MIKA 1
1
1Juda gu heguangme, Jothambe, Ahazbe zai Hezekiabe ne heguang sapbe ting ge Moresheth’mpeu Mikabe dage Tingwang gu sam wangkeu de lei, Samaria benai Jerusalem hangge pa mâ-ngau de lei.
Samaria benai Jerusalem peireige Kadesuibe
2Ningnui ’nteumena pezatme leine gau,
’ngking le lau;
Hei kedeireime benai pelung ge bamme leine gau, seu le lau;
zai Tingwang HERA ne pe gu kellumki ka’nchibe gene peize ningnui rasam sakkitewbe chang lau.
3Pie le lau,
Tingwang â pe bâm gene pat mui de lei,
kedei pebâm kehube ramme ge wangkeu lu ze tatrua gu lei.
4Hemi taige tega ’nnung gai di gum,
pebâm siabe gene hedui luakeu gum ze,
ramloa kehube ramme pe kangge ’nnungbuak kai du lei,
zai pechuak ramme hekâu chang kam du lei.
5Airamme leine ze Jakob gu hedieka’ngkabe ziegene benai Israel ki gu hemui ramme ziegene chang lei.
Jakob gu hedieka’ngkabe ze ’ndaikau lau?
Chize Samaria mak semei?
Zai Juda ki gu hemui ze ’ndaikau lau?
Chize Jerusalem mak semei?
6Chidaze Samaria je ’nduloa ge mâ-kaika’nduibe bâm gum tew gai bu lei,
grepchî merie tewbe bâm hang tew gai gu lei;
zai pe gu tingchu ramme peningkâm ’mbe kelattua ’ndu lei,
pe gu pedimpung ramme ngau ra lat kai bu lei.
7Pe gu mâ-luî ramme lakpângdesuirui ’ndu lei,
pa hiwangbe ramme hemi ne rû ’ndu lei,
zai pe gu heraluî ramme deî’ngga kam ’ndu lei;
pe pum zuateupui dagene pa gekuaka’ndui daze pe pum zuateupui dage chiramme ze tat kai dai gu lei.
8Aipauziegene I desui ze hap’nrung gu de lei;
paî luaktua lu ze a pumrua I tatrua gu lei;
Munserung gum ze hap’nrung gu lei;
ostrikruî ramme gum ze I ’nra gu lei.
9Pe jâm ze tew’mmichi lak lei;
zai chize Juda ge wangchang de lei,
a gu ziemmename gu keriekemui,
Jerusalem riâ wangchang de lei.
Jerusalem ge Heteu-herei Wangbe
10Gath ge chize salia gai se lau,
zai hap du hap kai se lau;
Beth-le-aphra ge timbuimoîne zeu ge ningnui runne kelarua zu lau.
11Shaphir ge lungme gau,
ningnui ’mpuî ra ’mbe ningnui pumrua ’ngngam ze tat zu lau;
Zaanan ge lungme â zuapat se lau;
Beth-ezel hapbe zene pa sapbe bâm ze ningnui dagene teitat tu lei.
12Maroth ge lungme â mâ-keyibe ze lêulak-desang bam lei,
Tingwang dagene mâ-kesiabe Jerusalem keriekemui ge wangkeuchang ze bambeibe ziegeneu.
13Lakis ge lungme gau,
hekun peranchibe ze timriang ramme ge keî gai lau;
Zaion na heleu’mpui gu hemui pîbang ze â ningnui de lei,
Israelme hedieka’ngkabe ramme â,
ningnui dagene chang daseu.
14Chidaze Moresheth-gath dage rimnarabe kela nang pei gai ra lei;
Akzib kibaume â,
Israel gu heguangme hangge kechoabe chang gu lei.
15Maresha ge lungme gau,
ningnui dage heteureipeu I ne teiwang gai dai gu lei;
Israelme ngeudibe â Adullam ge wangchang gu lei.
16Ningnui peîtam chiap ne lau,
ningnui name je ka’nchâbe ziegene ningnui peîtam gutduak ne lau;
Lawai gum ze ningnui peîtam gutpû ne lau,
ningnui name je ningnui dagene nîmtat tu daseu.
Currently Selected:
MIKA 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
