ZEKARIA 1
1
Tingwang ne Pe gume je Pe lam Helatwang dai ra Kube
1Dariabe kaheguangbe pakenabe kum hekêu padesatbe kêu ge Iddobe chapeu zai Berekiabe na kemeu’mpeu Zekariabe dage Tingwang gu sam wangchang de lei, acheu sa ze, 2“Ning paume dage Tingwang â pe râta-desang la de lei. 3Chipauziegene Tingwang baudime Rapeu ne aigum ze rang lei: A lam helatwang lau, ze Tingwang baudime Rapeu ne kacheu de lei, ze penui je salia lau. Chidezai I ne ningnui lam helatwang dai gu lei ze baudime gu Tingwang ne kacheu de lei. 4Ningnui paume gum bam se lau, tingtie ge kemeume ne acheu ze sa ze, ‘Tingwang baudime Rapeu ne aigum ze rang lei, ningnui tebamtak kesiabe benai ningnui tatew tak kesiabe gene helatwang dai de lau,’ ze paugaibeime gum zeu. Kane penui ne a kuâ seu mak zai mâ-hangge du chak kai mak tai de lei, ze Tingwang ne kacheu de lei. 5Ningnui paume penui ’ndaige la lau? Zai kemeume penui betingbeta ring bam mei? 6Kane a guâ ka’ngguame, kemeume ramme je a sam ramme benai a gu hingde rawgaibe ramme I diegaibe ze ningnui paume ramme peireige deîtau gai mak tai semei? Chigum ze penui lung heli di ze, Tingwang baudime Rapeu ne anui kebambe benai tâtewbe ’mpuî leine ge nguatatew gu lei be pa ne ’nninggailube luigum ze anui dage nguatatew de lei, ze kacheu de zeî lau,” ze acheu zeu.
Kemeu’mpeu gu Keliâbe gene Ngaube Hekun
7Dariabe kaheguangbe pakenabe kum ge Shebat kêu, chize hekêu pakereu ze katbe kêu gu hezie ’ngkai ze medai mai ge Iddobe chapeu zai Berekiabe na kemeu’mpeu Zekariabe dage Tingwang gu sam wang de lei; dadege Zekariabe ne, 8“Tingmuî ge I ngau lei, pie le lau, ziemmena hangkat ne hekun kegiebe chua de lei! Pebakchuak ge Murtel chingbang zeu ge pa sap bam lei; dadege pe chaige hekun kegiebe, gietikriabe, zai kehâbe ramme bam lei. 9Chidadege I ne ‘A pau gau, airamme ’ndaikau rei lau?’ kacheu de lei. Tinggîm angel’mpeu achu ka’mpaupeu ne achu, ‘Chiramme ’ndaikau mei be I ningchu teilia gu lei,’ kacheu de lei. 10Chidadege Murtel chingbang zeu ge sappeu ne kak ze, ‘Airamme ze â kedeirei reî ze tatrua ra Tingwang ne langgaibe kau ramme de lei,’ kacheu de lei. 11Dadege Tingwang gu angel’mpeu, Murtel chingbang zeu ruage sappeu je penui ne kak ze, ‘Anui ne kedeirei pieruatui gai de lei, zai pie le lau, kedeirei luî yi la kam lei,’ ze kacheu de lei. 12Chidadege Tingwang gu tinggîm angel’mpeu ne, ‘Hei baudime gu Tingwang gau, nang ne ai kum sena riâ ning lung siagai’ndime Jerusalem benai Juda gu namdi ramme peireige ’ndaitie riâ ngau’nggia gai mak ze bam gai ra rei lau?’ ze kacheu de lei. 13Dadege angel’mpeu achu ka’mpaupeu je Tingwang ne ’nggia ze tumbe sam ne kak kai de lei. 14Chigum ze achu ka’mpaupeu angel’mpeu ne achu, ‘Ning rankai ze sarua gai du lau, Tingwang baudime Rapeu ne aigum ze rang lei: Jerusalem benai Zaion peireige I a lunggailak-desang de lei. 15Zai heram ramme temichai ze bamme je I a râta-desang de lei; I â kecheîne runne a lungsia lei, kane mi duânggabe, pausiabe hangge penui ne kai gai sua lei. 16Chipauziegene Tingwang ne I ngauka’nggiabe gene Jerusalem ge helatwang gai de lei, ze aigum ze kacheu de lei; a ki chige tewchu gai gu, zai Jerusalem peireige mâ-ka’ndeube riâ ze gîngpat kai gu de lei, ze Tingwang baudime Rapeu ne kacheu de lei. 17Ning rankai ze paugaidairabe ze Tingwang ne aigum ze rang lei: A gu namdi ramme lung’ntua-desangchu gu lei, zai Tingwang ne Zaion je tum gai dai gu lei, zai Jerusalem je kelâng gai dai gu lei,’ kacheu lei,” ze kacheu de lei.
Keliâbe gene Mâ-kie ramme Ngaube
18Dadege I a mik rak’ndingchu gai de lei, zai ni pie le lau, mâkie medai I ngau lei! 19Chidadege achu ka’mpaupeu angel’mpeu je I ne, “Airamme ze ’ndaikau rei lau?” kacheu de lei. Dadege pa ne achu, “Airamme ze â Juda ge, Israel ge zai Jerusalem ge kairaripkai’ndibe mâkie ramme de lei,” ze kak lei. 20Chidadege â Tingwang ne hegeî kahekime hangmedai je achu ngualia de lei. 21Dadege I ne, “Aime bau ze ’ndaikau tew ra wangbe kau lau?” ze kacheu de lei; pa ne achu, “Aime bau ze â Juda ge langraripkai’ndibe mâkie ramme de lei, chidezai ziemmena mî du pe peî ze ’ngngûchu mak ra hangge zeu; aime â Juda je hûtimra gai ra heramzatme gu mâkie ramme ’nduasûn gai lu ze bamme je tuâkeu gai ze penui je tewgechimrim gai ra wangme bau de lei,” ze kak lei.
Currently Selected:
ZEKARIA 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
