ZEKARIA 4
4
Hemibung-kaira Keliâbe gene Ngaube
1Zai angel’mpeu achu ka’mpaupeu a dage wang gai kadai de lei, zai ziemmena je pa kejeibe gene ’ngkia gai bei gum ze achu ’ngkia’nrakhak kai de lei. 2Dadege pa ne achu, “Nang ’ndaikau ngau lau?” kacheu de lei. Dadege I ne, “Gechâk ’nnia gu hemibung-kaira bepeirei ge mâkuak bambe benai chige hemibung sena zai chi hemibung sena kat-kat ge kachâlei muiki sena bam lei. 3Zai chipau hiage olib chingbang kena bam lei, kat ze mâkuak gene hezat’mbia ge bam, zai kêdabe kat ze heku’mbia ge bambe I ngau lei,” ze acheu bei de lei. 4Dadege achu ka’mpaupeu angel’mpeu je I ne, “A pau gau, airamme ze ’ndaikau rei lau?” ze kacheu de lei. 5Chidadege achu ka’mpaupeu angel’mpeu ne achu kak ze, “Airamme ze ’ndaikau mei be nang â chî mak mei?” ze kacheu de lei. I ne, “A pau gau, I â chî me lei,” acheu bei de lei.
Zerubbabelbe dage Tingwang gu Samhatkaibe
6Dadege pa ne achu, “Aize Tingwang sam Zerubbabelbe hangge peibe de lei: A ranchi ne mak, a rimchi ne du mak, kane a gu Herui ne lei, ze Tingwang baudime Rapeu ne kacheu de lei. 7Ningchu â ningdaulak lei, Hei peloa kedibe gau? Zerubbabelbe suagene nang zene bekâmtenaibe pebâm yibe hangge chang gu lei; zai pa ne, ‘Peluiyi-desang lei, peluîyi-desang lei,’ acheu ’ngkiak ze bepeirei chukâng teiwang gai gu lei,” ze kacheu de lei. 8Chipau peireige du Tingwang gu sam a dage wangkeu ze, 9“Zerubbabelbe ba gene aipau ki gu pedimchukâng kai gai ’nde lei; chize pe ba gene tew du tew kam gai gu lei. Chidezai Tingwang baudime Rapeu ne achu ningnui dage lang gai lei be nang ne chî gu lei. 10Heki dîmchu’nchui gai-du-makbe tingnaimikpui ngaume leine ne penui suiyi’nta gu lei, zai Zerubbabelbe ba gene tingchu kuaisi ze tewbambe ngau gu lei.
“Airamme sena ze kedeirei pelane ruatuibe Tingwang mik lei.” 11Chidadege â I ne pechu, “Hemibung-kaira gene hezat’mbia benai heku’mbia ge olib chingbang kena bambe ze ’ndaikau rei lau?” acheu bei de lei. 12Zai pakenabe ge I ne pechu, “Mâ-châdui ruîpatbe gechâk ne tewbe beki putkapelabe heria hiage bambe olib chingbang keî kena ze ’ndaikau rei lau?” ze acheu bei de lei. 13Pa ne achu, “Airamme ze ’ndaikau mei be nang â chî mak mei?” ze kacheu de lei. I ne, “A pau gau, chî me lei,” ze acheu bei de lei. 14Chidadege pa ne, “Ai hangna ze â kedeirei leine gu Tingwang guâ ’nggua ra kelâng ze ’nnukkai’ndibe kena de lei,” ze kacheu de lei.
Currently Selected:
ZEKARIA 4: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
