ROMME 13
13
Heram ge Besuitewme Kuâpheu ze Tâtewrabe
1’Nteumena ne samramme rezieteime ba kangge peize bam ra yi lei, Hera dagene makchaine â rezieteibe â ga daseu, zai chuna bambe ramme ze du Hera ne sum gai de lei. 2Chipauziegene rezieteime je kahekangbe kau â, Hera ne sumgaibe je kahekangbe chang lei, zai chi kahekangme â penui peireige samrambe teiwang gai de lei. 3Tâ-yibe tewme hangge â besuitewme ze mi hingrabe kau mak daseu, kane tâ-kesiabe tewme hanggene zangno. Rezieteipeu je hing mak ze nang bam nei mei? Chidaze tâ-yibe tew lau, dezai pe lung hezuâgaibe nang ngau gu lei, 4ning hang yirabe hang ziegene pa â Hera guâ ka’ngguapeu chang lei. Kane nang tâ-kesiabe tew dizai â, pechu nang hing zu lau, ’ntane hiazutkie ze pa tei mak daseu; tâ-kesiabe tewbe kau peireige pa ne Hera guâ ka’ngguapeu chang ze pe lumpum teitâtewgaibe chang lei. 5Chidaze Hera lumpum gene ’mbiarabe hang runne makse, kane mi keyi-kesia chîrabe hang ziegene du rezieteipeu ba kangge bam sing ra lei. 6Chipau deu hanggene ningnui ’mpuâ du pei de lei, aipau tâ singbe tewme, rezieteime â Hera guâ ka’ngguame chang lei. 7Peira-rame dage pei kam be lau, ’mpuâ lurame dage ’mpuâ pei be, kedei gu ’mpuâ lurame dage kedei gu ’mpuâ pei be, hengêutewlia ra ka’nnangme je hengêutewlia be, hengêutewbe kedibe peirame dage hengeu kedibe pei be lau.
Kat kat dage tâtewrabe ngeu
8Mî dage hepâu mâ de pung gai se lau, kat-kat je hungrabe pâu hang runne zangnêu; pe ramname je hungchibe kau ne hingde â tewpui daseu. 9Samde ramme ze, “Nang hema mak ra lei, Nang tewchat mak ra lei, Nang hega mak ra lei, Nang ’nchie mak ra lei,” kacheube ramme ze lei, zai mâ-mâ kêdabe samde aipau sam ge teiherûpkamgaibe ze, “Nang ning runne ningchu hung gum ze ning ramname je hung ra lei,” kacheube ze lei. 10Kehungbe â mi kining’mpeu peireige mâ de kesiabe tew mak lei; chipauziegene kehungbe ne hingde ze tew’nsanggaibe chang lei.
11Aipau peireige du chuna ze ’ndaigumbe ting mei be ningnui ne chî lei, ningnui hangge chuna ze kejeibe gene ’nrakchurabe ting changsingdibe tak zeu. Anui neichuraibe ting ge suadu chunage anui hangge tewka’nringbe wang’nnabi-bi di daseu; 12muîtie de lei, tingbamie de lei. Chidaze kemuîbe tatew ramme ze tuâ nan ze kebabe hereipuâ anui kai zu kei lei; 13’nrîmbeting ge bam gum ze anui bamchi ze bam kei lei, mi deuzietewbe benai kameneube ge bam mak, heluilung pungchimakbe benai lungkahailabe ge bam mak, ’nggî-kahegeibe benai hemimeube ge bam mak zeu. 14Kane Heguang Isua Krista ge kai kam gai lau, zai hemeipum lungwângchangbe tew gai ra pei se lau.
Currently Selected:
ROMME 13: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
