ROMME 6
6
Hemui lam Chai di ze, Krista ge Kaheruabe ne Ringdibe
1Acheuzaine, anui ’ndaikau sa dai sua ra lau? Ka’nggiabe peize puiting bam ra hangge anui hemui ge bam bam ra rei semei? 2Acheu me lei! Hemui lam ge â anui chaigaidime ’ndaigum ze chige anui lung bamchi ra lau? 3Krista Isua dage anui ’nteumena baptistewlube ze pa kechaibe ge anui je ngua baptistew lei be ningnui â chî mak mei? 4Chidaze baptistewbe ne anui je pa kechaibe ge nguabai’mpam gai ’nde lei, chidaze Bepeu ngeudibe gene Krista je kechaibe gene zuchu gai bei gum ze anui du keringbe karchibe ge tat le ra hangge zeu.
5Pa kechaibe gum ze anui du pe dage nguapumkattew dizai â pa chukadaibe gum ze anui du pe dage nguachu dai sing gu lei. 6Aize anui chî lei, tingtie anui luilung bambe tak ze pe dage gia’mpam gai ’nde lei, chidezai chi hemui pungbe pum ze tew’ngga ne ra hang, zai hemui gu kebang anui chang ta de ra hangge zeu. 7Zai mi-mige chaidibe kau â hemui gene ’mbiapat ti de lei. 8Kane Krista dage anui nguachai dizaine â, pa ge anui du ring gu lei be anui â ’nnumka’mmi lei. 9Chaidime ruagene zuchugaibeipeu Krista ze mâtew-tewsede chai dai ra mak lei be anui â chi daseu; kechaibe ne pe peireige pe suitew dai ra ga de lei be zeu. 10Pa chaibe kechaibe ze â hemui hangge chai gai ’ndi lei, luakatne pelane hangge zeu, kane pa ringbe keringbe ze â Hera hangge ring bam lei. 11Chigum ze ningnui du Krista gene hemui lam ge chaigaidibe benai Hera lam ge ringbambe tak ze ningnui runne ningnui je ’nningchi ze bam sing ra de lei.
12Chidaze ningnui pumsie ka’nchiebe ge nguasui gai ze hemui ne ningnui pum chaiduibe pum ramme ge peize besuitew ze heguang ze bam se lau. 13Ningnui pumkeî ramme kesiabe gu merua ramme hang gum ze peipat kai se lau, kane ningnui runne ningnui je kechaibe gene keringbe ge nguapatkaibeime hang gum ze, zai ningnui pumkeî ramme je katelingbe merua ramme hang gum ze Hera dage peipat kai ze bam lau. 14Hemui ne ningnui peireige besuitew ze heguang ze bam ra mak lei, ningnui â hingde kangge bam mak ze, kane ka’nggiabe kangge bam di daseu.
Katelingbe gu Kebang ramme
15Acheuzaine, ’ndaikau tew ra lau? Hingde kangge anui bam mak ze ka’nggiabe kangge bam di daze anui hemui gai bam ra rei mei? Acheu me lei! 16Mi-mige châu dage mei ze ningnui runne ningnui je hekuâpheube kebang ramme hang gum ze peipat kai dizai â, ningnui ne châu kuâ pheu mei, chi kechaibe ge nguagaibe hemui kuâ mei nune hekuâpheube chi katelingbe ge nguagaibe hekuâpheube kuâ mei zai du ningnui ne hekuâpheugaibe gu kebang ningnui chang de lei be ningnui chî mak mei? 17Kane Hera dage hesuiyibe sam pau lau, ting kat â ningnui hemui gu kebangme chang bambe ze chuna â ningnui je geteiliabe-sie luî gene ningnui lung sing gene hekuâpheu ze bam di de lei, 18zai hemui gene ningnui je meupat kai bei ze katelingbe gu kebangme chang kam di de lei. 19Ziemmename ne seuchiduibe sam gene I sa lei, ningnui telung tak gene chîchanglakrabe bambe ziegeneu. Ting kat ge ningnui pumkeî ramme ze lung’nchimakbe ge benai hemui-helut dibi-birabe ge peipat kai ze bam gum ze chuna â tew’nchigairabe hangge katelingbe ge ningnui pumkeî ramme ze peipat kai zu lau.
20Ningnui hemui gu kebang changbe ting ge kapelingbe lam ge â ningnui deuzietew ze bam di de lei. 21Kane ningnui je tewka’ngngambe merua ramme gene ningnui ’ndaikau kegiebe ngau lau? Chiramme gene patbe â kechaibe lei. 22Kane chuna â ningnui je hemui gene tei’mbiapat kai bei ze Hera gu kebang ramme chang kam di de lei, ningnui kegiebe ngaube â tew’nchigaibe ze de lei, zai perachî â keringbe betunmakbe ze lei. 23Hemui hî ramme â kechaibe lei, kane Hera gu kela ’nta peibe ze â, anui Wang Isua Krista ge keringbe betunmakbe bambe ze lei.
Currently Selected:
ROMME 6: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
