ܡܦܩܢܐ 24

ܒܢܲܝ̈ ܝܼܣܪܵܝܹܠ ܩܲܒܘܼܠܹܐ ܘܲܥܕܵܐ ܕܡܵܪܝܵܐ

1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐ݇ܣܘܿܩ ܠܟܸܣ ܠܝܼ، ܐܲܢ݇ܬ ܘܐܲܗܪܘܿܢ، ܘܢܵܕܵܒ݂ ܘܐܲܒ݂ܝܼܗܘܿ، ܘܫܲܒ݂ܥܝܼ ܡ̣ܢ ܚܘܵܪ̈ܕܸܩܢܹܐ ܕܝܼܣܪܵܝܹܠ، ܘܣܵܓ݂ܕܝܼܬܘܿܢ ܡ̣ܢ ܪܸܚܩܵܐ. 2ܩܲܪܒܸܢ ܡܘܼܫܹܐ ܒܢܲܦ̮ܫܹܗ ܠܟܸܣ ܡܵܪܝܵܐ، ܘܐܵܢܝܼ ܠܵܐ ܩܲܪܒܸܢܝܼ، ܘܥܲܡܵܐ ܠܵܐ ܐܵܣܩܝܼ ܥܲܡܹܗ.“ 3ܐ݇ܙܝܼܠ ܠܹܗ ܡܘܼܫܹܐ ܘܗܘܼܩܹܐ ܠܹܗ ܠܥܲܡܵܐ ܟܠܲܝܗܝ ܗܹܡܸܙܡܵܢܹ̈ܐ ܘܦܘܼܩܕܵܢܹ̈ܐ ܕܡܵܪܝܵܐ، ܘܓ̰ܘܼܘܸܒ ܠܹܗ ܟܠܹܗ ܥܲܡܵܐ ܒܚܲܕ ܩܵܠܵܐ، ܒܹܐܡܵܪܵܐ، ”ܟܠܲܝܗܝ ܗܹܡܸܙܡܵܢܹ̈ܐ ܕܗܘܼܡܙܸܡ ܠܹܗ ܡܵܪܝܵܐ ܒܸܬ ܥܵܒ݂ܕܲܚ.“

4ܗ̇ܝܓܵܗ ܟܬܝܼܒܲܝ ܠܹܗ ܡܘܼܫܹܐ ܟܠܲܝܗܝ ܗܹܡܸܙܡܵܢܹ̈ܐ ܕܡܵܪܝܵܐ. ܩܝܼܡ ܠܹܗ ܓ̰ܲܠܕܹܐ ܒܨܲܦܪܵܐ ܘܒܢܹܐ ܠܹܗ ܡܲܕܒܚܵܐ ܬܚܘܿܬ ܛܘܼܪܵܐ، ܘܒܢܹܐ ܠܹܗ ܬܪܸܥܣܲܪ ܩܵܝܸܡܝܵܬܹ̈ܐ ܠܬܪܸܥܣܲܪ ܫܲܒ݂ܛܹ̈ܐ ܕܝܼܣܪܵܝܹܠ. 5ܘܫܘܼܕܸܪܹܗ ܠܓ̰ܘܲܢܩܹ̈ܐ ܕܒܢܲܝ̈ ܝܼܣܪܵܝܹܠ، ܘܡܘܼܐܣܸܩ ܠܗܘܿܢ ܕܸܒ݂ܚܹ̈ܐ ܡܘܼܩܕܹܐ، ܘܕܒ݂ܝܼܚ ܠܗܘܿܢ ܕܸܒ݂ܚܹ̈ܐ ܕܫܠܵܡܵܐ ܠܡܵܪܝܵܐ، ܬܵܘܪܹ̈ܐ. 6ܫܩܝܼܠ ܠܹܗ ܡܘܼܫܹܐ ܦܲܠܓܵܐ ܕܕܸܡܵܐ ܘܕܪܹܐ ܠܹܗ ܓܵܘ ܠܵܓܵܢܹ̈ܐ، ܘܦܲܠܓܵܐ ܐ݇ܚܹܪ݇ܢܵܐ ܡܘܼܪܝܸܣ ܠܹܗ ܥܲܠ ܡܲܕܒܚܵܐ. 7ܗ̇ܝܓܵܗ ܫܩܝܼܠ ܠܹܗ ܟܬܵܒ݂ܵܐ ܕܘܲܥܕܵܐ ܘܩܪܹܐ ܠܹܗ ܠܥܲܡܵܐ. ܘܐܵܢܝܼ ܓ̰ܘܼܘܸܒ ܠܗܘܿܢ، ”ܒܸܬ ܥܵܒ݂ܕܲܚ ܟܠ ܡܸܢܕܝܼ ܕܗܘܼܡܙܸܡ ܠܹܗ ܡܵܪܝܵܐ، ܘܒܸܬ ܫܵܡܥܲܚ.“ 8ܘܫܩܝܼܠ ܠܹܗ ܡܘܼܫܹܐ ܕܸܡܵܐ ܘܡܘܼܪܝܸܣ ܠܹܗ ܥܲܠ ܥܲܡܵܐ، ܘܐ݇ܡܝܼܪܹܗ، ”ܐܵܗܵܐ ܝܠܹܗ ܕܸܡܵܐ ܕܘܲܥܕܵܐ ܕܩܛܝܼܥ ܠܹܗ ܡܵܪܝܵܐ ܥܲܡܵܘܟ݂ܘܿܢ ܥܲܠ ܟܠܲܝܗܝ ܐܲܢܹܐ ܗܹܡܸܙܡܵܢܹ̈ܐ.“ 9ܘܐ݇ܣܝܼܩ ܠܗܘܿܢ ܡܘܼܫܹܐ، ܐܲܗܪܘܿܢ، ܢܵܕܵܒ݂، ܘܐܲܒ݂ܝܼܗܘܿ، ܘܫܲܒ݂ܥܝܼ ܡ̣ܢ ܚܘܵܪ̈ܕܸܩܢܹܐ ܕܝܼܣܪܵܝܹܠ، 10ܘܚܙܹܐ ܠܗܘܿܢ ܠܐܲܠܵܗܵܐ ܕܝܼܣܪܵܝܹܠ؛ ܬܚܘܿܬ ܐܲܩܠܵܬܹ̈ܗ ܪܨܝܼܦܬܵܐ ܡܲܒܪܸܩܵܢܬܵܐ ܕܦܝܼܪܘܼܙܵܐ، ܐܲܝܟ݂ ܫܡܲܝܵܐ ܒܓܵܢܘܼܗ̇ ܒܨܸܦܝܘܼܬܵܐ. 11ܥܲܠ ܚܘܵܪ̈ܕܸܩܢܹܐ ܕܒܢܲܝ̈ ܝܼܣܪܵܝܹܠ ܠܵܐ ܦܘܼܫܸܛ ܠܹܗ ܐܝܼܕܹܗ. ܘܚܙܹܐ ܠܗܘܿܢ ܠܐܲܠܵܗܵܐ، ܘܐ݇ܟ݂ܝܼܠ ܠܗܘܿܢ ܘܫܬܹܐ ܠܗܘܿܢ.

ܡܘܼܫܹܐ ܥܲܠ ܛܘܼܪܵܐ ܕܣܝܼܢܲܝ

12ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܐ݇ܣܘܿܩ ܠܟܸܣ ܠܝܼ ܠܛܘܼܪܵܐ، ܘܦܘܼܫ ܬܵܡܵܐ، ܘܒܸܬ ܝܵܗ݇ܒܹܢܘܼܟ݂ ܠܘܼܚܹ̈ܐ ܕܟܹܐܦܵܐ ܕܢܵܡܘܿܣܵܐ ܘܦܘܼܩܕܵܢܵܐ ܕܟܬܝܼܒܲܝ ܝܘܸܢ ܠܡܲܠܘܼܦܲܝ.“ 13ܘܩܝܼܡ ܠܹܗ ܡܘܼܫܹܐ ܘܝܼܫܘܿܥ ܒܲܪ ܢܘܿܢ ܗܲܝܸܪܵܢܹܗ، ܘܐ݇ܣܝܼܩ ܠܹܗ ܡܘܼܫܹܐ ܠܛܘܼܪܵܐ ܕܐܲܠܵܗܵܐ. 14ܘܠܚܘܵܪ̈ܕܸܩܢܹܐ ܐ݇ܡܝܼܪܹܗ، ”ܣܦܘܿܪܘܼܢ ܐܲܚܬܘܿܢ ܠܐܲܟ݂ܵܐ ܗܲܠ ܕܕܵܝܪܲܚ ܠܟܸܣ ܠܵܘܟ݂ܘܿܢ؛ ܐܲܗܪܘܿܢ ܘܚܘܿܪ ܒܸܬ ܦܵܝܫܝܼ ܠܟܸܣ ܠܵܘܟ݂ܘܿܢ. ܟܠ ܡ̇ܢ ܕܗܵܘܹܐ ܠܹܗ ܫܘܼܠܵܐ، ܐܵܙܹܠ ܠܟܸܣ ܠܲܝܗܝ.“

15ܟܲܕ ܐ݇ܣܝܼܩ ܠܹܗ ܡܘܼܫܹܐ ܠܛܘܼܪܵܐ، ܥܢܵܢܵܐ ܟܘܼܣܹܐ ܠܵܗ̇ ܠܛܘܼܪܵܐ، 16ܘܫܪܹܐ ܠܵܗ̇ ܬܸܫܒܘܿܚܬܵܐ ܕܡܵܪܝܵܐ ܥܲܠ ܛܘܼܪܵܐ ܕܣܝܼܢܲܝ، ܘܟܘܼܣܹܐ ܠܵܗ̇ ܐܸܠܹܗ ܥܢܵܢܵܐ ܐܸܫܬܵܐ ܝܵܘܡܵܢܹ̈ܐ. ܒܝܵܘܡܵܐ ܕܫܲܒ݂ܥܵܐ ܩܪܹܐ ܠܹܗ ܡܵܪܝܵܐ ܠܡܘܼܫܹܐ ܡ̣ܢ ܓܵܘ ܥܢܵܢܵܐ. 17ܚܸܙܘܵܐ ܕܬܸܫܒܘܿܚܬܵܐ ܕܡܵܪܝܵܐ ܐܲܝܟ݂ ܢܘܼܪܵܐ ܐܵܟ݂ܘܿܠܵܐ ܝܗ݇ܘܵܐ ܒܪܹܫܵܐ ܕܛܘܼܪܵܐ، ܩܵܕ݇ܡ ܥܲܝܢܹ̈ܐ ܕܒܢܲܝ̈ ܝܼܣܪܵܝܹܠ. 18ܘܥܒ݂ܝܼܪܹܗ ܡܘܼܫܹܐ ܒܓܵܘܵܐ ܕܥܢܵܢܵܐ، ܘܐ݇ܣܝܼܩ ܠܹܗ ܠܛܘܼܪܵܐ؛ ܘܗܘܹܐ ܠܹܗ ܡܘܼܫܹܐ ܒܛܘܼܪܵܐ ܐܲܪܒܥܝܼ ܐܝܼܡܵܡܹ̈ܐ ܘܐܲܪܒܥܝܼ ܠܲܝܠܵܘܵܬܹ̈ܐ.

Currently Selected:

ܡܦܩܢܐ 24: ABTAB

Highlight

Copy

Compare