܐ، ܓܲܝܸܡܟ̰ܵܪܵܐ) ܕܟܵܗܢܵܐ ܥܸܠܵܝܵܐ ܕܸܪܝܹܐ ܦܸܫܟܹ̈ܐ ܠܝܼܕܵܥܵܐ ܩܛܵܥܬܵܐ ܕܐܲܠܵܗܵܐ ، ܕܗܵܘܝܼ ܥܲܠ ܠܸܒܵܐ ܕܐܲܗܪܘܿܢ ܟܲܕ ܥܵܒܹܪ ܩܵܕ݇ܡ ܡܵܪܝܵܐ. ܗܲܕܟ݂ܵܐ ܒܸܬ ܛܵܥܹܢ ܐܲܗܪܘܿܢ ܕܲܝܵܢܘܼܬܵܐ ܕܒܢܲܝ̈ ܝܼܣܪܵܝܹܠ ܥܲܠ ܠܸܒܹܗ ܩܵܕ݇ܡ ܡܵܪܝܵܐ ܐܲܡܝܼܢܵܐܝܼܬ.

ܓ̰ܘܼܠܹ̈ܐ ܐ݇ܚܹܪ̈݇ܢܹܐ ܕܟܵܗܢܹ̈ܐ

31”ܬܲܪܨܸܬ ܠܵܗ̇ ܥܵܒܵܝܬܵܐ ܕܐܸܦܘܿܕܵܐ ܟܠܵܗ̇ ܡ̣ܢ ܥܸܙܠܵܐ ܡܝܼܠܵܐ. 32ܗܵܘܹܐ ܥܲܠܘܼܗ̇ ܦܘܼܡܵܐ ܩܵܐ ܪܹܫܵܐ. ܚܵܕܸܪ̈ܘܵܢܹܐ ܕܦܘܼܡܵܐ ܗܵܘܝܼ ܙܩܝܼܪܹܐ ܒܦܘܼܠܚܵܢܵܐ ܕܙܲܩܵܪܵܐ، ܐܲܝܟ݂ ܦܬܵܚܬܵܐ ܕܟܠ ܚܲܕ ܠܒ݂ܘܼܫܵܐ ܠܵܐ ܦܵܝܫܝܼ ܟ̰ܘܼܢܟ̰ܸܪܹܐ. 33ܬܲܪܨܸܬ ܥܲܠ ܫܸܦܘܼܠܵܠܘܼ̈ܗ̇ ܪܸ̈ܡܘܼܢܹܐ ܕܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ ܘܩܸܪܡܝܼܙ ܒܟܠܲܝܗܝ ܚܵܕܸܪ̈ܘܵܢܘܼܗ̇؛ ܘܒܹܝܠܲܝܗܝ ܡܲܬܒܸܬ ܙܹܓܹ̈ܐ ܕܕܲܗܒ݂ܵܐ ܒܟܠܲܝܗܝ ܚܵܕܸܪ̈ܘܵܢܹܐ، 34ܚܲܕ ܙܹܓܵܐ ܕܕܲܗܒ݂ܵܐ ܘܚܲܕ ܪܸܡܘܼܢܵܐ، ܚܲܕ ܙܹܓܵܐ ܕܕܲܗܒ݂ܵܐ ܘܚܲܕ ܪܸܡܘܼܢܵܐ ܗܵܘܝܼ ܠܡܲܪ̈ܙܵܢܹܐ ܕܥܵܒܵܝܬܵܐ. 35ܠܵܒܹܫ ܠܵܗ̇ ܐܲܗܪܘܿܢ ܐܵܗܵܐ ܥܵܒܵܝܬܵܐ ܟܲܕ ܥܵܒܹܪ ܠܡܲܩܕܫܵܐ ܠܸܥܒ݂ܵܕܵܐ ܚܸܠܡܲܬ ܩܵܕ݇ܡ ܡܵܪܝܵܐ، ܕܙܲܢܓܸܪܝܼ ܙܹܓܹ̈ܐ ܟܲܕ ܥܵܒܹܪ ܘܦܵܠܹܛ ܐܲܗܪܘܿܢ ܕܠܵܐ ܡܵܐܹܬ.

36ܘܬܲܪܨܸܬ ܦܵܪܘܿܫܬܵܐ ܡ̣ܢ ܕܲܗܒ݂ܵܐ ܨܸܦܝܵܐ ܘܢܵܩܪܹܬ ܥܲܠܘܼܗ̇ ܐܲܢܹܐ ܚܲܒܪܹ̈ܐ ܐܲܝܟ݂ ܕܢܵܩܪܝܼ ܥܲܠ ܚܵܬܡܵܐ، ’ܩܘܼܕܫܵܐ ܠܡܵܪܝܵܐ.‘ 37ܡܲܩܘܸܝܬ ܠܵܗ̇ ܦܵܪܘܿܫܬܵܐ ܒܓܸܕܵܐ ܡܝܼܠܵܐ ܥܲܠ ܟܪܵܟ݂ܬܵܐ ܕܐܲܗܪܘܿܢ، ܡ̣ܢ ܠܵܩܵܕ݇ܡܵܐ ܕܟܪܵܟ݂ܬܵܐ. 38ܗܵܘܝܵܐ ܥܲܠ ܩܸܨܵܐ ܕܐܲܗܪܘܿܢ، ܘܗܵܕܵܐ ܛܵܥܹܢ ܐܲܗܪܘܿܢ ܓܢܵܗܵܐ ܕܒܢܲܝ̈ ܝܼܣܪܵܝܹܠ ܒܘܼܬ ܕܒ݂ܵܚܝܵܬܹ̈ܐ ܩܘܼܕܫܹ̈ܐ ܕܥܵܒ݂ܕܝܼ ܠܗܘܿܢ. ܗܵܘܝܵܐ ܒܕܵܝܸܡܘܼܬܵܐ ܥܲܠ ܩܸܨܵܐ ܕܐܲܗܪܘܿܢ، ܕܦܵܝܫܝܼ ܩܘܼܒܠܹܐ ܒܢܲܝ̈ ܝܼܣܪܵܝܹܠ ܩܵܕ݇ܡ ܡܵܪܝܵܐ.

39ܬܲܪܨܸܬ ܨܘܼܕܪܵܐ ܡܢܘܼܩܸܫܬܵܐ ܡ̣ܢ ܟܸܬܵܢܵܐ ܢܵܙܸܟ، ܘܬܲܪܨܸܬ ܟܪܵܟ݂ܬܵܐ ܕܟܸܬܵܢܵܐ ܢܵܙܸܟ، ܘܚܘܼܪܵܪܵܐ ܙܩܝܼܪܵܐ ܒܝܲܕ ܐܘܼܡܵܢܵܐ ܕܪ̈ܲܢܓܹܐ. 40ܘܬܲܪܨܸܬ ܩܵܐ ܒܢܘܿܢܹ̈ܐ ܕܐܲܗܪܘܿܢ ܨܘܼܕܪ̈ܵܬܹܐ، ܚܘܼܪܵܪܹ̈ܐ ܘܟܪ̈ܵܟ݂ܝܵܬܹܐ، ܠܐܝܼܩܵܪܵܐ ܘܠܣܸܩܠܵܐ. 41ܡܲܠܒܸܫܸܬ ܠܗܘܿܢ ܠܐܲܗܪܘܿܢ ܐܲܚܘܿܢܘܼܟ݂، ܘܠܒܢܘܿܢܘܼ̈ܗܝ ܥܲܡܹܗ. ܡܵܫܚܹܬ ܠܗܘܿܢ، ܘܣܵܝܡܹܬ ܠܗܘܿܢ ܘܩܲܕܫܸܬ ܠܗܘܿܢ ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. 42ܐܘܼܦ ܬܲܪܨܸܬ ܠܗܘܿܢ ܦܪ̈ܵܙܘܿܡܹܐ ܡ̣ܢ ܟܸܬܵܢܵܐ، ܕܟܲܣܝܼ ܫܘܼܠܚܵܝܘܼܬܲܝܗܝ؛ ܝܘܼܪܟ݂ܲܝܗܝ ܗܵܘܹܐ ܡ̣ܢ ܚܲܨܵܐ ܗܲܠ ܥܸܛܡܵܬܹ̈ܐ. 43ܐܲܢܹܐ ܠܵܒ݂ܫܝܼ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ ܟܲܕ ܥܵܒ݂ܪܝܼ ܠܡܲܫܟܲܢ ܘܲܥܕܵܐ ܝܲܢ ܩܲܪܒܸܢܝܼ ܠܡܲܕܒܚܵܐ ܠܸܥܒ݂ܵܕܵܐ ܚܸܠܡܲܬ ܓܵܘ ܡܲܩܕܫܵܐ، ܕܠܵܐ ܛܵܥܢܝܼ ܓܢܵܗܵܐ ܘܡܵܝܬܝܼ. ܐܵܗܵܐ ܩܵܢܘܿܢܵܐ ܝܠܹܗ ܠܥܵܠܲܡ، ܠܐܲܗܪܘܿܢ ܘܠܙܲܪܥܹܗ ܕܡ̣ܢ ܒܵܬ݇ܪ ܡܸܢܹܗ.

Currently Selected:

ܡܦܩܢܐ 28: ABTAB

Highlight

Copy

Compare