MIKA 7
7
Israelme Tâtewbe Kelungbe Tak Kesiabe
1A duângga-desang de lei!
Tinglum ting gu hêchi raikam’ndibe ting ge bam gum,
zai grepchî rai’nzâu ’ndi gum ze bam di de lei:
pechîhût teurabe mâ de ga di de lei,
’mbeuchî meiraibe ze a keringbe ne teugainei-kadesangbe ga di de lei.
2Hera je ka’nchâbe ziemmena â kedeirei ge ga de lei,
zai ziemmename ruage kapelingbe kau mî de ga de lei;
penui ’nteumena ne hejai tewpat ra kuâ la kam lei,
zai penui sikina je ’mpia ne rap ra tew la kam lei.
3Tâ-kesiabe tew ra penui ba ne mâ-chiamchi-desang lei;
heguangme benai samramme ne henim luteu ra penui kie lei,
zai ziemmena kedime penui ka’nchiebe kesiabe salia lei;
chigum ze penui kahezuâ de lei.
4Penui ruage ziemmena yilangbe ze du hetupet riâ lei,
zai penui ruage pelingtewchilangpeu ze du hetubang suadu sia lei.
Penui je hekêtkaime gu tingnaimikpui penui je dei’nsiarabe mai wang mui de lei;
chuna penui duânggabe wangchang gu de lei.
5Mi kining’mpeu je ’nnum’mmi se lau,
zai mi kangme je du ’nnumtew se lau;
nang samsabe ze ning ga ge jeibepui dagene ’ntîng le lau;
6pe na ne pe peu je ngauka’nna lei,
pe na ’mpuimi ne pe pui je duîzuttew lei,
zai pe mupui ne pe nai je ka’nggi lei;
ziemmena teureime ze â pe ki-kelak gîm ze de lei.
7Kane I â Tingwang lam pie gu lei,
achu tewka’nringbe Hera je I â kuâ bam gu lei;
a Rapeu ne achu ’ngking gai gu lei.
Tingwang ne Tewka’nringbe Teiwangbe
8Hei, a teurei kau gau,
a peireige ning suiyi’nta se lau;
I kau sede zuachu dai gu lei;
kemuîbe ge I ka’ntaube luage Tingwang ne a hangge kebabe chang gu lei.
9Tingwang peireige I hemuigai’ndibe ziegene pe lunggailakbe ze I ne pung gu lei,
a deu pa ne sagaihâ ze,
a hangge samrambe pa ne ram gai mak tâne hangge zeu.
Kebabe ge pa ne achu nguapat kai gu lei;
zai pa ne ripatkaibe I ngau gu lei.
10Chidezai a teurei kau,
“Ning Rapeu Tingwang ’ndaige la lau?”
ze achu kacheupui ne chize ngau lu ka’ngngambe ne pechu ruichim ’ndu lei.
A mik ne pechu I pie gu lei;
chuna â puidi ge timdeu kutgetie bambe gum ze pechu kutgetie bam gu de lei.
11Ning gu kerie rierabe mai wang gu lei!
Chipau mai dezai heramrai ze tew’ndipat kai gu lei.
12Chipau mai dezai Assiriaram gene Ijipram riâ, zai Ijipram gene ’Nggeuki riâ,
zai sungkling gene sungkling riâ,
zai kedeiloa kedibe gene kedeiloa kedibe riâ,
chipau bâm ramme gene ning dage penui zuawang gu lei.
13Kane chipauram ge lungme ziegene benai penui tatew rachî ziegene kedei ze sâu gai gu lei.
Israel je Tingwang ne Ka’nggiabe
14Ning gu ziemmena je ning gu hetui ne gekum ze reî lau,
ning heurâ melidung zai merie deiloa zuilung ge hênamkang ge penui runne bamzîng ze ’ndâ ge gum ze,
Bashan benai Gilead ge deteu ze peize bam wak lau.
15Ijipram gene nang zuapatbe mai ge gum ze,
penui je tâningdaulakbe zat ramme I ne teilia gu lei.
16Pezat leine ne ngau lu penui ranchi leine peireige ’ngngam gai du lei;
penui ba ne penui mui keba gu lei;
zai penui kun du pang du lei;
17Henêu gum ze kedeimoîne penui ’nniak ku lei,
kedei ge buaruabe kau ramme gum zeu;
penui bambeki peranchibe bâm ramme gene kedun ze penui wang gu lei,
Tingwang anui Rapeu dage hing ze penui wang gu lei,
zai ning ziegene penui hing gu lei.
18Pe gume ’nsakpatme hangge hemui lun ze hedieka’ngkabe kelunbepeu,
nang gumbe kau Hera châu la lau?
Kehungbe ka’ntipbe je pa ka’nchâbe ziegene betingbeta pa â pe râta bam mak lei.
19Anui peireige pa ka’nggiabe bam dai gu lei,
anui tâ-kesiabe tewbe pe pî kangge kaichim gai ’ndu lei.
Anui gu hemui leine sungkling gechuk ’mbe nang ne tuâ gai ’ndu lei.
20Gechîng rehei ting gene nang ne anui peume dage sam hatkai’ndibe luigum ze Jakob dage lungsangtewbe nang ne teilia gai gu lei,
zai hungka’ntipbe ze Abraham dage tewlia gai gu lei.
Currently Selected:
MIKA 7: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
