MIKA 4
4
Tingwang ne Kedeirei ge Desieyi ze Samrambe
(Isa 2.1-4)
1Bechâng dezai aigum ze wangchang gu lei,
Tingwang ki deiloa ze kedeiloa kedibe ramme ruage hulangbe chang gu lei,
zai kedeiloa ramme leine peireige teichu’ngngu gai gu lei;
zai ziemmena zat ramme chige misongga ze luawang gai gu lei,
2zai heramzatme misongga ze wang gu lei,
zai penui ne: “Kei lei,
Tingwang gu kedeiloa kehu ’mbe,
Jakob Rapeu ki lam’mbe anui hang zu kei lei;
chidezai peize pa ne pe gu ’mpuî tak ramme anui je getei gai ra,
zai pa tatbe ’mpuî ramme ge anui tat le ra hangge zeu,” ze acheu gu lei.
Zaion gene hingde â pat ku,
zai Tingwang gu sam â Jerusalem gene pat ku daseu.
3Pezat misonggame kakge pa ne samram gu lei,
zai peranchime zat heram kedeu ’mbe bamme je du pa ne laddeitew gu lei;
dezai penui gu hiazutkie ramme hetâ-tabe kepeu ramme hang penui heki gai ’ndu lei,
zai penui gu hengeu ramme â mâ-chîbang chiapbe bepeîka’ngkuaibe hekie hang heki gai ’ndu lei;
pezat kat ne pezat kêdame peireige hiazutkie huachu gai ra mak lei,
zai herei ra du penui geteiheli dai ra mak lei;
4kane ziemmena leine ne penui gu grepchî hiâm kangge benai penui gu ’mbeuchîbang kangge ’ntau bam du lei,
zai mige ne penui je kehei ra mak lei;
Tingwang baudime Wangpeu ne acheu rang gai ’ndi daseu.
5Hezatme leine ne penui rapeu-peu ji gene tat lei,
kane anui â Tingwang anui Rapeu ji gene betingbeta tat bam gu lei.
Kebangchangbe gene Israelme Helatwangdairabe
6Chipau ting dezai aigum gu lei,
ze Tingwang ne acheu sa lei,
bepîsiame je I ne gekumwang’ndui gai gu,
zai guatua’ndime benai I ne tewsâgai’ndime je nguawang’ndui gai gu lei;
7zai bepîsiame je ring’nsakpatme hangge I ne tew gai gu lei;
zai kedeu ’mbe tuâpatkai’ndime je kechibe zat hangge I ne tew gai gu lei;
zai Zaion loa gene Tingwang ne penui peireige heguang chang ze chuna gene seu ze betingbeta samram bam gu lei.
8Dezai nang, Hei kaurui gu heki kehube,
Zaion name ’mpuimi bambe deiloa,
ning dage chize wangchang gu lei,
keraîbe ting ge kaheguangbe ze wang gu lei,
Jerusalem na ’mpuimi gu kaheguangbe bâm ze wang gu lei.
9’Ndaitew ze chuna nang hapka’nrung lau?
Ning dage heguang ga mei?
Ningchu geteiliapeu ga di de mei,
’mpuimi hena lung ra ’nraka’nsua gum ze tewbe zeu?
10Hei! Zaion na ’mpuimi gau,
’mpuimi hena lung ra ’nraka’nsua gum ze huaipun bam zu lau;
chuna â namdi gene nang zuapat ze hênam gesiloa ge nang bam gu lei;
Babilon ’mbe nang tat ku lei.
Chigene ningchu meupat kai gu lei,
chige ning teureime ba gene ningchu ripat kai gu lei.
11Chunage pezatme misongga ze ningchu tingkang ra wang’ndui la de lei, acheu sa ze,
“Peize pechu tewhebâ ne lau,
zai Zaion ’mbe anui mik â,
peize pie bam lau,” ze kacheu de lei.
12Kane Tingwang ka’nningbe tak ze penui chî mak lei,
pa tew ra ka’nningbe tak ze penui chî mak lei,
kechaîpung ge mekum ramme kegit ra teiwang’nduigaibe gum ze penui je pa ne teiwang’ndui gai de lei be zeu.
13Hei, Zaion na’mpui gau,
chu lu chêu nei zu lau,
ning kie hangge hegeî ne I tew gai bu lei,
zai ning ’nchîn hangge kangngâgeî ne tew gai bu lei;
ziemmena zat misonggame je nang ne lakdesuirui ’ndu lei,
zai pegiê-pelâp ze Tingwang dage diepat’nchi gai gu lei,
zai penui heurâ ze kedeirei pelane gu Tingwang hangge diepat’nchi gai gu lei.
Currently Selected:
MIKA 4: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
