MIKA 2
2
Kelaksiame peireige Kategame dage Mâ-daurabe
1Penui jeî gene tâ-kesiabe tew ra ’nning ze bamme,
zai tâ-kesiabe tew ra chiampatme hereu gu de lei!
Hechua tingbapat dege penui chize tew de lei,
penui ba ge rezie bambe ge chize bambe ziegeneu.
2Miramme gu helu ramme ze ’nchie ze penui sut lei;
zai heki ramme ’nchie ze penui ne lutat ti de lei;
ziemmena benai pe ki peireige,
ziemmena benai pe heurâ peireige penui ne tewnei-neibe tak tew ze bam lei.
3Chipauziegene Tingwang ne acheu ze rang lei:
Pie le lau,
aipau kelak peireige mâ-kesiabe tew gai ra I ka’nning lei,
chigene ningnui ’nreipatchi ra mak lei;
zai ningnui hegiêsie ze tatrua ra mak lei,
chize beting siabe ting chang gu daseu.
4Chipau mai ge penui ne ningnui je karengetbe leu tew gai gu lei,
mi suisiabe leutew ze ’nrung ze,
“Anui â siakeu kam de lei;
a gu ziemmename ngaurabe dam ze pa ne tewkeli ze la de lei;
a dagene chize ’ndaigum ze pa ne teika’mbia rei se lau!
Anui je ka’nggime dage anui gu helu ramme pa ne ka’nzi lei,” ze acheu gu lei.
5Chipauziegene Tingwang gu ziemmena wangka’nduibe ruage hedachak ze heria ne ’ndeupat kai ra mî de bam ra mak lei.
6“Herasam salia se lau”—acheu ze penui paube ze—
“mige aigumbe rasam ramme pau mak ra lei;
tewka’ngngambe anui dage guachang ra mak lei,”
ze kacheu de lei.
7Hei Jakob ki gau, aize sa ra ka’nnang semei?
Tingwang gu Herui â kagesutbe ga di de semei?
Airamme ze pa ne tewbe ramme semei?
Peling ge tatme peireige a sam ramme ne keyibe tew gai mak semei?
8Kane a gu ziemmename je ningnui ne heteureipeu gum ze chu lu ka’nggi de lei;
zai desieyi ze herei ra ’nning mak ze tatruame dagene ningnui ne paîni gau lei.
9A gu ziemmena ’mpuimi ramme je penui gu heki bamtemi ze bambeki ramme gene ningnui ne guatua lei;
zai penui name hename dagene a ngeudibe betingbeta hang ningnui ne teitat lei.
10Chu lu tatchu lau,
aize â sautemirabe bâm mak daseu;
mâ mi duânggabe tewka’nsiabe zene tewka’nsiabe kahebâbe ziegeneu.
11Mige ne mâ-mêruang benai karasa sam pau ze tatrua ze,
“Wain benai hezau peranchibe rasam I ning suage pau gai gu lei,” ze acheu sa gai dizai â,
aime bau gu pauruapeu pa chang gai de ra de lei!
12Ningnui ’nteumena je I ne gekumwang’ndui gai sing gu lei,
Hei Jakob gau, Israelme ka’nsakme je I ne gekumwang’ndui gai gu lei;
meli ramme perie lungge bambe gum ze I ne penui je kaiherua gai gu lei,
melidung petaning ge bam gum ze,
ziemmena baudime ’ncheu ne hiau bam gu lei.
13Tewputpeu ne penui suage tat ku lei;
penui ne tewputpela ze keriekemui tatpelatat ku lei,
zai chigene penui tatpat ku lei.
Penui gu heguang ne penui sua raîtat ku lei,
zai Tingwang ne penui je nguapat ku lei.
Currently Selected:
MIKA 2: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
