MATHAI 21
21
Isua Jerusalem ge Pengêudi ze Gutbe
(Mrk 11.1-11; Luk 19.28-40; Jhn 12.12-19)
1Zai Jerusalem penui wang’nna di ze Bethphage ge, olib Loa ge penui chang dege, Isua ne pe gu kenieme hangna je lang gai ze 2penai je, “Ningnai je teidabe keloa ’mbe tatchu lau, zai chige hekunmerângne keîbe benai bepoine pe taige bambe ningnai ngau gu lei; chi kena je heipat lu, a lam’mbe gaupat lau. 3Mige ne ningnai je mâ-sam ’nneu lêuzai â, ‘Heguang ne ai kena je betâu ka’nnang lei,’ acheu be lau, dezai pa ne kelua ze lang gai gu lei,” ze acheu bei de lei. 4Aize kemeu’mpeu ne rangbe ze tewpui gai ra hangge wangchang de lei,
5“Pie le lau, ningnui gu Heguangpeu kecheiluîpung ze hekunmerângne chingchua lu ze,
ningnui dage wang mui de lei,
ze Zaion na’mpui dage rang be lau” kacheube sam zeu.
6Dadege kenieme tat ze Isua ne rangbeibe luigum ze tew de lei; 7hekun-merângne benai bepoine je penui ne gauwang de lei, zai penai ching ge penui paî tap kai lu, pe peireige pa ka’ntau de lei. 8Dadege baudime ne ’mpuî ge penui paî ramme kâm gai de lei, zai hanggesame ne tenûng chut lu, ’mpuîki ge kâm gai de lei. 9Zai Baudime pe suage tatme benai pe chaige tatme ne, “Dabidbe Na, Hosanna! Tingwang ji gene wangkeupeu je peize yi lau! Hulangbe ge Hosanna!” ze penui ka’nrung de lei. 10Zai Jerusalem ge pa gut bei dege, namdi ge ’nteumena keleulia bam di de lei, “Aize châu lau?” ze penui kacheu de lei. 11Zai baudime ne, “Aize kemeu’mpeu Isua Galiliram Nazareth’mpeu de lei,” kacheu de lei.
Isua ne Kellumki ’mbe Tatbe
(Mrk 11.15-19; Luk 19.45-48; Jhn 2.13-22)
12Dadege Hera gu kellumki ge Isua gut te lei, zai kellumki ge mâ zuame benai luime leine je kelitua ’ndi de lei, zai rangkâng hiakme gu leisi-kaira ramme, zai depeine zuame gu bâm ramme pa ne chuikautuarang gai bei de lei. 13Pa ne penui je, “‘A ki â kakellumbeki ze kû gu lei,’ ze raw gai lei; aize ningnui ne hegasut-teume ki hang tew gai bei de lei,” ze kacheu de lei.
14Zai kellumki ge mikchitme benai bepîsiame pe dage wang de lei, zai pa ne penui je tew’mmi bei de lei. 15Kane pa ne ningdaulakbe tâ ramme tewbeibe benai kellumki lungge napoine ramme ne, “Dabidbe Na, Hosanna!” ze ’nrung ze bambe tingkugechîngme benai leisirawme ngau lu dege penui lunggailak ti de lei. 16Pechu penui ne, “Aime ne samsabe nang seu mei?” kacheu de lei. Zai Isua ne penui ze, “Seu lei;
‘’Napoine ramme benai ’ngngiêne tungbe kau ramme mui gene getoabe ka’nsangbe nang ne teiwang gai ’nde lei,’
kacheube ze ningnui mâdau kiâ gai mak semei?” acheu bei de lei.
17Zai penui je pa sâu gai nan ze namdi gene hela ’mbe Bethani ge pa tat ze chige pa rêu de lei.
Isua ne ’Mbeuchîbang je Desetkaibe
(Mrk 11.12-14,20-24)
18Zai chi namdi ge hechua helatwang dai dege, pa ’njei di de lei. 19Zai ’mpuî’ntai ge ’mbeuchîbang bambe ngau lu dege, pa chige zuawang de lei, kane chige peneu runne zangne mâ de pa ngau mak lei. Dadege pa ne ’mbeuchîbang je, “Mâdauge de ning dagene bechî peize ’nchi dai ta lau!” kacheu de lei. Dadege chi ’mbeuchîbang luakatne heguinui gai di de lei. 20Dadege kenieme chize ngau lu dege penui ’nningdaulak ti ze, “’Ndaigum ze luakatne ’mbeuchîbang heguikeu’nnua gai di se lau,” ze kacheu de lei. 21Dadege Isua ne penui je kak ze, “Pelingsing ze ningnui je I rang lei, ningnui keneibe bam, zai ningnui ’nnumteguak maktizai â, ai ’mbeuchîbang ge tewgai’ndibe luigum ze ningnui tewchiduibe runne mak ze, kane aipau deiloa je, ‘Nang aigene puipat ze sungkling ’mbe keu gai de lau,’ acheu bei sedu chize chang du lei. 22Kakellumbe gene ningnui ne gekiebe leine ze, ningnui dage keneibe bam dizai â, ningnui ngau sing gu lei,” ze kacheu de lei.
Isua gu Rezie Deu ge Samneube
(Mrk 11.27-33; Luk 20.1-8)
23Zai kellumki ge pa gut lu mâ-geteilia lage, tingkugechîngme benai gechîngme pe dage hang lu, “’Ndaikau gu rezie ne airamme nang tew lau, zai châu ne aipau rezie ningchu pei lau?” ze penui kacheu de lei. 24Isua ne penui je kak ze, “I du ningnui je sam kat ’nneu gu lei; zai aize ningnui ne achu rang bei zai â ’ndaikau gu rezie tei lu airamme I tew mei be I du ningnui je rang gu lei. 25Johanbe gu baptisma ze ’ndaigene pat lau? Tinggîm gene mei, nune ziemmena dagene lau?” ze kacheu de lei. Dadege penui karai tu ze, “Anui ne, ‘Tinggîm gene lei,’ ze acheu bei zaine â, pa ne anui je, ‘Acheuzaine ’ndaitew ze pechu ningnui ’nnum’mmi mak lau?’ ze acheu gu de lei. 26Kane anui ne, ‘Ziemmename dagene lei,’ ze acheu ra du baudime je anui hing rei de lei; zai ’nteumena ne Johanbe â kemeu ’mpeu lei be hangge riam gai daseu,” ze penui kacheu de lei. 27Dadege Isua je penui ne, “Anui â chî me lei,” kacheu de lei. Zai pa ne penui je, “Acheuzai â airamme ’ndaikau gu rezie ne I tew mei be ningnui je I du rang ra mak lei,
’Mpeuminapoine Hangna gu Sam’nda
28“Ningnui ’ndaigum ze ’nning gai lau? Mihangkat pe na hangna bam lei; raîbepeu dage pa tat lu ze pechu, ‘A na gau, nemai â grepchî merie ge tat ze tâtew lau,’ kacheu de lei. 29Dadege pa ne kak ze, ‘I â tat ra mak lei,’ kacheu de lei; kane nadege pe lung heli dai lu pa tat ti de lei. 30Zai pa ne pakenapeu dage tat ze, pechu kenû rangbe luigum ze rang kadai de lei; dadege pa ne, ‘A peu gau, I tat ra tew de lei,’ ze kak lei, kane pa tat mak tai lei. 31Penai hangna ruage penai peu ’nning châu ne tew bei lau?” ze kacheu de lei. Penui ne, “Keraipeu lei,” kacheu de lei. Isua ne penui je, “Pelingsing ze ningnui je I rang lei, ’mpuâhame benai penui pum zuateume ne ningnui suage Hera gu heguangram ge gut rai de lei. 32Johanbe ne katelingbe ’mpuî gene ningnui dage wangkeu bei, zai ningnui ne pechu ’nnum’mmi mak tai lei; kane ’mpuâhame benai hepumzuateume ne pechu ’nnum’mmi di lei; zai chize ningnui ne ngau lu sedu ningnui lungheli mak, zai pechu ningnui ’nnum’mmi mak lei.
Grepchî Merie Reîkadekime gu Sam’nda
(Mrk 12.1-12; Luk 20.9-19)
33“Sam’nda kêdabe ’ngking le lau; heki ’mpaupeu hangkat grepchî merie tew lu, zai chize riegua lu, chipau lungge machî niakrabe bâm hang su gai lu, zai chuha râchu gai lu, helu tewkadekime je pa pei gai nan ze heram kedeu ’mbe tat ti de lei. 34Zai pechî raibe ting changzi gu dadege, pe gu perachî lu ra hang pe gu tâka’ngguame je tewkadekime dage lang gai bei de lei; 35zai tewkadekime ne pe gu tâka’ngguame je nîm lu, hangkat je â penui ne bêu bei lei, zai hangkat je â penui ne tewchat ’ndi lei, zai pakechumpeu je â penui ne tingchu ne sîm bei lei. 36Zai tâka’ngguame kêdame je keraîbe lua suadu kie ze pa lang gai de lei; zai penui je du kenû luigum ze tew gai bei de lei. 37Zai nâlangbe ge â ‘A na je penui hengêutew gu lei,’ ze penui dage pe na je lang gai de lei. 38Kane tewkadekime ne pe na je ngau lu dege, ‘Aipaupeu zene pe heurâ teirapeu de lei, kei lei, pechu tewchat ne kei lei, pe heurâ ze anui ne lu kei lei,’ ze penui karai ge acheu sa ze bam lei. 39Dadege penui ne pechu nîm lu, grepchî merie gene hela ’mbe tuâpat kai lu ze pechu tewchat ’ndi lei. 40Chigum daze grepchî merie ’mpaupeu pat dezai chi tewkadekime je pa ’ndaikau tak tew gai gu lau?” ze pa kacheu de lei. 41Penui ne pechu, “Chi kesiame je â tewsâ-sâ lu ze tewchat ’ndu, zai grepchî merie â tewkadekime kêdame bechî raibe ting ge bechî ramme pechu pei’nsuirame je tewdeki ra hang pa pei ’ndu lei,” ze kacheu de lei.
42Isua ne penui je,
“Hera gu leisi sam ge aize ningnui mâdauge du kiâ gai mak semei:
‘Heki tewme ne tuâpatkaibe chukâng zene keraîbe pemikchukâng de lei;
aize â Tingwang tatew di de lei,
anui mikngau ge ’nningdaulak-kadesang lei,’ kacheube zeu?
43Chipauziegene ningnui je I rang lei, Hera gu heguangram ningnui dagene lutua nan ze kêdabe pechî ’nchipatrame zat dage pei gai ’ndu lei.”
44“Zai chipau tingchukâng peireige kâugaibe kau â ketaudesuirui gai gu lei; kane mi-mige peireige chipau chukâng ze keu gai dizai â, pechu niakpi ’ndu lei,” kacheu de lei. 45Tingkugechîngme benai Pharisaime pe gu sam’nda ramme seu lu dege penui lung gene chize penui je saka’nda de lei be chî lu de lei. 46Dadege pechu nîm ra hang heka gai dege baudime je penui hing de lei, pechu penui ne kemeu’mpeu hangge riamgai’ndibe ziegeneu.
Currently Selected:
MATHAI 21: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
