MATHAI 19
19
Isua ne Henâutabe Tedeu ge Geteiliabe
(Mrk 10.1-12)
1Zai chunage Isua ne aipau sam ramme sa kam dege, Galili gene tat ti de lei, zai Jordan geuki kapat lu Judiaram-bak gut ti de lei; 2zai baudime misongga ze pe chai suitat ti de lei, zai pa ne penui je tew’mmi bei de lei.
3Zai Pharisaime pe dage wang lu pechu kedak ze, “Mâ-mâ patedeu bambe ziegene mige pe nâu je tatuâ ra hangge besie la mei?” ze ka’nneu lei. 4Pa ne kak ze, “Bepîbang raîlangbe ge penai je ka’ndampeu ne ’mpeumi benai ’mpuimi hang tew gai lei be ningnui kiâ gai mak mei, 5zai ‘Aipau deu hanggene ’mpeumi â pe pui pe peu je sâu nan ze pe nâu je ngualung ra lei, zai penai hangna ze kat chang ra lei,’ ze kacheu de lei. 6Chidaze penai ze hangna chang ta de lei, kane kat chang de lei. Hera ne teiheluagai’ndibe ze peize mî ne de tew’mpak se lau,” kacheu de lei. 7Penui ne pechu, “Acheuzaine ’ndaitew ze Mosabe henâutabe leisi pei gai lu ’mpuimi je tatuâ ra hangkat je die gai lau?” kacheu de lei. 8Pa ne penui je, “Ningnui lung chibeibe ziegene Mosabe ne ningnui nâu je tatuâ ra hangge lun gai de lei, kane aize â bepîbang gene acheu mak lei. 9Ningnui je I rang lei: mi-mige de kahemabe ne mak ze, pe nâu je tatuâ nan ze kêdabe kau je lube kau â kahemabe kau lei; zai mi-mige de chi tapatkaibeipui je lube kau ze du kahema de lei,” ze acheu bei de lei.
10Kenieme ne pechu, “’Mpeumi hangge ’mpuimi dage aigumbe bam dizai â, kelaktewmakbe yi de lei,” kacheu de lei. 11Kane pa ne penui je, “Aipau sam ze ’nteumena teichi lak lei, kane peigaime hang runne lei. 12Hanggesame â pe pui nampâm gene hetia ze lungkeu lei, zai hanggesame â ’nraitewbe gene penui je kahetiâme hang tew gai bei, zai hanggesame â penui runne penui je tinggîm heguangram hang ziegene kahetiâme hang tew gai bei daseu. Mi-mige de aize tewchiduibe kau â, peize tew lau,” acheu bei de lei.
Isua ne Napoine ramme je ’Nnamgaibe
(Mrk 10.13-16; Luk 18.15-17)
13Dadege pe dage napoine ramme je nguawang de lei, peize penui peireige pa ne pe ba die gai ze kellum gai ra hangge zeu. Kenieme ne baudime je ’ngngiam bei lei; 14kane Isua ne, “Napoine ramme je peize a lam wang lau, penui je nam se lau; tinggîm heguangram â aigumbe kau ramme hang daseu,” acheu bei de lei. 15Dadege penui peireige pe ba die gai lu, chigene pa tatrimna di de lei.
Rehang’mpeu Lungyipeu rasam
(Mrk 10.17-31; Luk 18.18-30)
16Zai pie le lau, hangkat pe dage hang lu pechu, “Geteiliapeu gau, ringbetunmakbe I ngau ra ’ndaikau tâyibe I tew sing ra ka’nnang lau?” ze kacheu de lei. 17Zai pa ne pechu, “’Ndaitew ze nang achu mâ-keyibe tedeu ge ka’nneu lau? Keyibe â hangkat runne lei. Nang ne keringbe ge gut nei zai â samde ramme rei’mmi lau,” acheu bei de lei. 18Pa ne pechu, “’Ndaibe ramme ze lau?” kacheu de lei. Dadege Isua ne, “Nang tewchat mak ra lei, Nang kahemabe tâ tew mak ra lei, Nang hega mak ra lei, Nang karasa ne sakkitew mak ra lei, 19Ning pui benai ning peu je hengêutew lau, zai Ning runne ningchu hung gum ze ning kiningme je du nang hung ra lei,” acheu bei de lei. 20Rehang’mpeu ne pechu, “Airamme leine â, I rei kam lu de lei; ’ndaikau I tew’nsangmakbe bam gerei lau?” ze kacheu de lei. 21Isua ne pechu, “Yi’nsangsiak ze nang bam nei zaine â, tat ze ning gu kebambe leine zua lu, kelaksiame je pei be lau; chidezai tinggîm ge ning heu gekua gai gu lei; zai wang ze a chai sui le lau,” acheu bei de lei. 22Aipau sam ze rehang’mpeu seu lu ze, pe suisia ze tat ti de lei; pa pe heurâ misongga bambe ziegeneu.
23Dadege Isua ne pe gu kenieme je, “Pelingsing ze ningnui je I rang lei, keheupeu hang â tinggîm heguangram gut ra hung gu lei. 24Zai ningnui je I rang kadai lei, keheupeu ne Hera gu heguangram gut ra sua â put-hu ne ’ngngim kunki bua’nzutpela ra sêu’nteu gu lei,” kacheu de lei. 25Zai kenieme chize seu lu dege ’nningdaulak-desang di ze penui ne, “Acheuzaine, châu ne ring dui lau?” kacheu de lei. 26Kane Isua ne penui je pie gai lu penui je, “Aize â ziemmena dagene â chang lak lei, kane Hera dagene â getaleine chang dui lei,” ze acheu bei de lei. 27Dadege Peterbe ne kak ze, “Ni anui â mâgetaleine sâu nan ze ning chai sui de lei, chidaze ’ndaikau anui ngau ra la lau?” ze kacheu de lei. 28Isua ne penui je, “Pelingsing ze ningnui je I rang lei, kedeirei karchibe ge ziemmena Na ze pa pe ngeudibe heguang-bamrak ge ’ntau dezai ningnui a chai sui ze bamme du heguang-bamrak kereu ze kena ge ’ntau gu, zai Israelme zat kereu-ze-kename je ningnui nguasamram gu lei. 29Zai mi-mige de pe ki ramme, pe sikina ’mpeumi, ’mpuimi ramme, zai pe pui, pe peu zai pe name mei nune pe gu kedei ramme mei je a ji ziegene sâu’ndibe kau â chi pa sâu’ndibe bak haî suadu kie ze ngau gu lei, zai ringbetunmakbe pa ngau gu lei. 30Kane keraime misonggame ne nâ gu, zai kenâme ne raî gu lei.
Currently Selected:
MATHAI 19: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
