ܡܦܩܢܐ 11

ܡܵܘܬܵܐ ܕܒܘܼܟ݂ܪܹ̈ܐ ܕܡܸܨܪ̈ܵܝܹܐ

1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܗܹܫ ܚܕܵܐ ܡܚܘܿܬܵܐ ܒܸܬ ܡܲܝܬܸܝܢ ܥܲܠ ܦܸܪܥܘܿܢ ܘܥܲܠ ܡܸܨܪܹܝܢ، ܘܒܵܬ݇ܪ ܗܵܕܵܐ ܒܸܬ ܫܲܕܸܪܵܘܟ݂ܘܿܢ ܡܐܲܟ݂ܵܐ، ܘܟܲܕ ܫܲܕܸܪܵܘܟ݂ܘܿܢ، ܟܠܵܢܵܐܝܼܬ ܛܪܵܕܵܐ ܒܸܬ ܛܵܪܹܕ ܠܵܘܟ݂ܘܿܢ ܡܐܲܟ݂ܵܐ. 2ܘܐܵܕܝܼܵܐ ܐ݇ܡܘܿܪ ܠܥܲܡܵܐ ܕܛܵܠܒܝܼ ܐ݇ܢܵܫܵܐ ܡ̣ܢ ܫܒ݂ܵܒܹܗ ܘܒܲܟ݂ܬܵܐ ܡ̣ܢ ܫܒ݂ܵܒ݂ܬܘܼܗ̇ ܡܵܐܢܹ̈ܐ ܕܣܹܐܡܵܐ ܘܡܵܐܢܹ̈ܐ ܕܕܲܗܒ݂ܵܐ.“ 3ܝܘܼܗ݇ܒܸܠ ܠܹܗ ܡܵܪܝܵܐ ܫܵܦܵܩܲܬ ܠܥܲܡܵܐ ܒܥܲܝܢܹ̈ܐ ܕܡܸܨܪ̈ܵܝܹܐ. ܘܐܘܼܦ ܡܘܼܫܹܐ ܐ݇ܢܵܫܵܐ ܪܵܒܵܐ ܓܘܼܪܵܐ ܝܗ݇ܘܵܐ ܒܐܲܪܥܵܐ ܕܡܸܨܪܹܝܢ، ܒܥܲܝܢܹ̈ܐ ܕܪܹ̈ܓܵܘܵܬܹܐ ܕܦܸܪܥܘܿܢ ܘܒܥܲܝܢܹ̈ܐ ܕܥܲܡܵܐ.

4ܘܐ݇ܡܝܼܪܹܗ ܡܘܼܫܹܐ، ”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ، ’ܐܲܝܟ݂ ܦܲܠܓܵܐ ܕܠܲܝܠܹܐ ܒܸܬ ܥܵܒ݂ܪܹܢ ܒܓܵܘܵܐ ܕܡܸܨܪܹܝܢ، 5ܘܒܸܬ ܡܵܐܹܬ ܟܠ ܒܘܼܟ݂ܪܵܐ ܒܐܲܪܥܵܐ ܕܡܸܨܪܹܝܢ، ܡ̣ܢ ܒܘܼܟ݂ܪܵܐ ܕܦܸܪܥܘܿܢ ܕܝ݇ܬܝܼܒ݂ܵܐ ܝܠܹܗ ܥܲܠ ܟܘܼܪܣܝܹܗ، ܗܲܠ ܒܘܼܟ݂ܪܵܐ ܕܚܹܕܲܡܬܵܐ، ܕܝܼܠܵܗ̇ ܒܵܬ݇ܪ ܓܵܪܘܿܣܬܵܐ، ܘܟܠ ܒܘܼܟ݂ܪܵܐ ܕܩܸܢܝܵܢܹ̈ܐ. 6ܘܒܸܬ ܗܵܘܝܵܐ ܝ݇ܠܵܝܬܵܐ ܓܘܼܪܬܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ، ܕܠܲܝܬ ܗܘܝܼܬܵܐ ܐܲܝܟ݂ ܕܝܼܘܼܗ̇، ܘܠܵܐ ܒܸܬ ܗܵܘܝܵܐ ܡܸܢܕܪܸܫ. 7ܐܝܼܢܵܐ ܕܲܠܩܘܼܒ݂ܠ ܕܒܢܲܝ̈ ܝܼܣܪܵܝܹܠ، ܐܘܼܦ ܟܲܠܒܵܐ ܠܹܐ ܢܵܒܹܚ، ܠܵܐ ܠܐ݇ܢܵܫܵܐ ܘܠܵܐ ܠܗܲܝܘܵܢ. ܗܲܕܟ݂ܵܐ ܒܸܬ ܝܵܕܥܝܼܬܘܿܢ ܕܦܪܝܼܫ ܠܹܗ ܡܵܪܝܵܐ ܒܹܝܠ ܡܸܨܪ̈ܵܝܹܐ ܘܒܹܝܠ ܝܼܣܪܵܝܹܠ.‘ 8ܗ̇ܝܓܵܗ ܒܸܬ ܨܵܠܝܼ ܟܠܲܝܗܝ ܐܲܢܹܐ ܪܹ̈ܓܵܘܵܬܘܼܟ݂ ܠܟܸܣ ܠܝܼ، ܘܒܸܬ ܡܲܟܸܦܝܼ ܓܵܢܲܝܗܝ ܐܸܠܝܼ ܒܹܐܡܵܪܵܐ، ’ܦܠܘܿܛ ܐܲܢ݇ܬ ܘܟܠܹܗ ܥܲܡܵܐ ܕܝܼܠܹܗ ܒܵܬ݇ܪܘܼܟ݂.‘ ܘܒܵܬ݇ܪ ܗܵܕܵܐ ܒܸܬ ܦܵܠܛܹܢ.“ ܘܦܠܝܼܛ ܠܹܗ ܡ̣ܢ ܠܟܸܣ ܦܸܪܥܘܿܢ ܒܚܸܡܬܵܐ ܓܘܼܪܬܵܐ.

9ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܠܹܐ ܫܵܡܹܥ ܐܸܠܵܘܟ݂ܘܿܢ ܦܸܪܥܘܿܢ، ܕܙܵܝܕܝܼ ܕܘܼܡܵܪ̈ܝܼ ܒܐܲܪܥܵܐ ܕܡܸܨܪܹܝܢ.“ 10ܘܥܒ݂ܝܼܕ ܠܗܘܿܢ ܡܘܼܫܹܐ ܘܐܲܗܪܘܿܢ ܟܠܲܝܗܝ ܐܲܢܹܐ ܕܘܼܡܵܪܹ̈ܐ ܩܵܕ݇ܡ ܦܸܪܥܘܿܢ. ܐܝܼܢܵܐ ܡܵܪܝܵܐ ܡܘܼܩܫܹܐ ܠܹܗ ܠܠܸܒܵܐ ܕܦܸܪܥܘܿܢ، ܘܗ̇ܘ ܠܵܐ ܫܒ݂ܝܼܩ ܠܹܗ ܠܒܢܲܝ̈ ܝܼܣܪܵܝܹܠ ܕܦܵܠܛܝܼ ܡ̣ܢ ܐܲܪܥܹܗ.

Currently Selected:

ܡܦܩܢܐ 11: ABTAB

Highlight

Copy

Compare