ROMME 7
7
Kelaktewbe gene Teika’ndabe
1A puiname gau, hingde gechîme dage aipau sam ze I sa lei, hingde ze â pa keringbe ting ge runne ziemmena je pi lei be ningnui chî mak mei? 2Chigum ze ’mpuimi meidipui â pe napeu ring tâne â hingde ne pechu pi bam lei; kane pe napeu chai dizai â, pa ze hingde lam gene pe napeu dagene pat ti de lei. 3Chipau luigum ze pe napeu ringbe ting ge kêdapeu dage pa ne ngualung dizai â pechu ze kahemapui ze kû gu lei. Kane pe napeu chai dizaine â chipau hingde zene pi ta di de lei, zai kêdapeu dage meitat dai sedu pa ze kahemapui mak lei.
4Chipau luigum ze a puiname nung gau, Krista pum gezene hingde ge ningnui â chai gai di de lei, chidezai Hera hangge anui rachî ’nchirabe hanggene kechaibe gene kuakchugaipeu, chi kêdapeu (Isua) gu ningnui chang de ra hangge zeu. 5Hemeipumsie ge anui bambe ting ge hemui lam ge anui ka’nchiebe ramme ze hingde ne gecheu bei ze kechaibe rachî ’nchi ra hangge anui pumkeî ramme ge tâtew bei de lei. 6Kane chuna â hingde gene anui pat ti de lei, chi anui je kebangtewgaibe gene chai di de lei, chidezai tingtie gu rawdiakkaibe-hingde guâ ’nggua mak ze kane Herui gu keringbe karchibe gene anui ’nggua ra hangge zeu.
Hingde benai Hemui
7Acheuzaine anui ’ndaikau sa ra lau? Chi hingde ze hemui mei? Acheu me lei! Acheuleusede hingde bam mak nung laîzai â hemui ze I chî ra mak lei. Hingde ne, “Dekum se lau,” acheu mak nung laîzaine â chi katekumbe ze hemui lei be I chî ra mak lei. 8Kane hemui â chi samdiegaibe ge pedâuyibe ngau lu dadege ka’nchiebe zat leine ze I ge tewpat kai ze bam lei, hingde gabe ge hemui du chai daseu. 9Tingkat â hingde ga ze I â ring bam lei, kane chi samdiegaibe wang dege hemui ze tew’nrakchu gai bei ze I â chai di de lei; 10keringbe hangge samhatkaibe chi samde singbe zene a hangge kechaibe teiliadesi gai bei de lei. 11Hemui ne chi samdiegaibe ge pedâuyibe ngau lu, achu choa gai ze tewchat ’ndi daseu. 12Chigum ze hingde â ’nchi lei, zai samdiegaibe ze du ’nchi zai ’nzei zai yi lei.
13Acheuzaine, chi keyibe zene a hangge kechaibe teiwang semei? Acheu me lei! Kane hemui â hemui lei be teilia be ra hangge mâ-keyibe gene kechaibe dage nguatatew bam lei, zai samdiegaibe gene hemui ze seikamlakbe chang le ra hangge zeu.
Ziemmena Lungge Ka’nggibe bambe
14Hingde â Herui lam gu lei be anui chî lei; kane I â hemeipumsie gu de lei, zai hemui kangge bam ra zuagaibeibe kau de lei. 15A runne a tatew ramme I â chî mak lei. I neibe I tew mak, kane I ngauka’nriebe singbe ze I â tew daseu. 16Chunage I tewneimakbe ze I tew dizai â, hingde ze yi de lei be ze I hezuâ gai de lei. 17Chigum dizai â, chize tewbe ze I ne chang ta de lei, kane a lungge hemui bambe zene de lei. 18A pum hemeipum ge mâ-keyibe mâ de bam mak lei be I chî daseu. ’Ndaibe ze ka’nzei mei be â I kelâng dui, kane chize I tewchi lak lei. 19Mâ-keyibe I neibe ze I tew mak, kane kesiabe I neimakbe ze I tew ka’nsui daseu. 20Chunage I neimakbe ze I tew dizai â chize I ne tewbe chang ta de lei, kane a lungge hemui bambe zene de lei.
21Mâ-keyibe I tewnei-neibe luage kesiabe ze a dage wang’nna ka’nsui lei, besie changbe riâ gum zeu. 22A lungsui tak sing ge Hera gu hingde ze I ka’nchâ de lei, 23kane a pumkeî ramme ge hingde kêdabe ramme bambe benai a lungsui tak hereitewbe I ngau lei, zai a dage bambe a pumkeî ramme ne hemui gu hingde kebang hang achu tew gai lei. 24I â ziemmena siabe kau de zeî lau! Ai kechaipum gene châu ne achu ripat kai ra lau? 25Anui Wang Isua Krista dagene Hera dage hesuiyibe sam pau gai lau! Chigum dizai â, a runne I ka’nningbe ge Hera gu hingde guâ I ka’nggua lei, kane a pum hemeipumsie ge â hemui gu hingde guâ I ka’nggua lei.
Currently Selected:
ROMME 7: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
