ROMME 8
8
Herui ge keringbe
1Chidaze chuna â Krista Isua ge bamdime hang â tewka’ngkuibe ga de lei. 2Krista Isua ge keringbe Herui gu hingde ne achu hemui benai kechaibe gu hingde gene ’nripat kai bei daseu. 3Hemeipumsie zene peran tew’nggagaibeibe hingde ne tewchilaktibe ze Hera ne tew gai bei de lei: hemui ne puibe hemeipum luilung tak benai hemui hangge pe Na singpeu je lang gai ze, hemeipum ge hemui bambe ze pa ne chau’ngkui gai bei de lei, 4chidezai anui hemeipumsie luigum tat mak ze kane chi anui Herui sie luigum ze tatme dage ka’nnangbe ka’nzeibe ze tewpui gai be ra hangge zeu. 5Hemeipumsie luigum ze bamme â, hemeipumsie gu mâ-mâ ramme ka’nning lei, kane Herui sie luigum ze bamme â Herui gu mâ-mâ ramme ’nning ze bam daseu. 6Hemeipumsie lam ge ka’nningme â kechaibe lei, kane Herui lam ge ka’nningbe â keringbe benai desieyibe lei. 7Hemeipumsie lam ge ka’nningbe â, Hera je ka’nggibe chang lei; Hera gu hingde kangge bam mak, zai bam du bamchi lak lei; 8zai hemeipumsie ge bamme â Hera suigut tewchi lak lei.
9Kane ningnui â hemeipumsie ge bam me lei, ningnui â Herui ge bam lei, Hera gu Herui gesangsing ze ningnui dage bam bam dizaine aî. Mi-mige pe dage Krista gu Herui bam makchai â Krista gu mak lei. 10Kane Krista ningnui dage bam dizaine â, hemui ziegene ningnui pum ramme chai di sedu kapelingbe ziegene ningnui gu herui ramme â ring la lei. 11Kane kechaime ruagene Isua je kuakchugaibepeu gu Herui ningnui dage bam bam dizaine â, kechaime ruagene Krista Isua je kuakchugaipeu pe gu Herui ningnui dage bambambe zene ningnui gu chaiduibe pum ramme je keringbe pei gai gu lei.
12Chidaze a puiname gau, anui â hepâupung me chang lei, hemeipumsie hangge hemeipumsie luigum ze bam ra hanggene mak lei— 13hemeipumsie luigum ze ningnui ring ze bam dizaine â ningnui chai gu lei, kane chi hemeipum gu tâ ramme je Herui gene tewchat ’ndizai â ningnui ring gu lei. 14Hera gu Herui ne kanguame leine â Hera name kam daseu. 15Kehingbe ge kau gai dai ra kebangchangbe gu herui ningnui ngau mak lei, kane pe name changbe gu herui ningnui â ngau lei, “Abba! a peu!” ze anui ka’nrungbe lua, 16chi anui â Hera name lei be Herui gîmsing ne anui gu herui dage nguasakkitew de lei, 17zai pe name anui chang zai â, pe heu lurame chang lei, Hera heu lurame de lei, zai Krista benai nguaheurame chang lei, pechu anui nguahereulie dizaine â, anui je pe dage nguahengêutew gai be ra hangge zeu.
Pengeudibe Ngaurabe
18Henaiting gu kahereube liebe ramme â, chi pengêudibe anui je liârabe benai â teikedadau lak lei ze I â ’nning gai lei. 19’Ndamgai’ndibe leine ne Hera name je liârabe ze ngaunei-desang ze heguîkua ze bam lei; 20chi ’ndamgaibe ze peruânggabe kangge bam ra chang di de lei, chize penui runne suî’nning gene makse, kane chi ’ndamgaipeu suî’nning gene chang lei, acheuleusede kaheguîbe larei lei; 21chi ’ndamgai’ndibe gîmsing je huikeuderabe kebang kangge bambe gene lupat kai gu, zai Hera name lungzeunetewbe ngeudibe ngau gu daseu. 22’Ndamgai’ndibe leine chuna riâ chang ze henalung ra geteube ted lie gum ze huaipun ze bambe anui chî lei; 23zai chi ’ndamgai’ndibe runne makse, kane anui sing ne du anui Herui rachî keraîbe ngaulume, anui pum ramme ’nripat kai ze pe name chang ra helung gene huaipun ze anui kuâ bam gum zeu. 24Ai kaheguîbe gene anui je tew’nring gai bei de lei. Chuna ngau ze kaheguîbe â kaheguîbe mak kerei lei. Pa ngaube je châu heguîchi ra lau? 25Kane anui ngaumakbe je anui heguî dizai â liechibe ne chi je kuâ bam lei.
26Chigum ze Herui ne anui ran-gabe ge anui je ka’ngngâ lei; ’ndaigum ze kellum ra mei be du anui â chî mak lei, kane sam ne sachilaktibe huaipunbe zene Herui gîmsing ne anui kelei kiegaihâ lei. 27Zai ziemmena lung ka’mmêtpeu â Herui ka’nningbe ze ’ndaikau mei be chî lei, Herui ne keneime ka’nchime hangge Hera ’nning luigum ze kiegaihâbe ziegeneu.
28Pa ne betâuka’nnangbe luigum ze kûllume, pechu kehungme dage â mâgetaleine ge mâ-keyibe hang Hera â tâtew lei be anui chî lei. 29Penui je pa ne chi’ntualume je â pe Na luî tak gum ze penui chang ra pa ne penui je hatkai’ntua ’ndi de lei, chidezai â pa mi puiname misonggame ruage meraibe chang le ra hangge zeu. 30Zai pa ne hatkai’ndime je â pa ne kû de ku lei; zai pa ne kûgai’ndime je â pa ne tew de tew’nzei gai de lei; zai pa ne tew’nzeigai’ndime je â pa ne suang de suang gai de lei.
Krista ge Hera Kehungbe bambe
31Acheuzaine airamme deu ge anui ’ndaikau sasua dai ra lau? Hera ne anui hangge bam dizai â châu ne anui je kangchi ra lau? 32Pe Na gîmsing je ’nsangdu ’nzâ mak ze anui hangge peipatkaipeu ne pe dage kebambe leine du anui hangge pa pei mak ta ra semei? 33Hera ne kelângpatlume peireige châu ne ki’nsiachi ra lau? Tew’nzeigaipeu ze â Hera lei; 34châu ne chau’ngkui gai ra lau? Eu lei, chize â, Krista Isua chai di ze chaidime ruagene zuchugaibeipeu, Hera hezat’mbia ge ’ntaubampeu, anui hangge Hera dage kiegaihâpeu zene mei? 35Krista kehungbe gene châu ne anui je tewrimna ra lau? Lielakbe herêu, mi duânggabe, tewsabe, herakûm wangbe, pumlâng bambe, gagaiderabe zai hiazutkie zene ra mei?
36“Ning hang ziegene ’nrîmbeting tâluî anui je tewchat ze bam lei;
meli ramme gîchatrabe kau je gum anui je riam gai ze bam de lei,” acheu ze rawgaibe gum zeu.
37Mak lei, kane airamme leine ge anui je kehungpeu dagezene anui â ngamlume suadu anui di’nteu lei. 38Aize â I chî sing de lei, kechaibe ne mei, nu keringbe ne mei, angelme ne mei, rezieteime ne mei, chuna ting gu merua ramme ne mei, mâ-mâ wangrabe zat ramme ne mei, tâtewchibe rezie ramme ne mei, 39pehut ne mei, nu pechuk ne mei, ’ndamgaibe leine ge mâkedabe ramme ne mei ze anui Wang Krista Isua gene Hera ne anui je kehungbe gene mâ de tewrimnachi ra mak lei.
Currently Selected:
ROMME 8: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
