MATHAI 28
28
Kechaibe gene Ringchukadaibe
(Mrk 16.1-10; Luk 24.1-12; Jhn 20.1-10)
1Chunage ’ntakkak kat gu hezie raîlangbe mai, ’ntakbambe bechaibe mai tingbarabelia ge Mari-Magdalinle benai kêdabe Marile ze heraw ’mbe tat ti de lei. 2Zai pie le lau, kedei-kageteibe peranchibe wang de lei, tinggîm ’mbene Tingwang gu angel’mpeu wangkeu ze, tingchukâng kelatpat dai lu chipau peireige ka’ntau de lei. 3Pe ju â tingkagepitbe gum lei, zai pe paîni â kebun gum ze ’ngngûpchup lei. 4Hekêtkaime ze pechu hingbe ziegene penui kedun ze, chaidime gum ze bam di de lei. 5Kane tinggîm angel’mpeu ne ’mpuimi kena je ’mpau ze, “Hing se lau; heling ge giagai’ndipeu Isua je ningnai peurua lei be I chî lei. 6Aige pa â ga de lei; pa ne rangbe luigum ze, pa â chu dai de lei, wang ze pa jeibe bâm pie le lau. 7Chidaze kelua ze tat ze, pe gu kenieme je, pa â kechaibe gene chu dai de lei, zai ningnui suage Galili ’mbe pa raîtat te lei; pechu chige ningnui ngau gu lei, ze acheu be lau. Ni, ningnui je I ranglia bei de lei,” ze acheu bei de lei. 8Chigum ze penai hing de hing, zai penai suî yi-desang di ze heraw gene kelua ze paktat ti de lei, pe gu kenieme je salia ra hangge zeu. 9Dadege pie le lau, penai je Isua hedau lu, “Kellum de lei!” kacheu de lei. Dadege penai ne hang lu pe pî tui lu pechu kakellum de lei. 10Dadege Isua ne penai je, “Hing se lau, Galili ’mbe tat ra hangge a puiname dage tat ze salia be lau, chige penui achu ngau gu lei,” ze acheu bei de lei.
Hekêtkaime ne Pauliagaibe
11Zai ’mpuîki ge penai tatbe luage, hekêtkaime hanggesame ne namdi ge tat lu, mâ-mâ wangchangbe ramme leine ze tingkugechîngme je salia bei de lei. 12Zai gechîngme benai penui wang’ndui lu, samhedeitew lu dege, sipaime je rangkâng misongga penui pei gai ze, 13“Ziemmena ramme je ranglia be lau, ‘Tingmuî ne pe gu kenieme wang ze anui jeidibe lua ne pechu hegatat ti de lei,’ ze acheu zeu. 14Zai laksaibe aize seuchang dizai â, anui ne pechu kiâm ’ndu lei, zai ningnui je tewhereu ra mak lei,” ze acheu bei de lei. 15Dadege penui ne rangkâng lu lu, penui ne rangbeibe luigum ze penui tew de lei; zai aipau rasam ze Judame ruage nemai riâ chang ze sa lamui lei.
Isua pe gu Kenieme je Liâbe
(Mrk 16.14-18; Luk 24.36-49; Jhn 20.19-23; Tât 1.6-8)
16Dadege Galili ge Isua ne tat ra ranggaibeibe deiloa ’mbe kenieme hangkereu-ze-katme tat ti de lei. 17Zai pechu penui ngau lu dege, pechu kakellum de lei; kane hanggesame ne pechu ze ’nningkategei de lei. 18Zai Isua penui dage wang lu, penui je ’mpau ze, “Tinggîm ge benai kedeirei ge rezie bambe leine achu pei gai ’nde lei. 19Chidaze ningnui tat ze, heramzatme leine je kenieme hang tew gai ze, Bepeu, pe Na, zai Herui Ka’nchibe ji gene penui je baptistew ze, 20ningnui je I samdiegaibe leine reî’mmi le ra hangge penui je geteilia lau; zai ni pie le lau, rehei kamgairabe riâ chang ze ningnui dage I bam bam gu lei,” kacheu de lei.
Currently Selected:
MATHAI 28: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
