NAHUM 1
1
1Ninebi hangge sam peibe Elkos’mpeu Nahumbe ne keliâbe ngaube leisi.
Ninebi Keloa peireige Tingwang Pe râtabe
2Tingwang â pe hang peipat kam gai ra luneibe Rapeu,
zai hekûmlube Rapeu lei,
Tingwang â hekûm luchi zai pe râtachi lei;
Tingwang â pechu ka’nggime je hekûm lu lei,
zai pe teureime je pe râta bam lei.
3Tingwang â pe râta kelua mak,
kane tâtewchibe misongga la lei,
kesiame je â mâtew-tewsede ka’nzeibe hangge riam gai ra mak lei.
Pe gu ’mpuî ze â natri benai heratingkai kechibe ge la lei,
zai kemua ramme ze pe pî ge bambe kedeimoîne ramme de lei.
4Sungkling ze pa ne ’ngngiam gai bei ze changku di lei,
’nggeuki ramme leine pa ne tewchangku gai lei;
Bashanram benai Karmel loa changkeu di,
Lebanon loa mâpâ pabe huikeu di lei.
5Kedeiloa ramme pe suage ’ngngai,
zai kedeiloa poine ramme ’nnung gai di lei;
pe suage kedei ze ka’ngngai lei,
kedeirei benai chige ziemmename leine kakedun lei.
6Pe lunggailak-kadesangbe masuage châu sapchi ra lau?
Pe lumpumbe ngauhingbe ze châu ne liechi ra lau?
Pe lumpumbe hemi gum ze ruîpat lei,
zai pe taige â tingchukâng kedibe ramme ze pâng kam di tai lei.
7Tingwang â yi lei,
mi duânggabe mai ge kerie ka’ntipbe de lei;
pe dage ka’nseume leine je pa chi lei.
8Kane pechu ka’nggime je â,
heduidikeu ze mi duângga-kadesangbe ne deî’ngga kam ’ndu lei,
zai pe teureime je kemuîbe ge guagut kai gu lei.
9Tingwang peireige ningnui ’ndaikau kesiatew lau?
Pa ne ningnui je tew’ngga ’nzâu gai gu lei;
pe teureime peireige pa ne lua na hekûmtew ra mak lei.
10Hetupet heguakritbe,
zai megau changbe gum ze penui je â rû kam ’nde lei.
11Ning dagene hangkat Tingwang peireige kesiabe ’mpungchu ra ka’nningbe kau,
kesiabe laddeitewbe kau pat mak ti lau?
12Tingwang ne acheu rang lei,
“Penui ’ndaizeu penui ranchi,
zai penui misongga bam sedu,
penui je bikau kam ’ndu,
zai deî’ngga kam ’ndu lei.
Ningchu I ne tewsâ ze bam da,
kane ningchu tewsâ ta de lei.
13Chuna â ning dage pe gu guangkâm ze I ne tewbet ’ndu lei,
zai ning gu kebangria ramme ze I ne râm ’ndu lei,” ze acheu zeu.
14Ning peireige Tingwang ne sam kat die gai ’nde lei:
“Ning ji tew’ndi gai ta du de lei;
ning gu hera ramme ki gene mâ-luî giapatkaibe benai mâ-luî hekigaibe I ne tew’nsia ’ndu lei.
Ning lungriaksiabe ziegene ning raw hang I tew gai gu lei,” ze acheu zeu.
15Kedeiloa kedibe ramme ge sam yibe pungwangpeu,
zai desieyibe sam paupeu pî ze pie le lau!
Hei Juda gau,
kahengîbe ramme nang hengî zun hengî lau,
zai nang deseutewbe tewpui le lau,
ziemmena kesiabe kau ning dage mâtew-tewsedu ningchu ’nggi ra wang dai ra mak lei,
pechu â tew’ngga ’nde lei.
Currently Selected:
NAHUM 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
