ZEPHANIA 3
3
Jerusalem Kahemuibe benai Ripatkaibe
1Ka’nggibe, tewkesu’ndibe,
zai pelung ge lungme je kagetedbe namdi (Jerusalem) peduângga gu lei.
2Pechu rangbeibe kuâ pheu mak,
pechu geteiliabeibe du lu gai mak,
Tingwang je ’nnumtew mak,
zai pe Rapeu dage du wang’nna mak lei.
3Chipau namdi lungge rezieteime â,
duilui ’nrakelungkung bambe gum lei;
zai samramme ze â,
hegî ting gu henei ramme tingbapat mak tâne hemeira katte ’nsakkaimakbe kau ramme gum lei.
4Pe gu kemeume â keneibe ’mpuangraibe kau ramme,
zai choateube kau ramme lei;
pe gu tingkume ne ka’nchibe bâm tewkahebâ lei;
penui ne hingde je ka’nggi lei.
5Acheuleusede chi namdi lungge nguabampeu Tingwang â kapelingbe kau lei,
pa â kesiabe tew gai mak lei.
Pa â hechua ’nsangne ge ’ngngîn mak luisui ze samram’nzei gai ze bam lei,
acheubeisede ziemmena ka’ngkuibe kau â,
ka’ngngambe chî mak lei.
6Heramzat ramme je I ne tew’ngga kam ’ndi de lei,
zai penui gu hekêtkaibeki ramme riamkeu kam di de lei,
mî de penui gu puidi ramme ge tat kai ta de ra hangge I ne puidi ramme tew’nsia ’ndi de lei;
penui gu namdi ramme gua’mpiezîng ’ndi ze,
ziemmena ’ngga di,
zai pelung ge kelungme bam ta de ra I ne tew gai bei de lei.
7“Chipau namdi ze achu hing sing gu,
I ne geteiliabe lu gu,
zai pe peireige I ne teiwangchanggai’ndibe mâtew-tewsede pa ngau dai ra mak lei,” ze I kacheu de lei.
Kane penui kechoa-keduaibe tâ tewbe ramme ze rankaibi-bi ze bam lei.
8Chidaze achu piekua bam lau,
ze Tingwang ne kacheu de lei,
heram zat ramme je chau’ngkui gai ra hang I zuachuderabe mai ze piekua le lau.
Heram zat ramme je kumwangherua gai lu,
heguangram ramme ze tei’ndui gai lu,
penui peireige a râtabe benai I a lumpumbe ruîkeu gai ra hang a lung teleu ’ndi daseu;
chidezai a lumpumbe gu hemi getaube ne kedeirei rû kam ’ndu de lei.
9Chipau hî wangchang dezai â,
helad ka’nchibe ne ziemmename sa ze bam ra I ne teleukeli gai gu lei,
chidezai penui ’nteumena Tingwang ji kû ze bam de ra,
zai lungkat-suikattew ze pe guâ ’nggua ze bam de ra hangge zeu.
10Ethiopia geugiam ’mbe a gu ziemmena hûtimraripkai’ndibe kau ramme ne du a dage penui gu herâtewbe kela teiwang ze peipat kai gu lei.
11Chipau mai ge â ningnui tatew ramme gene achu ka’nggibe ramme ziegene ningnui je I tew’ngngam gai dai ra mak lei;
chidezai â ’ngnguangrai ze gechîrettewbe kau ramme je â,
ningnui ruagene lutua ’ndu de lei,
zai a gu ka’nchibe deiloa ge ningnui gechîrettewbe ze bam dai ta du de lei.
12Ningnui ruage kecheiluilungpungme benai kelaksiame je I sâudiak kai gu daseu.
Tingwang ji ge penui ’nnumtewbe kai ze bam gu lei.
13Israelme ’nsakkaidiakme ne tâ-kesiabe tew ra mak,
zai karasa sa ra mak,
zai penui mui ramme ge du karasa sabe leiria katte bam dai ra mak lei.
Penui teu ze sak lu jeikela ze bam gu,
zai mî ne du penui je tewhingrim gai dai ra mak lei.
Hesuiyibe Leu
14Zaion na heleu’mpui gau,
heleutew’nchi lau; Israelme gau,
heleutew ’nrung zu lau;
Jerusalem na heleu’mpuî gau,
ning lung leine ne ning suiyi’nta zu lau.
15Ning peireige samramgaibe ramme ze Tingwang ne lutua dai ’ndi de lei,
ning teureime je pa ne kumtua ’nde lei,
Israelme gu Heguang,
Tingwang ze â ningnui ruage la de lei;
tewka’nsiabe ningnui hing dai ra ga de lei.
16Chipau mai wangchang dezai â,
Jerusalem peireige acheu ze sa gai gu lei;
“Zaion namdi gau, hing se lau;
peize ning ba peran-ga ze bam ta lau.
17Tingwang, ning Rapeu â ningnui ruage la de lei,
pa â heteureipeu ningnui je kengambe (keduîbepeu) peigaipeu lei;
pa ne ningnui peireige hesuiyibe ne pui ze bam gu lei,
Pa kehungbe ziegene ningnui keringbe pa ne tewrechi gai gu lei;
ningnui peireige pe suiyibe ne pui ze heleutew gu lei,
kahengîbe mai ge gum zeu.
18Tew’nsiarabe zat ze â,
I ne ningnui dagene tei’mbia gai gu lei,
chidezai ningnui ka’nrube lie bam ta de ra hangge zeu.
19Chipau hî dezai â ningnui je tewsâme je I ne samram gu lei,
chuakanime je I ne tew’nring gai gu,
zai tuâpat’ndibe zat je I ne teiwang’ndui gai gu lei,
chidezai penui ka’ngngambe ze getoabe hangge I ne tewkeli gai gu lei,
zai kedeirei luî ge penui ji di ze bam gu lei.
20I ne ningnui je nguawang’nduigaibe ting dezai,
I ne ningnui ki ge nguawang gai gu lei;
kedeirei ge ziemmename leine ruage ningnui ji di ra,
zai toa ze bam ra I ne tew gai gu lei;
ningnui masuage pauyibe ningnui je pei gai dai dezai neu,”
ze Tingwang ne kacheu de lei.
Currently Selected:
ZEPHANIA 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
