ܡܦܩܢܐ 23

ܒܘܼܬ ܗܵܩܘܼܬܵܐ

1”ܠܵܐ ܝܵܗ݇ܒܹܬ ܣܵܗܕܘܼܬܵܐ ܕܕܘܼܓܠܵܐ. ܠܵܐ ܫܲܪܸܟܸܬ ܥܲܡ ܒܝܼܫܵܐ ܠܸܗܘܵܝܵܐ ܣܵܗܕܵܐ ܥܵܘܵܠܵܐ. 2ܠܵܐ ܬܵܒܥܹܬ ܠܟܸܢܫܵܐ ܠܸܥܒ݂ܵܕܵܐ ܒܝܼܫܬܵܐ؛ ܘܟܲܕ ܝܵܗ݇ܒܹܬ ܣܵܗܕܘܼܬܵܐ ܓܵܘ ܒܹܝܬ ܕܝܼܢܵܐ، ܠܵܐ ܬܵܒܥܹܬ ܠܒܘܼܫܵܝܘܼܬܵܐ ܠܡܲܩܠܘܼܒܹܐ ܫܪܵܪܵܐ؛ 3ܘܠܵܐ ܓܵܢܹܝܬ ܠܓܹܒܵܐ ܕܡܸܣܟܹܢܵܐ ܓܵܘ ܒܹܝܬ ܕܝܼܢܵܐ ܐܲܚܟ̰ܝܼ ܒܥܸܠܬܵܐ ܕܡܸܣܟܹܢܵܐ ܝܠܹܗ.

4ܟܲܕ ܚܵܙܹܝܬ ܬܵܘܪܵܐ ܝܲܢ ܚܡܵܪܵܐ ܕܕܸܫܡܸܢܘܼܟ݂ ܛܘܼܠܩܵܐ ܐܘܼܪܚܹܗ، ܡܲܕܘܼܪܹܐ ܡܲܕܸܪܸܬ ܠܹܗ ܐܸܠܹܗ. 5ܟܲܕ ܚܵܙܹܝܬ ܚܡܵܪܵܐ ܕܣܵܢܝܵܢܘܼܟ݂ ܒܪܝܼܟܵܐ ܬܚܘܿܬ ܛܲܥܢܹܗ، ܠܵܐ ܡܲܚܦܸܠܸܬ ܡ̣ܢ ܠܸܫܪܵܝܹܗ، ܫܪܵܝܵܐ ܫܵܪܹܝܬ ܠܹܗ ܥܲܡܹܗ.

6ܠܵܐ ܡܲܦܟ̰ܸܠܸܬ ܗܵܩܘܼܬܵܐ ܕܐ݇ܢܵܫܵܐ ܡܸܣܟܹܢܵܐ ܒܕܝܼܘܵܢ. 7ܗܵܘܹܝܬ ܪܸܚܩܵܐ ܡ̣ܢ ܫܘܼܠܵܐ ܕܕܘܼܓܠܵܐ؛ ܘܠܵܐ ܩܵܛܠܹܬ ܠܙܲܟܵܝܵܐ ܘܠܙܲܕܝܼܩܵܐ، ܣܵܒܵܒ ܠܹܐ ܦܲܚܠܸܢ ܠܒܝܼܫܵܐ. 8ܪܸܫܘܲܬ ܠܵܐ ܫܵܩܠܹܬ، ܣܵܒܵܒ ܪܸܫܘܲܬ ܟܹܐ ܡܲܣܡܝܼܵܐ ܥܲܝܢܹ̈ܐ ܚܵܙܝܵܢܹ̈ܐ، ܘܟܹܐ ܡܲܦܟ̰ܸܠܵܐ ܗܹܡܸܙܡܵܢܹ̈ܐ ܕܙܲܕܝܼܩܹ̈ܐ.

9ܠܡܵܫܵܚܲܛ ܠܵܐ ܡܲܥܝܸܩܸܬ؛ ܐܲܚܬܘܿܢ ܟܹܐ ܝܵܕܥܝܼܬܘܿܢ ܠܓܵܢܵܐ ܕܡܵܫܵܚܲܛ، ܣܵܒܵܒ ܓܵܢܵܘܟ݂ܘܿܢ ܡܵܫܵܚܲܛܹ̈ܐ ܝܬܘܿܢ ܗ݇ܘܵܘ ܒܐܲܪܥܵܐ ܕܡܸܨܪܹܝܢ.

ܩܵܢܘܿܢܹ̈ܐ ܒܘܼܬ ܫܲܒܵܬ

10ܐܸܫܸܬ ܫܸܢܹ̈ܐ ܙܵܪܥܹܬ ܐܲܪܥܘܼܟ݂ ܘܓ̰ܲܡܥܸܬ ܛܥܘܼܢܬܘܼܗ̇؛ 11ܐܝܼܢܵܐ ܒܫܹܢ݇ܬܵܐ ܕܫܒܲܥ ܫܵܒ݂ܩܹܬ ܠܵܗ̇ ܒܘܼܪܵܐ، ܕܐܵܟ݂ܠܝܼ ܡܸܣܟܹܢܹ̈ܐ ܕܥܲܡܘܼܟ݂؛ ܘܡܸܢܕܝܼ ܕܙܵܐܹܕ ܡܸܢܲܝܗܝ ܐܵܟ݂ܠܝܼ ܠܹܗ ܗܲܝܘܵܢܹ̈ܐ ܕܕܸܫܬܵܐ. ܗܲܕܟ݂ܵܐ ܥܵܒ݂ܕܹܬ ܐܘܼܦ ܠܟܲܪܡܘܼܟ݂ ܘܠܙܲܝܬܘܼܟ݂. 12ܐܸܫܬܵܐ ܝܵܘܡܵܢܹ̈ܐ ܥܵܒ݂ܕܹܬ ܦܘܼܠܚܵܢܘܼ̈ܟ݂، ܘܒܝܵܘܡܵܐ ܕܫܲܒ݂ܥܵܐ ܫܵܠܹܝܬ؛ ܩܵܐ ܕܡܲܢܝܸܚ ܐܘܼܦ ܬܵܘܪܘܼܟ݂ ܘܚܡܵܪܘܼܟ݂، ܘܡܲܢܝܸܚ ܒܪܘܿܢܵܐ ܕܚܹܕܲܡܬܘܼܟ݂ ܘܡܵܫܵܚܲܛܘܼܟ݂.

13ܗܵܘܹܝܬܘܿܢ ܙܗܝܼܪܹ̈ܐ ܠܟܠ ܡܸܢܕܝܼ ܕܐ݇ܡܝܼܪܝܼ ܐܸܠܵܘܟ݂ܘܿܢ. ܫܸܡܵܐ ܕܐܲܠܵܗܹ̈ܐ ܐ݇ܚܹܪ̈݇ܢܹܐ ܠܵܐ ܡܲܕܟܸܪܝܼܬܘܿܢ، ܐܘܼܦ ܠܵܐ ܦܵܐܹܫ ܫܡܝܼܥܵܐ ܡ̣ܢ ܦܘܼܡܵܘܟ݂ܘܿܢ.

ܬܠܵܬܵܐ ܥܹܐܕܵܘܵܬܹ̈ܐ ܒܫܹܢ݇ܬܵܐ

14”ܬܠܵܬ ܓܵܗܹ̈ܐ ܒܫܹܢ݇ܬܵܐ ܥܵܒ݂ܕܹܬ ܠܝܼ ܥܹܐܕܵܐ. 15ܢܵܛܪܹܬ ܥܹܐܕܵܐ ܕܦܲܛܝܼܪܹ̈ܐ. ܫܲܒ݂ܥܵܐ ܝܵܘܡܵܢܹ̈ܐ ܐܵܟ݂ܠܹܬ ܦܲܛܝܼܪܹ̈ܐ ܒܥܕܵܢܵܐ ܪܫܝܼܡܬܵܐ ܒܝܲܪܚܵܐ ܕܐܵܒܝܼܒ، ܕܵܐܟ݂ܝܼ ܕܦܩܝܼܕ ܠܝܼ ܐܸܠܘܼܟ݂، ܣܵܒܵܒ ܒܐܵܗܵܐ ܝܲܪܚܵܐ ܦܠܝܼܛ ܠܘܼܟ݂ ܡ̣ܢ ܡܸܨܪܹܝܢ. ܐܘܼܦ ܚܲܕ ܠܵܐ ܡܲܒܝܸܢ ܐܝܼܕܹܗ ܣܦܝܼܩܬܵܐ ܩܵܕ݇ܡܝܼ. 16ܢܵܛܪܹܬ ܥܹܐܕܵܐ ܕܚܸܨܕܵܐ، ܟܲܕ ܡܲܝܬܸܝܬ ܠܝܼ ܛܥܘܼܢܬܵܐ ܩܵܕ݇ܡܵܝܬܵܐ ܕܦܘܼܠܚܵܢܘܼܟ݂. ܘܢܵܛܪܹܬ ܥܹܐܕܵܐ ܕܓ̰ܵܡܲܥܬܵܐ ܕܚܸܨܕܵܐ، ܒܚܲܪܬܵܐ ܕܫܹܢ݇ܬܵܐ، ܐܝܼܡܲܢ ܕܓ̰ܲܡܥܸܬ ܛܥܘܼܢܝܵܬܘܼ̈ܟ݂ ܡ̣ܢ ܟܠ ܕܙܪܝܼܥ ܠܘܼܟ݂ ܒܚܲܩܠܘܼܟ݂. 17ܬܠܵܬ ܓܵܗܹ̈ܐ ܒܫܹܢ݇ܬܵܐ ܦܵܐܹܫ ܚܸܙܝܵܐ ܟܠ ܐܘܼܪܙܘܼܟ݂ ܩܵܕ݇ܡ ܡܵܪܝܵܐ ܐܲܠܵܗܵܐ. 18ܠܵܐ ܡܲܩܪܸܒܸܬ ܠܲܚܡܵܐ ܚܡܝܼܥܵܐ ܥܲܡ ܕܸܡܵܐ ܕܕܸܒ݂ܚܵܐ ܐܸܠܝܼ؛ ܘܠܵܐ ܫܵܒ݂ܩܹܬ ܬܲܪܒܵܐ ܕܥܹܐܕܝܼ ܦܵܐܹܫ ܗܲܠ ܨܲܦܪܵܐ. 19ܛܥܘܼܢܬܵܐ ܩܵܕ݇ܡܵܝܬܵܐ ܕܐܲܪܥܘܼܟ݂ ܡܲܩܪܸܒ݂ ܠܵܗ̇ ܠܒܲܝܬܵܐ ܕܡܵܪܝܵܐ ܐܲܠܵܗܘܼܟ݂. ܠܵܐ ܒܲܫܠܸܬ ܓܸܕܝܵܐ ܓܵܘ ܚܲܠܒ݂ܵܐ ܕܝܸܡܹܗ.

ܩܵܘܠܵܐ ܕܗܕܝܼܪܘܼܬܵܐ ܕܡܵܪܝܵܐ

20”ܗܵܐ ܐܵܢܵܐ ܫܲܕܘܼܪܹܐ ܝܘܸܢ ܡܲܠܲܐܟ݂ܵܐ ܩܵܕ݇ܡܘܼܟ݂ ܠܸܢܛܵܪܘܼܟ݂ ܒܐܘܼܪܚܵܐ، ܘܠܡܲܝܬܘܼܝܘܼܟ݂ ܠܕܘܼܟܵܐ ܕܗܘܼܕܪܘܼܗ̇ ܝܘܸܢ. 21ܦܘܼܫ ܙܗܝܼܪܵܐ ܐܸܠܹܗ ܘܫܡܸܥ ܐܸܠܹܗ. ܠܵܐ ܥܵܒ݂ܕܹܬ ܥܵܨܝܼܘܼܬܵܐ ܥܲܠܘܼܗܝ. ܗ̇ܘ ܠܹܐ ܦܲܚܸܠ ܓܢܵܗܘܼ̈ܟ݂؛ ܣܵܒܵܒ ܫܸܡܝܼ ܥܲܠܘܼܗܝ ܝܠܹܗ. 22ܣܵܒܵܒ ܐܸܢ ܫܡܵܥܵܐ ܫܵܡܥܹܬ ܠܩܵܠܹܗ، ܘܥܵܒ݂ܕܹܬ ܟܠ ܡܸܢܕܝܼ ܕܐܵܡܪܹܢ، ܗ̇ܝܓܵܗ ܒܸܬ ܗܵܘܹܝܢ ܕܸܫܡܸܢ ܠܕܸܫܡܸܢܘܼ̈ܟ݂، ܘܒܸܬ ܡܲܠܝܸܨܸܢ ܠܡܲܠܝܸܨܵܢܘܼ̈ܟ݂. 23ܒܸܬ ܐܵܙܹܠ ܡܲܠܲܐܟ݂ܝܼ ܩܵܕ݇ܡܘܼܟ݂، ܘܒܸܬ ܡܲܝܬܹܐ ܠܘܼܟ݂ ܠܐܲܪܥܵܐ ܕܐܵܡܘܿܪ̈ܵܝܵܐ، ܘܚܹܝܬܵܝܹ̈ܐ، ܘܦܲܪ̈ܙܵܝܹܐ، ܘܟܢܲܥܢܵܝܹ̈ܐ، ܘܚܵܘܵܝܹ̈ܐ، ܘܝܵܒ݂ܘܿܣܵܝܹ̈ܐ، ܘܒܸܬ ܛܲܠܩܸܢ ܠܟܠܲܝܗܝ ܐܲܢܹܐ. 24ܠܵܐ ܣܵܓ݂ܕܹܬ ܠܐܲܠܵܗܲܝ̈ܗܝ ܘܠܵܐ ܦܵܠܚܹܬ ܠܗܘܿܢ، ܘܠܵܐ ܥܵܒ݂ܕܹܬ ܐܲܝܟ݂ ܦܘܼܠܚܵܢܲܝ̈ܗܝ؛ ܐܸܠܵܐ ܬܠܵܚܵܐ ܬܵܠܚܹܬ ܠܗܘܿܢ ܘܬܒ݂ܵܪܵܐ ܬܵܒ݂ܪܹܬ ܠܩܵܝܸܡܝܵܬܲܝ̈ܗܝ. 25ܦܵܠܚܝܼܬܘܿܢ ܠܡܵܪܝܵܐ ܐܲܠܵܗܵܘܟ݂ܘܿܢ، ܘܒܸܬ ܒܲܪܸܟ݂ ܠܠܲܚܡܵܘܟ݂ܘܿܢ ܘܠܡ̈ܝܼܵܘܟ݂ܘܿܢ، ܘܒܸܬ ܫܵܩܠܹܢ ܡܲܪܥܵܐ ܡ̣ܢ ܓܵܘܵܘܟ݂ܘܿܢ، 26ܘܠܹܐ ܗܵܘܝܵܐ ܡܲܪܚܸܫܵܢܬܵܐ ܘܐܘܼܦ ܠܵܐ ܥܩܲܪܬܵܐ ܒܐܲܪܥܘܼܟ݂؛ ܘܒܸܬ ܡܲܟܡܸܠܸܢ ܡܸܢܝܵܢܵܐ ܕܝܵܘܡܵܢܘܼ̈ܟ݂.

27ܒܸܬ ܫܲܕܪܸܢ ܙܕܘܼܥܬܝܼ ܩܵܕ݇ܡܘܼܟ݂، ܘܒܸܬ ܡܲܫܓܸܫܹܢ ܠܟܠܲܝܗܝ ܛܵܝܸܦܹ̈ܐ ܕܥܵܒ݂ܪܹܬ ܓܵܘܲܝܗܝ، ܘܒܸܬ ܥܵܒ݂ܕܹܢ ܕܟܠܲܝܗܝ ܕܸܫܡܸܢܘܼ̈ܟ݂ ܕܥܵܪܩܝܼ ܡ̣ܢ ܩܵܕ݇ܡܘܼܟ݂. 28ܘܒܸܬ ܫܲܕܪܸܢ ܕܸܒܘܼܪܬܵܐ ܩܵܕ݇ܡܘܼܟ݂ ܘܒܸܬ ܛܵܪܕܵܐ ܠܚܵܘܵܝܹ̈ܐ، ܘܠܟܢܲܥܢܵܝܹ̈ܐ، ܘܠܚܹܝܬܵܝܹ̈ܐ ܡ̣ܢ ܩܵܕ݇ܡܘܼܟ݂. 29ܐܝܼܢܵܐ ܠܹܐ ܛܵܪܕܹܢܗܘܿܢ ܡ̣ܢ ܩܵܕ݇ܡܘܼܟ݂ ܒܚܕܵܐ ܫܹܢ݇ܬܵܐ، ܕܠܵܐ ܗܵܘܝܵܐ ܐܲܪܥܵܐ ܚܵܪܵܒܵܐ ܘܙܵܝܕܵܐ ܥܲܠܘܼܟ݂ ܚܲܝܘܬܵܐ ܕܕܸܫܬܵܐ. 30ܚܲܕ݇ܟ̰ܵܐ ܒܚܲܕ݇ܟ̰ܵܐ ܒܸܬ ܛܵܪܕܹܢܗܘܿܢ ܡ̣ܢ ܩܵܕ݇ܡܘܼܟ݂، ܗܲܠ ܕܙܵܐܹܕ ܡܸܢܝܵܢܘܼܟ݂ ܘܦܵܠܛܹܬ ܡܵܪܵܐ ܠܐܲܪܥܵܐ. 31ܒܸܬ ܡܲܬܒܸܢ ܬܚܘܼܡܘܼ̈ܟ݂ ܡ̣ܢ ܝܵܡܵܐ ܕܣܘܿܦ،#23‏:31 ܥܸܒ݂ܪܵܐܝܼܬ ܒܡܲܥܢܵܝܵܐ: ܝܵܡܵܐ ܕܙܹܠܹ̈ܐ، ܘܦܝܼܫܬܵܐ ܝ݇ܕܝܼܥܬܵܐ ”ܝܵܡܵܐ ܣܡܘܿܩܬܵܐ“ ܒܝܲܕ ܐܲܨܲܚܬܵܐ ܝܵܘܢܵܝܬܵܐ. ܗܲܠ ܝܵܡܵܐ ܕܦܠܸܫܬܵܝܹ̈ܐ#23‏:31 ܝܲܥܢܹܐ: ܝܵܡܵܐ ܕܡܸܕܝܼܬܪܵܢܝܵܐ ، ܘܡ̣ܢ ܒܲܪܝܼܵܐ ܗܲܠ ܢܲܗܪܵܐ ܕܦܪܵܬ؛ ܣܵܒܵܒ ܒܸܬ ܣܲܦܸܝܢ ܒܐܝܼܕܵܘܟ݂ܘܿܢ ܠܥܵܡܪ̈ܵܢܹܐ ܕܗ̇ܝ ܐܲܪܥܵܐ ܘܒܸܬ ܛܵܪܕܹܬ ܠܗܘܿܢ ܡ̣ܢ ܩܵܕ݇ܡܘܼܟ݂. 32ܠܵܐ ܥܵܒ݂ܕܹܬ ܘܲܥܕܵܐ ܥܲܡܲܝܗܝ ܘܠܵܐ ܥܲܡ ܐܲܠܵܗܲܝ̈ܗܝ 33ܠܵܐ ܝܵܬܒ݂ܝܼ ܒܐܲܪܥܘܼܟ݂، ܕܠܵܐ ܗܵܘܝܵܐ ܕܡܲܚܛܝܼ ܠܘܼܟ݂ ܥܲܠܝܼ، ܣܵܒܵܒ ܐܸܢ ܦܵܠܚܹܬ ܠܐܲܠܵܗܲܝܗܝ، ܒܸܬ ܢܵܦܠܹܬ ܓܵܘ ܩܘܼܠܬܵܐ.“

Currently Selected:

ܡܦܩܢܐ 23: ABTAB

Highlight

Copy

Compare