ZEKARIA 3
3
Tingku Dilangpeu je Kemeu’mpeu gu Keliâbe gene Ngaube
1Chidadege â Tingwang gu angel’mpeu suage tingku dilangpeu Joshuabe sapbambe benai Satan ne pechu ’nggi ra pa hezat’mbia ge sapbambe pa ne achu teilia de lei. 2Dadege Tingwang ne Satan je, “Hei Satan! Tingwang ne ningchu ka’ngngiam lei! Jerusalem je kelânggaipeu Tingwang ne ningchu ka’ngngiam lei! Ziemmena aipaupeu ze hemi gene tukpatbe heching mak mei?” ze kacheu de lei. 3Joshuabe â pe paîni huakchuakbe kai lu angel’mpeu suage sapbam de lei. 4Dadege pe suage sap-bamme je angel’mpeu ne, “Pe dagene hepaîni kahebâbe luakpat ne lau,” acheu bei de lei. Zai pa ne pechu, “Pie le lau, ning dagene nang kesiabe I ne lutua gai ’nde lei, zai I ne ningchu hepuâni yi-kadesangbe ne luak kai gu lei,” kacheu de lei. 5Chidadege I ne, “Penui je peize pe peî ge hepeî’nggau ka’nchibe luak kai be lau,” ze acheu bei de lei. Chigum ze penui ne pe peî ge hepeî’nggau ka’nchibe luak kai ze pe puâ kai bei de lei; zai pehiage Tingwang gu angel’mpeu â sapkua bam lei.
6Dadege Tingwang gu angel’mpeu ne Joshuabe je samdie gai ze, 7“Tingwang baudime Rapeu ne aigum ze rang lei: Nang ne a ’mpuî ge tat ra, zai I kerangbe ramme tei ra dizai â nang ne a ki peireige samram gu zai a kisîam ge nang ne rezietei gu lei, zai aige sapme ruage nang tatrua ra pebâm I ne ningchu pei gu lei. 8Hei, nang tingku dilangpeu Joshuabe gau, nang benai ning kangme ning suage ka’ntaume ne ’ngking le lau, penui â mâ-wangchangrabe hang heda chakpiechime bau daze: Pie le lau, I ne a guâ ka’ngguapeu Pekeî (chize Zerubbabelbe) je nguawang gai gu lei. 9Pie le lau, tingkupuâ ge bambe tingchugeu pum, kat ge bechung sena pungbe Joshuabe suage I ne kai ’nde lei, chige I ne leisirit ’nrit kai gu lei, ze Tingwang baudime Rapeu ne kacheu de lei, zai aipau heramme mâu ze tingnaimikpui kat lung gene I ne lutua gai gu lei. 10Chipau mai ge â ningnui ’nteumena ne pe runne pe kining-ning’mpeu je pe gu grepchî hiâm benai pe gu ’mbeuchîbang kangge wang gai ra ’nnâ gai kam gu lei,” ze kacheu de lei.
Currently Selected:
ZEKARIA 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
