MARKA 2
2
Bepumpikatlam Chaipeu je Isua ne Tewka’mmibe
(Mat 9.1-8; Luk 5.17-26)
1Bechâng hezie mâtiege mak ze Isua Kaperna-um ’mbe wang dai ze pe kilûng ge la lei be rasam pau gai bei de lei. 2Zai misongga wangka’nduibe ziegene penui bâm hang ga di, zai kemuiki hang du ga di de lei; zai pa ne penui dage sam salia bam de lei. 3Zai pe pum pikatlam chaipeu je hangmedai ne puarâ lu, pe dage teiwang de lei. 4Zai baudime ziegene pe dage penui wang’nnachi lak ti ze, pa bambe ’nchui ge heki’mpûm penui riput te lei; zai penui riput lu dege bepumpikatlam chaipeu je pe jeî ge pa jeibe luî gene ’mpatkeu de lei. 5Zai penui keneibe tak Isua ne ngau lu dege, bepumpikatlam chaipeu je, “A na gau, ning gu hemui ramme ze lun gai ’nde lei,” kacheu de lei. 6Chunage leisirawme hanggesame chige ka’ntaume ne penui lung gene ’nning ze, 7“’Ndaitew ze aipaupeu aigumbe sam sa lau? Aize Hera je sakahebâbe sam de ba! Hera runne zangno châu ne hemui ramme lunchi ra lau?” kacheu de lei. 8Zai Isua pe gu herui gene, penui lung ge aigum ze sam ka’nningbe la de lei be chîgap lu dege penui je, “’Ndaitew ze ningnui lung ge aigum ze ka’nning lau? ze kacheu de lei. 9Pe pum pikatlam chaipeu je, ‘Ning gu hemui ramme lun gai ’nde lei,’ acheu ra ning hangge sêubi mei, nune ‘Chu lu ning paîzui pua lu tat kai ni lau,’ acheu ra sêubi lau? 10Kane ziemmena Na â kedeirei ge hemui ramme lun-gairabe pe gu rezie la lei be ningnui chî le ra hanggene pa ne pe pum pikatlam chaipeu je, 11“Ningchu I rang de lei, chu ze ning paîzui pua lu ze ning ki lam’mbe tatchu lau,” kacheu de lei. 12Zai pa chu lu, luakatne pe paîzui pua lu, penui ’nteumena suagene tat ti de lei; chidadege penui ’nteumena lu-lu bam di de lei, zai Hera je toa ze, “Aigumbe â mâdauge de anui ngau merei de lei!” kacheu de lei.
Isua ne Lebibe je Kube
(Mat 9.9-13; Luk 5.27-32)
13Isua â sungkling kung ’mbe tat dai di de lei; zai baudime pe dage wangka’ndui de lei, dadege pa ne penui je mâ-geteilia de lei. 14Zai pa acheu tat lage, Alphaibe na Lebibe ’mpuâlubeki ge ’ntau bambe ngau lu, pa ne pechu, “A chai sui le lau,” acheu bei de lei, zai pa zuachu lu, pe chai suitat ti de lei.
15Zai Lebibe ki ge mâ-teu ra Isua ’ntaubambe luage, mâ-hâ-hame benai kahemuime misongga ze Isua benai pe gu kenieme je ngua’ntau ze bam lei; pe chaisuime misongga bam dadegeu. 16Zai Pharisaime ruage leisirawme ze Isua ne hemuime benai rehâhame je pa mâ-nguateube ngau lu dege, pe gu kenieme je, “’Ndaitew ze pa rehâhame benai hemuime je mâ-nguateu lau?” kacheu de lei. 17Zai chize Isua seu lu dege pa ne penui je, “Penui pumsakyime â tewka’mmipeu je ’nnang mak lei, kane ka’nrâme ne ka’nnang zangno, katelingme je kû ra I wangkeu mak lei, kane hemuime je kû ra I wangkeu lei,” acheu bei de lei.
Teseureibe Deu ge Samka’nneube
(Mat 9.14-17; Luk 5.33-39)
18Zai chunage Johanbe (Baptistewpeu) gu kenieme benai Pharisaime â teseurei ze bam lei; zai penui ne wang ze Isua je, “’Ndaitew ze Johanbe gu kenieme benai Pharisaime gu kenieme â teseurei bam ze, ning gu kenieme teseurei mak lau?” kacheu de lei. 19Dadege Isua ne penui je, “Henâukupeu penui dage bam ze hegiakagepâume penui teseureichi dui semei? Henâukupeu penui dage bam bam tâne, penui teseureichi lak lei. 20Penui dagene henâukupeu je nguatatterabe beting wang gu lei, chidezai chipau mai ge penui teseurei gu lei. 21Mi-mige de paî perie ge paî karchibe ne kup kai me lei; chigum pa tew dizai â bekûp ne chize tewhak ’ndu, zai hak kam du lei, perie ge karchibe kaibeibe zeneu. 22Mi-mige de hemeigeibung perie ge wain karchibe kai me lei; chigum pa tew dizai â, wain zene chi hemeigeibung ze tewpâng gu, zai wain ze ga gai du, zai hemeigeibung du sia du lei; kane wain karchibe ze â hemeigeibung karchibe ge kairabe kau lei,” kacheu de lei.
’Ntakbambe Mai Tedeu ge Samneube
(Mat 12.1-8; Luk 6.1-5)
23’Ntakbambe mai, mai kat â Isua helu ramme tatpelapat lei, zai penui pat dege pe gu kenieme ne hemeubuî ramme ’nzutteuchu di de lei. 24Zai Pharisaime ne pechu, “Pie gai ni lau, ’ndaitew ze ’ntakbambe mai ge besiemakbe penui tew lau?” kacheu de lei. 25Dadege pa ne penui je, “Dabidbe pa ne ’nnangdibe luage benai ’njeidibe luage ’ndaikau tew mei be: 26Abiatharbe ne tingkudilangbe changbe ting ge Hera ki ge pa gut lu ze tingkume ne makchai â mî de tew ra besiemakbe chi keliâbe tingku teu ze, zai pe dage bammme je du peibe tak rasam ze ningnui kiâ gai mak mei?” ze kacheu de lei. 27Zai pa ne penui je, “Ziemmena hangge ’ntakbambe mai tew gai lei, ’ntakbambe mai hangge ziemmena je tew gai mak lei; 28chidaze ziemmena Na â heguang zai ’Ntakbambe mai wangpeu du chang lei,” ze acheu bei lei.
Currently Selected:
MARKA 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
