MATHAI 20
20
Grepchî Merie ge Tâtewme
1“Tinggîm heguangram â heki’mpaupeu pe gu grepchî merie ge tâtew ra hang tâtewme ze puî ra hechuasûn ge tattipeu gum lei. 2Mai kat ge kangpi pei ra hangge tâtewrame benai hesuî-hezuâ lu ze, pe gu grepchî merie ’mbe penui je lang gai bei de lei. 3Zai ’nchet sekui gumbe hî ge pa tat dege hanggesame hechaiki ge ’ntakûne sapbambe pa ngau de lei; 4dadege penui je pa ne rang ze, ‘Ningnui du grepchî merie ’mbe tatchu lau, helî buibe riâ ningnui je I pei gu lei,’ kacheu de lei. Dadege penui tat ti de lei. 5Zai ’nchet kereu ze kena hî ge benai ’nchet kechum hî ge pa tatpat dai lu ze, chipau luigum ze tew kadai de lei. 6Zai hegî ’nchet mengeu gumbe hî ge pa tatpat kadai lei, zai chige hanggesame ’ntakûne sapbambe pa ngau de lei; dadege pa ne penui je, ‘’Ndaitew ze aige mâ-tatew mak ze saphimmui lau?’ kacheu de lei. 7Penui ne pechu, ‘Mî ne anui je tâtew ra puîmakbe ziegene de lei,’ ze acheu bei lei. Pa ne penui je, ‘Ningnui du grepchî merie ’mbe tatchu lau,’ acheu bei de lei. 8Zai hegî dege grepchî merie ’mpaupeu ne pe gu tiâkelame peireige besuitewpeu je, ‘Tâtewme je kû lu zuakeunâlangbe gene chu ze raîlangbe chang ze penui hî pei be lau,’ acheu bei de lei. 9Zai hegî ’nchet mengeu gumbe hî gene tâtew ra tatme wang dai dege penui ’nteumena rangkâng bepi-pi ngau kam lu lei. 10Zai zuakeuraîlangme bau wang dege, penui â ngau’ngkiebi ra ’nnum gai de lei. 11Zai chize penui lu lu dege penui lungneu ze pa’mpaupeu je, 12‘Aime tatkahekapme ’nchetkak kat runne penui tâtew gai lei, zai anui tîngna kahereume benai tingchiê lieme je nang â ’nsam ze tew gai bei zeu,’ ze kacheu de lei. 13Dadege pa ne penui ruage hangkat je, ‘A kangpeu gau, ning peireige mâ de I tâtewmau gai me lei; nang kangpi hi ra hang a dage hesuî-hezuâ lu demak ti lau? 14Ning gu lu lu tatchu lau; ningchu I pei gum ze ai tatkahekapme je du I pei ra nei lei. 15A gu changbe peireige I ne a suitew ra rezie bam mak ra semei? I a lung yibe je nang ning lunggailak mei?’ acheu bei de lei. 16Chigum ze nâlangme ne raîlangbe chang gu zai railangme ne nâlangbe chang gu lei,” ze pa ne acheu bei de lei.
Isua ne Pa Chairabe rasam Sabe Pakechumbe
(Mrk 10.32-34; Luk 18.31-34)
17Zai Isua Jerusalem ’mbe hang dege, pe kenieme hangkereu ze kena je ’mpuîki ge nguatî lu penui je, 18“Pie le lau, anui Jerusalem wangchang gu de lei; zai ziemmena Na je tingkugechîngme benai Leisirawme ba ge peipat kai gu lei, zai penui ne pechu chai ra chau’ngkui gai gu lei, 19zai pechu teihenuitew ra, zai kegit ra, zai gia gai ra hangge Jentailme ba ge pei gai gu lei. Zai pakechumbe mai ge pechu teichu gai gu lei,” kacheu de lei.
Hêpui Hangkat ne Kiambe
(Mrk 10.35-45)
20Zai Zebedaibe name bau pui, pe na hangna je ngua lu, pe dage wang ze kukdungkeu ze pe dage mâ kie lei. 21Dadege pa ne chipaupui je, “Nang ’ndaikau lunei lau?” kacheu de lei. Zai chipaupui ne pechu, “Ai a na kena je ning ram ge nang hezat’mbia hangkat, zai heku’mbia hangkat ’ntau ra hangge die gai lau,” kacheu de lei. 22Kane Isua ne kak ze, “Ningnui ’ndaikau kie mei be ningnui chî mak lei. I sakrabe piak ze ningnui sak dui se mei?” acheu bei de lei. Penui ne pechu, “Eu lei, anui sak dui lei,” ze kacheu de lei. 23Pa ne penui je, “A piak ze ningnui sak ku lei, kane a hezat’mbia benai heku’mbia ’ntaurabe ze â I ne peirabe mak lei, kane a peu ne kedâgai’ndime hang lei,” acheu bei de lei. 24Zai hangkereume aize seu lu dege, chi besikina hangna peireige penui châkkerâk ti de lei. 25Kane Isua ne pe dage penui je kûwang lu, “Jentailme gu heguangme â penui deiname peireige pa’mpau chang ze bam lei, zai besuitewme â penui sui-sui gene chime peireige rezietei ze bam lei be ningnui chî lei. 26Peize ningnui ruage chigum se lau; kane ningnui ruage mi-mige de kedipeu changrabe kau â, ningnui guâ ka’ngguapeu peize chang sing ra lei, 27zai mi-mige de ningnui ruage raîneibe kau â, ningnui gu kebang chang sing ra lei; 28ziemmena Na du miramme ne pe guâ ’nggua gai ra wangkeu mak lei, kane miramme guâ ’nggua ra hangge pa wangkeu lei, zai ziemmena misonggame hangge pe gu keringbe du pumlei gum ze pei gai bei daseu,” ze kacheu de lei.
Hemikchitme Hangna je Tewka’mmibe
(Mrk 10.46-52; Luk 18.35-43)
29Zai Jeriko gene hela ’mbe penui pat dege, baudi pe chai suitat ti de lei. 30Zai pie le lau, mikchitme hangna ’mpuî’ntai ge ’ntau bam ze, Isua pat la lei be seu lu dege, “Heguang Dabidbe Na, anai je ngau’nggia gai lau!” ze penai ka’nrung de lei. 31Baudime ne penai kuâneu mak ra hangge ’ngngiam bei lei; kane penai ne “Heguang Dabidbe Na, anai je ngau’nggia gai lau,” ze ’nrung ranbi-bi bam de lei. 32Dadege Isua sapmang gai lu, penai je kû lu, “Ningnai hangge ’ndaikau I tew gai be ra ningnai lunei lau?” ze kacheu de lei. 33Penai ne pechu, “Heguang gau, anai mik ngau ra lat kai lau,” kacheu de lei. 34Dadege Isua ne penai je ngau’nggia-desang di ze, penai mik deî gai de lei, zai luakatne penai mik ngau lu ze pe chai suitat ti de lei.
Currently Selected:
MATHAI 20: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
