ܡܦܩܢܐ 12
12
ܦܸܨܚܵܐ
1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ ܒܐܲܪܥܵܐ ܕܡܸܨܪܹܝܢ، 2”ܐܵܗܵܐ ܝܲܪܚܵܐ ܗܵܘܹܐ ܐܸܠܵܘܟ݂ܘܿܢ ܪܹܫܵܐ ܕܝܲܪ̈ܚܹܐ؛ ܒܸܬ ܗܵܘܹܐ ܐܸܠܵܘܟ݂ܘܿܢ ܝܲܪܚܵܐ ܩܲܕ݇ܡܵܝܵܐ ܕܫܹܢ݇ܬܵܐ. 3ܗܲܡܙܸܡܘܼܢ ܥܲܡ ܟܠܵܗ̇ ܓ̰ܲܡܵܥܲܬ ܕܝܼܣܪܵܝܹܠ، ܒܹܐܡܵܪܵܐ، ’ܒܝܵܘܡܵܐ ܕܥܸܣܪܵܐ ܒܐܵܗܵܐ ܝܲܪܚܵܐ، ܫܵܩܹܠ ܟܠ ܐ݇ܢܵܫܵܐ ܚܲܕ ܦܹܐܪܵܐ ܠܒܲܝܬܵܐ ܕܒܵܒܘܼܗܝ، ܚܲܕ ܦܹܐܪܵܐ ܠܟܠ ܒܲܝܬܵܐ؛ 4ܘܐܸܢ ܙܥܘܿܪܵܐ ܝܠܹܗ ܒܲܝܬܵܐ ܡ̣ܢ ܕܗܵܘܹܐ ܠܹܗ ܚܲܕ ܦܹܐܪܵܐ، ܗ̇ܝܓܵܗ ܫܵܩܹܠ ܗ̇ܘ ܘܫܒ݂ܵܒܹܗ ܕܩܘܼܪܒܵܐ ܠܒܲܝܬܹܗ، ܒܡܸܢܝܵܢܵܐ ܕܓܵܢܵܬܹ̈ܐ، ܟܠ ܚܲܕ ܠܩܲܕܪܵܐ ܕܐ݇ܟ݂ܵܠܬܹܗ ܚܲܫܒܸܢܝܼܬܘܿܢ ܥܲܠ ܦܹܐܪܵܐ. 5ܦܹܐܪܵܐ ܗܵܘܹܐ ܕܠܵܐ ܠܲܟܵܐ، ܐܘܼܪܙܵܐ ܒܲܪ ܚܕܵܐ ܫܹܢ݇ܬܵܐ. ܫܵܩܠܝܼܬܘܿܢ ܠܹܗ ܡ̣ܢ ܘܲܥܢܹ̈ܐ ܝܲܢ ܡ̣ܢ ܥܸܙܹ̈ܐ؛ 6ܘܢܵܛܪܝܼܬܘܿܢ ܠܹܗ ܗܲܠ ܝܵܘܡܵܐ ܕܐܲܪܒܲܥܣܲܪ ܡ̣ܢ ܐܵܗܵܐ ܝܲܪܚܵܐ، ܘܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ ܦܵܪܡܝܼ ܠܹܗ ܒܒܹܝܬ݇ ܪ̈ܲܡܫܹܐ. 7ܘܫܵܩܠܝܼ ܡ̣ܢ ܕܸܡܵܐ ܘܡܲܪܝܸܣܝܼ ܠܹܗ ܥܲܠ ܬܸܪܘܲܝܗܝ ܫܝܼܦܵܢܹ̈ܐ ܘܥܲܠ ܪܹܫ ܬܲܪܥܵܐ ܕܒܵܬܹ̈ܐ ܕܐܵܟ݂ܠܝܼ ܠܹܗ ܓܵܘܲܝܗܝ. 8ܘܐܵܟ݂ܠܝܼ ܠܒܸܣܪܵܐ ܒܗ̇ܘ ܠܲܝܠܹܐ، ܛܸܘܝܵܐ ܒܢܘܼܪܵܐ؛ ܒܦܲܛܝܼܪܹ̈ܐ ܘܒܝܲܪ̈ܩܹܐ ܡܲܪܝܼܪܹ̈ܐ ܐܵܟ݂ܠܝܼ ܠܹܗ. 9ܠܵܐ ܐܵܟ݂ܠܝܼܬܘܿܢ ܡܸܢܹܗ ܢܵܝܵܐ ܝܲܢ ܒܘܼܫܠܵܐ ܒܡ̈ܝܼܵܐ، ܐܸܠܵܐ ܛܸܘܝܵܐ ܒܢܘܼܪܵܐ، ܪܹܫܹܗ ܥܲܡ ܫܵܩܵܢܘܼ̈ܗܝ ܘܥܲܡ ܗܲܕܵܡܘܼ̈ܗܝ ܓܵܘܵܝܹ̈ܐ. 10ܘܠܵܐ ܫܵܒ݂ܩܝܼܬܘܿܢ ܡܸܢܕܝܼ ܡܸܢܹܗ ܗܲܠ ܨܲܦܪܵܐ؛ ܡܸܢܕܝܼ ܕܦܵܐܹܫ ܡܸܢܹܗ ܗܲܠ ܨܲܦܪܵܐ، ܡܲܩܕܝܼܬܘܿܢ ܠܹܗ ܒܢܘܼܪܵܐ. 11ܗܲܕܟ݂ܵܐ ܐܵܟ݂ܠܝܼܬܘܿܢ ܠܹܗ: ܚܲܨܵܘ̈ܟ݂ܘܿܢ ܐ݇ܣܝܼܪܹܐ، ܨܵܘܠܵܘ̈ܟ݂ܘܿܢ ܒܐܲܩܠܵܬܵܘ̈ܟ݂ܘܿܢ، ܘܚܘܼܛܪ̈ܵܘܟ݂ܘܿܢ ܒܐܝܼܕܵܘܟ݂ܘܿܢ، ܐܵܟ݂ܠܝܼܬܘܿܢ ܠܹܗ ܒܡܲܠܝܲܙܬܵܐ. ܦܸܨܚܵܐ ܕܡܵܪܝܵܐ ܝܠܹܗ.
ܥܹܐܕܵܐ ܕܦܲܛܝܼܪܹ̈ܐ
12’ܒܸܬ ܥܵܒ݂ܪܹܢ ܒܓܵܘܵܐ ܕܐܲܪܥܵܐ ܕܡܸܨܪܹܝܢ ܒܗ̇ܘ ܠܲܝܠܹܐ، ܘܒܸܬ ܡܵܚܹܝܢ ܟܠ ܒܘܼܟ݂ܪܵܐ ܕܓܵܘ ܐܲܪܥܵܐ ܕܡܸܨܪܹܝܢ، ܡ̣ܢ ܒܲܪܢܵܫܵܐ ܗܲܠ ܗܲܝܘܵܢ، ܘܒܸܬ ܕܵܝܢܹܢ ܠܟܠܲܝܗܝ ܐܲܠܵܗܹ̈ܐ ܕܡܸܨܪ̈ܵܝܹܐ. ܐܵܢܵܐ ܝܘܸܢ ܡܵܪܝܵܐ. 13ܘܕܸܡܵܐ ܒܸܬ ܗܵܘܹܐ ܐܸܠܵܘܟ݂ܘܿܢ ܢܝܼܫܲܢܩܵܐ، ܥܲܠ ܒܵܬܹ̈ܐ ܕܐܲܚܬܘܿܢ ܓܵܘܲܝܗܝ ܝܬܘܿܢ؛ ܘܟܲܕ ܚܵܙܹܝܢ ܠܕܸܡܵܐ، ܒܸܬ ܥܵܒ݂ܪܹܢ ܡܥܲܠܵܘܟ݂ܘܿܢ، ܘܠܹܐ ܗܵܘܝܵܐ ܥܲܠܵܘܟ݂ܘܿܢ ܡܚܘܿܬܵܐ ܠܛܲܠܘܼܩܹܐ ܐܸܠܵܘܟ݂ܘܿܢ ܟܲܕ ܡܵܚܹܝܢ ܠܐܲܪܥܵܐ ܕܡܸܨܪܹܝܢ. 14ܗܵܘܹܐ ܐܵܗܵܐ ܝܵܘܡܵܐ ܐܸܠܵܘܟ݂ܘܿܢ ܠܕܘܼܟ݂ܪܵܢܵܐ، ܘܥܵܒ݂ܕܝܼܬܘܿܢ ܠܹܗ ܥܹܐܕܵܐ ܠܡܵܪܝܵܐ؛ ܢܵܛܪܝܼܬܘܿܢ ܠܹܗ ܩܵܢܘܿܢܵܐ ܦܵܝܫܵܢܵܐ ܠܟܠܲܝܗܝ ܬܵܘܠܕܵܬܵܘ̈ܟ݂ܘܿܢ. 15ܫܲܒ݂ܥܵܐ ܝܵܘܡܵܢܹ̈ܐ ܐܵܟ݂ܠܝܼܬܘܿܢ ܠܲܚܡܵܐ ܕܦܲܛܝܼܪܹ̈ܐ. ܒܝܵܘܡܵܐ ܩܲܕ݇ܡܵܝܵܐ ܩܵܛܥܝܼܬܘܿܢ ܚܡܝܼܪܵܐ ܡ̣ܢ ܒܵܬܵܘ̈ܟ݂ܘܿܢ، ܣܵܒܵܒ ܟܠ ܕܐܵܟܹܠ ܠܲܚܡܵܐ ܚܡܝܼܥܵܐ ܡ̣ܢ ܝܵܘܡܵܐ ܩܲܕ݇ܡܵܝܵܐ ܗܲܠ ܝܵܘܡܵܐ ܫܒ݂ܝܼܥܵܝܵܐ، ܒܸܬ ܦܵܝܫܵܐ ܩܛܝܼܥܬܵܐ ܗ̇ܝ ܓܵܢܵܐ ܡ̣ܢ ܝܼܣܪܵܝܹܠ. 16ܒܝܵܘܡܵܐ ܩܵܕ݇ܡܵܝܵܐ ܥܵܒ݂ܕܝܼܬܘܿܢ ܓ̰ܡܵܥܬܵܐ ܩܲܕܝܼܫܬܵܐ، ܘܒܝܵܘܡܵܐ ܕܫܲܒ݂ܥܵܐ ܥܵܒ݂ܕܝܼܬܘܿܢ ܓ̰ܡܵܥܬܵܐ ܩܲܕܝܼܫܬܵܐ. ܦܘܼܠܚܵܢܵܐ ܠܵܐ ܦܵܐܹܫ ܦܠܝܼܚܵܐ ܒܐܲܢܹܐ ܝܵܘܡܵܢܹ̈ܐ؛ ܐܸܠܵܐ ܡܸܢܕܝܼ ܕܐ݇ܢܵܫܵܐ ܐܵܟܹܠ، ܐܲܚܟ̰ܝܼ ܗ̇ܘ ܦܵܐܹܫ ܗܘܼܕܪܵܐ ܒܝܼܵܘܟ݂ܘܿܢ. 17ܘܢܵܛܪܝܼܬܘܿܢ ܥܹܐܕܵܐ ܕܦܲܛܝܼܪܹ̈ܐ، ܣܵܒܵܒ ܗܲܪ ܒܐܵܗܵܐ ܝܵܘܡܵܐ ܦܘܼܠܸܛ ܠܝܼ ܠܟܸܢܫܵܘ̈ܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ؛ ܢܵܛܪܝܼܬܘܿܢ ܠܹܗ ܐܵܗܵܐ ܝܵܘܡܵܐ ܡ̣ܢ ܕܵܘܪܵܐ ܠܕܵܘܪܵܐ، ܩܵܢܘܿܢܵܐ ܠܥܵܠܲܡ. 18ܒܝܲܪܚܵܐ ܩܵܕ݇ܡܵܝܵܐ، ܒܝܵܘܡܵܐ ܕܐܲܪܒܲܥܣܲܪ ܒܝܼܹܗ ܒܪܲܡܫܵܐ، ܐܵܟ݂ܠܝܼܬܘܿܢ ܠܲܚܡܵܐ ܕܦܲܛܝܼܪܹ̈ܐ ܗܲܠ ܝܵܘܡܵܐ ܕܥܸܣܪܝܼ ܘܚܲܕ ܒܝܼܹܗ ܒܪܲܡܫܵܐ. 19ܫܲܒ݂ܥܵܐ ܝܵܘܡܵܢܹ̈ܐ ܠܵܐ ܦܵܐܹܫ ܡܫ݇ܟ̰ܝܼܚܵܐ ܚܡܝܼܪܵܐ ܓܵܘ ܒܵܬܵܘ̈ܟ݂ܘܿܢ، ܣܵܒܵܒ ܟܠ ܕܐܵܟܹܠ ܠܲܚܡܵܐ ܚܡܝܼܥܵܐ، ܒܸܬ ܦܵܝܫܵܐ ܩܛܝܼܥܬܵܐ ܗ̇ܝ ܓܵܢܵܐ ܡ̣ܢ ܟܸܢܫܵܐ ܕܝܼܣܪܵܝܹܠ، ܐܸܢ ܗܵܘܹܐ ܡܵܫܵܚܲܛ ܝܲܢ ܒܪܘܿܢܵܐ ܕܐܲܬܪܵܐ. 20ܡܸܢܕܝܼ ܡܘܼܚܡܸܥܵܐ ܠܵܐ ܐܵܟ݂ܠܝܼܬܘܿܢ؛ ܒܟܠܲܝܗܝ ܒܵܬܵܘ̈ܟ݂ܘܿܢ ܐܵܟ݂ܠܝܼܬܘܿܢ ܠܲܚܡܵܐ ܕܦܲܛܝܼܪܹ̈ܐ.‘“
ܦܸܨܚܵܐ ܩܵܕ݇ܡܵܝܵܐ
21ܗ̇ܝܓܵܗ ܩܪܹܐ ܠܹܗ ܡܘܼܫܹܐ ܠܟܠܲܝܗܝ ܚܘܵܪ̈ܕܸܩܢܹܐ ܕܝܼܣܪܵܝܹܠ ܘܐ݇ܡܝܼܪܹܗ ܐܸܠܲܝܗܝ، ”ܫܩܘܿܠܘܼܢ ܠܵܘܟ݂ܘܿܢ ܦܹܐܪܹ̈ܐ ܠܫܲܪ̈ܒܵܬܵܘܟ݂ܘܿܢ، ܘܦܪܘܿܡܘܼܢ ܦܸܨܚܵܐ. 22ܫܵܩܠܝܼܬܘܿܢ ܕܲܣܬܵܐ ܕܦܲܥܘܵܢܹ̈ܐ ܕܙܘܿܦܵܐ، ܘܛܵܡܫܝܼܬܘܿܢ ܠܵܗ̇ ܒܕܸܡܵܐ ܕܝܼܠܹܗ ܒܡܵܐܢܵܐ، ܘܡܵܚܹܝܬܘܿܢ ܡܸܢܹܗ ܥܲܠ ܪܹܫ ܬܲܪܥܵܐ ܘܥܲܠ ܬܸܪܘܲܝܗܝ ܫܝܼܦܵܢܹ̈ܐ؛ ܘܐܘܼܦ ܚܲܕ ܡܸܢܵܘܟ݂ܘܿܢ ܠܵܐ ܦܵܠܹܛ ܡ̣ܢ ܬܲܪܥܵܐ ܕܒܲܝܬܹܗ ܗܲܠ ܩܵܝܕܲܡܬܵܐ. 23ܒܸܬ ܥܵܒܹܪ ܡܵܪܝܵܐ ܠܸܡܚܵܝܵܐ ܠܡܸܨܪ̈ܵܝܹܐ، ܘܟܲܕ ܚܵܙܹܐ ܠܕܸܡܵܐ ܥܲܠ ܪܹܫ ܬܲܪܥܵܐ ܘܥܲܠ ܬܸܪܘܲܝܗܝ ܫܝܼܦܵܢܹ̈ܐ، ܒܸܬ ܥܵܒܹܪ ܡܥܲܠ ܗ̇ܘ ܬܲܪܥܵܐ، ܘܠܹܐ ܫܵܒܹܩ ܠܛܲܠܩܵܢܵܐ ܕܥܵܒܹܪ ܓܵܘ ܒܵܬܵܘ̈ܟ݂ܘܿܢ ܘܛܲܠܸܩ ܠܵܘܟ݂ܘܿܢ. 24ܢܵܛܪܝܼܬܘܿܢ ܠܹܗ ܐܵܗܵܐ ܫܘܼܠܵܐ ܠܩܵܢܘܿܢܵܐ ܐܸܠܵܘܟ݂ܘܿܢ ܘܠܒܢܘܿܢܵܘ̈ܟ݂ܘܿܢ ܗܲܠ ܥܵܠܲܡ. 25ܘܟܲܕ ܐܵܬܹܝܬܘܿܢ ܠܐܲܪܥܵܐ ܕܝܲܗ݇ܒܸܠ ܡܵܪܝܵܐ ܐܸܠܵܘܟ݂ܘܿܢ ܐܲܝܟ݂ ܩܵܘܠܹܗ، ܢܵܛܪܝܼܬܘܿܢ ܠܹܗ ܐܵܗܵܐ ܥܒ݂ܵܕܵܐ. 26ܘܟܲܕ ܒܲܩܪܝܼ ܠܵܘܟ݂ܘܿܢ ܒܢܘܿܢܵܘ̈ܟ݂ܘܿܢ، ’ܡܘܿܕܝܼ ܝܠܹܗ ܐܵܗܵܐ ܥܒ݂ܵܕܵܐ؟‘ 27ܓ̰ܲܘܸܒܝܼܬܘܿܢ، ’ܕܸܒ݂ܚܵܐ ܕܦܸܨܚܵܐ ܝܠܹܗ ܠܡܵܪܝܵܐ، ܕܥܒ݂ܝܼܪܹܗ ܡܥܲܠ ܒܵܬܹ̈ܐ ܕܒܢܲܝ̈ ܝܼܣܪܵܝܹܠ ܓܵܘ ܡܸܨܪܹܝܢ ܟܲܕ ܡܚܹܐ ܠܹܗ ܠܡܸܨܪ̈ܵܝܹܐ، ܐܝܼܢܵܐ ܦܘܼܨܹܐ ܠܹܗ ܠܒܵܬܲܢ̈.‘“ ܘܟܝܼܦ ܠܗܘܿܢ ܥܲܡܵܐ ܘܣܓ݂ܝܼܕ ܠܗܘܿܢ. 28ܘܐ݇ܙܝܼܠ ܠܗܘܿܢ ܒܢܲܝ̈ ܝܼܣܪܵܝܹܠ ܘܥܒ݂ܝܼܕ ܠܗܘܿܢ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ.
ܒܘܼܟ݂ܪܹ̈ܐ ܕܡܸܨܪ̈ܵܝܹܐ ܦܝܵܫܵܐ ܩܛܝܼܠܹܐ
29ܗܘܹܐ ܠܵܗ̇ ܒܦܲܠܓܵܐ ܕܠܲܝܠܹܐ، ܡܵܪܝܵܐ ܡܚܹܐ ܠܹܗ ܠܟܠ ܒܘܼܟ݂ܪܵܐ ܒܐܲܪܥܵܐ ܕܡܸܨܪܹܝܢ، ܡ̣ܢ ܒܘܼܟ݂ܪܵܐ ܕܦܸܪܥܘܿܢ ܕܝ݇ܬܝܼܒ݂ܵܐ ܥܲܠ ܟܘܼܪܣܝܹܗ، ܗܲܠ ܒܘܼܟ݂ܪܵܐ ܕܐܲܣܝܼܪܵܐ ܓܵܘ ܒܹܝܬ ܐܲܣܝܼܪܹ̈ܐ، ܘܟܠ ܒܘܼܟ݂ܪܵܐ ܕܗܲܝܘܵܢ. 30ܘܩܝܼܡ ܠܹܗ ܦܸܪܥܘܿܢ ܒܗ̇ܘ ܠܲܝܠܹܐ، ܗ̇ܘ ܘܟܠܲܝܗܝ ܪܹ̈ܓܵܘܵܬܹܗ، ܘܟܠܲܝܗܝ ܡܸܨܪ̈ܵܝܹܐ؛ ܘܗܘܹܐ ܠܵܗ̇ ܡܲܩܘܲܚܬܵܐ ܚܲܝܠܵܢܬܵܐ ܓܵܘ ܡܸܨܪܹܝܢ، ܣܵܒܵܒ ܠܲܝܬ ܗ݇ܘܵܐ ܒܲܝܬܵܐ ܕܠܲܝܬ ܗ݇ܘܵܐ ܓܵܘܹܗ ܚܲܕ ܡܝܼܬܵܐ.
ܒܢܲܝ̈ ܝܼܣܪܵܝܹܠ ܒܸܫܒ݂ܵܩܵܐ ܠܡܸܨܪܹܝܢ
31ܘܩܪܹܐ ܠܹܗ ܦܸܪܥܘܿܢ ܠܡܘܼܫܹܐ ܘܠܐܲܗܪܘܿܢ ܒܠܲܝܠܹܐ، ܘܐ݇ܡܝܼܪܹܗ، ”ܩܘܼܡܘܼܢ ܘܦܠܘܿܛܘܼܢ ܡ̣ܢ ܓܵܘ ܥܲܡܝܼ، ܐܲܚܬܘܿܢ ܘܐܘܼܦ ܒܢܲܝ̈ ܝܼܣܪܵܝܹܠ؛ ܙܹܠ݇ܡܘܼܢ ܘܦܠܘܿܚܘܼܢ ܠܡܵܪܝܵܐ ܐܲܝܟ݂ ܕܐ݇ܡܝܼܪܵܘܟ݂ܘܿܢ. 32ܠܲܒܠܘܼܢ ܐܘܼܦ ܦܸܣܩܵܘ̈ܟ݂ܘܿܢ ܘܒܸܩܪ̈ܵܬܵܘܟ݂ܘܿܢ، ܕܵܐܟ݂ܝܼ ܕܐ݇ܡܝܼܪܵܘܟ݂ܘܿܢ؛ ܙܹܠ݇ܡܘܼܢ، ܘܒܲܪܟ݂ܘܼܢ ܐܘܼܦ ܐܸܠܝܼ.“
33ܘܡܘܼܠܝܸܙ ܠܗܘܿܢ ܡܸܨܪ̈ܵܝܹܐ ܠܫܲܕܘܼܪܹܐ ܠܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ، ܣܵܒܵܒ ܐ݇ܡܝܼܪܗܘܿܢ، ”ܟܠܲܢ ܒܸܬ ܡܵܝܬܲܚ.“ 34ܘܫܩܝܼܠ ܠܹܗ ܥܲܡܵܐ ܠܲܝܫܹܗ ܡ̣ܢ ܩܵܕ݇ܡ ܕܚܵܡܹܥ ܗ݇ܘܵܐ، ܓ̰ܸܦܢܵܬܲܝ̈ܗܝ ܐ݇ܣܝܼܪܹܐ ܓܵܘ ܓ̰ܘܼܠܲܝ̈ܗܝ ܥܲܠ ܪ̈ܘܼܦ̮ܫܵܢܲܝܗܝ. 35ܥܒ݂ܝܼܕ ܠܗܘܿܢ ܒܢܲܝ̈ ܝܼܣܪܵܝܹܠ ܐܲܝܟ݂ ܚܲܒܪܵܐ ܕܡܘܼܫܹܐ؛ ܛܠܝܼܒ ܠܗܘܿܢ ܡ̣ܢ ܡܸܨܪ̈ܵܝܹܐ ܡܵܐܢܹ̈ܐ ܕܣܹܐܡܵܐ، ܡܵܐܢܹ̈ܐ ܕܕܲܗܒ݂ܵܐ، ܘܓ̰ܘܼܠܹ̈ܐ. 36ܘܝܘܼܗ݇ܒܸܠ ܠܹܗ ܡܵܪܝܵܐ ܪ̈ܲܚܡܹܐ ܠܥܲܡܵܐ ܒܥܲܝܢܹ̈ܐ ܕܡܸܨܪ̈ܵܝܹܐ، ܘܝܘܼܗ݇ܒܸܠ ܠܗܘܿܢ ܐܸܠܲܝܗܝ ܡܸܢܕܝܼ ܕܛܠܝܼܒ ܠܗܘܿܢ. ܗܲܕܟ݂ܵܐ، ܣܠܝܼܒ ܠܗܘܿܢ ܠܡܸܨܪ̈ܵܝܹܐ.
37ܦܠܝܼܛ ܠܗܘܿܢ ܒܢܲܝ̈ ܝܼܣܪܵܝܹܠ ܡ̣ܢ ܪܲܥܡܣܝܼܣ ܠܣܵܟܘܼܬ، ܐܲܝܟ݂ ܐܸܫܸܬܡܵܐܐ ܐܲܠܦܹ̈ܐ ܓܲܒ݂ܪܹ̈ܐ ܪ̈ܲܓ݂ܵܠܹܐ، ܫܒ݂ܘܿܩ ܡ̣ܢ ܝܲܠܘܼܕܹ̈ܐ. 38ܐܘܼܦ ܟܸܢܫܵܐ ܚܒ݂ܝܼܛܵܐ ܐ݇ܣܝܼܩ ܠܹܗ ܥܲܡܲܝܗܝ، ܘܦܸܣܩܹ̈ܐ، ܒܸܩܪ̈ܵܬܹܐ ܘܩܸܢܝܵܢܹ̈ܐ ܪܵܒܵܐ ܪܵܒܵܐ. 39ܘܝ݇ܦܹܐ ܠܗܘܿܢ ܓܸܪ̈ܕܲܝܹܐ ܦܲܛܝܼܪܹ̈ܐ ܡ̣ܢ ܠܲܝܫܵܐ ܕܦܘܼܠܛܹܐ ܝܗ݇ܘܵܘ ܡ̣ܢ ܡܸܨܪܹܝܢ. ܠܹܐ ܝܗ݇ܘܵܐ ܚܡܝܼܥܵܐ، ܣܵܒܵܒ ܦܝܼܫ ܠܗܘܿܢ ܛܪܝܼܕܹܐ ܡ̣ܢ ܡܸܨܪܹܝܢ، ܘܠܵܐ ܡܨܹܐ ܠܗܘܿܢ ܠܥܲܪܩܘܼܠܹܐ، ܐܘܼܦ ܙܘܵܕܹ̈ܐ ܠܵܐ ܗܘܼܕܸܪܗܘܿܢ ܩܵܐ ܓܵܢܲܝܗܝ.
40ܡܸܬܚܵܐ ܕܝ݇ܬܵܒ݂ܬܵܐ ܕܒܢܲܝ̈ ܝܼܣܪܵܝܹܠ ܓܵܘ ܡܸܨܪܹܝܢ ܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ ܝܗ݇ܘܵܐ. 41ܒܚܲܪܬܵܐ ܕܐܲܪܒܲܥܡܵܐܐ ܘܬܠܵܬܝܼ ܫܸܢܹ̈ܐ، ܗܲܪ ܒܗ̇ܘ ܝܵܘܡܵܐ، ܦܠܝܼܛ ܠܗܘܿܢ ܟܠܲܝܗܝ ܟܸܢܫܹ̈ܐ ܕܡܵܪܝܵܐ ܡ̣ܢ ܐܲܪܥܵܐ ܕܡܸܨܪܹܝܢ. 42ܚܲܕ ܠܲܝܠܹܐ ܕܢܛܵܪܬܵܐ ܝܗ݇ܘܵܐ ܠܡܵܪܝܵܐ ܒܘܼܬ ܦܵܠܲܛܬܲܝܗܝ ܡ̣ܢ ܐܲܪܥܵܐ ܕܡܸܨܪܹܝܢ؛ ܐܵܗܵܐ ܝܠܹܗ ܗ̇ܘ ܠܲܝܠܹܐ ܕܡܵܪܝܵܐ ܕܦܵܐܹܫ ܢܛܝܼܪܵܐ، ܒܟܠܲܝܗܝ ܒܢܲܝ̈ ܝܼܣܪܵܝܹܠ، ܡ̣ܢ ܕܵܘܪܵܐ ܠܕܵܘܪܵܐ.
ܩܵܢܘܿܢܵܐ ܒܘܼܬ ܦܸܨܚܵܐ
43ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ، ”ܐܵܗܵܐ ܝܠܹܗ ܩܵܢܘܿܢܵܐ ܕܦܸܨܚܵܐ: ܢܘܼܟ݂ܪܵܝܵܐ ܠܵܐ ܐܵܟܹܠ ܡܸܢܹܗ؛ 44ܐܝܼܢܵܐ ܟܠ ܥܲܒ݂ܕܵܐ ܙܒ݂ܝܼܢܵܐ ܒܙܘܼܙܵܐ ܐܵܟܹܠ ܡܸܢܹܗ ܡ̣ܢ ܒܵܬ݇ܪ ܕܓܵܙܪܹܬ ܠܹܗ. 45ܡܵܫܵܚܲܛ ܘܕܒ݂ܝܼܩܵܐ ܒܗܵܩܵܐ ܠܵܐ ܐܵܟܹܠ ܡܸܢܹܗ. 46ܒܓܵܘܵܐ ܕܚܲܕ ܒܲܝܬܵܐ ܦܵܐܹܫ ܐ݇ܟ݂ܝܼܠܵܐ؛ ܘܠܵܐ ܦܲܠܛܸܬ ܒܸܣܪܵܐ ܠܒܲܕܲܪ ܡ̣ܢ ܒܲܝܬܵܐ، ܘܓܲܪܡܵܐ ܠܵܐ ܬܵܒ݂ܪܹܬ ܡܸܢܹܗ. 47ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ ܥܵܒ݂ܕܝܼ ܗܲܕܟ݂ܵܐ. 48ܐܸܢ ܚܲܕ ܢܘܼܟ݂ܪܵܝܵܐ ܡܵܫܵܚܲܛ ܝܠܹܗ ܠܟܸܣ ܠܘܼܟ݂، ܘܒܵܥܹܐ ܕܥܵܒܹܕ ܦܸܨܚܵܐ ܠܡܵܪܝܵܐ، ܦܵܐܹܫ ܓܙܝܼܪܵܐ ܐܸܠܹܗ ܟܠ ܐܘܼܪܙܵܐ، ܗ̇ܝܓܵܗ ܩܲܪܒܸܢ ܠܸܥܒ݂ܵܕܹܗ. ܒܸܬ ܗܵܘܹܐ ܐܲܝܟ݂ ܒܪܘܿܢܵܐ ܕܐܲܬܪܵܐ، ܐܝܼܢܵܐ ܥܘܼܪܠܵܐ ܠܵܐ ܐܵܟܹܠ ܡܸܢܹܗ. 49ܚܲܕ ܩܵܢܘܿܢܵܐ ܒܸܬ ܗܵܘܹܐ ܠܒܪܘܿܢܵܐ ܕܐܲܬܪܵܐ ܘܠܢܘܼܟ݂ܪܵܝܵܐ ܕܝܼܠܹܗ ܡܵܫܵܚܲܛ ܒܓܵܘܵܘܟ݂ܘܿܢ.“ 50ܘܥܒ݂ܝܼܕ ܠܗܘܿܢ ܟܠܲܝܗܝ ܒܢܲܝ̈ ܝܼܣܪܵܝܹܠ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ ܘܠܐܲܗܪܘܿܢ. 51ܗܘܹܐ ܠܵܗ̇ ܗܲܪ ܒܗ̇ܘ ܝܵܘܡܵܐ ܦܘܼܠܸܛ ܠܹܗ ܡܵܪܝܵܐ ܠܒܢܲܝ̈ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ ܒܚܲܝܠܵܘܵܬܲܝ̈ܗܝ.
Currently Selected:
ܡܦܩܢܐ 12: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
