ZEPHANIA 2
2
Helung Heli ra Kiambe
1Wangherua lu ze ’nduichu zu lau,
Hei ’ngngammakbe zat gau,
2gepaimoîne ramme je tingkai ne guitua’ndibe gum ze ningnui je guituarabe suage,
zai Tingwang lumpum ningnui peireige wangchangrabe suage,
zai chi Tingwang lumpum mai ningnui peireige wangchangrabe suage wang’ndui zu lau.
3Heram lungge kecheiluilungpungme leine,
zai pa ne kerangbe kuâpheume leine gau,
Tingwang je peu zu lau;
kapelingbe benai kecheilung-pungbe ze peurankai zu lau;
chidezai Tingwang lumpum mai ge ningnui je â,
tei’mbia gai be ra hangge du chang lêu gu lei.
Israelram Huazie ge Miduânggabe Wangrabe
4Gaza namdi ze â putzîng gai ’ndi ze bam gu,
zai Ashkelon je â gua’mpiezîng gai gu lei.
Ashdod keloame je â tîngna’nding hî gene guatua ’ndu,
zai Ekron keloa je â puitua gai bu lei.
5Ningnui sungkling kung ge lungme ningnui Kerethme zat nung gau,
ningnui duângga gu lei.
Hei Kanaan, Philistiame gu heram gau,
Tingwang pe râtabe sam ning peireige lamui de lei.
Ningnui ’nteumena je I ne tew’ngga ’nzâuchiak kai gu lei.
6Zai sungkling kung bekâm ramme ze melitaning chang gu,
zai meli reîme ki ramme benai meli merie ramme tew gai ze bam gu lei.
7Judame ’nsakpatme ne chipau heram ’nram gu lei.
Chige penui gu melidung deteu ze bam ra ngua gai ze,
hegî ting dezai Ashkelon keloa gu heki ramme ge penui jei gu lei.
Tingwang penui Rapeu ne penui je ’nningtinggeu bam gu,
zai lungzeunetew ze bam dai ra pei gai dai gu lei.
8Moabme ne kakedeube benai Ammonme ne a gu ziemmena peireige ’nrû-kagetiebe kuâ I seu lu de lei,
zai penui ram du sut dui lei,
ze keditewbe kuâ I seu lu de lei.
9Chidaze I bambe ziegene Moab ze â,
Sodom gum ze chang gai du,
zai Ammonme ze Gomorra gum chang gu lei.
Chipau bâm ramme ze â,
’mbu (’nneibang) ramme benai ’nchaî-kuiki ne puigit kai du,
zai betingbeta hangge gua’mpie’ndibe bâm chang gu lei.
A gu ziemmena ’nsakkaidiakme ne penui je gechim’nsia gu,
zai a zatme kechai-’nreipatlume ne penui ram sut-tat kam ’ndu lei,
ze baudime gu Tingwang Israelme Rapeu ne kacheu de lei.
10Penui gechîrettewbe ziegene aize penui dam hangge chang ra de lei,
penui ne baudime gu Tingwang gu ziemmena peireige ngau’nna ze penui dit tewliabe ziegeneu.
11Tingwang ze penui hangge kehingbe chang gu lei;
eu lei, pa ne kedeirei gu hera ramme leine je keduiriam-teu ’ndu lei,
chidezai penui bam-bambe bâm gene pezat leine ne pechu kellum gu lei.
12Ningnui Ethiopiame gau,
ningnui je du a gu hiazutkie ne gî ’ndu lei.
13Tingpeî ’mbia bambe heram peireige pe ba getuapat ku,
zai Assiriaram ze pa ne tew’ngga ’ndu lei;
dezai pa ne Ninebi keloa je gua’mpie’ndibe chang ra,
zai tingkangram gum ze changku ze bam ra tew gai gu lei.
14Zai chi pelung geze kauruidung ramme,
zai hênam gu hekaune ramme leine wang ze jei gu lei.
Kechia’ndi ramme peireige hebie ramme wang ze tâu bam gu,
zai muicheiki ramme peireige tâu lu ze penui kuâ ’nra gu,
zai kûngduaki ge ’nggek ramme ’nra gu lei;
kedarching ne tewlubeki ramme ’nsangdu keuhiangtat ti bam gu daseu.
15Aipau namdi ze lung’ntakediâu ze kehingbe chita di ze pe runne pechu,
“I ze dilangbe kau de lei,
a peirei wangduibe kau ga de lei,”
kacheube namdi ze de mei?
’Ndaigum ze pechu gua’mpiezîng ’ndi ze bam nung se lau;
hekaune ramme jeika’nduibe bâm changgaidibe nung ze hêu!
Chige tatpelagaime leine ne ngauhingrim ze kezinkeluak ze bam de lei.
Currently Selected:
ZEPHANIA 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
