ROMME 14
14
Ning Puina’mpeu je Ki se lau
1Mige keneibe ge peran-gabe kau je pa ka’nningbe tak ramme peireige ki makse pechu ’nchâ lau. 2Hangkat ne mâ-mâ leine pa teu dui kam lei, ze ’nnum gai lei, zai pe ran-gapeu â gireuneu ramme runne teu lei. 3Teupeu zene teumakpeu je peize ngau’nna se lau, zai teumakpeu zene du teupeu peireige peize sa’nsia se lau; Hera ne pechu ’nchâ bei daseu. 4Miramme guâ ka’ngguapeu peireige samram ra nang ze châu lau? Pe pau suagene pa â chu zai kâukeu ze bambe kau lei. Zai pechu tei’nsap kai bu lei, pe pau ne pechu â tei’nsap kai dui daseu.
5Hangkat ne chi naimikpui kat je sua â kêdabe mai je ’nningka’ndi lei, zai kêdapeu ne tingnaimikpui leine ’nzuâkambe hang ’nning gai lei. ’Nteumena ne peize penui ka’nningbe besingsiak ze bam lau. 6Chipau mai ze kereipeu zene Tingwang ngeutewka’ndibe gene chipau mai ze rei ze bam lei. Chi mâ-teupeu ze du Hera ngeutewka’ndibe gene pa mâ-teu ze bam lei, Hera dage pe suiyibe sam pa ne pauliâ gai dadegeu; zai teu mak ze reipeu ze du Hera dage pe suiyibe sam pauliâ gai lu rei lei. 7Anui ruage mige de pe hang runne pa ring mak lei, zai anui ruage mige de pe hang runne pa chai mak lei. 8Anui ring zai â Tingwang hang anui ring lei, zai anui chai zai â Tingwang hang anui chai lei, chidaze anui ring mei, zai chai mei zaidu, anui â Tingwang gu lei. 9Aipau hanggene Krista chai lu ringchu kadai de lei, chidezai pa ne kechaime benai keringme Wangpeu chang le ra hangge zeu. 10’Ndaitew ze ning sikina peireige nang samram lau? Zai ’ndaitew ze ning sikina je nang ngauka’nna lau? Hera samrambe bâmrak suage anui ’nteumena sap kû daseu;
11“Tingwang ne rang ze,
I ringbe ziegene,
’nteumena a suage kukdungkeu gu,
zai heleiria leine ne Hera je getoabe pei gu lei,”
ze raw gai ’ndi daseu.
12Chidaze anui ’nteumena mi run-runne Hera suage mi rasam salia kam gu lei.
Ning Puina’mpeu je Tewkau se lau
13Chidaze kat-kat je anui sa’nsia ta zu kei lei, chi suane â mi puina’mpeu ’mpuî ge mâtew-tewsede kâurabe zat mei, nune kenambe zat mei kai mak ra ’nning zu kei lei. 14Mâ-zat ge du ’nchimakbe â bam me lei be Heguang Isua Krista gene I chî’mmi sing di de lei; kane chize ’nchimakrabe hang ’nninggaibe kau hangge â ’nchimakbe chang lei. 15Zai nang mâ-teube zene ning sikina je tewkahejambe chang dizai â kehungbe ge nang â tat ta di de lei. Nang mâ-teube zene Krista ne pe hangge chaigaibeipeu, chipaupeu je tew’nsiagaibe peize chang gai se lau. 16Chigum ze ning hangge keyibe changbe ze peize sa’nsia gai se lau. 17Hera gu heguangram kacheube ze â keteu-kesakbe je rang mak lei, kane kapelingbe, desieyibe zai Herui Ka’nchibe gene misuiyibe ze de lei; 18aigumbe ’mpuî gene Krista guâ ka’ngguabe kau â Hera hangge ka’nchâbe, zai ziemmena ne tei’ndigaibe chang lei.
19Chidaze desieyibe tewrabe benai kat-kat je nguaranchirabe deze anui gua’nsa kei lei. 20Keteu-kesak deu hang ziegene Hera gu tâtewbe ze tew’nsia se lau. Mâgetaleine ka’nchibe kam de lei, kane mige pa mâ-teube zene miramme je tewkaurabe kemaube chang lei; 21hemei teu mak ra, zai wain sak mak ra, zai ning sikina je tewkaurabe hang â mâ de tewmakrabe ze betâu sing de lei. 22Ning dage keneibe bambe ze Hera benai nang ning runne kakge teichi le lau. Pa ne keyibe hang lugaibe ge pe runne pechu ki’nsiagairagabe kau ze yi de lei. 23Kane pa ne ’nningkategeibe bam lu pa ne mâ-teube chang dizai â, pechu â tew’ngkui gai ’nde lei, keneibe gene pa tâtewmakbe ziegeneu; keneibe gene patmakbe leine â hemui chang daseu.
Currently Selected:
ROMME 14: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
