ܡܦܩܢܐ 25
25
ܬܵܪܲܨܬܵܐ ܕܡܲܫܟܢܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 2”ܐ݇ܡܘܿܪ ܠܒܢܲܝ̈ ܝܼܣܪܵܝܹܠ ܕܡܲܝܬܝܼ ܐܸܠܝܼ ܕܸܒ݂ܚܵܐ، ܡ̣ܢ ܟܠ ܐ݇ܢܵܫܵܐ ܐܲܝܟ݂ ܕܒܵܥܹܐ ܠܸܒܹܗ ܫܵܩܠܝܼܬܘܿܢ ܕܸܒ݂ܚܵܐ. 3ܐܵܗܵܐ ܝܠܹܗ ܕܸܒ݂ܚܵܐ ܕܫܵܩܠܝܼܬܘܿܢ ܡܸܢܲܝܗܝ: ܕܲܗܒ݂ܵܐ، ܣܹܐܡܵܐ، ܘܢܚܵܫܵܐ، 4ܘܡܝܼܠܵܐ، ܘܐܲܪܓܘܵܢܵܐ ܘܩܸܪܡܝܼܙ، ܘܟܸܬܵܢܵܐ ܪܲܩܝܼܩܵܐ، ܘܣܲܥܪܵܐ ܕܥܸܙܹ̈ܐ؛ 5ܓܸܠܕܹ̈ܐ ܡܘܼܣܡܸܩܹ̈ܐ ܕܒܲܪ̈ܥܵܢܹܐ، ܓܸܠܕܹ̈ܐ ܕܟܲܠܒܹ̈ܐ ܕܝܵܡܵܐ، ܘܩܲܝܣܹ̈ܐ ܕܐܵܩܵܩܝܼܵܐ؛ 6ܡܸܫܚܵܐ ܩܵܐ ܡܢܵܪܬܵܐ، ܒܸܣܡܹ̈ܐ ܩܵܐ ܡܸܫܚܵܐ ܕܡܫܵܚܬܵܐ ܘܒܸܣܡܵܐ ܪܹܝܚܵܢܵܐ؛ 7ܘܟܹܐܦܹ̈ܐ ܕܫܘܼܗܲܡ، ܘܟܹܐܦܹ̈ܐ ܛܝܼܡܵܢܹ̈ܐ، ܕܦܵܝܫܝܼ ܚܪܝܼܙܹܐ ܥܲܠ ܐܸܦܘܿܕܵܐ ܘܥܲܠ ܒܪܵܬ݇ ܨܲܕܪܵܐ. 8ܬܲܪܨܝܼ ܐܸܠܝܼ ܡܲܩܕܫܵܐ ܕܫܵܪܹܝܢ ܒܓܵܘܲܝܗܝ. 9ܬܲܪܨܝܼܬܘܿܢ ܠܹܗ ܐܵܗܵܐ ܡܲܫܟܢܵܐ ܘܟܠܲܝܗܝ ܡܸܢܕܝܼܵܢܹ̈ܐ ܕܓܵܘܹܗ ܐܲܝܟ݂ ܕܐܵܢܵܐ ܡܲܚܙܸܝܢܘܼܟ݂.
ܒܢܵܝܬܵܐ ܕܩܹܒ݂ܘܼܬܵܐ ܕܩܵܘܠܵܐ
10”ܬܲܪܨܝܼ ܩܹܒ݂ܘܼܬܵܐ ܡ̣ܢ ܩܲܝܣܵܐ ܕܐܵܩܵܩܝܼܵܐ، ܬܲܪܬܹܝ ܝܲܡܝܼܢܹ̈ܐ ܘܦܲܠܓܵܐ ܝܘܼܪܟ݂ܘܼܬܘܼܗ̇، ܝܲܡܝܼܢܵܐ ܘܦܲܠܓܵܐ ܦܸܬܝܘܼܬܘܼܗ̇، ܘܝܲܡܝܼܢܵܐ ܘܦܲܠܓܵܐ ܪܵܡܘܼܬܘܼܗ̇. 11ܩܵܪܡܹܬ ܠܵܗ̇ ܒܕܲܗܒ݂ܵܐ ܨܸܦܝܵܐ ܡ̣ܢ ܠܓܵܘܵܐ ܘܡ̣ܢ ܠܒܲܕܲܪ، ܘܟܵܪܟܹܬ ܠܚܵܕܸܪ̈ܘܵܢܘܼܗ̇ ܒܡܲܠܒ݂ܵܫܵܐ ܕܕܲܗܒ݂ܵܐ. 12ܘܕܵܪܹܝܬ ܥܲܠܘܼܗ̇ ܐܲܪܒܲܥ ܚܵܠܲܩܝܵܬܹ̈ܐ ܕܕܲܗܒ݂ܵܐ ܘܐܵܣܪܹܬ ܠܗܘܿܢ ܒܐܲܪܒܲܥ ܐܲܩܠܵܬܘܼ̈ܗ̇، ܬܲܪܬܹܝ ܥܲܠ ܚܕܵܐ ܕܸܦܢܘܼܗ̇، ܘܬܲܪܬܹܝ ܐ݇ܚܹܪ̈݇ܢܹܐ ܥܲܠ ܕܗ̇ܝ ܕܸܦܢܘܼܗ̇ ܐ݇ܚܹܪ݇ܬܵܐ. 13ܬܲܪܨܸܬ ܕܝܼܘܲܢܝܵܬܹ̈ܐ ܡ̣ܢ ܩܲܝܣܵܐ ܕܐܵܩܵܩܝܼܵܐ، ܘܩܵܪܡܹܬ ܠܗܘܿܢ ܒܕܲܗܒ݂ܵܐ. 14ܡܲܥܒܸܪܸܬ ܠܗܘܿܢ ܕܝܼܘܲܢܝܵܬܹ̈ܐ ܒܚܵܠܲܩܝܵܬܹ̈ܐ ܡ̣ܢ ܕܸܦܢܵܬܹ̈ܐ ܕܩܹܒ݂ܘܼܬܵܐ، ܕܦܵܝܫܵܐ ܛܥܝܼܢܬܵܐ ܒܝܼܲܝܗܝ. 15ܐܲܢܹܐ ܕܝܼܘܲܢܝܵܬܹ̈ܐ ܗܵܘܝܼ ܗܲܡܵܫܵܐ ܓܵܘ ܚܵܠܲܩܝܵܬܹ̈ܐ ܕܩܹܒ݂ܘܼܬܵܐ؛ ܠܵܐ ܦܵܝܫܝܼ ܦܘܼܠܛܹܐ ܡ̣ܢ ܕܘܼܟܲܝܗܝ. 16ܘܡܲܬܒܸܬ ܓܵܘ ܩܹܒ݂ܘܼܬܵܐ ܠܘܼܚܹ̈ܐ ܕܣܵܗܕܘܼܬܵܐ ܕܝܵܗ݇ܒܹܢܗܘܿܢ ܐܸܠܘܼܟ݂.
17ܬܲܪܨܸܬ ܟܲܣܵܝܬܵܐ ܕܚܘܼܣܵܝܵܐ ܡ̣ܢ ܕܲܗܒ݂ܵܐ ܨܸܦܝܵܐ، ܬܲܪܬܹܝ ܝܲܡܝܼܢܹ̈ܐ ܘܦܲܠܓܹܐ ܝܘܼܪܟ݂ܘܼܬܹܗ ܘܝܲܡܝܼܢܵܐ ܘܦܲܠܓܹܐ ܦܸܬܝܘܼܬܹܗ. 18ܘܬܲܪܨܸܬ ܬܪܹܝ ܟܪ̈ܘܿܒܹܐ ܕܕܲܗܒ݂ܵܐ، ܦܘܼܠܚܵܢܵܐ ܕܐܘܼܡܵܢܵܐ، ܘܡܲܬܒܸܬ ܒܬܸܪܘܲܝܗܝ ܪܹ̈ܫܵܢܹܐ ܕܟܲܣܵܝܬܵܐ ܕܚܘܼܣܵܝܵܐ. 19ܬܲܪܨܸܬ ܚܲܕ ܟܪܘܿܒ݂ܵܐ ܒܐܵܗܵܐ ܪܹܫܵܐ، ܘܚܲܕ ܒܗ̇ܘ ܪܹܫܵܐ ܐ݇ܚܹܪ݇ܢܵܐ. ܚܲܕ ܩܸܛܥܵܐ ܥܲܡ ܟܲܣܵܝܬܵܐ ܕܚܘܼܣܵܝܵܐ ܬܲܪܨܝܼܬܘܿܢ ܟܪ̈ܘܿܒܹܐ ܥܲܠ ܬܸܪܘܲܝܗܝ ܪܹ̈ܫܵܢܘܼܗܝ. 20ܗܵܘܝܼ ܓܘܼܠܦܵܢܹ̈ܐ ܕܟܪ̈ܘܿܒܹܐ ܒܸܦܪܵܣܵܐ ܠܥܸܠܸܠ؛ ܒܓܘܼܠܦܵܢܲܝ̈ܗܝ ܗܵܘܝܼ ܟܲܣܘܼܝܹܐ ܠܚܘܼܣܵܝܵܐ. ܦܵܬܘܵܬܲܝ̈ܗܝ ܚܲܕ ܠܗ̇ܘ ܐ݇ܚܹܪ݇ܢܵܐ؛ ܦܵܬܘܵܬܹ̈ܐ ܕܟܪ̈ܘܿܒܹܐ ܗܵܘܝܼ ܠܓܹܒܵܐ ܕܟܲܣܵܝܬܵܐ ܕܚܘܼܣܵܝܵܐ. 21ܡܲܬܒܸܬ ܠܵܗ̇ ܟܲܣܵܝܬܵܐ ܕܚܘܼܣܵܝܵܐ ܥܲܠ ܩܹܒ݂ܘܼܬܵܐ، ܠܥܸܠܸܠ، ܘܡܲܬܒܸܬ ܓܵܘ ܩܹܒ݂ܘܼܬܵܐ ܠܘܼܚܹ̈ܐ ܕܣܵܗܕܘܼܬܵܐ ܕܝܵܗ݇ܒܹܢܗܘܿܢ ܐܸܠܘܼܟ݂. 22ܬܵܡܵܐ ܒܸܬ ܬܵܦܩܹܢ ܒܝܼܘܼܟ݂، ܡܥܲܠ ܟܲܣܵܝܬܵܐ ܕܚܘܼܣܵܝܵܐ، ܡ̣ܢ ܒܹܝܠ ܬܪܹܝ ܟܪ̈ܘܿܒܹܐ ܕܝܼܢܵܐ ܥܲܠ ܩܹܒ݂ܘܼܬܵܐ ܕܣܵܗܕܘܼܬܵܐ، ܘܒܸܬ ܗܲܡܙܸܡܸܢ ܥܲܡܘܼܟ݂ ܟܠ ܡܸܢܕܝܼ ܕܦܵܩܕܹܢ ܐܸܠܘܼܟ݂ ܒܘܼܬ ܒܢܲܝ̈ ܝܼܣܪܵܝܹܠ.“
ܬܵܪܲܨܬܵܐ ܕܦܵܬܘܿܪܵܐ ܘܡܵܐܢܹ̈ܐ
23”ܬܲܪܨܸܬ ܦܵܬܘܿܪܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܬܲܪܬܹܝ ܝܲܡܝܼܢܹ̈ܐ ܝܘܼܪܟ݂ܘܼܬܹܗ، ܘܚܕܵܐ ܝܲܡܝܼܢܵܐ ܦܸܬܝܘܼܬܹܗ، ܘܝܲܡܝܼܢܵܐ ܘܦܲܠܓܹܐ ܪܵܡܘܼܬܹܗ. 24ܩܵܪܡܹܬ ܠܹܗ ܒܕܲܗܒ݂ܵܐ ܨܸܦܝܵܐ، ܘܥܵܒ݂ܕܹܬ ܠܚܵܕܸܪ̈ܘܵܢܘܼܗܝ ܟܠܝܼܠܵܐ ܕܕܲܗܒ݂ܵܐ. 25ܘܬܲܪܨܸܬ ܩܵܬܹܗ ܣܸܦܬܵܐ ܠܚܵܕܸܪ̈ܘܵܢܘܼܗܝ ܐܲܝܟ݂ ܦܸܬܝܘܼܬܵܐ ܕܐܝܼܕܵܐ، ܘܬܲܪܨܸܬ ܟܠܝܼܠܵܐ ܕܕܲܗܒ݂ܵܐ ܠܚܵܕܸܪ̈ܘܵܢܹܐ ܕܣܸܦܬܵܐ. 26ܬܲܪܨܸܬ ܐܸܠܹܗ ܐܲܪܒܲܥ ܚܵܠܲܩܝܵܬܹ̈ܐ ܕܕܲܗܒ݂ܵܐ، ܘܡܲܬܒܸܬ ܠܗܘܿܢ ܥܲܠ ܐܲܪܒܲܥ ܩܘܼܪ̈ܢܝܼܵܬܹܐ ܕܝܼܢܵܐ ܝ݇ܬܝܼܒܹܐ ܥܲܠ ܐܲܪܒܲܥ ܐܲܩܠܵܬܹ̈ܗ. 27ܚܵܠܲܩܝܵܬܹ̈ܐ ܗܵܘܝܼ ܩܘܼܪܒܵܐ ܠܣܸܦܬܵܐ ܠܸܢܛܵܪܵܐ ܠܕܝܼܘܲܢܝܵܬܹ̈ܐ ܟܲܕ ܦܵܐܹܫ ܛܥܝܼܢܵܐ ܦܵܬܘܿܪܵܐ. 28ܬܲܪܨܸܬ ܠܗܘܿܢ ܕܝܼܘܲܢܝܵܬܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܩܵܪܡܹܬ ܠܗܘܿܢ ܒܕܲܗܒ݂ܵܐ، ܘܒܝܼܲܝܗܝ ܦܵܐܹܫ ܛܥܝܼܢܵܐ ܦܵܬܘܿܪܵܐ. 29ܬܲܪܨܸܬ ܡ̣ܢ ܕܲܗܒ݂ܵܐ ܨܸܦܝܵܐ ܦܝܼܠܵܣܘܼ̈ܗܝ، ܘܟܵܣܘܼ̈ܗܝ، ܘܛܵܣܘܼ̈ܗܝ ܘܙܵܒ݂ܘܿܪ̈ܘܼܗܝ، ܩܵܐ ܨܲܢܨܘܼܠܹܐ ܒܝܼܲܝܗܝ. 30ܘܡܲܬܒܸܬ ܥܲܠ ܐܵܗܵܐ ܦܵܬܘܿܪܵܐ ܠܚܹܡ ܐܲܦܹ̈ܐ ܕܐܲܡܝܼܢܵܐܝܼܬ ܗܵܘܹܐ ܩܵܕ݇ܡ ܦܵܬܝܼ.
ܬܵܪܲܨܬܵܐ ܕܡܢܵܪܬܵܐ
31”ܬܲܪܨܸܬ ܡܢܵܪܬܵܐ ܡ̣ܢ ܕܲܗܒ݂ܵܐ ܨܸܦܝܵܐ. ܒܵܣܸܣ ܕܝܼܘܼܗ̇ ܘܦܲܥܘܘܼܗ̇ ܦܵܝܫܝܼ ܬܘܼܪܨܹܐ ܒܐܘܼܡܵܢܵܐ، ܘܦܝܼܵܠܘܼ̈ܗ̇ ܘܛܥܘܼܢܝܵܬܘܼ̈ܗ̇ ܘܦܸܩܚܘܼ̈ܗ̇ ܗܵܘܝܼ ܒܚܲܕ ܩܸܛܥܵܐ ܡܸܢܘܼܗ̇. 32ܗܵܘܹܐ ܠܵܗ̇ ܐܸܫܬܵܐ ܦܲܥܘܵܢܹ̈ܐ ܒܸܦܠܵܛܵܐ ܡ̣ܢ ܕܸܦܢܵܬܘܼ̈ܗ̇، ܬܠܵܬܵܐ ܦܲܥܘܵܢܹ̈ܐ ܡ̣ܢ ܚܕܵܐ ܕܸܦܢܘܼܗ̇، ܘܬܠܵܬܵܐ ܡ̣ܢ ܕܗ̇ܝ ܕܸܦܢܘܼܗ̇ ܐ݇ܚܹܪ݇ܬܵܐ. 33ܬܠܵܬܵܐ ܦܝܼܵܠܹ̈ܐ ܬܘܼܪܨܹܐ ܐܲܝܟ݂ ܫܲܓ݂݇ܕܹ̈ܐ، ܟܠ ܚܲܕ ܒܝܼܹܗ ܛܥܘܼܢܬܵܐ، ܘܦܸܩܚܵܐ ܕܗܵܘܝܼ ܥܲܠ ܚܲܕ ܦܲܥܘܵܐ، ܘܬܠܵܬܵܐ ܦܝܼܵܠܹ̈ܐ ܬܘܼܪܨܹܐ ܐܲܝܟ݂ ܫܲܓ݂݇ܕܹ̈ܐ، ܟܠ ܚܲܕ ܒܝܼܹܗ ܛܥܘܼܢܬܵܐ، ܘܦܸܩܚܵܐ ܠܗ̇ܘ ܓܹܒܵܐ ܐ݇ܚܹܪ݇ܢܵܐ. ܗܲܕܟ݂ܵܐ ܦܵܠܛܝܼ ܐܸܫܬܵܐ ܦܲܥܘܵܢܹ̈ܐ ܡ̣ܢ ܡܢܵܪܬܵܐ. 34ܒܡܢܵܪܬܵܐ ܗܵܘܝܼ ܐܲܪܒܥܵܐ ܦܝܼܵܠܹ̈ܐ ܬܘܼܪܨܹܐ ܐܲܝܟ݂ ܫܲܓ݂݇ܕܹ̈ܐ، ܒܛܥܘܼܢܝܵܬܘܼ̈ܗ̇ ܘܦܸܩܚܘܼ̈ܗ̇. 35ܚܕܵܐ ܛܥܘܼܢܬܵܐ ܗܵܘܝܵܐ ܬܚܘܿܬ ܚܲܕ ܙܵܘܓܵܐ ܕܦܲܥܘܵܢܹ̈ܐ ܒܚܲܕ ܩܸܛܥܵܐ ܡܸܢܘܼܗ̇، ܚܕܵܐ ܛܥܘܼܢܬܵܐ ܬܚܘܿܬ ܚܲܕ ܙܵܘܓܵܐ ܐ݇ܚܹܪ݇ܢܵܐ ܕܦܲܥܘܵܢܹ̈ܐ ܒܚܲܕ ܩܸܛܥܵܐ ܡܸܢܘܼܗ̇، ܚܕܵܐ ܛܥܘܼܢܬܵܐ ܬܚܘܿܬ ܗ̇ܘ ܙܵܘܓܵܐ ܐ݇ܚܹܪ݇ܢܵܐ، ܒܚܲܕ ܩܸܛܥܵܐ ܡܸܢܘܼܗ̇، ܗܲܕܟ݂ܵܐ ܒܐܸܫܬܵܐ ܦܲܥܘܵܢܹ̈ܐ ܕܝܼܢܵܐ ܒܸܦܠܵܛܵܐ ܡ̣ܢ ܡܢܵܪܬܵܐ. 36ܛܥܘܼܢܝܵܬܲܝ̈ܗܝ ܘܦܲܥܘܵܢܲܝ̈ܗܝ ܗܵܘܝܼ ܒܚܲܕ ܩܸܛܥܵܐ ܡ̣ܢ ܡܢܵܪܬܵܐ، ܟܠܲܝܗܝ ܦܘܼܠܚܵܢܵܐ ܕܐܘܼܡܵܢܵܐ، ܥܒ݂ܝܼܕܹܐ ܡ̣ܢ ܕܲܗܒ݂ܵܐ ܨܸܦܝܵܐ. 37ܬܲܪܨܸܬ ܫܒܲܥ ܫܪ̈ܵܓ݂݇ܝܵܬܹܐ ܠܡܢܵܪܬܵܐ، ܘܗܲܕܟ݂ܵܐ ܡܲܬܒܸܬ ܠܗܘܿܢ ܕܝܵܗ݇ܒ݂ܝܼ ܒܲܗܪܵܐ ܠܩܵܕ݇ܡܘܼܗ̇. 38ܡܲܟ̰ܡܸܥܵܢܹ̈ܐ ܕܢܘܼܗܪ̈ܲܝܗܝ ܘܡܵܐܢܲܝ̈ܗܝ ܗܵܘܝܼ ܡ̣ܢ ܕܲܗܒ݂ܵܐ ܨܸܦܝܵܐ. 39ܚܲܕ ܟܲܟܪܵܐ ܕܕܲܗܒ݂ܵܐ ܨܸܦܝܵܐ ܒܵܥܹܝܬ ܠܬܲܪܘܼܨܹܐ ܡܢܵܪܬܵܐ ܘܟܠܲܝܗܝ ܐܲܢܹܐ ܡܵܐܢܹ̈ܐ. 40ܘܗܘܝܼ ܚܲܬܝܼܬܵܐ ܕܬܲܪܨܸܬ ܟܠ ܡܸܢܕܝܼ ܐܲܝܟ݂ ܦܸܨܠܵܐ ܕܡܘܼܚܙܹܐ ܠܝܼ ܐܸܠܘܼܟ݂ ܥܲܠ ܛܘܼܪܵܐ.
Currently Selected:
ܡܦܩܢܐ 25: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
