MARKA 1
1
Johanbe Baptistewpeu ne Sam Pauruabe
(Mat 3.1-12; Luk 3.1-18; Jhn 1.19-28)
1Hera Na Isua Krista gu Sam Keyibe bepîbang putchube. 2Kemeu’mpeu Isaiabe ne acheu ze rawgai’ndibe ge,
“Pie le lau, ning gu ’mpuî teleukuâ ra a gu hepâupaupeu je ning sua ’mbe I ne lang gai lei;
3hênamkang ge hangkat ne ka’nrungbe kuâ:
Tingwang gu puidi ze teleukuâ lau,
pe gu ’mpuî tew’nzei lau—”
kacheube sam gum ze 4hemui kelunbe hangge helungkahelibe gu baptisma rasam paurua ze hênamkang ge Johanbe patlia de lei. 5Zai Judiaram leine gene zai Jerusalem ge bamme leine pe dage wang de lei; zai penui gu hemui ramme ralia bei ze, pa ne penui je Jordan geuki gene baptistew gai bei de lei. 6Chunage Johanbe â put-hu gêupaî bâ lu, zai hemeigei ne bekia kak kai lu, tîngkau (hênam teipichêu) ramme benai hênam gu ’ngkuidui ne teu ze bam lei. 7Zai pa ne acheu ze sam sarua ze, “A chaige I suadu peranchipeu wangkeu la lei, I â keikeu ze pe pichûpria heipat ra du bui me lei. 8I â hedui ne ningnui je baptistew de lei; kane pa â Herui Ka’nchibe gene ningnui je baptistew gu lei,” kacheu de lei.
Isua je Baptistewbe benai Keduaibe
(Mat 3.13—4.11; Luk 3.21,22; 4.1-13)
9Chipau ting ge Isua Galili ge Nazareth gene wangkeu ze, Johanbe ne pechu Jordan geuki gene baptistew gai bei de lei. 10Zai hedui gene pa zuachu dege luakatne tinggîm latbak kai ze, Herui depeine gum ze pe peireige wangkeube pa ngau de lei; 11dadege tinggîm gene hekuâ wangkeu ze, “Nang a Na nekune lei; ning dage I a sui-yisang-yi lei,” kacheu de lei.
12Zai luakatne pechu hênamkang ’mbe chi Herui ne nguatat ti de lei. 13Zai hênamkang ge Satan ne pechu hezie hedai duai ze bam lei; hênam gu hekaubena ramme ruage pa bam lei; zai angelme ne pechu ngua ze bam de lei.
Isua ne Hekânimme Hangmedai je Kube
(Mat 4.12-22; Luk 4.14,15; 5.1-11)
14Zai Johanbe je nîm’ndibe chângge, Isua Galili ge wang lu, Hera gu Sam Keyibe paurua ze, 15acheu sa ze, “Beting â tewpui gai ’nde lei, zai Hera gu heguangram â na de lei; ningnui lung heli ze, Sam Keyibe ge ’nnum’mmi zu lau,” kacheu de lei.
16Zai Galili Sungkling bak tatpat dege, Simonbe benai Simonbe kinapeu Andriabe sungkling ge penai chiâktua bambe ze pa ngau de lei; penai â hekânimme dadegeu. 17Zai Isua ne penai je, “A chai sui le lau, ziemmena je nimme chang ra ningnai je I ne tew gai gu lei,” kacheu de lei. 18Zai kelua ze penai gu chîak ramme saupêt nan ze pe chai suitat ti de lei. 19Zai kecheîne tatpat kai dege, Zebedaibe na Jakobbe benai pe kinapeu Johanbe je pa ngau de lei, ’nnei lungge penai gu chîak ramme getak ze bambe hangna jeu. 20Zai kelua ze pa ne penai je kû gai bei dege, ’nnei ge penai peu Zebedaibe benai tâtewme je sâu gai nan ze, pe chai suitat ti de lei.
Herui Kesiabe Bambepeu
(Luk 4.31-37)
21Zai Kaperna-um ge penui gut kai de lei; zai ’ntakbambe mai ge ka’nduibeki ge pa gutgap lu, mâ-geteilia de lei. 22Zai pa geteiliabe sam ze penui ’nninglu-lu bam di de lei, leisirawme ne geteiliabe gum mak ze, rezieteipeu gum ze penui je geteilia bei dadegeu. 23Zai luakatne chi penui ka’nduibeki ge herui kahebâbe bambepeu gihung gut te lei; 24dadege pa ’nrung ze, “Nazareth’mpeu Isua gau, Nang ze anui hangge châu nung ze lau? Anui je deî’ngga ra nang wangkeu mei? Nang châu mei be I chî lei, Nang â Hera gu Ka’nchipeu lei,” kacheu de lei. 25Kane Isua ne pechu ’nrû ze, “Ning kuâneu mak ze pe dagene zuapat te lau!” acheu bei de lei. 26Zai herui kahebâbe zene pa bambepeu je tewkechuîlip kai lu ze, pe rankai ’nrung ze pe dagene zuapat ti de lei. 27Zai penui ’nteumena ne ’nningdaulak ti, penui karai ge mâ ’nneu ze, “Aize ’ndaikau se lau? Mâ-geteirechidabe nung zeu! Rezietei lu herui kahebâbe je ’nsangdu pa ne samdie gai bei ze penui ne du pe kuâpheu bei lei,” kacheu de lei. 28Zai luakatne Galili bak pebâm leine ge pe ji sa’nditat ti de lei.
Misonggame je Isua ne Tewka’mmibe
(Mat 8.14-17; Luk 4.38-41)
29Zai ka’nduibeki gene zuapat gap lu dege, Simonbe benai Andriabe ki ge Jakobbe benai Johanbe je ngua lu gut ti de lei. 30Chunage Simonbe nâu pui kaherêube rarît ne ’nrâ ze jei bam lei, zai chipau luage pe rasam Isua je penui ne saliarâp kai bei de lei. 31Dadege pa wang lu, ka’nrâpui je pe ba ne tei lu kuakchu gai bei ze chi ka’nrâbe ze sau di de lei; dadege â chipaupui ne penui je mâ-mâ ’nggua bam di de lei.
32Zai chipau mai hegî naimik kêu di dege, penui ne ka’nrâme benai herui kesiabe bamme leine je pe dage nguawang de lei. 33Zai chipau namdi ge bamme leine kemuiki hiage wang’nduigit kai de lei. 34Zai herarît gechâm-châmbe gene ka’nrâme je pa ne tew’mmi bei, zai herakesiabe ramme je kelitua gai bei de lei; zai herasiabe ramme je sam sa ra pa ne lun mak lei, penui ne pechu chi dadegeu.
Galili ge Isua ne Sampauruabe
(Luk 4.42-44)
35Bechaibe mai hechuasûn tingbapat makge, Isua chu lu, zîngbe bâm ge tat lu, chige pa kellum bam de lei. 36Dadege Simonbe zai pe dage bamme ne pechu suitat ti de lei, 37dadege penui ne pechu ngau lu dege, pechu “’Nteumena ne ningchu peu la de lei,” kacheu de lei. 38Zai pa ne penui je, “Kêdabe namdi ramme ge du anui tat kai rî kei lei, chige du I sam paurua gai ra hangge zeu; chipau deu hanggene I zuapat daseu,” kacheu de lei. 39Zai Galili bak leine ge pa tatrua ze, penui gu ka’nduibeki ramme ge sam salia, zai herasiabe ramme je kelitua ze bam de lei.
Isua ne Mi Hangkat je Tewka’mmibe
(Mat 8.1-4; Luk 5.12-16)
40Zai ka’mpapeu pe dage wang ze, kukdungkeu lu, acheu ze pechu kiâm ze, “Nang ne nei zai â, achu nang ne tew’nchi duî lei,” ze kacheu de lei. 41Dadege ngauka’nggiabe ne pui di ze Isua ne pe ba getuapat ze pechu deî gai de lei, dadege pechu, “I nei lei, ’nchi de zu lau,” acheu bei de lei. 42Dadege luakatne ka’mpabe rarît ze pechu sâu gai bei ze pa ’nchi di de lei. 43Zai Isua ne pechu sam gechibe ne dei sing gai lu, pechu tat ra lang gai bei de lei, 44zai pechu, “’Ntîng le lau, aize mî dage du nang sa mak ra lei; kane nang tat ze tingkupeu dage teilia lau, zai Mosabe ne diegaibe luigum ze ningchu hui’nchigaibeibe tâ hangge herâtew zu lau, baudime suage sakkitewbe chang le ra hangge zeu,” kacheu de lei. 45Kane pa ne pat ze chipau rasam ze saruagai’ndibe gene chipau sam ze pebâm leine ge puigit bamdibe ziegene Isua â ’ndûlang ze keloa ge gutchi lak ti ze, hênamram zîngbe ge bam di de lei; zai baudime pe dage mâ-mâ gene zuawang ze bam lei.
Currently Selected:
MARKA 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
