ROMME 3
3
1Acheuzai Juda’mpeu hangge ’ndaikau yika’ngkeube la lau? Makchai rumkagetanbe ge pemî ’ndaikau la lau? 2’Mpuî leine ge kegiebe misongga lamui lei. Bepîbang dîmchube ge Hera gu samsabe leine Judame dage pei gai lei. 3Hanggesame ne nei makchai â, chize ’ndaikau chang ra lau? Penui neimakbe ziegene Hera keneibe ze tew’ngga ’ndi semei? 4Acheu ra mak lei! Ziemmename ne karasa sa leusede Hera â peize peling ze bam lau,
“Ning sam ramme gene ningchu tew’nzei gai gu,
zai ningchu samram dezai nang ne duî himchang gu lei,” acheu ze raw gai gum zeu.
5Kane anui lungriaksiabe zene Hera gu katelingbe teilia ra tew gai zai â, anui ’ndaikau tew lei ra lau? Anui peireige pe lumpumbe ruîkeugaibe ziegene Hera teling ta di de mei? (Ziemmena helî gene I samsa lei.) 6Acheu ra mak lei! Chigum dizai â ’ndaigum ze Hera ne kedeirei je samramchi ra lau? 7Kane I karasasabe zene Hera gu kapelingbe ze pa pengêudibe tewpungbi-bi ra dizai â, ’ndaitew ze achu hemui kau je gum ze tew’ngkui gai bam ra rei lau? 8Zai keyibe wangchang ra hangge ’ndaitew ze kesiabe tew mak ra lau?—acheu ze saka’nsiame hanggesame ne anui je gechui gai gum zeu. Penui je chau’ngkuigaibe â peling de lei.
Mige de Katelingbe kau ga lei
9Acheu zaine anui ’ndaikau tew ra lau? Anui Judame â miramme sua â yika’ngkeu de mei? Acheu me lei; ziemmena leine Judame benai Grikme hemui tâ tewbe kangge bam kam lei, ze I ne gecheu gai ’ndi gum zeu;
10“Mige de katelingbe kau ’ngga lei,
ga lei, hangkat te ga lei;
11mî de ’nningchibe kau ga lei,
hangkat te Hera je peube kau ga lei.
12Haimena ne tatlietat kam di de lei,
penui tatmau kam di de lei;
mî de keyibe tew mak lei,
hangkat ’nsangdu ga lei.”
13“Penui kuki â herawmui latrangbe gum lei,
penui leiria ze gechoabe hangge tei gai lei.”
“Penui mui ge henêu’nchai geteube ted la lei.”
14“Penui mui â desetkaibe ramme benai gekabe (karîbe) ne pui lei.”
15“Penui pî â hejai tewpat kai ra ka’nzet lei;
16tewka’nsiabe benai hesuisit ne penui ’mpuî ge bam lei,
17zai penui â lungkatemibe ’mpuî chî mak lei.”
18“Penui masuage ge Hera je kehingbe ga lei,”
ze rawgaibe gum zeu.
19Hingde ne kerangbe leine ze hingde kangge bamme dage rang lei be ze chuna â anui chî de lei, chidezai mi mui leine tew’nsau gai ra, zai kedeirei leine tatew Hera dage ralia ra hangge zeu. 20Mige de pe mikngau ge hingde teitâtewbe ne râm’nzei gai ra mak lei, hingde gene hemui lei be gechîbe ze â wang daseu.
Hera ne Anui je Ka’nzeibe ge Kaibe
21Hingde benai kemeume ne chipau hangge sakkitew bam sede, chuna â Hera gu kapelingbe ze hingde ze deîtau mak ze teilia gai bei de lei. 22Hera gu kapelingbe ze Isua Krista je keneibe ziegene keneime leine hangge chang lei. Chige mî de gechâmbe ga daseu; 23haimena ne hemuigai’ndibe ziegene Hera ngeudibe ze tew’nchei ’ndi de lei, 24kela ’nta peibe gum ze pa ka’nggiabe gene penui je tew’nzei gai bei de lei, Krista Isua ripatkaibe ziegeneu, 25pechu â Hera ne pe râtabe ze tei’mbia ’nde ra hangge zai pe lungwângchang ra hangge desieyibe tew ra herâtew gum tew gai de lei, chize pe jai ge keneime zene ’nchâ ra de lei. Aize â Hera katelingbe teiliarabe hangge pa gesutchibe ziegene tingtie gu hemui ramme ze pa ne tat’ntua lu de lei; 26aize chuna hî ge pa â kateling lei be teilia be ra, zai Isua je neibe kau je â tew’nzei gai ra hangge zeu.
27Acheuzaine â anui ’nningkahegiêbe ze ’ndaikau chang di lau? Chize chak kai mak lei. ’Ndaikau ziegene lau? Tâtewbe ziegene mei? Mak lei, kane keneibe ziegene lei. 28Anui ziemmena â hingde gu tâ ramme gene makse keneibe gene pechu tew’nzei gai gu lei be anui â lutei gai daseu. 29Nune Hera ze Judame Rapeu hang runne semei? Jentailme Rapeu hang chang mak mei? Eu lei, pa â Jentailme hang du chang lei, 30Hera â kat runne dadegeu; rumkagetanme je penui neigaibe ’nchui gene pa ne tew’nzei gai gu, zai rumgetanmakme je penui keneibe luî gene tew’nzei gai gu lei. 31Acheuzaine ai keneibe ziegene hingde ze anui mâ-hang du chak kai mak tai semei? Acheu me lei! Maknedu hingde ze anui ne teika’nsap lei.
Currently Selected:
ROMME 3: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
