ROMME 15
15
Mi Suigut tew makse Miramme Suigut Tewrabe
1Anui miranchime ne penui ran-game daulakbe ramme ze nguapunggaihâ ra yi sing lei, zai anui runne anui suigut tew mak zeu; 2anui ruage mi-mige ’nteumena ne peize pe kining’mpeu yirabe hangge pe suiguttew ze bam lau, pechu ngua’nzei gai ra hangge zeu. 3Krista â pe runne pe suigut tew me lei; “Ningchu penui ne saka’nsiabe sam ramme ze a peireige keu gai de lei,” acheu ze raw du raw gai lei. 4Tingtie rawgai’ndibe leine ze anui je mâ-geteiliabe chang ra raw gai de lei, chi rawdiakkaibe leisi ka’nchibe sam ka’ntipbe benai helungsui tew’ndigaibe zene kaheguîbe anui bam le ra hangge zeu. 5’Ntiprip ze bambe benai helungsui tewka’ndibe Hera zene Krista lungtak luigumbe gene peize ningnui je aigum ze kat-kat dage nguamuikattewchi ze bam ra pei gai be lau, 6chidezai ningnui sam kat leu kat ne Hera, Bepeu zai anui Wang Isua Krista je hengêutew’ndi bam ra hangge zeu.
Jentailme hangge Samkeyibe
7Chidaze Krista ne ningnui je ’nchâ bei gum ze, kat-kat je ningnui ’nchâchi ze bam lau, Hera ngeudirabe hanggeneu. 8I ningnui je ranglia lei, Hera gu samsang teilia ra Krista â rumkagetanme hangge ka’ngguapeu chang de lei, anui paume dage samhatkaibe ramme ze tew’ntip kai ra, 9zai Jentailme ne Hera je pa ka’nggiabe ziegene pechu toa le ra hangge zeu.
“Chidaze Jentailme ruage ningchu I toa gu lei,
zai ning ji je I toa gu lei,” acheu ze rawgai’ndibe gum zeu;
10zai acheu sa dai ze,
“Hei Jentailme gau,
pe gu ziemmename benai ningnui suiyigaihâ lau,” ze kacheu de lei;
11zai acheu dai ze;
“Tingwang je toa zu lau,
Jentailme leine gau,
zai ziemmena zat leine ne pechu peize toa zu lau,” ze kacheu de lei;
12zai Isaiabe ne sa’nduâ gai dai ze,
“Jentailme je samram ra zuachupeu,
Jessibe chana’mpeu wang gu lei;
pa gene Jentailme heguî ze bam gu lei,” ze kacheu de lei.
13Kaheguîbe bangpui chi Hera ne peize ’nnumka’mmibe gene ngaube chi misuiyibe benai desieyibe zene ningnui je tewpui gai be lau, chidezai ningnui ze Herui Ka’nchibe tâtewchibe rezie ne kaheguîbe ge puigit bam le ra hangge zeu.
Paulbe Hing mak ze Samrawbe Deu
14A puiname gau, ningnui keyibe ne puigit ze bambe zai ningchingchibe ne puigit ze bambe zai kat-kat je geteiliachibe bambe ningnui peireige I a lungwângchangbe lamui lei. 15Kane Hera ne achu peibeibe chi ka’nggiabe ziegene mâ mâ deu ramme gêsa ge mâ-rang’ngkiagaibe hangge I ne hingmeluisui ze ningnui dage sam raw gai bei de lei, 16chi Hera gu gospel gu tingku chang ze tâka’ngguabe ge Jentailme hangge Krista Isua gu tâka’ngguapeu I chang le ra hangge neu, chidezai Jentailme ne mâ-peipatbe ze Herui Ka’nchibe ne ’nchâgaibe benai tew’nchigaibe chang le ra hangge zeu. 17Chidaze Hera hang I tâtewbe ge Krista Isua gene I hegiêleduibe lamui lei. 18I ne kuugiereu ze mâ de sa ra mak lei, Jentailme je hekuâpheube ge, sam benai tâtewbe ne, 19mâ-mâ-tewliabe ’nningdaulakbe benai ’nningdaulakbe tewbe ramme gu rezie ne, Herui Ka’nchibe gu rezie ne nguawanglerabe hangge Krista ne a peireige tâtewgaibe rasam runne kuugiereu ze sa ra zangnêu, chidezai Jerusalem gene chu ze Illirikon riâ chang ze Krista gu gospel rasam I ne pauwangtuisiak kai le ra hangge zeu, 20chigum ze Krista ji kûchugaimakbe bâm ge gospel rasam pau gai ra I ka’nning lei, makchai â kêdapeu ne hekipung dîmchugaibe ge heki tewgairabe chang gu daseu,
21“Penui dage pe rasam mâdau paugaimakme,
chi baudime zene pechu (Krista je) ngau gu lei,
zai pe rasam mâdau de seumakme ne pechu chî’mmi gu lei,” ze acheu ze du raw gai daseu.
Rom ge Paulbe ’Ngkiâmie ra Ka’nningbe
22Aipau deu hanggene ningnui je I ’ngkiâmie ra changlak ze bam bam de lei. 23Kane chuna â aipau huâzie ramme ge a tâ tewgaidairabe bâm hang ga di dadege zai patingkum misongga ze ningnui dage I wang gai nei bam dadege, 24Spain ’mbe I tat ra tatbe ge ningnui je ngauhedau gai ra, zai luakat ningnui ruage nguabam gai lu, ningnui ne I ka’mbeibe ’mpuî ge nguagepâu gai ra I kaheguî lei. 25Kane chuna kakge â Jerusalem ge keneibe lam ge ka’nchime bamme hang ka’ngngâbe kela tei lu I hang gu rei lei. 26Makedonia ge benai Akaia ge bamme ne Jerusalem ge keneime ka’nchime ruage kelaksiame je ka’ngngâbe kela hang penui suiyibe ne pei gai bei daseu; 27penui suiyibe ne aize tew de lei, zai penui tew du tewsingrabe kau lei. Jentailme ne penui (Judame) gu herui lam ge penui heu ramme nguaheu dizaine â, kedeirei heu ramme ne penui guâ ’nggua ra yi sing de lei. 28Chidaze aize I tew kam lu, zai tei’nduilube ze penui ba ge pei gai lu dezai ningnui dage tat kai ze Spain ’mbe I tat ku lei; 29zai aize I chî lei, ningnui lam I wang dezai, Krista gu ’nnamgaibe puigit bambe ze tei lu I wankeu gu lei.
30A puiname gau, anui Wang Isua Krista zai Herui kehungbe ziegene a dage muikattew ze ningnui kakellumbe ge, Hera dage a hang kiegaihâ ra ningnui je I kiam lei, 31chidezai Judia ge neimakme dagene achu ripat kai be ra hang zai Jerusalem ge a tâ tewrabe ze keneime ka’nchime dage ka’nchâbe chang le ra hangge zeu, 32chidezai Hera sui’nning gene ningnui dage I a suiyi ze wang le ra, zai ningnui ruage I sautemi gai le ra hangge zeu. 33Desieyibe Rapeu ningnui ’nteumena dage peize bam bam lau. Amen.
Currently Selected:
ROMME 15: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
