ܡܦܩܢܐ 27
27
ܒܢܵܝܬܵܐ ܕܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ
1”ܘܬܲܪܨܸܬ ܡܲܕܒܚܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ؛ ܚܲܡܸܫ ܝܲܡܝܼܢܹ̈ܐ ܝܘܼܪܟ݂ܘܼܬܹܗ ܘܚܲܡܸܫ ܝܲܡܝܼܢܹ̈ܐ ܦܸܬܝܘܼܬܹܗ. ܗܵܘܹܐ ܡܪܲܒܥܵܐ، ܘܬܠܵܬ ܝܲܡܝܼܢܹ̈ܐ ܪܵܡܘܼܬܹܗ. 2ܬܲܪܨܸܬ ܩܵܪ̈݇ܢܵܢܹܐ ܐܸܠܹܗ ܥܲܠ ܐܲܪܒܲܥ ܩܘܼܪ̈ܢܝܼܵܬܹܐ؛ ܘܩܵܪ̈݇ܢܵܢܘܼܗܝ ܗܵܘܝܼ ܚܲܕ ܩܸܛܥܵܐ ܡܸܢܹܗ. ܘܩܵܪܡܹܬ ܠܹܗ ܒܢܚܵܫܵܐ. 3ܬܲܪܨܸܬ ܡܲܪܸ̈ܓܠܹܐ ܠܸܫܩܵܠܵܐ ܩܸܛܡܵܐ، ܓܵܪ̈ܘܿܦܹܐ، ܛܵܣܹ̈ܐ، ܡܲܫܠܝܹ̈ܐ، ܟܪ̈ܘܿܠܹܐ، ܘܡܵܐܢܹ̈ܐ ܕܢܘܼܪܵܐ؛ ܟܠܲܝܗܝ ܡܵܐܢܘܼ̈ܗܝ ܬܲܪܨܸܬ ܠܗܘܿܢ ܡ̣ܢ ܢܚܵܫܵܐ. 4ܘܬܲܪܨܸܬ ܩܵܬܹܗ ܩܲܪܩܸܠ، ܦܘܼܠܚܵܢܵܐ ܕܓܲܪܕܵܐ، ܡ̣ܢ ܢܚܵܫܵܐ؛ ܘܥܲܠ ܓܲܪܕܵܐ ܬܲܪܨܸܬ ܐܲܪܒܲܥ ܚܵܠܲܩܝܵܬܹ̈ܐ ܕܢܚܵܫܵܐ ܥܲܠ ܐܲܪܒܲܥ ܩܘܼܪ̈ܢܝܼܵܬܹܐ. 5ܡܲܬܒܸܬ ܠܹܗ ܬܚܘܿܬ ܣܸܦܬܵܐ ܕܡܲܕܒܚܵܐ ܡ̣ܢ ܠܠܬܸܚܬ، ܗܵܕܵܐ ܕܓܲܪܕܵܐ ܡܵܛܹܐ ܗܲܠ ܦܲܠܓܵܐ ܕܡܲܕܒܚܵܐ. 6ܬܲܪܨܸܬ ܕܝܼܘܲܢܝܵܬܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ ܩܵܐ ܡܲܕܒܚܵܐ، ܘܩܵܪܡܹܬ ܠܗܘܿܢ ܒܢܚܵܫܵܐ. 7ܡܲܥܒܸܪܸܬ ܠܗܘܿܢ ܕܝܼܘܲܢܝܵܬܹ̈ܐ ܒܚܵܠܲܩܝܵܬܹ̈ܐ، ܡ̣ܢ ܬܸܪܘܲܝܗܝ ܕܸܦܢܵܬܹ̈ܐ ܕܡܲܕܒܚܵܐ ܟܲܕ ܦܵܐܹܫ ܛܥܝܼܢܵܐ. 8ܬܲܪܨܸܬ ܠܹܗ ܡܲܕܒܚܵܐ ܡ̣ܢ ܕܲܦܹ̈ܐ، ܣܦܝܼܩܵܐ ܡ̣ܢ ܓܵܘܹܗ. ܬܲܪܨܸܬ ܠܗܘܿܢ ܕܵܐܟ݂ܝܼ ܕܦܝܼܫ ܠܹܗ ܡܘܼܚܙܝܼܵܐ ܐܸܠܘܼܟ݂ ܒܛܘܼܪܵܐ.
ܬܵܪܲܨܬܵܐ ܕܕܵܪܬܵܐ ܕܡܲܫܟܢܵܐ
9”ܬܲܪܨܸܬ ܕܵܪܬܵܐ ܩܵܐ ܡܲܫܟܢܵܐ. ܠܓܹܒܵܐ ܕܝܲܡܝܼܢܵܐ ܕܕܵܪܬܵܐ ܗܵܘܝܼ ܣܸܬܪܹ̈ܐ ܥܒ݂ܝܼܕܹܐ ܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܐܸܡܵܐܐ ܝܲܡܝܼܢܹ̈ܐ ܝܘܼܪܟ݂ܘܼܬܲܝܗܝ ܩܵܐ ܚܲܕ ܓܹܒܵܐ. 10ܗܵܘܹܐ ܠܗܘܿܢ ܥܸܣܪܝܼ ܣܛܘܼܢܹ̈ܐ، ܘܥܸܣܪܝܼ ܣܵܡܟܹ̈ܐ ܕܢܚܵܫܵܐ؛ ܐܝܼܢܵܐ ܟܪ̈ܘܿܠܹܐ ܕܣܛܘܼܢܹ̈ܐ ܘܬܘܼܪ̈ܲܝܗܝ ܗܵܘܝܼ ܡ̣ܢ ܣܹܐܡܵܐ. 11ܗܲܕܟ݂ܵܐ ܐܘܼܦ ܠܓܹܒܵܐ ܕܓܲܪܒܝܵܐ ܕܕܵܪܬܵܐ ܗܵܘܝܼ ܣܸܬܪܹ̈ܐ ܒܝܘܼܪܟ݂ܵܐ ܕܐܸܡܵܐܐ ܝܲܡܝܼܢܹ̈ܐ. ܥܸܣܪܝܼ ܣܛܘܼܢܲܝ̈ܗܝ ܘܥܸܣܪܝܼ ܣܵܡܟܲܝ̈ܗܝ ܗܵܘܝܼ ܡ̣ܢ ܢܚܵܫܵܐ، ܐܝܼܢܵܐ ܟܪ̈ܘܿܠܹܐ ܕܣܛܘܼܢܹ̈ܐ ܘܬܘܼܪ̈ܲܝܗܝ ܗܵܘܝܼ ܡ̣ܢ ܣܹܐܡܵܐ.
12ܠܦܸܬܘܵܐ ܕܕܵܪܬܵܐ ܒܓܹܒܵܐ ܕܡܲܥܪܒ݂ܵܐ ܗܵܘܝܼ ܣܸܬܪܹ̈ܐ ܒܝܘܼܪܟ݂ܵܐ ܕܚܲܡܫܝܼ ܝܲܡܝܼܢܹ̈ܐ، ܥܲܡ ܥܸܣܪܵܐ ܣܛܘܼܢܹ̈ܐ ܘܥܸܣܪܵܐ ܣܵܡܟܹ̈ܐ. 13ܦܸܬܘܵܐ ܕܕܵܪܬܵܐ ܠܓܹܒܵܐ ܕܡܲܕܢܚܵܐ ܗܵܘܹܐ ܚܲܡܫܝܼ ܝܲܡܝܼܢܹ̈ܐ. 14ܣܸܬܪܹ̈ܐ ܠܚܲܕ ܓܹܒܵܐ ܗܵܘܝܼ ܚܲܡܫܲܥܣܲܪ ܝܲܡܝܼܢܹ̈ܐ، ܥܲܡ ܬܠܵܬܵܐ ܣܛܘܼܢܹ̈ܐ ܘܬܠܵܬܵܐ ܣܵܡܟܹ̈ܐ. 15ܠܓܹܒܵܐ ܐ݇ܚܹܪ݇ܢܵܐ، ܣܸܬܪܹ̈ܐ ܗܵܘܝܼ ܚܲܡܫܲܥܣܲܪ ܝܲܡܝܼܢܹ̈ܐ، ܬܠܵܬܵܐ ܣܛܘܼܢܹ̈ܐ ܘܬܠܵܬܵܐ ܣܵܡܟܹ̈ܐ.
16ܘܩܵܐ ܬܲܪܥܵܐ ܕܕܵܪܬܵܐ ܦܲܪܕܵܐ ܗܵܘܹܐ ܥܸܣܪܝܼ ܝܲܡܝܼܢܹ̈ܐ، ܬܘܼܪܨܵܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܟܸܬܵܢܵܐ ܢܵܙܸܟ ܩܡܝܼܛܵܐ، ܥܒ݂ܝܼܕܵܐ ܒܝܲܕ ܙܵܩܪܵܢܵܐ ܕܠܲܩܛܵܐ. ܗܵܘܹܐ ܠܹܗ ܐܲܪܒܥܵܐ ܣܛܘܼܢܹ̈ܐ ܘܐܲܪܒܥܵܐ ܣܵܡܟܹ̈ܐ. 17ܟܠܲܝܗܝ ܣܛܘܼܢܹ̈ܐ ܕܚܵܕܸܪ̈ܘܵܢܹܐ ܕܕܵܪܬܵܐ ܗܵܘܝܼ ܩܪܝܼܡܹܐ ܒܬܘܼܪܹ̈ܐ ܕܣܹܐܡܵܐ، ܘܟܪ̈ܘܿܠܲܝܗܝ ܗܵܘܝܼ ܕܣܹܐܡܵܐ ܘܣܵܡܟܲܝ̈ܗܝ ܕܢܚܵܫܵܐ. 18ܝܘܼܪܟ݂ܵܐ ܕܕܵܪܬܵܐ ܗܵܘܹܐ ܐܸܡܵܐܐ ܝܲܡܝܼܢܹ̈ܐ، ܦܸܬܘܘܼܗ̇ ܚܲܡܫܝܼ، ܘܪܵܡܘܼܬܘܼܗ̇ ܚܲܡܫܵܐ، ܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܘܣܵܡܟܲܝ̈ܗܝ ܕܢܚܵܫܵܐ. 19ܟܠܲܝܗܝ ܡܵܐܢܹ̈ܐ ܕܦܵܝܫܝܼ ܡܘܼܦܠܸܚܹܐ ܓܵܘ ܡܲܫܟܢܵܐ، ܘܟܠܲܝܗܝ ܣܸܟܵܟܘܼ̈ܗܝ، ܘܟܠܲܝܗܝ ܣܸܟܵܟܹ̈ܐ ܕܕܵܪܬܵܐ، ܗܵܘܝܼ ܡ̣ܢ ܢܚܵܫܵܐ.
ܡܸܫܚܵܐ ܘܠܲܚܡܵܐ ܕܦܵܬܘܿܪܹ̈ܐ
20ܘܦܵܩܕܹܬ ܠܒܢܲܝ̈ ܝܼܣܪܵܝܹܠ ܕܡܲܝܬܝܼ ܠܘܼܟ݂ ܡܸܫܚܵܐ ܕܙܲܝܬܵܐ ܨܸܦܝܵܐ، ܩܵܐ ܡܢܵܪܬܵܐ ܕܗܵܘܝܵܐ ܒܸܠܗܵܝܵܐ ܒܕܵܝܸܡܘܼܬܵܐ. 21ܓܵܘ ܡܲܫܟܲܢ ܘܲܥܕܵܐ، ܠܒܲܕܲܪ ܡ̣ܢ ܣܸܬܪܵܐ ܩܵܕ݇ܡ ܣܵܗܕܘܼܬܵܐ، ܐܲܗܪܘܿܢ ܘܒܢܘܿܢܘܼ̈ܗܝ ܗܵܘܝܼ ܬܲܓܒܘܼܪܘܼܗ̇ ܡ̣ܢ ܪܲܡܫܵܐ ܘܗܲܠ ܨܲܦܪܵܐ ܩܵܕ݇ܡ ܡܵܪܝܵܐ، ܩܵܢܘܿܢܵܐ ܐܵܡܝܼܢܵܝܵܐ ܡ̣ܢ ܕܵܘܪܵܐ ܠܕܵܘܪܵܐ ܩܵܐ ܒܢܲܝ̈ ܝܼܣܪܵܝܹܠ.
Currently Selected:
ܡܦܩܢܐ 27: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
