ROMME 2
2
Hera gu Samrambe
1Chipauziegene Hei ziemmena gau, nang châu gumme chang ze bam lêuzaidu, nang ’mbia ra ga lei; nang samrampeu zene mige peireige samramgailube nang ne chize tew dai ze bambe ziegene nang pechu samramgaibe gene ning runne ningchu tew’ngkuigaibe changbe ziegeneu. 2’Mpui leine ge kegiebe misongga lamui lei. Bepîbang dîmchube ge Hera gu samsabe leine Judame dage pei gai lei. 3Hei ziemmena gau, chi kesiabe ramme tewme peireige nang ne samram gai lu, zai chiramme ze nang sing ne tew lu, Hera gu samrambe gene nang â ’mbiachi duî lei, ze nang ka’nning semei? 4Makchai pa pe helungyibe, pa pe raitiebe zai pa gesutchibe peireige nang ne mâ-hang ’nning gai mak ze Hera gu samrambe gene nang ’mbia le ra ’nnum gai mei? Hera pe lungyibe â ningchu helungkahelibe ge nguagairabe kau lei be nang chî mak mei? 5Kane nang â ning lung keikeulakbe benai helichilakbe lungtak zene Hera gu kapelingbe samrambe teiliarabe mai hangge Hera lumpum ze ning runne ning hangge kaigekua gai de lei. 6Pa tâtewgaibe luigum ze haimena je pa ne penui hî pei gai gu daseu: 7hereuliechi ze tew’mmi ze tew ze pengêudibe, hengêutewbe zai chaidailakbe je peubamme leine je â pa ne keringbe betunmakbe pei gai gu lei; 8kane penui runne yirabe hangge peu ze, zai samsang ge pheu mak ze, kane helungriaksiabe ge pheugaime hangge â pe lumpum benai pe rata kedibe bam gu lei. 9Kesiabe tewbe ziemmena leine peireige kahereube benai duânggabe bam gu lei, raîlangbe ge Juda’mpeu peireige zai Grik’mpeu hangge du bam gu lei, 10kane pengêudibe, hengêutewbe zai desieyibe â tâ-yibe tewme leine hang bam gu lei, raîlangbe ge Juda’mpeu hang zai Grik’mpeu hangge du bam gu lei. 11Hera â kehung-ka’nrie teilia mak daseu. 12Hingde ga ze hemuitewme leine du hingde ga ze penui ga kam gu lei, zai hingde kangge bam ze hemuitewme leine hingde gene penui je samram gai gu lei. 13Hingde geseume zene Hera masuage katelingbe ngau suadu me lei, kane hingde ze teitâtewme je â tew’nzei gai bu lei. 14Jentailme dage â hingde ga sedu penui telung tak gene hingde ne ka’nnangbe tew lei, penui dage hingde ga sedu penui singbe zene penui hangge hingde chang de lei. 15Hingde ne ka’nnangbe ze penui lungge raw gai ’ndi de lei be penui ne teilia lei; zai penui keyi-kesia chibe lung tak zene du sakkitew, zai penui lung katimpeube zene penui je gechui, nune penui je saka’mbia lei, 16chipau mai dezai Krista Isua gene ziemmename gu hekim rasam leine ze a gu gospel luigum ze Hera ne samram gu lei.
Judame benai Hingde
17Kane nang ne ning runne ningchu Juda’mpeu ze kû ze hingde ge ’ngngêu ze Hera dage nang puinakattewbe peireige kedikuâ-kua ze bam dizai â 18zai ningchu â hingde getei gai bei dadege pe suî’nningtak chî lu zai ’ndaibe ze yilang mei be ge lugaichi lu, 19zai hemikchitpeu hangge nang ne pe hangge kanguapeu de lei be chî lu kemuîbe ge bamme hangge kebabe de lei be nang chî sing lu dizai â, 20kemiebe hangge geteiliapeu chang lu, napoine ramme hangge geteiliapeu chang lu, hingde ge mâ-gechîbe benai kapelingbe la lei be nang ne chî sing lu ze— 21nang miramme je geteilia lu, ning runne ningchu geteilia mak ra semei? Hega mak ra nang ne paurua lu, nang kahega mei? 22Mige de hema mak ra lei, kacheupeu nang kahema mei? Heraluîtewbe je ngaugailakpeu, nang kellumki ramme gu nang ne sut ra mei? 23Hingde ge nang kedikuâ-kuapeu nang hingde ’ngka ze Hera je nang tewhelêu ra mei? 24“Ningnui ziegene Jentailme ruage Hera ji ze sakahebâ de lei,” acheu ze raw gai gum zeu.
25Hingde nang pheuchi dizai â rumkagetanbe â kegiebe bam sing lei; kane hingde ze nang ne ’ngka dizai â, nang rumkagetanbe ze rumgetanmakbe chang lei. 26Chidaze mi-mige rumgetanmakbe kau ne hingde ne kerangbe leine ze rei ze bam dizai â, pa rumgetanmakbe ze rumkagetanbe hangge riam gai mak ta ra semei? 27Chigum dizai â hemeipum sing ge rungetan mak sedu hingde teika’ntipme zene nang ning dage rawlube hingde bam lu zai rumgetan lu kane hingde ka’ngkabepeu je chau’ngkui gai gu lei. 28Hela kengaube ge tâtewgaibe ne mî de Juda’mpeu gesang hang chang mak lei, zai hela kengaube ge hemeipumsie gene rumkagetanbe du peling chang mak lei. 29Kane pe dagene bamkuâdipeu ne Juda’mpeu gesangsingbe kau chang lei, zai rumkagetanbe singbe â helung gene herui lam gene chang lei, rawgaibe hingde gene runne mak zeu. Pe gu getoabe â ziemmena dagene makse Hera dagene ngau lei.
Currently Selected:
ROMME 2: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
