ܡܦܩܢܐ 13

ܩܵܕܲܫܬܵܐ ܕܒܘܼܟ݂ܪܵܐ

1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 2”ܩܲܕܸܫ ܐܸܠܝܼ ܟܠ ܒܘܼܟ݂ܪܵܐ، ܟܠ ܦܵܬܚܵܢܵܐ ܕܡܲܪܒܥܵܐ ܓܵܘ ܒܢܲܝ̈ ܝܼܣܪܵܝܹܠ، ܒܲܪܢܵܫܵܐ ܘܗܲܝܘܵܢ، ܕܝܼܝܼ ܝܠܹܗ.“

ܥܹܐܕܵܐ ܕܦܲܛܝܼܪܹ̈ܐ

3ܘܐ݇ܡܝܼܪܹܗ ܡܘܼܫܹܐ ܠܥܲܡܵܐ، ”ܕܟ݂ܘܿܪܘܼܢ ܠܐܵܗܵܐ ܝܵܘܡܵܐ ܕܦܠܝܼܛ ܠܵܘܟ݂ܘܿܢ ܡ̣ܢ ܡܸܨܪܹܝܢ، ܡ̣ܢ ܒܹܝܬ ܥܲܒ݂ܕܘܼܬܵܐ، ܣܵܒܵܒ ܒܐܝܼܕܵܐ ܚܲܝܠܵܢܬܵܐ ܩܲܡ ܦܲܠܸܛ ܠܵܘܟ݂ܘܿܢ ܡܵܪܝܵܐ ܡܐܲܟ݂ܵܐ؛ ܠܵܐ ܦܵܐܹܫ ܐ݇ܟ݂ܝܼܠܵܐ ܠܲܚܡܵܐ ܚܡܝܼܥܵܐ. 4ܒܐܵܗܵܐ ܝܵܘܡܵܐ ܒܸܦܠܵܛܵܐ ܝܬܘܿܢ، ܒܝܲܪܚܵܐ ܕܐܵܒܝܼܒ. 5ܘܒܸܬ ܗܵܘܝܵܐ ܟܲܕ ܡܲܥܒܸܪܵܘܟ݂ܘܿܢ ܡܵܪܝܵܐ ܠܐܲܪܥܵܐ ܕܟܢܲܥܢܵܝܵܐ، ܕܚܹܝܬܵܝܵܐ، ܕܐܵܡܘܿܪܵܝܵܐ، ܕܚܵܘܵܝܵܐ، ܘܕܝܵܒ݂ܘܿܣܵܝܵܐ، ܕܝ݇ܡܹܐ ܠܹܗ ܠܐܲܒ݂ܵܗܵܬܵܘ̈ܟ݂ܘܿܢ ܕܒܸܬ ܝܲܗ݇ܒܸܠ ܠܵܗ̇ ܐܸܠܵܘܟ݂ܘܿܢ، ܐܲܪܥܵܐ ܡܲܓ̰ܪܝܼܵܢܬܵܐ ܕܚܲܠܒ݂ܵܐ ܘܕܸܒ݂ܫܵܐ، ܗ̇ܝܓܵܗ ܢܵܛܪܝܼܬܘܿܢ ܠܐܵܗܵܐ ܥܒ݂ܵܕܵܐ ܒܐܵܗܵܐ ܝܲܪܚܵܐ. 6ܫܲܒ݂ܥܵܐ ܝܵܘܡܵܢܹ̈ܐ ܐܵܟ݂ܠܹܬ ܠܲܚܡܵܐ ܕܦܲܛܝܼܪܹ̈ܐ، ܘܝܵܘܡܵܐ ܕܫܲܒ݂ܥܵܐ ܗܵܘܹܐ ܥܹܐܕܵܐ ܠܡܵܪܝܵܐ. 7ܠܲܚܡܵܐ ܠܵܐ ܚܡܝܼܥܵܐ ܦܵܐܹܫ ܐ݇ܟ݂ܝܼܠܵܐ ܫܲܒ݂ܥܵܐ ܝܵܘܡܵܢܹ̈ܐ؛ ܠܵܐ ܦܵܐܹܫ ܚܸܙܝܵܐ ܠܲܚܡܵܐ ܚܡܝܼܥܵܐ ܠܟܸܣ ܠܘܼܟ݂، ܘܠܵܐ ܡܲܒܝܸܢ ܚܡܝܼܪܵܐ ܒܟܠܹܗ ܬܚܘܼܡܘܼܟ݂. 8ܒܗ̇ܘ ܝܵܘܡܵܐ ܡܲܕܥܸܬ ܠܒܪܘܿܢܘܼܟ݂ ܘܐܵܡܪܹܬ ܐܸܠܹܗ، ’ܥܒ݂ܘܿܕ ܐܵܗܵܐ، ܣܵܒܵܒ ܗܲܕܟ݂ܵܐ ܥܒ݂ܝܼܕ ܠܹܗ ܡܵܪܝܵܐ ܐܸܠܝܼ ܟܲܕ ܦܠܝܼܛ ܠܝܼ ܡ̣ܢ ܡܸܨܪܹܝܢ.‘ 9ܘܗܵܘܹܐ ܐܸܠܘܼܟ݂ ܢܝܼܫܲܢܩܵܐ ܥܲܠ ܐܝܼܕܘܼܟ݂ ܘܕܟ݂ܵܪܵܐ ܥܲܠ ܩܸܨܘܼܟ݂، ܕܗܵܘܹܐ ܢܵܡܘܿܣܵܐ ܕܡܵܪܝܵܐ ܒܦܘܼܡܘܼܟ݂؛ ܣܵܒܵܒ ܒܐܝܼܕܵܐ ܚܲܝܠܵܢܬܵܐ ܦܘܼܠܸܛ ܠܹܗ ܐܸܠܘܼܟ݂ ܡܵܪܝܵܐ ܡ̣ܢ ܡܸܨܪܹܝܢ. 10ܢܵܛܪܹܬ ܠܹܗ ܐܵܗܵܐ ܦܘܼܩܕܵܢܵܐ ܒܥܕܵܢܵܐ ܪܫܝܼܡܬܵܐ، ܡ̣ܢ ܫܹܢ݇ܬܵܐ ܠܫܹܢ݇ܬܵܐ.

11”ܟܲܕ ܡܲܥܒܸܪܘܼܟ݂ ܡܵܪܝܵܐ ܠܐܲܪܥܵܐ ܕܟܢܲܥܢܵܝܵܐ، ܕܵܐܟ݂ܝܼ ܕܝ݇ܡܹܐ ܠܹܗ ܐܸܠܘܼܟ݂ ܘܠܒܵܒܵܘܵܬܘܼ̈ܟ݂، ܘܝܲܗ݇ܒܸܠ ܠܵܗ̇ ܐܸܠܘܼܟ݂، 12ܗ̇ܝܓܵܗ ܦܵܪܫܹܬ ܠܡܵܪܝܵܐ ܟܠ ܦܵܬܚܵܢܵܐ ܕܡܲܪܒܥܵܐ. ܟܠ ܒܘܼܟ݂ܪܵܐ ܙܲܥܝܵܐ ܕܗܲܝܘܵܢ ܕܐܝܼܬ ܠܘܼܟ݂، ܕܡܵܪܝܵܐ ܝܠܹܗ. 13ܟܠ ܒܘܼܟ݂ܪܵܐ ܕܚܡܵܪܵܐ ܦܲܪܩܸܬ ܠܹܗ ܒܦܹܐܪܵܐ، ܘܐܸܢ ܠܵܐ ܦܲܪܩܸܬ ܠܹܗ، ܬܵܒ݂ܪܹܬ ܩܕܵܠܹܗ. ܟܠ ܒܘܼܟ݂ܪܵܐ ܕܒܲܪܢܵܫܵܐ ܓܵܘ ܒܢܘܿܢܘܼ̈ܟ݂ ܦܲܪܩܸܬ. 14ܒܕܲܥܬܝܼܕ ܟܲܕ ܒܲܩܸܪܘܼܟ݂ ܒܪܘܿܢܘܼܟ݂، ܒܹܐܡܵܪܵܐ، ’ܡܘܿܕܝܼ ܝܠܹܗ ܐܵܗܵܐ؟‘ ܐܵܡܪܹܬ ܐܸܠܹܗ، ’ܒܐܝܼܕܵܐ ܚܲܝܠܵܢܬܵܐ ܩܲܡ ܦܲܠܸܛ ܠܲܢ ܡܵܪܝܵܐ ܡ̣ܢ ܡܸܨܪܹܝܢ، ܡ̣ܢ ܒܹܝܬ ܥܲܒ݂ܕܘܼܬܵܐ. 15ܟܲܕ ܩܫܹܐ ܠܹܗ ܠܸܒܵܐ ܕܦܸܪܥܘܿܢ ܘܠܵܐ ܫܒ݂ܝܼܩ ܠܹܗ ܕܦܵܠܛܲܚ ܗ݇ܘܵܘ، ܩܛܝܼܠ ܠܹܗ ܡܵܪܝܵܐ ܟܠ ܒܘܼܟ݂ܪܵܐ ܒܐܲܪܥܵܐ ܕܡܸܨܪܹܝܢ، ܡ̣ܢ ܒܘܼܟ݂ܪܵܐ ܕܒܲܪܢܵܫܵܐ ܗܲܠ ܒܘܼܟ݂ܪܵܐ ܕܗܲܝܘܵܢ. ܒܘܼܬ ܐܵܗܵܐ ܒܸܥܒ݂ܵܕܵܐ ܝܘܸܢ ܕܸܒ݂ܚܵܐ ܠܡܵܪܝܵܐ ܟܠ ܐܘܼܪܙܵܐ ܦܵܬܚܵܢܵܐ ܕܡܲܪܒܥܵܐ، ܐܝܼܢܵܐ ܟܠ ܒܘܼܟ݂ܪܵܐ ܕܒܢܘܿܢܝܼ̈ ܒܸܬ ܦܲܪܩܸܢ.‘ 16ܒܸܬ ܗܵܘܹܐ ܢܝܼܫܲܢܩܵܐ ܥܲܠ ܐܝܼܕܘܼܟ݂ ܘܪܘܼܫܡܵܐ ܒܹܝܠ ܥܲܝܢܘܼ̈ܟ݂، ܣܵܒܵܒ ܒܐܝܼܕܵܐ ܚܲܝܠܵܢܬܵܐ ܦܘܼܠܸܛ ܠܹܗ ܐܸܠܲܢ ܡܵܪܝܵܐ ܡ̣ܢ ܡܸܨܪܹܝܢ.“

ܒܢܲܝ̈ ܝܼܣܪܵܝܹܠ ܒܸܦܠܵܛܵܐ ܡ̣ܢ ܡܸܨܪܹܝܢ

17ܗܘܹܐ ܠܵܗ̇ ܟܲܕ ܫܘܼܕܸܪܹܗ ܦܸܪܥܘܿܢ ܠܥܲܡܵܐ، ܠܵܐ ܠܘܼܒܠܲܝ ܠܹܗ ܐܲܠܵܗܵܐ ܒܐܘܼܪܚܵܐ ܕܐܲܪܥܵܐ ܕܦܠܸܫܬܵܝܹ̈ܐ، ܐܵܦܸܢ ܕܩܘܼܪܒܵܐ ܝܗ݇ܘܵܐ، ܣܵܒܵܒ ܐ݇ܡܝܼܪܹܗ ܐܲܠܵܗܵܐ، ”ܠܵܐ ܗ݇ܘܹܐ ܕܦܵܫܹܡ ܥܲܡܵܐ ܟܲܕ ܚܵܙܝܼ ܦܠܵܫܵܐ، ܘܕܵܝܪܝܼ ܠܡܸܨܪܹܝܢ.“ 18ܒܘܼܬ ܐܵܗܵܐ، ܡܘܼܚܕܸܪܹܗ ܐܲܠܵܗܵܐ ܠܥܲܡܵܐ ܒܐܘܼܪܚܵܐ ܕܒܲܪܝܼܵܐ ܕܝܵܡܵܐ ܕܣܘܿܦ#13‏:18 ܥܸܒ݂ܪܵܐܝܼܬ ܒܡܲܥܢܵܝܵܐ: ܝܵܡܵܐ ܕܙܹܠܹ̈ܐ، ܘܦܝܼܫܬܵܐ ܝ݇ܕܝܼܥܬܵܐ ”ܝܵܡܵܐ ܣܡܘܿܩܬܵܐ“ ܒܝܲܕ ܐܲܨܲܚܬܵܐ ܝܵܘܢܵܝܬܵܐ. . ܐ݇ܣܝܼܩ ܠܗܘܿܢ ܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ ܗܕܝܼܪܹ̈ܐ ܠܦܠܵܫܵܐ. 19ܘܫܩܝܼܠ ܠܹܗ ܡܘܼܫܹܐ ܠܓܲܪ̈ܡܹܐ ܕܝܵܘܣܸܦ ܥܲܡܹܗ، ܣܵܒܵܒ ܡܲܡܘܼܝܹܐ ܡܘܼܡܝܼܵܐ ܝܗ݇ܘܵܐ ܝܵܘܣܸܦ ܠܒܢܲܝ̈ ܝܼܣܪܵܝܹܠ، ܒܹܐܡܵܪܵܐ، ”ܣܲܚܒܘܼܪܹܐ ܒܸܬ ܣܲܚܒܸܪܵܘܟ݂ܘܿܢ ܐܲܠܵܗܵܐ، ܗ̇ܝܓܵܗ ܡܲܐܣܩܝܼܬܘܿܢ ܠܓܲܪ̈ܡܝܼ ܥܲܡܵܘܟ݂ܘܿܢ ܡܐܲܟ݂ܵܐ.“

20ܫܘܼܢܹܐ ܠܗܘܿܢ ܡ̣ܢ ܣܵܟܘܼܬ، ܘܫܪܹܐ ܠܗܘܿܢ ܓܵܘ ܐܵܬܵܡ، ܒܡܲܪܙܵܐ ܕܒܲܪܝܼܵܐ. 21ܘܡܵܪܝܵܐ ܒܹܐܙܵܠܵܐ ܝܗ݇ܘܵܐ ܩܵܕ݇ܡܲܝܗܝ، ܒܐܝܼܡܵܡܵܐ ܓܵܘ ܣܛܘܼܢܵܐ ܕܥܢܵܢܵܐ، ܠܡܗܲܕܘܼܝܲܝ ܒܐܘܼܪܚܵܐ، ܘܒܠܲܝܠܹܐ ܓܵܘ ܣܛܘܼܢܵܐ ܕܢܘܼܪܵܐ ܠܒܲܗܪܘܼܢܹܐ ܥܲܠܲܝܗܝ، ܕܡܵܨܝܼ ܗ݇ܘܵܘ ܠܹܐܙܵܠܵܐ ܒܐܝܼܡܵܡܵܐ ܘܒܠܲܝܠܹܐ. 22ܠܹܐ ܫܲܢܹܐ ܗ݇ܘܵܐ ܣܛܘܼܢܵܐ ܕܥܢܵܢܵܐ ܒܐܝܼܡܵܡܵܐ، ܘܣܛܘܼܢܵܐ ܕܢܘܼܪܵܐ ܒܠܲܝܠܹܐ، ܡ̣ܢ ܩܵܕ݇ܡ ܥܲܡܵܐ.

Currently Selected:

ܡܦܩܢܐ 13: ABTAB

Highlight

Copy

Compare