TÂTEWBE 28
28
Malta ge bambe
1Zai himloa ge anui kapat kam dege, chipau duiluaka’ngguabe ji ze Malta lei be anui chî di de lei. 2Zai chipau ramname ne anui je ngau’nggia-desang di ze, zai tingrui bei ze hegei-desangdibe ziegene hemitew gai lu, anui ’nteumena je ’nchâ bei de lei. 3Paulbe ne heching-kît pua lu ze hemi ge dik kai bei ze, zai lum dege mechinêu pat ze pe ba ge kebitgit nan ze bam de lei. 4Zai chipau ramname ne henêu Paulbe ba ge kebit bambe ngau lu dege, kat-kat je, “Aipaupeu â kegîpeu sing de lei, sungkling gene pechu tew’nring gai bei sedu samram ka’nzeibe ne du pechu ring ra peimeu lei,” ze kacheu de lei. 5Kane pechu mâ de tewhejam gai mak ze, hemi ge henêu je kebetkeu gai ’ndi lei. 6Pa pumpat ze mei, nune luakatne kâukeu ze chai de ra mei ze penui heguî ze piekua ze bam lei; kane beting tiesang ze penui piekua gai ze pe peireige pe pausiabe mâ de dau mak dege, penui lung keli ze, pa â hera lei, ze acheu kadai lei.
7Chunage chipau bâm hiage duiluaka’ngguabe ge besuiteupeu pe ji, Publiabe pe gu kedei bam lei, chipaupeu ne anui je ’nchâ-desang bei ze hezie kechum ne pe dage anui ’nnai ze bam lei. 8Zai Publiabe peu ze kaherêube rarît benai kadesibe-rârît ne ’nrâ di ze jei bam lei; zai Paulbe ne pe ki ge gut lu, kellum ze pe pum ze pe ba ne deî gai bei ze, pechu tew’mmi gai bei de lei. 9Chigumbe wangchang dege chipauram ge bamme keteukeneume leine wang ze penui keteu-keneube tew’mmi kam gai bei de lei. 10Zai penui ne anui je kela ramme misongga pei gai de lei, zai anui tat dai ra dege ’nnei ge anui tâuka’nnangbe leine penui ne kai kam gai bei de lei.
Malta gene Rom ’mbe Tatbe
11Zai kêu chum châng dege, Alekzandria gu dui’nnei chi duiluaka’ngguabe ge hetating ge saube pe ji, ’Mpinlungbe Kena chi penai luî hang du tewgaibe, (chize Grikme gu hera kena Kastor benai Pollaks luî hang tewbe lei), chige zene anui ’nnei chaîtat te lei. 12Zai Surakas ge gut kai lu, chige hezie kechum anui ’nnai ze bam lei. 13Zai chigene anui tat’ngguawang ze Rhegion keloa chang lei; zai mai kat châng dege tingpî ’mbene tingkai guiwang de lei, zai bechai mai dege â, Puteoli ge anui chang de lei. 14Chige anui puiname je kahedau de lei, chigene Rom keloa ge anui chang de lei. 15Zai chigene anui puiname ne anui ’nsâ seu lu dege, penui bambe gene Appias Hechaiki benai Hesangki Pakechumbe riâ ge anui je suidau ra hang penui wangkeu lei, penui je Paulbe ngau lu dege, Hera dage pe suiyibe sam pau gai ze, pe lungdi ze bam di de lei.
Rom ge bambe
16Zai Rom ge anui gutchang dege, Paulbe je â, pe runne bam ra, zai sipai’mpeu ne pechu hekêt-kai ze bam ra pei gai bei de lei.
17Zai hezie kechumne bam gai dege, chige Judame besuitewme je pa ne kû’ndui gai de lei; penui wang’ndui gai dege pa ne penui je, “A puiname gau, a zatme peireige zai anui peume kelungbe-sietak peireige kesiabe mâ de I tew gai mak sede, Jerusalem gene achu bang gai ’ndi ze Romme ba ge pei gai de lei. 18Zai penui ne achu samram gai lu ’mpat kai ra tew gai de lei, I kemaube gene kechaibe daurabe ka’ngkuibe mâ de gabe ziegeneu. 19A zatme peireige mâ de I ne kesiatewbe ga leusedu Judame ne chap’nruibeibe ziegene Kaisarbe je I kiâmchang di de lei. 20Aipau sam ziegene ningnui je ’mpau gai nei ze kûwang-kandui de lei; Israelbe kaheguîbe deu hanggene nemai ge ai hegeîria ’nta lu ze I bam daseu,” kacheu de lei. 21Dadege penui ne pechu, “Nang ’ndaigum bam mei be chî ra lei ze Judiaram gene samkela mâ de anui ngau mak, zai anui puiname ruagene mige de wang ze pau gai mak lei, yi la mei sia la mei be zeu. 22Kane anui ne ai nang ka’nningbe tak ramme ze ’ngking gai nei lei; ai pebau (herakiangna) châmpat ze bamme peireige pebâm’nsangne ge sa’nsia ze bambe anui chi dadegeu,” ze kacheu de lei.
23Zai penui ne pe hang naimikpui die gai bei dege, pa bambeki ge ziemmena misongga ze wangka’ndui de lei. Zai hechua gene hegî chang ze penui dage chipau rasam sakelilia ze Hera gu heguangram je pa ne sakkitew zai Mosabe gu hingde gene benai kemeume gu leisi ramme gene lupat lu ze Isua je nei ra penui je kiâm de lei. 24Zai hanggesame â pa samsabe ne penui lung deîtau di de lei, kane hanggesame â, ’nnum’mmi mak lei. 25Chigum ze penui karai gene hezuâlak ti ze, Paulbe ne aipau sam kat sa kam gai dege zuapat kam di de lei, Paulbe ne sam kat sagaibe: “Herui Ka’nchibe ne kemeu’mpeu Isaiabe mui gene ningnui paume dage sam saliabe ze peling de lei:
26‘Aime dage tat ze salia be lau,
Ningnui seu â seu gu,
kane chî’mmi ra mak,
zai ningnui ngau â ngau gu,
kane mâtew-tewsedu ngauchi ra mak lei.
27Aime zat lung â ’ndamdei di de lei,
zai penui kun ne seugut lak ti de lei,
zai penui mik ramme du ’mmuî kam di de lei;
makchai â,
penui mik ne ngau dai de ra be da,
zai penui kun ne seu dai ra be da,
zai penui lung ne chîdesi dai lu ze,
a lam ge ’nreiwang lu ze,
penui je I ne tew’mmidaiberabe de lei,’ ze kacheube zeu.
28Chidaze Hera gu tewka’nringbe â Jentailme dage lang gai ’nde lei be ningnui je peize chî ra yi lei; zai penui â ’ngking de ’ngking gu lei,” acheu ze sagaibeibe chângge zeu. 29Paulbe ne aipau sam sa gai lu dege Judame penui karai ge tukebieng ze penui rimna di de lei.
30Zai Paulbe â chige peripeibe heki ge pe runne peri pei ze bam lei, zai pe dage wangme leine je pa ’nchâchi ze bam lei, 31Hera gu heguangram rasam paurua ze, Heguang Isua Krista rasam ze kuugiereu ze geteilia de lei, mâ de kenambe ga zeu.
Currently Selected:
TÂTEWBE 28: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
