ܡܦܩܢܐ 15
15
ܙܡܵܪܬܵܐ ܕܡܘܼܫܹܐ
1ܗ̇ܝܓܵܗ ܙܡܝܼܪܗܘܿܢ ܡܘܼܫܹܐ ܘܒܢܲܝ̈ ܝܼܣܪܵܝܹܠ ܐܵܗܵܐ ܙܡܵܪܬܵܐ ܠܡܵܪܝܵܐ، ܒܹܐܡܵܪܵܐ، ”ܒܸܬ ܙܵܡܪܹܢ ܠܡܵܪܝܵܐ، ܣܵܒܵܒ ܓ݂ܠܝܼܒ ܠܹܗ ܒܐܝܼܩܵܪܵܐ؛ ܣܘܼܣܹܐ ܘܪܵܟܒ݂ܵܢܹܗ ܕܪܹܐ ܠܹܗ ܒܝܵܡܵܐ. 2ܚܲܝܠܝܼ ܘܙܡܵܪܬܝܼ ܡܵܪܝܵܐ ܝܠܹܗ؛ ܗܘܹܐ ܠܹܗ ܐܸܠܝܼ ܠܦܘܼܪܩܵܢܵܐ. ܐܵܗܵܐ ܝܠܹܗ ܐܲܠܵܗܝܼ، ܘܒܸܬ ܫܲܒܚܸܢܹܗ، ܐܲܠܵܗܵܐ ܕܒܵܒܝܼ، ܘܒܸܬ ܝܵܗ݇ܒܹܢ ܪܘܼܡܪܵܡܵܐ ܐܸܠܹܗ؛ 3ܡܵܪܝܵܐ ܩܪܲܒ݂ܬܵܢܵܐ ܝܠܹܗ؛ ܡܵܪܝܵܐ ܫܸܡܹܗ ܝܠܹܗ. 4ܡܲܪ̈ܟܒ݂ܵܬܹܐ ܕܦܸܪܥܘܿܢ ܘܚܲܝܠܵܘܵܬܹ̈ܗ ܕܪܹܐ ܠܹܗ ܒܝܵܡܵܐ؛ ܓܘܼܒܝܹ̈ܐ ܕܪܹ̈ܫܵܢܘܼܗܝ ܦܝܼܫ ܠܗܘܿܢ ܛܘܼܒܥܹܐ ܒܝܵܡܵܐ ܕܣܘܿܦ#15:4 ܥܸܒ݂ܪܵܐܝܼܬ ܒܡܲܥܢܵܝܵܐ: ܝܵܡܵܐ ܕܙܹܠܹ̈ܐ، ܘܦܝܼܫܬܵܐ ܝ݇ܕܝܼܥܬܵܐ ”ܝܵܡܵܐ ܣܡܘܿܩܬܵܐ“ ܒܝܲܕ ܐܲܨܲܚܬܵܐ ܝܵܘܢܵܝܬܵܐ. . 5ܟܘܼܣܹܐ ܠܗܘܿܢ ܐܸܠܲܝܗܝ ܬܗܘܿܡܹ̈ܐ؛ ܠܥܘܼܡܩܹ̈ܐ ܨܠܹܐ ܠܗܘܿܢ ܐܲܝܟ݂ ܟܹܐܦܵܐ. 6ܝܲܡܝܼܢܘܼܟ݂، ܝܵܐ ܡܵܪܝܵܐ، ܦܝܼܫ ܠܵܗ̇ ܫܘܼܒܸܚܬܵܐ ܒܚܲܝܠܵܐ؛ ܝܲܡܝܼܢܘܼܟ݂، ܝܵܐ ܡܵܪܝܵܐ، ܛܘܼܚܛܸܚ ܠܵܗ̇ ܠܕܸܫܡܸܢ. 7ܒܥܸܠܵܝܘܼܬܵܐ ܕܪܵܡܘܼܬܘܼܟ݂ ܟܹܐ ܓ݂ܵܠܒܹܬ ܠܣܲܩܘܼܒ݂ܠܵܝܘܼ̈ܟ݂، ܟܹܐ ܫܲܕܪܸܬ ܠܵܗ̇ ܚܸܡܬܘܼܟ݂، ܘܟܹܐ ܐܵܟ݂ܠܵܐ ܠܗܘܿܢ ܐܲܝܟ݂ ܟܘܼܠܵܫ. 8ܒܢܦܵܚܬܵܐ ܕܦܘܼܩܵܩܘܼ̈ܟ݂ ܟܠܹܐ ܠܗܘܿܢ ܡ̈ܝܼܵܐ ܐܲܝܟ݂ ܪܘܼܡܬܵܐ؛ ܐܲܝܟ݂ ܩܘܼܚܵܐ ܪܝܼܡ ܠܗܘܿܢ ܡܸܠܐܹ̈ܐ؛ ܒܪܝܼܙ ܠܗܘܿܢ ܥܘܼܡܩܹ̈ܐ ܒܠܸܒܵܐ ܕܝܵܡܵܐ. 9ܐ݇ܡܝܼܪܹܗ ܕܸܫܡܸܢ، ’ܒܸܬ ܢܵܦܠܹܢ ܒܵܬ݇ܪܲܝܗܝ، ܒܸܬ ܡܵܛܹܝܢܗܘܿܢ، ܒܸܬ ܦܲܠܥܸܢ ܣܠܵܒܵܐ، ܒܸܬ ܦܵܐܹܚ ܡܸܢܲܝܗܝ ܠܸܒܝܼ، ܒܸܬ ܓܵܪܫܹܢ ܣܲܝܦܝܼ، ܒܸܬ ܡܲܚܪܸܒ݂ܵܐ ܠܗܘܿܢ ܐܝܼܕܝܼ.‘ 10ܐܝܼܢܵܐ ܢܦܝܼܚ ܠܘܼܟ݂ ܒܦܵܘܚܘܼܟ݂، ܘܟܘܼܣܹܐ ܠܵܗ̇ ܐܸܠܲܝܗܝ ܝܵܡܵܐ؛ ܛܒܝܼܥ ܠܗܘܿܢ ܐܲܝܟ݂ ܐܲܒ݂ܵܪܵܐ ܒܡ̈ܝܼܵܐ ܙܲܪ̈ܒܵܢܹܐ. 11ܡܵܢܝܼ ܝܠܹܗ ܐܲܝܟ݂ ܕܝܼܘܼܟ݂ ܓܵܘ ܐܲܠܵܗܹ̈ܐ، ܝܵܐ ܡܵܪܝܵܐ؟ ܡܵܢܝܼ ܝܠܹܗ ܐܲܝܟ݂ ܕܝܼܘܼܟ݂ ܫܘܼܒܚܵܐ ܒܩܘܼܕܫܹܗ، ܣܲܗܡܵܢܵܐ ܒܬܸܫܒܘܿܚܝܵܬܹ̈ܐ، ܥܵܒ݂ܕܵܢܵܐ ܕܕܘܼܡܵܪܹ̈ܐ؟ 12ܦܘܼܫܸܛ ܠܘܼܟ݂ ܝܲܡܝܼܢܘܼܟ݂ ܘܒܠܝܼܥܲܝ ܠܵܗ̇ ܐܲܪܥܵܐ. 13ܡܕܘܼܒܸܪܘܼܟ݂ ܒܫܵܦܵܩܲܬܘܼܟ݂ ܥܲܡܵܐ ܕܦܘܼܪܸܩ ܠܘܼܟ݂؛ ܡܗܘܼܕܝܲܝ ܠܘܼܟ݂ ܒܚܲܝܠܘܼܟ݂ ܠܒܹܝܬ ܩܘܼܕܫܘܼܟ݂. 14ܫܡܝܼܥ ܠܗܘܿܢ ܥܲܡܵܐ ܘܪܓܝܼܕ ܠܗܘܿܢ؛ ܙܕܘܼܥܬܵܐ ܕܒ݂ܝܼܩܲܝ ܠܵܗ̇ ܥܵܡܪ̈ܵܢܹܐ ܕܦܠܸܫܬ. 15ܙܕܝܼܥ ܠܗܘܿܢ ܓܘܼܪ̈ܵܢܹܐ ܕܐܲܕܘܿܡ؛ ܕܒ݂ܝܼܩܲܝ ܠܵܗ̇ ܪܲܬܪܲܬܬܵܐ ܪܵܘܪ̈ܒ݂ܵܢܹܐ ܕܡܘܼܐܵܒ݂؛ ܦܫܝܼܪܗܘܿܢ ܟܠܲܝܗܝ ܥܵܡܪ̈ܵܢܹܐ ܕܟܢܲܥܢ. 16ܒܸܬ ܢܵܦܠܵܐ ܥܲܠܲܝܗܝ ܙܕܘܼܥܬܵܐ ܘܪܓܘܼܕܵܐ؛ ܒܓܘܼܪܘܼܬܵܐ ܕܕܪܲܥܢܘܼܟ݂ ܒܸܬ ܫܵܬܩܝܼ ܐܲܝܟ݂ ܟܹܐܦܵܐ، ܗܲܠ ܕܥܵܒܹܪ ܥܲܡܘܼܟ݂، ܝܵܐ ܡܵܪܝܵܐ، ܗܲܠ ܕܥܵܒܹܪ ܐܵܗܵܐ ܥܲܡܵܐ ܕܙܒ݂ܝܼܢܘܼܟ݂. 17ܒܸܬ ܡܲܝܬܸܝܬ ܠܗܘܿܢ ܘܢܵܨܒܹܬ ܠܗܘܿܢ ܒܛܘܼܪܵܐ ܕܝܵܪܬܘܼܬܘܼܟ݂، ܕܘܼܟܵܐ ܕܗܘܼܕܸܪܘܼܟ݂ ܩܵܐ ܫܪܵܝܬܘܼܟ݂، ܝܵܐ ܡܵܪܝܵܐ، ܡܲܩܕܫܵܐ ܕܗܘܼܕܸܪܗܘܿܢ ܐܝܼܕܵܬܘܼ̈ܟ݂، ܝܵܐ ܡܵܪܝܵܐ. 18ܡܵܪܝܵܐ ܒܸܬ ܥܵܒܹܕ ܡܲܠܟܘܼܬܵܐ ܠܥܵܠܲܡ ܥܵܠܡܝܼܢ.“
ܙܡܵܪܬܵܐ ܕܡܲܪܝܲܡ
19ܟܲܕ ܥܒ݂ܝܼܪܗܘܿܢ ܣܘܼܣܵܘܵܬܹ̈ܐ ܕܦܸܪܥܘܿܢ ܒܡܲܪ̈ܟܒ݂ܵܬܲܝܗܝ ܘܒܪ̈ܲܟܵܒܲܝܗܝ ܓܵܘ ܝܵܡܵܐ، ܡܘܼܕܸܪܹܗ ܡܵܪܝܵܐ ܥܲܠܲܝܗܝ ܡ̈ܝܼܵܐ ܕܝܵܡܵܐ؛ ܐܝܼܢܵܐ ܒܢܲܝ̈ ܝܼܣܪܵܝܹܠ ܚܕܝܼܪܗܘܿܢ ܥܲܠ ܐܲܪܥܵܐ ܒܵܪܘܿܙܬܵܐ ܒܓܵܘܵܐ ܕܝܵܡܵܐ. 20ܘܫܩܝܼܠ ܠܵܗ̇ ܡܲܪܝܲܡ ܢܒ݂ܝܼܬܵܐ، ܚܵܬܵܐ ܕܐܲܗܪܘܿܢ، ܦܠܲܓܵܐ ܒܐܝܼܕܘܼܗ̇، ܘܦܠܝܼܛ ܠܗܘܿܢ ܟܠܲܝܗܝ ܒܲܟ݂ܬܵܬܹ̈ܐ ܒܵܬ݇ܪܘܼܗ̇ ܒܦܠܲܓܹ̈ܐ ܘܒܪܸ̈ܩܕܹܐ. 21ܘܙܡܝܼܪܵܗ̇ ܐܸܠܲܝܗܝ ܡܲܪܝܲܡ، ”ܙܡܘܿܪܘܼܢ ܠܡܵܪܝܵܐ، ܣܵܒܵܒ ܓ݂ܠܝܼܒ ܠܹܗ ܒܐܝܼܩܵܪܵܐ؛ ܣܘܼܣܹܐ ܘܪܲܟܵܒܹܗ ܕܪܹܐ ܠܹܗ ܒܝܵܡܵܐ.“
ܡ̈ܝܼܵܐ ܡܲܪܝܼܪܹ̈ܐ
22ܗ̇ܝܓܵܗ ܡܗܘܼܕܹܐ ܠܹܗ ܡܘܼܫܹܐ ܠܝܼܣܪܵܝܹܠ ܡ̣ܢ ܝܵܡܵܐ ܕܣܘܿܦ#15:22 ܥܸܒ݂ܪܵܐܝܼܬ ܒܡܲܥܢܵܝܵܐ: ܝܵܡܵܐ ܕܙܹܠܹ̈ܐ، ܘܦܝܼܫܬܵܐ ܝ݇ܕܝܼܥܬܵܐ ”ܝܵܡܵܐ ܣܡܘܿܩܬܵܐ“ ܒܝܲܕ ܐܲܨܲܚܬܵܐ ܝܵܘܢܵܝܬܵܐ. ܠܒܲܪܝܼܵܐ ܕܫܘܼܪ. ܐ݇ܙܝܼܠ ܠܗܘܿܢ ܬܠܵܬܵܐ ܝܵܘܡܵܢܹ̈ܐ ܓܵܘ ܒܲܪܝܼܵܐ ܘܠܵܐ ܡܘܼܫ݇ܟ̰ܸܚ ܠܗܘܿܢ ܡ̈ܝܼܵܐ. 23ܐ݇ܬܹܐ ܠܗܘܿܢ ܠܡܘܼܪܲܬ،#15:23 ܥܸܒ݂ܪܵܐܝܼܬ ܒܡܲܥܢܵܝܵܐ: ”ܡܲܪܝܼܪܬܵܐ“ ܘܠܵܐ ܡܨܹܐ ܠܗܘܿܢ ܠܸܫܬܵܝܵܐ ܡ̈ܝܼܵܐ ܡ̣ܢ ܡܘܼܪܲܬ ܣܵܒܵܒ ܡܲܪܝܼܪܹ̈ܐ ܝܗ݇ܘܵܘ. ܒܘܼܬ ܐܵܗܵܐ، ܩܪܹܐ ܠܗܘܿܢ ܫܸܡܘܼܗ̇ ܡܘܼܪܲܬ. 24ܘܛܘܼܪܛܸܡ ܠܗܘܿܢ ܥܲܡܵܐ ܥܲܠ ܡܘܼܫܹܐ، ܒܹܐܡܵܪܵܐ، ”ܡܘܿܕܝܼ ܫܵܬܲܚ؟“ 25ܡܘܼܩܘܸܚ ܠܹܗ ܡܘܼܫܹܐ ܠܡܵܪܝܵܐ، ܘܩܲܡ ܡܲܚܙܹܐ ܠܹܗ ܡܵܪܝܵܐ ܐܝܼܠܵܢܵܐ. ܪܘܼܦܹܐ ܠܹܗ ܓܵܘ ܡ̈ܝܼܵܐ، ܘܚܠܹܐ ܠܗܘܿܢ ܡ̈ܝܼܵܐ. ܬܵܡܵܐ ܡܘܼܬܸܒ݂ ܠܹܗ ܐܸܠܲܝܗܝ ܩܵܢܘܿܢܵܐ ܘܢܵܡܘܿܣܵܐ، ܘܬܵܡܵܐ ܓ̰ܘܼܪܸܒ ܠܹܗ ܐܸܠܲܝܗܝ، 26ܒܹܐܡܵܪܵܐ، ”ܐܸܢ ܫܡܵܥܵܐ ܫܵܡܥܹܬ ܠܩܵܠܵܐ ܕܡܵܪܝܵܐ ܐܲܠܵܗܘܼܟ݂، ܘܥܵܒ݂ܕܹܬ ܗ̇ܘ ܕܝܼܠܹܗ ܬܪܘܼܨܵܐ ܒܥܲܝܢܘܼ̈ܗܝ، ܘܡܲܨܝܸܬܸܬ ܠܦܘܼܩܕܵܢܘܼ̈ܗܝ، ܘܢܵܛܪܹܬ ܟܠܲܝܗܝ ܩܵܢܘܿܢܘܼ̈ܗܝ، ܠܹܐ ܡܲܝܬܸܝܢ ܥܲܠܘܼܟ݂ ܐܘܼܦ ܚܲܕ ܡ̣ܢ ܡܲܪ̈ܥܹܐ ܕܡܘܼܐܬܹܐ ܠܝܼ ܥܲܠ ܡܸܨܪ̈ܵܝܹܐ؛ ܣܵܒܵܒ ܐܵܢܵܐ ܝܘܸܢ ܡܵܪܝܵܐ ܒܲܣܡܵܢܘܼܟ݂.“
27ܗ̇ܝܓܵܗ ܐ݇ܬܹܐ ܠܗܘܿܢ ܠܐܝܼܠܸܡ، ܐܲܝܟܵܐ ܕܐܝܼܬ ܗ݇ܘܵܐ ܬܵܡܵܐ ܬܪܸܥܣܲܪ ܥܲܝܢܵܬܹ̈ܐ ܕܡ̈ܝܼܵܐ ܘܫܲܒ݂ܥܝܼ ܐܝܼܠܵܢܹ̈ܐ ܕܚܘܼܪܡܵܐ؛ ܘܫܪܹܐ ܠܗܘܿܢ ܬܵܡܵܐ ܥܲܠ ܡ̈ܝܼܵܐ.
Currently Selected:
ܡܦܩܢܐ 15: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
