ROMME 12
12
Hera Guâ Ka’ngguabe ge Mi Keringbe bambe Tak
1Chidaze a puiname gau, Hera ka’nggiabe ramme gene ningnui je I kiam lei, ningnui pum ramme ze herâtewbe keringbe gum ze ka’nchibe benai Hera ne kelunbe chang ze peipat kai ra hangge zeu, chi herui lam ge ningnui kakellumbe changbe zeu. 2Kedeireime kebambe tak gum ze ningnui bam se lau, kane ningnui lung tewrechigaibe zene ningnui kelungbe tak tewkeli gai kam ne lau, chidezai Hera ’nning ze ’ndaikau mei, zai pe hangge keyibe zai pa luneibe zai yika’nsangbe ze ’ndaikau mei be ningnui chî’mmi le ra hangge zeu.
3Achu ka’nggiabe peibeibe ziegene ningnui ’nteumena mî de pe runne pechu peize pe hut peireige ’nning’ndi ze bam mak ra, kane Hera ne pechu keneibe ranchi hang peigaibe hut gene pe runne pe hangge samram’nzeichi ze bam ra hangge I salia lei. 4Hepum kat ge hepumtaura ramme misongga anui dage bam gum, zai chi hepumtaura leine zene tâtewbe tak ’nzuâ kam mak gum ze, 5anui du misongga ze bam leusedu, Krista ge anui pum kat chang lei, zai kat-kat zene kat-kat hangge hepumtaura hang chang kam lei. 6Anui dage kela gechâm-châmbe bambe ze ka’nggiabe gene anui je peigaibeibe luî gene chi kela ramme ze anui teitatew kei lei: mâ-rangka’ntuabe kela dizaine â, anui dage keneibe bambe riâ ge anui sa ra lei; 7tâ’ngguachibe kela anui je pei gai dizai â, anui ’nggua ra lei; mige pe dage mâ-geteichibe kela pei gai dizai â, pa nguagetei ra lei; 8mige pe dage miramme je nguagecheuchibe kela pei gai dizai â, pa nguagecheu ra lei; mige pe dage mâ-mâ-peipatchibe kela pei gai dizai â, pa helungdi ze peipat ra lei; mige pe dage ’ngngâchibe kela pei gai dizai â, pa ’nchâlai ze ’ngngâ ra lei; mige pe dage ka’nggiabe tâ tewchibe kela pei gai dizai â, pe lungsuiyibe ne tew ra lei. 9Kehungbe ze peize peling ze bam lau; kesiabe je ’nrie ze keyibe je ’nggui’ntip le lau; 10puinakattewbe kehungbe zene kat-kat je hungchi ze bam lau; kat-kat je hengêutewchinei-helit ze bam lau. 11Mâ mâ tewbe ka’nchâbe lam ge mâtew-tewsedu ’ntâmkeu mak ze Tingwang gua ’nggua ze bam lau. Herui lam ge ’nchanghang zai rengachai ze bam lau. 12Nang kaheguîbe ge hesuiyi’nta ze bam lau, mi duânggabe kahereube ge liechi lau, panehî leine ge kellum bam lau. 13Keneibe lam ge ka’nchime penui ka’nnangbe ge ka’ngngâbe-hâ pei gai lau, hesangme je ’nchâchi ze bam lau.
14Ningnui je tewsâme je ’nnam gai be lau; penui je deset kai mak ze ’nnam gai be lau. 15Hesuiyime suî nguayigaihâ be lau, zai kehapme je nguahap kai be lau. 16Kat kat dage ’ndeuhui ze bam lau; gechîrettew se lau, kane kecheime dage nguaheruachi ze bam lau; ningnui runne ningnui je ’nning’nditau ze bam se lau. 17Mî je de kesiabe ne kesiabe peiruî dai se lau, kane ’nteumena mikngau ge keyibe ze tew ra ’nning gai lau. 18Chize tew ra ningnui je dau tânege chang dui dizai â, ’nteumena dage nguadesieyichi ze bam lau. 19Kehungme gau, mâtew-tewsedu hekûm â lu se lau, kane chize Hera lumpum hangge ’nsak kai ne lau; “Hekûmlurabe ze â a gu lei, I ne peiruî dai gu lei, ze Tingwang ne kacheu de lei.” 20Mak lei, “ning teureipeu ne ’njei dizai â pechu kei be lau; pa herei dizai â sak ra pei be lau; chigum ze tewbe gene pe peî’nning ge hemi-mechingkâng ramme nang ne kaibe chang gu lei,” ze rawgaibe gum zeu. 21Kesiabe ne duî ze bam mak ze keyibe ne kesiabe je duî ze bam lau.
Currently Selected:
ROMME 12: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
