MIKA 3
3
Israelme ruage Ka’nguame je Mikabe Saka’nsiabe
1Dadege I ne:
’Ngking le lau,
ningnui Jakobbe kibaume besuitewme,
zai Israelbe kiduîme ruage samramme nung gau!
Mâ-peling tewbe chirabe ze ningnui hang mak semei?—
2ningnui mâ-keyibe ze lugailak ze mâ-kesiabe luneime,
a gu ziemmena gei la ze penui ra ramme gene penui chie chakpatme zeu;
3a gu ziemmena ji ningnui teu,
zai penui gei lapat lu penui ra ramme tewbetdesuirui lu,
heli gene lang ra gum ze hemei dimdesui lu mâ-suabe li ge hemei kai gum kaime zeu,
ze kacheu de lei.
4Chidezai Tingwang je penui kû gu lei,
kane penui je pa kak kai ra mak lei;
chipau luage penui dagene pe ju ’mbai du lei,
penui tâ-kesiabe tewbe ziegeneu.
5Mâ-teu ra ngau lu dege â, “Desieyibe” ze acheu,
kane mâ-teu ra penui mui ge mâ de kaimakme peireige herei ka’mpungme,
kemeume, a gu ziemmena je ngualietattime peireige Tingwang ne acheu rang gai de lei.
6Chipauziegene ningnui dage kengaube ga ze ningnui dage muîwang gu lei,
zai hedachakchi lak ra kemuîbe wang gu lei.
Kemeume hangge naimik kêugut tu lei,
tîngna du penui hangge muiterîng bam du lei;
7kemeume je tewhelêu gai bu lei,
zai hedachakme je tew’ngngam gai bu lei;
Hera dagene samkakbe gabe ziegene penui ’nteumena penui mui kelim kam du lei.
8Kane Jakobbe kiduîme suage penui hedieka’ngkabe salia ra,
zai Israelbe kiduîme suage penui gu hemui salia ra Tingwang gu Herui a dage bambe ziegene tâtewchibe benai samrambe zai reziechibe a dage â puigit lamui lei.
9Aize ’ngking le lau,
ningnui Jakobbe kibaume ruage besuitewme,
zai Israelbe kiduîme gu samramme,
samrambe peling je tenet ze peling leine ze tewkedetkaime,
10Zaion ze hejai ne tei’nsapchume,
zai Jerusalem ze kemaube gene tewchugaime gau.
11Pe gu tâ-muipuame henim teulube ziegene samram gai,
tingkume du peri peibeibe ziegene geteilia,
kemeume rangkâng hanggene kemeu sam pau gai lei;
acheuleusede Tingwang dage penui ’ngngêu lu ze,
“Tingwang â anui ruage ga semei?
Anui peireige mâ de kesiabe wang ra mak lei,”
ze acheu sa de lei.
12Chipauziegene ningnui ziegene Zaion je â helu pu gum ze pu gu de lei;
Jerusalem â sia ze kua’mpum gai gu lei,
zai heki bambe deiloa ze hênam chang gai gu lei.
Currently Selected:
MIKA 3: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
