ROMME 11
11
Israelme je Hera Ka’nggiabe
1Acheuzaine aize I ka’nneu lei, Hera ne pe gu ziemmename je tuâpat ’ndi de mei? Chi acheu me lei! I du Israel’mpeu Abrahambe gene piakeube kau, Benjaminbe kiria luî kau lei. 2Hera ne pe gu ziemmename pa ne chi’ntualume je tuâpat mak lei. Elijabe rasam ranggaika’ntuabe leisi ka’nchibe ge pa ’ndaigum ze Hera dage Israelme peireige saka’nsia mei be ningnui chî mak mei? 3“Tingwang gau, ning gu kemeume je penui ne tewchat kam ’nde lei, zai ning gu herâtewbe bâmra ramme ze penui ne tew’ngga kam da, zai a runne ze ’nsakpat te lei, zai achu du tewchat ra peu lei,” ze kacheube zeu. 4Kane Hera ’ndaikau sam kak lau? “Baal dage penui kukdungkeugaimakme ziemmena chang sena ze a hangge I kaikua ze lamui lei,” kacheu zeî lau. 5Chigum ze henaiting ge du ka’nggiabe gene kelânglume ’nsakpatme lamui lei. 6Kane chize ka’nggiabe ne chang dizai â tâtewbe gene chang ta de lei; chigum makchai â, ka’nggiabe ze â ka’nggiabe chang ta du daseu.
7Acheuzaine, chize ’ndaikau lau? Israelme â penui gepeube ze ngaulak ti de lei. Kelângpatlume â chize ngau lu da, kane kêdame je â penui lung tew’nchi-desang gai bei de lei,
8“Hera ne penui je kejeibe herui pei gai bei de lei,
ngaumakrabe mik ramme,
zai seumakrabe kun ramme pei gai bei de lei,
nemai riâ chang zeu,” acheu ze rawgai’ndibe gum zeu,
9Zai Dabidbe ne rang ze,
“Peize penui gu luube-bâm ge mâ-teube-kaira ze penui gu ’mpia ramme,
hûm zai tewsabe ngaurabe hang chang gai de lau;
10peize penui ngauchi lak ze penui mik ramme muiterîng gai de lau,
zai peize penui kia ramme
’ngkuaizut kai de lei,” ze kacheu de lei.
11Chipauziegene kau gai ra hang penui ’nrap kai mei? ze I ka’nneu de lei. Kane penui gu hedieka’ngkabe zene Jentailme dage tewka’nringbe wangchang di de lei, chidezai, Israelme ne penui peireige ngauteu ra hangge zeu. 12Chunage penui gu hedieka’ngkabe ziegene kedeirei hangge ’nnamgaibe misonggame hang chang, zai penui daulakbe zene Jentailme hangge ’nnamgaibe misongga bam ra chang dizai â, penui je teiheruakamgaibe ge ’ndaizeu yi’nteu ze bam de ra lau!
Jentailme je Tewka’nringbe
13Chuna â ningnui Jentailme dage I sam sa lei. Jentailme dage apostol tâ I tew tâne I tâka’ngguabe ze I tew’ndi gu lei, 14chidezai Judame a zatme ne ’nchie ra, zai chi zene penui ruage hanggesame je tew’nring dui gu mei zeu. 15Penui je tuâpatkaibe zene kedeirei hangge desieyibe tewgaibe chang dizaine â, penui je lugaikadaibe ze kechaibe gene ringchukadaibe mak semei? 16Dekuîkâng keneipat-kairaîlangbe Hera hang peipatkaibe ze ’nchi dizai â, chi keneilube betûm luî ze ’nchi kam de lei; zai (hingbang) pema ’nchi dizai â, bekeî ramme du ’nchi kam de lei. 17Zai bekeî gêsa â bet ti ze chi bettibe bâm ramme ge nang, hênam olib sûne je chi olib keî ge nguahedam lu ra ’ntuk kai bei zai â, 18chi bekeî ramme peireige nang kedikuâ-kua se lau. Nang kedikuâ-kua ra dizai â, pema retgimgaihâbe ze nang ne mak lei, kane pema zene ningchu ’ntukgimgaihâ lei be ze chibam lau. 19“Achu teleu’ntuk kai be ra hangge bekeî ramme ze bet kam de lei,” ze nang acheu gu lei. 20Aize gesangsing de lei. Penui neimakbe ziegene penui je tewbet ’ndi de lei, kane nang â keneibe gene sap’ntiprip ze bam lei. Chidaze gechîrettew se lau. 21Hera ne olib singbe keî ramme ze ’nzuak kai mak laîzaine â ningchu du pa ’nzuak kai ra mak lei. 22Chidaze Hera ka’nggiabe benai pe raksiabe ze chî le lau: kâudime peireige peraksiabe tak zeu, kane nang ne pa ka’nggiabe ge bam bam bei zai â Hera ne ningchu ’nggia gu lei; makchai â ningchu du ngettua ’ndu lei. 23Zai kêdame je du neimakbe bâm ge bam ta dizai â penui je du teleu’ntuk kai bu lei, penui je teleu’ntuk kai dai be ra hangge Hera dage tâtewchibe la daseu. 24Nang Hera ’ndam luî gene hênam olib bang changbe je kuî lu, besiemakbe gene ka’ngkutbe Olib bang ge ’ntuk kai lu zai â, bekeî singbe ramme hang â olib bang gesang ge ’ntuk kai dai ra ’ndaizeu sêu de ra lau.
’Nteumena je Hera Ka’nggiabe
25A puiname gau, ningnui runne ningnui je ’nningka’ndibe ge ningchingchi ra aipau ningchanglakbe sam ze ningnui ’nningchi ra I lunei lei: Jentailme riak wang’nsang kam mak tâne Israelme hanggesame ruage penui lung kechibe bam gu lei. 26Chidezai Israelme leine je tew’nring gai gu de lei;
“Zaion gene Ripatpeu ze wang gu lei;
pa ne Jakob dagene Hera lungtak pungmakbe ze lutua kam ’ndu lei;”
27“zai aize ne penui dage a sam hatkaibe chang gu lei,
penui gu hemui ramme I ne lutua gai dezai aî,”
acheu ze rawdaikkaibe gum zeu.
28Samkeyibe lam ge penui â Hera teureime chang lei, ningnui hang ziegeneu; kane kakelângbe lam ge â penui pau-paime hang ziegene penui â Hera ne kehungme kam de lei. 29Hera gu kela peibe ramme benai pa gekûbe ze â tew’nggadaichilakbe lei. 30’Ndâ ge â Hera kuâ pheumakme ningnui chang da, kane chuna â ka’nggiabe ningnui ngau lu de lei, penui ne Hera kuâ pheumakbe ziegeneu, 31chigum ze chuna hang â penui hekuâ lu mak ze bam de lei, chidezai â ningnui je ka’nggiabe teiliabeibe zene penui du ka’nggiabe ngau le ra hangge zeu. 32Hera ne ’nteumena je hekuâpheumakbe rielung ge kai kam ’nde lei, ’nteumena je ka’nggiabe pa ne teilia be ra hangge zeu.
Hera je Toarabe
33Hei Hera keheube pa kaningchingbe zai mâ-gechîbe tak ze chuk-desang lei! Pa samramchibe tak ramme ze mî ’nningchanglak lei, pe gu ’mpuî ramme du mi ’nningchanglak lei!
34“Tingwang lungtak châu chî lu lau,
Nune pechu nguageteiliapeu hangge changgailube kau châu la lau?”
35“Nune pechu peiruî dai be ra hangge châu ne pechu kela pei lau?”
36Mâgetaleine ze pe dagene, pe ziegene, zai pe hanggene chang kam lei. Pe dage betingbeta pengêudibe peize bam lau. Amen.
Currently Selected:
ROMME 11: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
