ܡܦܩܢܐ 26
26
ܬܵܪܲܨܬܵܐ ܕܡܲܫܟܢܵܐ
1”ܬܲܪܨܸܬ ܡܲܫܟܢܵܐ ܒܥܸܣܪܵܐ ܣܸܬܪܹ̈ܐ ܕܟܸܬܵܢܵܐ ܪܲܩܝܼܩܵܐ ܩܡܝܼܛܵܐ، ܘܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܥܲܡ ܟܪ̈ܘܿܒܹܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 2ܝܘܼܪܟ݂ܵܐ ܕܟܠ ܣܸܬܪܵܐ ܗܵܘܹܐ ܥܸܣܪܝܼ ܘܬܡܵܢܝܵܐ ܝܲܡܝܼܢܹ̈ܐ، ܘܦܸܬܘܹܗ ܐܲܪܒܲܥ ܝܲܡܝܼܢܹ̈ܐ؛ ܟܠܲܝܗܝ ܣܸܬܪܹ̈ܐ ܗܵܘܝܼ ܒܚܲܕ ܟܝܘܼܠܵܐ. 3ܚܲܡܫܵܐ ܣܸܬܪܹ̈ܐ ܗܵܘܝܼ ܠܗ̇ܘ ܓܹܒܵܐ، ܐ݇ܣܝܼܪܹܐ ܚܲܕ ܒܗ̇ܘ ܐ݇ܚܹܪ݇ܢܵܐ؛ ܘܚܲܡܫܵܐ ܐ݇ܚܹܪ̈݇ܢܹܐ ܠܗ̇ܘ ܓܹܒܵܐ، ܐ݇ܣܝܼܪܹܐ ܚܲܕ ܒܗ̇ܘ ܐ݇ܚܹܪ݇ܢܵܐ. 4ܬܲܪܨܸܬ ܚܵܠܲܩܝܵܬܹ̈ܐ ܡܝܼܠܹ̈ܐ ܠܣܸܦܬܵܐ ܕܣܸܬܪܵܐ ܒܲܪܵܝܵܐ ܡ̣ܢ ܪܹܐܙܵܐ ܩܵܕ݇ܡܵܝܵܐ، ܘܐܘܼܦ ܬܲܪܨܸܬ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܕܝܼܠܹܗ ܒܲܪܵܝܵܐ ܡ̣ܢ ܪܹܐܙܵܐ ܬܪܲܝܵܢܵܐ. 5ܬܲܪܨܸܬ ܚܲܡܫܝܼ ܚܵܠܲܩܝܵܬܹ̈ܐ ܥܲܠ ܚܲܕ ܣܸܬܪܵܐ، ܘܚܲܡܫܝܼ ܚܵܠܲܩܝܵܬܹ̈ܐ ܠܣܸܬܪܵܐ ܡܗ̇ܘ ܓܹܒܵܐ ܐ݇ܚܹܪ݇ܢܵܐ. ܚܵܠܲܩܝܵܬܹ̈ܐ ܗܵܘܝܼ ܒܲܠܩܘܼܒ݂ܠ ܕܚܲܕ ܠܗ̇ܘ ܐ݇ܚܹܪ݇ܢܵܐ. 6ܘܬܲܪܨܸܬ ܚܲܡܫܝܼ ܟܪ̈ܘܿܠܹܐ ܕܕܲܗܒ݂ܵܐ، ܘܐܵܣܪܹܬ ܠܗܘܿܢ ܣܸܬܪܹ̈ܐ ܚܲܕ ܒܗ̇ܘ ܐ݇ܚܹܪ݇ܢܵܐ، ܕܗܵܘܹܐ ܡܲܫܟܢܵܐ ܚܲܕ ܩܸܛܥܵܐ.
7ܐܘܼܦ ܙܹܐ ܬܲܪܨܸܬ ܣܸܬܪܹ̈ܐ ܡ̣ܢ ܣܲܥܪܵܐ ܕܥܸܙܹ̈ܐ ܩܵܐ ܡܲܟܲܣܬܵܐ ܕܡܲܫܟܢܵܐ؛ ܚܲܕܸܥܣܲܪ ܣܸܬܪܹ̈ܐ ܬܲܪܨܸܬ ܠܗܘܿܢ. 8ܝܘܼܪܟ݂ܵܐ ܕܟܠ ܣܸܬܪܵܐ ܗܵܘܹܐ ܬܠܵܬܝܼ ܝܲܡܝܼܢܹ̈ܐ، ܘܦܸܬܘܹܗ ܐܲܪܒܲܥ ܝܲܡܝܼܢܹ̈ܐ. ܟܠܲܝܗܝ ܣܸܬܪܹ̈ܐ ܗܵܘܝܼ ܒܚܲܕ ܟܝܘܼܠܵܐ. 9ܐܵܣܪܹܬ ܠܗܘܿܢ ܚܲܡܫܵܐ ܣܸܬܪܹ̈ܐ ܒܢܲܦ̮ܫܲܝܗܝ، ܘܐܸܫܬܵܐ ܣܸܬܪܹ̈ܐ ܒܢܲܦ̮ܫܲܝܗܝ. ܣܸܬܪܵܐ ܕܐܸܫܬܵܐ ܟܵܦܠܹܬ ܠܹܗ ܥܲܠ ܬܲܪܥܵܐ ܕܡܲܫܟܢܵܐ. 10ܬܲܪܨܸܬ ܚܲܡܫܝܼ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܐ݇ܚܵܪܵܝܵܐ ܒܚܲܕ ܓܹܒܵܐ، ܘܚܲܡܫܝܼ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܐ݇ܚܵܪܵܝܵܐ ܕܗ̇ܘ ܓܹܒܵܐ ܐ݇ܚܹܪ݇ܢܵܐ. 11ܘܬܲܪܨܸܬ ܚܲܡܫܝܼ ܟܪ̈ܘܿܠܹܐ ܕܢܚܵܫܵܐ، ܘܡܲܥܒܸܪܸܬ ܠܗܘܿܢ ܒܚܵܠܲܩܝܵܬܹ̈ܐ، ܘܐܵܣܪܹܬ ܠܗܘܿܢ ܒܝܼܲܝܗܝ؛ ܗܲܕܟ݂ܵܐ ܒܸܬ ܗܵܘܹܐ ܡܲܫܟܢܵܐ ܚܲܕ ܩܸܛܥܵܐ. 12ܘܦܲܠܓܵܐ ܕܟܠ ܡܸܢܕܝܼ ܕܙܵܐܹܕ ܡ̣ܢ ܣܸܬܪܵܐ ܒܸܬ ܗܵܘܹܐ ܟܲܣܵܝܬܵܐ ܕܒܵܬ݇ܪܵܐ ܕܡܲܫܟܢܵܐ. 13ܚܕܵܐ ܝܲܡܝܼܢܵܐ ܡ̣ܢ ܕܐܵܗܵܐ ܓܹܒܵܐ ܘܚܕܵܐ ܝܲܡܝܼܢܵܐ ܡ̣ܢ ܕܗ̇ܘ ܓܹܒܵܐ، ܡ̣ܢ ܙܵܘܕܘܼܢܝܘܼܬܵܐ ܕܝܘܼܪܟ݂ܵܐ ܕܣܸܬܪܵܐ ܦܵܝܫܝܼ ܬܸܠܝܹܐ ܥܲܠ ܕܸܦܢܵܬܹ̈ܐ ܩܵܐ ܟܲܣܵܝܬܹܗ. 14ܘܬܲܪܨܸܬ ܟܲܣܵܝܬܵܐ ܠܡܲܫܟܢܵܐ ܒܓܸܠܕܹ̈ܐ ܡܘܼܣܡܸܩܹ̈ܐ ܕܒܲܪ̈ܥܵܢܹܐ، ܘܟܲܣܵܝܬܵܐ ܕܓܸܠܕܹ̈ܐ ܕܟܲܠܒܹ̈ܐ ܕܝܵܡܵܐ ܡܲܠܒܸܫܸܬ ܥܲܠܘܼܗ̇.
15ܬܲܪܨܸܬ ܕܲܦܹ̈ܐ ܠܡܲܫܟܢܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܡܲܟܠܸܝܬ ܠܗܘܿܢ ܠܐܲܩܠܲܝܗܝ. 16ܟܠ ܕܲܦܵܐ ܗܵܘܝܵܐ ܥܣܲܪ ܝܲܡܝܼܢܹ̈ܐ ܝܲܪܝܼܟ݂ܬܵܐ، ܘܝܲܡܝܼܢܵܐ ܘܦܲܠܓܹܐ ܦܬܝܼܬܵܐ. 17ܥܲܠ ܟܠ ܕܲܦܵܐ ܗܵܘܝܼ ܬܲܪܬܹܝ ܠܸܫܲܢܝܵܬܹ̈ܐ، ܕܠܵܚܡܝܼ ܠܗ̇ܝ ܕܲܦܵܐ ܐ݇ܚܹܪ݇ܬܵܐ. ܗܲܕܟ݂ܵܐ ܬܲܪܨܸܬ ܠܗܘܿܢ ܟܠܲܝܗܝ ܕܲܦܹ̈ܐ ܕܡܲܫܟܢܵܐ. 18ܬܲܪܨܸܬ ܥܸܣܪܝܼ ܡ̣ܢ ܕܐܲܢܹܐ ܕܲܦܹ̈ܐ ܠܓܹܒܵܐ ܕܬܲܝܡܢܵܐ ܕܡܲܫܟܢܵܐ. 19ܘܬܲܪܨܸܬ ܐܲܪܒܥܝܼ ܣܵܡܟܹ̈ܐ ܕܣܹܐܡܵܐ ܘܡܲܬܒܸܬ ܠܗܘܿܢ ܬܚܘܿܬ ܕܐܲܢܹܐ ܕܲܦܹ̈ܐ، ܬܪܹܝ ܣܵܡܟܹ̈ܐ ܬܚܘܿܬ ܚܕܵܐ ܕܲܦܵܐ ܩܵܐ ܬܲܪܬܹܝ ܠܸܫܲܢܝܵܬܹ̈ܗ، ܘܬܪܹܝ ܣܵܡܟܹ̈ܐ ܬܚܘܿܬ ܕܗ̇ܝ ܕܲܦܵܐ ܐ݇ܚܹܪ݇ܬܵܐ ܩܵܐ ܬܲܪܬܹܝ ܠܸܫܲܢܝܵܬܹ̈ܗ. 20ܠܕܸܦܢܵܐ ܕܬܲܪܬܹܝ ܕܡܲܫܟܢܵܐ، ܡ̣ܢ ܓܹܒܵܐ ܕܓܲܪܒܝܵܐ ܕܡܲܫܟܢܵܐ، ܥܸܣܪܝܼ ܕܲܦܹ̈ܐ، 21ܘܐܲܪܒܥܝܼ ܣܵܡܟܹ̈ܐ ܕܣܹܐܡܵܐ، ܬܪܹܝ ܣܵܡܟܹ̈ܐ ܬܚܘܿܬ ܚܕܵܐ ܕܲܦܵܐ، ܘܬܪܹܝ ܣܵܡܟܹ̈ܐ ܬܚܘܿܬ ܕܗ̇ܝ ܕܲܦܵܐ ܐ݇ܚܹܪ݇ܬܵܐ. 22ܘܩܵܐ ܒܵܬ݇ܪܵܐ ܕܡܲܫܟܢܵܐ، ܠܓܹܒܵܐ ܕܡܲܥܪܒ݂ܵܐ، ܬܲܪܨܸܬ ܐܸܫܸܬ ܕܲܦܹ̈ܐ. 23ܘܬܲܪܨܸܬ ܬܲܪܬܹܝ ܕܲܦܹ̈ܐ ܩܵܐ ܩܘܼܪ̈ܢܝܼܵܬܹܐ ܕܡܲܫܟܢܵܐ ܡ̣ܢ ܒܵܬ݇ܪܵܐ. 24ܐܲܢܹܐ ܕܲܦܹ̈ܐ ܗܵܘܝܼ ܙܵܘܓܵܐ ܡ̣ܢ ܠܠܬܸܚܬ، ܘܩܕܝܼܚܹܐ ܒܥܘܼܕܵܠܹ̈ܐ ܡ̣ܢ ܥܸܠܸܠ ܒܚܕܵܐ ܚܵܠܲܩܬܵܐ. ܬܸܪܘܲܝܗܝ ܕܲܦܹ̈ܐ ܕܩܘܼܪ̈ܢܝܼܵܬܹܐ ܦܵܝܫܝܼ ܬܘܼܪܨܹܐ ܐܲܝܟ݂ ܚܕܵܕܹ̈ܐ. 25ܗܲܕܟ݂ܵܐ ܗܵܘܝܼ ܬܡܵܢܝܵܐ ܕܲܦܹ̈ܐ، ܥܲܡ ܐܸܫܬܲܥܣܲܪ ܣܵܡܟܲܝ̈ܗܝ ܕܣܹܐܡܵܐ، ܬܪܹܝ ܣܵܡܟܹ̈ܐ ܬܚܘܿܬ ܚܲܕ ܕܲܦܵܐ، ܘܬܪܹܝ ܣܵܡܟܹ̈ܐ ܬܚܘܿܬ ܕܗ̇ܝ ܕܲܦܵܐ ܐ݇ܚܹܪ݇ܬܵܐ.
26ܬܲܪܨܸܬ ܥܲܡܘܼܕܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܚܲܡܫܵܐ ܩܵܐ ܕܲܦܹ̈ܐ ܕܚܲܕ ܓܹܒܵܐ ܕܡܲܫܟܢܵܐ، 27ܘܚܲܡܫܵܐ ܩܵܐ ܕܲܦܹ̈ܐ ܕܗ̇ܝ ܕܸܦܢܵܐ ܐ݇ܚܹܪ݇ܬܵܐ ܕܡܲܫܟܢܵܐ، ܘܚܲܡܫܵܐ ܐ݇ܚܹܪ̈݇ܢܹܐ ܩܵܐ ܒܵܬ݇ܪܵܐ ܕܡܲܫܟܢܵܐ ܠܓܹܒܵܐ ܕܡܲܥܪܒ݂ܵܐ. 28ܥܲܡܘܼܕܵܐ ܕܒܹܝܬ݇ ܦܲܠܓܵܐ ܡ̣ܢ ܦܲܠܓܵܐ ܕܪܵܡܘܼܬܵܐ ܕܕܲܦܹ̈ܐ ܦܵܐܹܫ ܡܘܼܥܒܸܪܵܐ ܡ̣ܢ ܓܹܒܵܐ ܠܓܹܒܵܐ. 29ܩܵܪܡܹܬ ܠܕܲܦܹ̈ܐ ܒܕܲܗܒ݂ܵܐ، ܘܬܲܪܨܸܬ ܚܵܠܲܩܝܵܬܹ̈ܐ ܕܕܲܗܒ݂ܵܐ ܠܸܛܥܵܢܵܐ ܠܥܲܡܘܼܕܹ̈ܐ، ܘܠܥܲܡܘܼܕܹ̈ܐ ܩܵܪܡܹܬ ܒܕܲܗܒ݂ܵܐ.
30ܗ̇ܝܓܵܗ ܡܲܩܸܡܸܬ ܡܲܫܟܢܵܐ ܐܲܝܟ݂ ܫܸܟܠܵܐ ܕܦܝܼܫ ܠܹܗ ܡܘܼܚܙܝܼܵܐ ܐܸܠܘܼܟ݂ ܒܛܘܼܪܵܐ. 31ܬܲܪܨܸܬ ܣܸܬܪܵܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܪܲܩܝܼܩܵܐ ܩܡܝܼܛܵܐ، ܥܲܠܘܼܗܝ ܫܸܟܠܹ̈ܐ ܕܟܪ̈ܘܿܒܹܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 32ܬܵܠܹܝܬ ܠܹܗ ܥܲܠ ܐܲܪܒܥܵܐ ܣܛܘܼܢܹ̈ܐ ܕܐܵܩܵܩܝܼܵܐ ܩܪܝܼܡܹܐ ܒܕܲܗܒ݂ܵܐ، ܐܘܼܦ ܟܪ̈ܘܿܠܲܝܗܝ ܡ̣ܢ ܕܲܗܒ݂ܵܐ، ܡܘܼܠܚܸܡܹܐ ܠܐܲܪܒܥܵܐ ܣܵܡܟܹ̈ܐ ܕܣܹܐܡܵܐ. 33ܬܵܠܹܝܬ ܠܹܗ ܣܸܬܪܵܐ ܒܝܲܕ ܟܪ̈ܘܿܠܹܐ، ܘܡܲܥܒܸܪܸܬ ܩܹܒ݂ܘܼܬܵܐ ܕܣܵܗܕܘܼܬܵܐ ܡ̣ܢ ܓܵܘܹܗ، ܘܡܲܬܒܸܬ ܠܵܗ̇ ܠܒܵܬ݇ܪܵܐ ܣܸܬܪܵܐ. ܣܸܬܪܵܐ ܒܸܬ ܗܵܘܹܐ ܦܵܪܫܵܢܵܐ ܕܕܘܼܟܵܐ ܩܘܼܕܸܫܬܵܐ ܡ̣ܢ ܩܕܘܿܫ ܩܘܼܕܫܹ̈ܐ. 34ܗ̇ܝܓܵܗ ܡܲܬܒܸܬ ܟܲܣܵܝܬܵܐ ܕܚܘܼܣܵܝܵܐ ܥܲܠ ܩܹܒ݂ܘܼܬܵܐ ܕܣܵܗܕܘܼܬܵܐ، ܓܵܘ ܩܕܘܿܫ ܩܘܼܕܫܹ̈ܐ. 35ܡܲܬܒܸܬ ܠܹܗ ܦܵܬܘܿܪܵܐ ܠܒܲܕܲܪ ܡ̣ܢ ܣܸܬܪܵܐ، ܘܡܢܵܪܬܵܐ ܠܒܲܠܩܘܼܒ݂ܠ ܕܦܵܬܘܿܪܵܐ، ܠܓܹܒܵܐ ܕܬܲܝܡܢܵܐ ܕܡܲܫܟܢܵܐ؛ ܘܦܵܬܘܿܪܵܐ ܡܲܬܒܸܬ ܠܹܗ ܠܓܹܒܵܐ ܕܓܲܪܒܝܵܐ.
36ܬܲܪܨܸܬ ܦܲܪܕܵܐ ܩܵܐ ܬܲܪܥܵܐ ܕܡܲܫܟܢܵܐ، ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ؛ ܬܲܪܨܸܬ ܠܹܗ ܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܦܘܼܠܚܵܢܵܐ ܕܙܵܩܪܵܢܵܐ ܕܠܲܩܛܹ̈ܐ. 37ܬܲܪܨܸܬ ܩܵܐ ܦܲܪܕܵܐ ܚܲܡܫܵܐ ܣܛܘܼܢܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܩܵܪܡܹܬ ܠܗܘܿܢ ܒܕܲܗܒ݂ܵܐ؛ ܐܘܼܦ ܟܪ̈ܘܿܠܲܝܗܝ ܗܵܘܝܼ ܕܲܗܒ݂ܵܐ. ܘܬܲܪܨܸܬ ܩܵܬܲܝܗܝ ܚܲܡܫܵܐ ܣܵܡܟܹ̈ܐ ܕܢܚܵܫܵܐ.
Currently Selected:
ܡܦܩܢܐ 26: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
