ZEKARIA 2
2
Keliâbe gene Mâ-ka’ndeube-ria Ngaube
1Zai a mik rak’ndingchu gai de lei, zai ni pie le lau, ziemmena pe ba ge mâ-ka’ndeube ria teipeu je I ngau lei! 2Chidadege I ne, “Nang ’ndai’ngge tat lau?” ze kacheu de lei. Dadege pa ne achu, “Jerusalem pedit benai petâ ze ’ndaibe riâ mei be ’ndeu ra lei,” ze kacheu de lei. 3Zai pie le lau, achu ka’mpaupeu, angel’mpeu tatwang de lei, dadege angel’mpeu kêdapeu pechu hedau ra tatwang de lei, 4zai pe suage, “Paktat lu chi rehang’mpeu mâria teipeu je, ‘Ziemmena benai kaurui ne puidibe ziegene Jerusalem ze keloa ramme ne bampuigit nan ze kerie riegua ta di de lei. 5Hemi ne kerie rieguabe hang I zene chang ra de lei, zai I zene pelungki ge pengêudibe hang chang ra de lei,’ ze rang gai du lau,” ze kacheu de lei.
Keli’ndime je Wang ra Kûgaibe
6Chau! chau! Tingpî ’mbia gu heram gene pat te zu lau, ze Tingwang ne kacheu de lei; tingsung kedibe gu tingkai medai gum ze ningnui je langrarip kai lei, ze Tingwang ne kacheu de lei. 7Chau! ’Mbia de lau, Zaion, nang Babilon’mpui dage bambe kau gau. 8Tingwang baudime Rapeu ne aigum ze rang lei, pa pengêudibe bambe luigumbe gene ningnui je rik ze tewkakeleume heramzatme dage achu lang gai bei de lei, ningnui je ’nggi ze deîtaugaibe kau â, I ne ka’nzâbe je pa deîtaugaibe chang lei: 9“Pie le lau, I ne penui peireige a ba kezap kai gu de lei, chidezai tingkat ge penui guâ ’nggua gai ze bamme ne penui gu sut dai gu lei. Chipau châng dezai Tingwang baudime Rapeu ne achu lang gai lei be ningnui chî gu lei. 10Hei, Zaion ’mpuimi gau, heleutew ze ning suiyi du lau; pie le lau ni, ning dage I bam ra hang wang lamui de lei ze Tingwang ne kacheu de lei. 11Zai chipau mai ge heram ramme misonggame ne Tingwang dage penui run runne wangherua gai kam gu lei; chidezai I ne penui ruage bam gu lei, zai Tingwang baudime Rapeu ne achu ningnui dage lang gai lei be ningnui chî gu lei. 12Dezai ka’nchibe heram ge Juda ze Tingwang ne pe gu heram chang ze ’nram gu lei, zai Jerusalem je kelângpat kai dai gu lei,” kacheu de lei.
13Tingwang suage ziemmena leine ne rim bam zu lau; pebâm ka’nchibe gene perunne zuachu de daseu.
Currently Selected:
ZEKARIA 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
