JONA 4
4
Jonabe Pe Râtabe benai Hera Ka’nggiabe
1Kane chize Jonabe pa-’nning makluisui di de lei. 2Zai Tingwang dage pa acheu ze kakellum de lei. “Hei Tingwang gau, I ning dage kie lei, a ram ge I bambe ting ge sagai’ndibe mak semei? Chipauziegene I keluakkelet Tarshis ’mbe pak’mbia gai di de lei; nang â ’nggiachibe Rapeu, ning raitiepeu zai hungka’ntipbe ne puibepeu zai kesiabe gene nang â helidaichipeu lei be I chî lu dadegeu. 3Chipauziegene chunage, Hei Tingwang gau, a dagene a keringbe ze lu le zu lau, ningchu I kiam lei, a hangge â ringrabe suadu chaiderabe yibi gu daseu,” ze acheu zeu. 4Dadege Tingwang ne, “Nang achu ning râtabe ze ning hangge mâ-keyibe la se mei?” ze kacheu de lei. 5Chidadege Jonabe namdi ’mbe tat ti de lei, zai namdi gene naimikpat ’mbia ’ntau gai lu chige pe runne pe hang hetiamki liâm gai de lei. Zai chi hetiamki kezui kangge pa ’ntau gai di de lei, zai chi namdi peireige ’ndaikau wangchang gu mei be pa ngau mak tâneu.
6Zai Tingwang ne mâ-bang kat chaupat kai de lei, zai Jonabe bamtemibi ra hang, pe peirei sungkezui ra mâ-bang puakpat ra tew gai bei de lei. Chigum ze Jonabe a chi mâ-bang ziegene pe suiyi-desang di de lei. 7Kane bechaibe mai ba’nzangrapatbe luage, chi mâ-bang je tew’nsiarabe hang Hera ne pa’ngkit kai bei de lei, chidadege â chipau bang ze heguikeu di de lei. 8Zai tingnaimik pat dege, Hera ne tingbia ’mbene tingkai lumbe pei gai bei ze, tingnaichiê ted ne Jonabe je pu bei ze pe jiesia di de lei; zai pa chai gai de ra hang acheu ze kie de lei. “A hang â ringrabe suadu chaiderabe ze yibi gu de lei,” ze acheu zeu. 9Kane Hera ne Jonabe je, “Mâ-bang hangge nang ning lumpumbe ze ning hang yi semei?” kacheu de lei. Zai pa ne, “I â a lumpum ra run de lei, chai du chairabe riâ hang a lumpum de lei,” ze kacheu de lei. 10Dadege Tingwang ne pechu, “Nang mâ-bang je ngau’nggia lau, chi nang ne tâtewhereugaimakbe, zai puakpatrabe hang du tâtewhereugaimakbe tingmuî kat lung gene pa pat lu, zai tingmuî kat lung gene gagaidaidibe bang zeu. 11Zai chigum ze ziemmename mâ-keyi-kesia ’nning chimakme lâk kat ze chang ’ngkai suadu kie ze bambe namdi kedibe Ninebi benai kaurui misongga bambe je I ngau’nggia mak ta ra se mei?” ze kacheu de lei.
Currently Selected:
JONA 4: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
