ROMME 1
1
1Paulbe Isua Krista guâ ka’ngguapeu, apostol hangge kûgaipeu, zai Hera gu sam keyibe hangge lupatchâmgaipeu, 2chize rawdiakkaibe leisikuak ka’nchibe ge pe gu kemeume dagene samhat’ntuagai’ndibe, 3hemeipum sie gene Dabidbe dagene piakeube, pe Na deu gu gospel, 4zai anui Wangpeu Isua Krista, chaidime ruagene pa ringchukadaibe gu ka’nchibe pe gu Herui lam gene tâtewchibe rezie gene Hera Na hang teiliagaibe, 5pe ji hang ziegene pe dagezene heramzatme leine ruage keneibe ge hekuâpheube teiwang gai ra hang anui ne ka’nggiabe benai apostol changbe hang ngau lu de lei, 6Isua Krista gu chang ra kûgaibeime ningnui je du riam gai zeu;
7Rom ge bamme leine, Hera ne hungbeime, zai ka’nchime chang ra kûgaibeime dage: Hera anui Peu zai Heguang Isua Krista dagene ka’nggiabe benai desieyibe peize bam lau.
Hesuiyibe Kellum
8Railangbe ge ningnui ’nteumena je Isua Krista dagezene a Rapeu dage a suiyibe sam I pau gai de lei, ningnui gu keneibe rasam ze kedeirei leine ge pauruagaibeibe ziegeneu. 9Pe Na gu gospel ge I ka’nningbe gechîbe gene I ne nguabambe Hera â a gu sakki dadege, a gu kakellumbe leine ge pehî’nsangne ge sau mak ze ningnui je I kûchu gai ze 10’ndaigum mei zai â Hera suî’nning gene I ningnui dage wangchang le ra kie gai bam de lei. 11Ningnui je I ngauhedau gai ra nei-desang lei, chidezai ningnui ran tew’nchi gai ra ningnui je Herui lam gu kela mâge â I pei be ra hangge zeu, 12chidezai ningnui dage benai a dage bambe kat-kat keneibe zene anui kat-kat ran tew’nchi gai be ra hangge zeu. 13A puiname gau, ningnui dage zuamie ra I ’nning gai ze bambe ningnui chî ra I lunei lei, ningnui ruage benai Jentailme kêdame leine ruage du perachî ze gat le ra hangge zeu (kane chuna riâ chang ze achu nam ze bam lei.) 14Grikme dage benai kelungbe tak chimakme, kaningchingme benai kemieme dage I hepâupung lei: 15chigum ze ningnui Rom ge bamme dage du sam keyibe ze pau gai nei-desang lei.
Gospel Tâtewchibe
16I â gospel je ’ngngam me lei: chize â, keneibe bambe kau leine hangge tew’nringgairabe hang Hera gu tâtewchibe daseu. 17Chige zene Hera katelingbe ze keneibe gene keneibe hangge teilia gai bei de lei; “Keneibe gene katelingbe kau â ring gu lei,” ze raw gai gum zeu.
Ziemmena Kemaube
18Tinggîm ’mbene Hera lumpum ze ziemmena telingmakbe benai helungriaksiabe peireige liâ gai bei de lei, penui lungriaksiabe ne samsang ze deinamme peireige zeu. 19Hera châu mei be chî ra hang â penui hang ’nchichiak ze lamui de lei, Hera ne chize penui je teiliagai’ndibe ziegeneu. 20Kedeirei ’ndamgaibe gene seuze, pa telung tak mi mik ne ngauchilakbe ramme, chize pa betun mak ze reziechibe benai pa kaherâbe ze pa ’ndamgai’ndibe merua ramme gene ’nchichiak ze ngaukâ lamui lei, chidadege penui sa’nreiduibe mâ de ga lei; 21penui â Hera je chî lu sede Hera je hengêutew mak, zai pe dage penui suiyibe sam du pau gai mak, kane penui ka’nningbe ze peruânggabe chang di, zai penui mâ-’nningchilakbe lung ze tewmuî ’ndi lei. 22Kaningchingme hangge riam gai lu ze penui â kemieme chang di lei, 23zai chaidailakbe Hera pengêudibe hangge, chaidaiduibe ziemmena luî mei nu, ’nruine ramme luî mei nu, hekaubena ramme luî mei nu, liaruabe ramme mâkâupui luî mei zene ’ngngiak kai ’ndi lei.
24Chipauziegene Hera ne penui je mâ-mâ kahebâbe ge penui lung ngau’ntetlak ze bamrabe ge, penui runne penui pum je mâ-hang chak kai mak bamrabe ruage ze sâudiak kai bei de lei, 25penui ne Hera samsang changbe ze karasa hang tei’ngngiak kai ze betingbeta hang suanggai’ndipeu Ka’ndampeu je kellumrabe kelei ge ’ndamgaibe zat dage kellum ze ’nggua ze bamdibe ziegeneu! Amen.
26Aipau ziegene Hera ne penui je ka’ngngambe kedibe ge sâudiak kai bei de lei. Penui ruage ’mpuimi ramme kelaktewbe sie ze betâu-pakezeimakbe kelaktewbe sie hangge tei’ngngiak kai ze bam lei, 27zai ’mpeumi du chigum ze ’mpuimi dage nguakelaktew ze bambe sie sâu nan ze ’mpeumi ne ’mpeumi karai ge mi ka’ngngambe tâ tew ze bam ra ran ze bambe penui tewmaube ziegene gesâbe penui pumgîm ge ngau ra bambe ze ngau ze bam de lei.
28Zai Hera je chî ra penui ne betâudibe hang ngau gai mak bei dadege ka’ngkuibe lungtak benai bamchimakbe telung tak ge Hera ne penui je sâu gai bei de lei. 29Penui dage helungriaksiabe, kesiabe, kadekumbe, zai kategabe airamme leine ne puigit ze bam di de lei. Hemimeube, kegîbe, kahegeibe, gechoabe, katîmphibe ne pui lu ze, penui â tiakchi, 30sa’nsiachi, Hera je ngaugailakme chang, keraichi, gechîrattewchi, keditewchi, kesiapeuchi, pe pui-peu kuâpheu mak, 31gepangme, keneibe game, mâ-ka’nningbe game, zai ka’nggiabe game chang ze bam lei. 32Airamme tewme leine â chaikezei lei, kacheube Hera gu samde penui chî lu sedu, airamme penui tewbe runne makse, kane airamme tewme peireige penui suî hezuâ gai sua lei.
Currently Selected:
ROMME 1: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
