ܡܦܩܢܐ 14
14
ܦܸܪܥܘܿܢ ܒܸܢܦܵܠܵܐ ܒܵܬ݇ܪ ܒܢܲܝ̈ ܝܼܣܪܵܝܹܠ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 2”ܐ݇ܡܘܿܪ ܠܒܢܲܝ̈ ܝܼܣܪܵܝܹܠ، ܕܵܝܪܝܼ ܘܫܵܪܝܼ ܩܵܕ݇ܡ ܦܝܼ ܗܲܚܝܼܪܘܿܬ، ܒܹܝܠ ܡܲܓ݂ܕܘܿܠ ܘܝܵܡܵܐ. ܫܵܪܹܝܬܘܿܢ ܩܵܕ݇ܡ ܒܲܥܲܠ ܨܦܘܿܢ ܒܲܠܩܘܼܒ݂ܠܘܼܗ̇ ܥܲܠ ܝܵܡܵܐ. 3ܒܸܬ ܐܵܡܹܪ ܦܸܪܥܘܿܢ ܒܘܼܬ ܒܢܲܝ̈ ܝܼܣܪܵܝܹܠ، ’ܫܓ݂ܝܼܫܹܐ ܝܢܵܐ ܒܐܲܪܥܵܐ، ܘܟܪܝܼܟܹܐ ܒܒܲܪܝܼܵܐ.‘ 4ܘܐܵܢܵܐ ܒܸܬ ܡܲܩܫܸܝܢ ܠܠܸܒܵܐ ܕܦܸܪܥܘܿܢ، ܘܒܸܬ ܢܵܦܹܠ ܒܵܬ݇ܪܲܝܗܝ، ܘܒܸܬ ܦܵܝܫܹܢ ܡܝܘܼܩܪܵܐ ܒܦܸܪܥܘܿܢ ܘܒܟܠܲܝܗܝ ܚܲܝܠܵܘܵܬܹ̈ܗ، ܘܒܸܬ ܝܵܕܥܝܼ ܡܸܨܪ̈ܵܝܹܐ ܕܐܵܢܵܐ ܝܘܸܢ ܡܵܪܝܵܐ.“ ܘܥܒ݂ܝܼܕ ܠܗܘܿܢ ܒܢܲܝ̈ ܝܼܣܪܵܝܹܠ ܗܲܕܟ݂ܵܐ.
5ܟܲܕ ܦܝܼܫ ܠܹܗ ܡܘܼܚܒܸܪܵܐ ܡܲܠܟܵܐ ܕܡܸܨܪܹܝܢ ܕܥܪܝܼܩ ܠܹܗ ܥܲܡܵܐ، ܩܠܝܼܒ ܠܹܗ ܠܸܒܵܐ ܕܦܸܪܥܘܿܢ ܘܕܪܹ̈ܓܵܘܵܬܹܗ ܥܲܠ ܥܲܡܵܐ، ܘܐ݇ܡܝܼܪܗܘܿܢ، ”ܐܵܗܵܐ ܡܘܿܕܝܼ ܥܒ݂ܝܼܕ ܠܲܢ، ܕܫܘܼܕܸܪܲܢ ܠܝܼܣܪܵܝܹܠ ܡ̣ܢ ܠܸܦܠܵܚܵܐ ܐܸܠܲܢ؟“ 6ܗܘܼܕܸܪܹܗ ܡܲܪܟܲܒ݂ܬܹܗ، ܘܫܩܝܼܠ ܠܹܗ ܠܚܲܝܠܵܘܵܬܹ̈ܗ ܥܲܡܹܗ، 7ܘܫܩܝܼܠ ܠܹܗ ܐܸܫܸܬܡܵܐܐ ܡܲܪ̈ܟܒ݂ܵܬܹܐ ܓܘܼܒܝܹ̈ܐ، ܘܟܠܲܝܗܝ ܡܲܪ̈ܟܒ݂ܵܬܹܐ ܐ݇ܚܹܪ̈݇ܢܹܐ ܕܡܸܨܪܹܝܢ، ܘܪܹ̈ܫܵܢܹܐ ܥܲܠ ܟܠܲܝܗܝ. 8ܡܘܼܩܫܹܐ ܠܹܗ ܡܵܪܝܵܐ ܠܠܸܒܵܐ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ، ܘܢܦܝܼܠ ܠܹܗ ܒܵܬ݇ܪ ܒܢܲܝ̈ ܝܼܣܪܵܝܹܠ، ܕܒܸܦܠܵܛܵܐ ܝܗ݇ܘܵܘ ܒܪܹܫܵܐ ܪܵܡܵܐ. 9ܢܦܝܼܠ ܠܗܘܿܢ ܡܸܨܪ̈ܵܝܹܐ ܒܵܬ݇ܪܲܝܗܝ، ܟܠܲܝܗܝ ܣܘܼܣܵܘܵܬܹ̈ܐ ܘܡܲܪ̈ܟܒ݂ܵܬܹܐ ܕܦܸܪܥܘܿܢ، ܘܪ̈ܲܟܵܒ݂ܘܼܗܝ ܘܚܲܝܠܵܘܵܬܹ̈ܗ، ܘܡܸܛܝܲܝ ܠܗܘܿܢ ܟܲܕ ܐܵܢܝܼ ܫܸܪܝܹܐ ܠܡܲܪܙܵܐ ܕܝܵܡܵܐ، ܠܟܸܣ ܦܝܼ ܗܲܚܝܼܪܘܿܬ ܩܵܕ݇ܡ ܒܲܥܲܠ ܨܦܘܿܢ.
10ܟܲܕ ܩܘܼܪܒܸܢܹܗ ܦܸܪܥܘܿܢ، ܡܘܼܪܸܡ ܠܗܘܿܢ ܥܲܝܢܲܝ̈ܗܝ ܒܢܲܝ̈ ܝܼܣܪܵܝܹܠ ܘܚܙܹܐ ܠܗܘܿܢ ܠܡܸܨܪ̈ܵܝܹܐ ܒܹܐܬܵܝܵܐ ܒܵܬ݇ܪܲܝܗܝ؛ ܙܕܝܼܥ ܠܗܘܿܢ ܪܵܒܵܐ ܘܡܘܼܩܘܸܚ ܠܗܘܿܢ ܠܡܵܪܝܵܐ، 11ܘܐ݇ܡܝܼܪܗܘܿܢ ܠܡܘܼܫܹܐ، ”ܣܵܒܵܒ ܠܲܝܬ ܗ݇ܘܵܘ ܩܲܒ݂ܪ̈ܵܘܵܬܹܐ ܓܵܘ ܡܸܨܪܹܝܢ ܩܲܡ ܡܲܝܬܸܝܬ ܠܲܢ ܠܸܡܝܵܬܵܐ ܓܵܘ ܒܲܪܝܼܵܐ؟ ܐܵܗܵܐ ܡܘܿܕܝܼ ܥܒ݂ܝܼܕ ܠܘܼܟ݂ ܐܸܠܲܢ، ܠܦܲܠܘܼܛܲܢ ܡ̣ܢ ܡܸܨܪܹܝܢ؟ 12ܗܵܐ ܠܵܐ ܐ݇ܡܝܼܪܲܢ ܐܸܠܘܼܟ݂ ܒܡܸܨܪܹܝܢ، ’ܦܪܘܿܩ ܡܸܢܲܢ ܕܦܵܠܚܲܚ ܠܡܸܨܪ̈ܵܝܹܐ؟ ܣܵܒܵܒ ܗܵܘܝܵܐ ܗ݇ܘܵܐ ܒܘܼܫ ܨܦܵܝܝܼ ܐܸܠܲܢ ܠܸܦܠܵܚܵܐ ܠܡܸܨܪ̈ܵܝܹܐ ܡ̣ܢ ܠܸܡܝܵܬܵܐ ܒܒܲܪܝܼܵܐ.‘“ 13ܐ݇ܡܝܼܪܹܗ ܡܘܼܫܹܐ ܠܥܲܡܵܐ، ”ܠܵܐ ܙܵܕܥܝܼܬܘܿܢ، ܟܠܹܝܡܘܼܢ ܡܩܵܘܝܵܢܹ̈ܐ ܘܚܙܹܝܡܘܼܢ ܦܘܼܪܩܵܢܵܐ ܕܡܵܪܝܵܐ، ܕܒܸܬ ܥܵܒܹܕ ܐܸܠܵܘܟ݂ܘܿܢ ܐܸܕܝܘܿܡ ܝܵܘܡܵܐ، ܣܵܒܵܒ ܡܸܨܪ̈ܵܝܹܐ ܕܒܸܚܙܵܝܲܝ ܝܬܘܿܢ ܐܸܕܝܘܿܡ، ܐ݇ܚܹܪ݇ܢܵܐ ܠܹܐ ܚܵܙܹܝܬܘܿܢ ܠܗܘܿܢ ܠܥܵܠܲܡ. 14ܡܵܪܝܵܐ ܒܸܬ ܦܵܠܹܫ ܩܵܬܵܘܟ݂ܘܿܢ، ܟܲܕ ܐܲܚܬܘܿܢ ܗܵܘܹܝܬܘܿܢ ܫܸܠܝܹܐ.“ 15ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܩܵܡܘܿܕܝܼ ܡܲܩܘܘܼܚܹܐ ܝܘܸܬ ܐܸܠܝܼ؟ ܐ݇ܡܘܿܪ ܠܒܢܲܝ̈ ܝܼܣܪܵܝܹܠ ܕܦܵܣܥܝܼ ܠܵܩܵܕ݇ܡܵܐ. 16ܘܐܲܢ݇ܬ ܡܲܪܸܡ ܚܘܼܛܪܘܼܟ݂ ܘܦܲܫܸܛ ܐܝܼܕܘܼܟ݂ ܥܲܠ ܝܵܡܵܐ ܘܦܲܠܸܥ ܠܵܗ̇، ܕܥܵܒ݂ܪܝܼ ܒܢܲܝ̈ ܝܼܣܪܵܝܹܠ ܥܲܠ ܐܲܪܥܵܐ ܓܵܘ ܝܵܡܵܐ. 17ܘܐܵܢܵܐ، ܗܵܐ، ܒܸܬ ܡܲܩܫܸܝܢ ܠܠܸܒܵܐ ܕܡܸܨܪ̈ܵܝܹܐ ܕܐܵܬܝܼ ܒܵܬ݇ܪܲܝܗܝ، ܘܒܸܬ ܦܵܝܫܹܢ ܡܝܘܼܩܪܵܐ ܒܦܸܪܥܘܿܢ ܘܒܟܠܲܝܗܝ ܚܲܝܠܵܘܵܬܹ̈ܗ، ܘܒܡܲܪ̈ܟܒ݂ܵܬܹܗ ܘܒܪ̈ܲܟܵܒ݂ܘܼܗܝ. 18ܘܒܸܬ ܝܵܕܥܝܼ ܡܸܨܪ̈ܵܝܹܐ ܕܐܵܢܵܐ ܝܘܸܢ ܡܵܪܝܵܐ، ܟܲܕ ܦܵܝܫܹܢ ܡܝܘܼܩܪܵܐ ܒܦܸܪܥܘܿܢ، ܒܡܲܪ̈ܟܒ݂ܵܬܹܗ، ܘܒܪ̈ܲܟܵܒ݂ܘܼܗܝ.“
19ܫܘܼܢܹܐ ܠܹܗ ܡܲܠܲܐܟ݂ܵܐ ܕܐܲܠܵܗܵܐ ܕܒܹܐܙܵܠܵܐ ܝܗ݇ܘܵܐ ܩܵܕ݇ܡ ܚܲܝܠܵܘܵܬܹ̈ܐ ܕܝܼܣܪܵܝܹܠ، ܘܐ݇ܙܝܼܠ ܠܹܗ ܡ̣ܢ ܒܵܬ݇ܪܲܝܗܝ؛ ܘܫܘܼܢܹܐ ܠܹܗ ܣܛܘܼܢܵܐ ܕܥܢܵܢܵܐ ܡ̣ܢ ܩܵܕ݇ܡܲܝܗܝ ܘܟܠܹܐ ܠܹܗ ܡ̣ܢ ܒܵܬ݇ܪܲܝܗܝ، 20ܘܐ݇ܬܹܐ ܠܹܗ ܒܹܝܠ ܚܲܝܠܵܘܵܬܹ̈ܐ ܕܡܸܨܪ̈ܵܝܹܐ ܘܚܲܝܠܵܘܵܬܹ̈ܐ ܕܝܼܣܪܵܝܹܠ، ܘܗܘܹܐ ܠܹܗ ܥܢܵܢܵܐ ܚܸܫܟܵܢܵܐ، ܘܒܘܼܗܪܸܢܹܗ ܠܠܲܝܠܹܐ. ܘܠܵܐ ܩܘܼܪܒܸܢܹܗ ܚܲܕ ܠܗ̇ܘ ܐ݇ܚܹܪ݇ܢܵܐ ܟܠܹܗ ܠܲܝܠܹܐ.
ܒܢܲܝ̈ ܝܼܣܪܵܝܹܠ ܒܸܥܒ݂ܵܪܵܐ ܡ̣ܢ ܓܵܘ ܝܵܡܵܐ
21ܗ̇ܝܓܵܗ ܦܘܼܫܸܛ ܠܹܗ ܡܘܼܫܹܐ ܐܝܼܕܹܗ ܥܲܠ ܝܵܡܵܐ؛ ܘܡܘܼܕܸܪܹܗ ܡܵܪܝܵܐ ܠܝܵܡܵܐ ܒܦܵܘܚܵܐ ܚܲܝܠܵܢܵܐ ܕܡܲܕܢܚܵܐ ܟܠܹܗ ܗ̇ܘ ܠܲܝܠܹܐ، ܘܡܘܼܚܕܸܪܵܐ ܠܹܗ ܝܵܡܵܐ ܠܒܸܪܙܵܐ، ܘܦܝܼܫ ܠܗܘܿܢ ܦܠܝܼܥܹܐ ܡ̈ܝܼܵܐ. 22ܥܒ݂ܝܼܪܗܘܿܢ ܒܢܲܝ̈ ܝܼܣܪܵܝܹܠ ܡ̣ܢ ܓܵܘ ܝܵܡܵܐ ܥܲܠ ܐܲܪܥܵܐ ܒܵܪܘܿܙܬܵܐ، ܘܡ̈ܝܼܵܐ ܗܘܹܐ ܠܗܘܿܢ ܫܘܼܪܵܐ ܐܸܠܲܝܗܝ ܡ̣ܢ ܝܲܡܝܼܢܵܐ ܘܡ̣ܢ ܣܸܡܵܠܵܐ.
23ܢܦܝܼܠ ܠܗܘܿܢ ܡܸܨܪ̈ܵܝܹܐ ܒܵܬ݇ܪܲܝܗܝ ܓܵܘ ܝܵܡܵܐ، ܟܠܲܝܗܝ ܣܘܼܣܵܘܵܬܹ̈ܐ ܕܦܸܪܥܘܿܢ، ܡܲܪ̈ܟܒ݂ܵܬܹܗ، ܘܪ̈ܲܟܵܒ݂ܘܼܗܝ. 24ܘܒܒܲܕܠܵܐ ܕܨܲܦܪܵܐ، ܚܝܼܪܹܗ ܡܵܪܝܵܐ ܠܚܲܝܠܵܘܵܬܹ̈ܐ ܕܡܸܨܪ̈ܵܝܹܐ ܡ̣ܢ ܓܵܘ ܣܛܘܼܢܵܐ ܕܢܘܼܪܵܐ ܘܕܥܢܵܢܵܐ، ܘܫܓ݂ܝܼܫ ܠܹܗ ܠܚܲܝܠܵܘܵܬܹ̈ܐ ܕܡܸܨܪ̈ܵܝܹܐ، 25ܐ݇ܣܝܼܪܲܝ ܠܹܗ ܓܸܓ݂ܠܹ̈ܐ ܕܡܲܪ̈ܟܒ݂ܵܬܲܝܗܝ، ܗܵܕܵܐ ܕܛܪܹܐ ܠܗܘܿܢ ܒܝܲܩܘܼܪܘܼܬܵܐ؛ ܐ݇ܡܝܼܪܗܘܿܢ ܡܸܨܪ̈ܵܝܹܐ، ”ܥܵܪܩܲܚ ܡ̣ܢ ܩܵܕ݇ܡ ܝܼܣܪܵܝܹܠ؛ ܣܵܒܵܒ ܡܵܪܝܵܐ ܒܸܦܠܵܫܵܐ ܝܠܹܗ ܠܓܹܒܲܝܗܝ ܕܲܠܩܘܼܒ݂ܠ ܕܡܸܨܪܹܝܢ.“
ܕܡܸܨܪ̈ܵܝܹܐ ܒܸܚܢܵܩܵܐ ܓܵܘ ܝܵܡܵܐ
26ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܦܲܫܸܛ ܐܝܼܕܘܼܟ݂ ܥܲܠ ܝܵܡܵܐ ܩܵܐ ܕܕܵܝܪܝܼ ܡ̈ܝܼܵܐ ܥܲܠ ܡܸܨܪ̈ܵܝܹܐ، ܥܲܠ ܡܲܪ̈ܟܒ݂ܵܬܲܝܗܝ ܘܥܲܠ ܪ̈ܲܟܵܒܲܝܗܝ.“ 27ܘܦܘܼܫܸܛ ܠܹܗ ܡܘܼܫܹܐ ܐܝܼܕܹܗ ܥܲܠ ܝܵܡܵܐ، ܘܒܥܕܵܢܵܐ ܕܨܲܦܪܵܐ ܕܝܼܪܵܗ̇ ܝܵܡܵܐ ܠܕܘܼܟܬܘܼܗ̇. ܗܘܹܐ ܠܗܘܿܢ ܒܸܥܪܵܩܵܐ ܡܸܨܪ̈ܵܝܹܐ ܒܓܵܘܘܼܗ̇، ܐܝܼܢܵܐ ܢܦܝܼܨ ܠܹܗ ܡܵܪܝܵܐ ܠܡܸܨܪ̈ܵܝܹܐ ܓܵܘ ܝܵܡܵܐ. 28ܕܝܼܪܗܘܿܢ ܡ̈ܝܼܵܐ ܘܟܘܼܣܹܐ ܠܗܘܿܢ ܠܡܲܪ̈ܟܒ݂ܵܬܹܐ ܘܠܪ̈ܲܟܵܒܹܐ ܘܠܟܠܲܝܗܝ ܚܲܝܠܵܘܵܬܹ̈ܐ ܕܦܸܪܥܘܿܢ ܕܐ݇ܬܝܼܹܐ ܝܗ݇ܘܵܘ ܒܵܬ݇ܪ ܒܢܲܝ̈ ܝܼܣܪܵܝܹܠ ܓܵܘ ܝܵܡܵܐ؛ ܠܵܐ ܦܝܼܫ ܠܹܗ ܚܵܝܵܐ ܡܸܢܲܝܗܝ ܐܘܼܦ ܚܲܕ. 29ܐܝܼܢܵܐ ܓ̰ܘܝܼܓ̰ ܠܗܘܿܢ ܒܢܲܝ̈ ܝܼܣܪܵܝܹܠ ܒܝܵܡܵܐ ܐܲܝܟ݂ ܕܥܲܠ ܒܸܪܙܵܐ، ܘܡ̈ܝܼܵܐ ܗܘܹܐ ܠܗܘܿܢ ܐܸܠܲܝܗܝ ܫܘܼܪܵܐ ܡ̣ܢ ܝܲܡܝܼܢܵܐ ܘܡ̣ܢ ܣܸܡܵܠܵܐ.
30ܗܲܕܟ݂ܵܐ ܦܘܼܪܸܩ ܠܹܗ ܡܵܪܝܵܐ ܠܝܼܣܪܵܝܹܠ ܒܗ̇ܘ ܝܵܘܡܵܐ ܡ̣ܢ ܐܝܼܕܵܐ ܕܡܸܨܪ̈ܵܝܹܐ؛ ܘܚܙܹܐ ܠܗܘܿܢ ܒܢܲܝ̈ ܝܼܣܪܵܝܹܠ ܠܡܸܨܪ̈ܵܝܹܐ ܡܝܼܬܹܐ ܥܲܠ ܣܸܦܬܵܐ ܕܝܵܡܵܐ. 31ܟܲܕ ܚܙܹܐ ܠܹܗ ܝܼܣܪܵܝܹܠ ܚܲܝܠܵܐ ܓܘܼܪܵܐ ܕܡܘܼܦܠܸܚ ܠܹܗ ܡܵܪܝܵܐ ܒܡܸܨܪ̈ܵܝܹܐ، ܙܕܝܼܥ ܠܗܘܿܢ ܡ̣ܢ ܡܵܪܝܵܐ؛ ܘܗܘܼܡܸܢܗܘܿܢ ܒܡܵܪܝܵܐ ܘܒܡܘܼܫܹܐ ܥܲܒ݂ܕܹܗ.
Currently Selected:
ܡܦܩܢܐ 14: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
