MATHAI 18
18
Châu ne Dilang ra lau?
(Mrk 9.33-37; Luk 9.46-48)
1Chipau luage kenieme Isua dage wang lu, “Tinggîm heguangram ge châu ne dilang ra lau?” ze penui ka’nneu lei. 2Dadege napoine je pe dage kûwang lu, penui zuilung ge kai lu ze 3“Pelingsing ze ningnui je I rang lei, ningnui ’nreiwang ze napoine ramme gum ze chang makchaine â tinggîm heguangram ningnui mâtew-tewsedu gut ra mak lei. 4Mi-mige de ai napoine gum ze kecheiluîtewbe kau ne tinggîm heguangram ge dilangbe chang gu lei.
5“Zai mi-mige de a ji gene napoine aigumbe kau hangkat je ka’nchâbe kau â achu ka’nchâ lei.”
Keduaibe ne Hemui ge Nguagaibe
(Mrk 9.42-48; Luk 17.1,2)
6Kane mi-mige de aigum ze kecheime ruage achu ’nnumka’mmibe kau hangkat je tewkaube kau je â mâ-niakbe chukâng pe guang ge keî gai lu, sungkling chukbe ge pechu tuâgaibeibe pe hang yibi gu lei.
7“Tewkaurabe ramme misongga bambe ziegene kedeirei peduângga gu lei! Keduaibe ramme â wang himchang gu, kane ziemmena pe dagene keduaibe patrapeu â peduângga gu lei! 8Zai ning ba ne mei, nu ning pî ne mei ne ningchu hemui ge chui gai dizai â chize dângpat lu tuâ ne lau; ba na mei, nune pî na mei bam lu, betunmakbe hemi ge tuâgairabe sua â ba kat mei, nu pî kat mei runne bam lu ze keringbe ge gutbe ning hang yi’nteu gu lei. 9Zai ning mik ne ningchu hemui ge chui gai zai â kuitua ne lau; mik na pung ze gehenna hemi ge tuâgairabe sua â mik kat pung ze keringbe ge gutbe ning hang yi’nteu gu lei.
Meli Gadibe gu Sam’nda
(Luk 15.3-7)
10“Ai kecheime ruage hangkat je de ngau’nna mak ra ningnui ’ntîng le lau; ningnui je I rang lei, penui gu angelme â a peu tinggîm ge bampeu ju ngau bam daseu. 11Zai ziemmena Na â ’nggadibe kau je tew’nringpat kai ra wangkeu lei. 12Ndaigum ze ningnui ka’nning lau? Mige meli haî kat bam ze, meli kat tatlietat teleu zaine riaksekui ze sekui je peloa ramme ge sâu gai nan ze, kat tatlietattibe je pa peu mak ta ra semei? 13Pelingsing ze ningnui je I rang lei, chize pa ngau dai lu dezai riaksekui ze sekui tatliemakbe je sua â chi kat peireige pe suiyi-desang gu lei. 14Chigum ze ai kecheime ruage hangkat de gaderabe ze â a Peu tinggîm ge bampeu ne nei mak lei.
Besikina Kahemuibe
15“Ning peireige ning sikina ne mâ-tewmaube lazai â tat ze pa benai ningnai runne kakge pa tewmaube salia be lau. Pa ne ning kuâ seu bei zaine â nang ne ning sikina je teiwangdailube chang de lei. 16Kane ning kuâ pa ’ngking nei mak tizai â kêdabe hangkat mei, nune hangna mei je ngua le lau, dezai samsabe leine ze sakkitewme hangna mei, nu hangchum mei mui gene tew’ntip kai ra chang gu lei. 17Zai penui kuâ pa ne ’ngking nei makchai â herakiangna dage salia gai be lau, zai herakiangna kuâ du pa ne ’ngking nei makchaine â ning hangge pa â Jentail’mpeu benai mâ-hâhapeu gum ze peize chang de zu lau.
Kenambe benai Letbe
18Pelingsing ze ningnui je I rang lei, kedeirei ge ningnui ne pibe leine tinggîm ge du pi ze bam gu lei, zai kedeirei ge ningnui ne heipatbe leine tinggîm ge du heipat ze bam gu lei. 19Ningnui je I rang gai kadai lei, kedeirei ge ningnui ruage mi hangna ne penai lungkattew ze mâ-mâ kie dizai â, a Peu tinggîm ge bampeu ne penai hang tew gai gu lei. 20Zai mi hangna mei nu hangchum mei a ji gene wangka’nduibe leine ge chime ruage I bam gu lei,” ze kacheu de lei.
Lunchilakbe Kebang gu Sam’nda
21Chipau chângge Peterbe wang lu pechu, “A Wang gau, a sikina ne a peireige hemuitew gai bam bei ze lua daikiege pechu I lun ra lau, lua sena riâ mei?” ze kacheu de lei. 22Isua ne pechu, “Ningchu lua sena lei, ze I acheu me lei, kane lua sena tûm riaksena ra lei.
23“Chipauziegene tinggîm heguangram â mige heguang hangkat ne pe gu tâka’ngguame je ngua lu pe gu rangkâng riak riam’nchigaineipeu deze teikeda gai le dui lei. 24Zai riamwang gai dege, mi hangkat talent chang kereu hekumpungpeu je pe dage teiwang de lei; 25zai pa peichilaktibe ziegene pe nâu, pe name zai pe gu kebambe leine zua kam lu chigene pe gu hepâu pei ra die gai bei de lei. 26Dadege chi tâka’ngguapeu ze kukdungkeu lu kiâm ze, ‘A Wang gau, a ma pie gai rî lau, getaleine I ningchu pei kam gai gu lei,’ ze kacheu de lei. 27Dadege â pe pau ne pechu ngauka’nggiabe ziegene pechu ’mpat kai lu ze pe gu hepâu leine lun gai bei de lei. 28Kane chi tâka’ngguapeu ze pa zuapatbe luage pe kangme ruage hangkat kangpi haî kat hepâupungpeu je pa ngau lu dege pechu, ‘Nang hepâupungbe ze pei du lau’ ze pe guang kahekit lei. 29Chidadege pe kangpeu tâka’ngguapeu ne pe pîkang ge keikeu lu, ‘A ma pie gai rî lau, I ningchu pei gu lei,’ ze kiam de lei. 30Kane pa lun mak ze pechu hepâupungbe ze ruî kam mak tâne kebangki ge pechu bangnam gai nan tai lei. 31Chidadege pe kangme ne pa tâtewbe ngau lu ze penui lunghereu-desang di de lei, zai penui pau dage wang lu, pa tâtewbe tak leine penui ne salia kam bei de lei. 32Dadege â pe pau ne pechu kûwang lu, ‘Nang tâka’ngguapeu helungriaksiabe kau de lei! Nang ne achu kiambeibe ziegene ning gu hepâu leine I lun gai bei de lei; 33ningchu I ne ngau’nggia gai bei gum ze nang du ning kangme je ngau’nggiarabe mak ti lau?’ ze kacheu de lei. 34Dadege pe pau pe râta-desang di ze, hepâu pa pungbe ruî kam mak tâne hang tewsâme dage pechu pei gai ’ndi de lei. 35Mi-mige de pe lung gesangsing ne pe sikiname je lun makchai â, a peu tinggîm ge kebampeu ne chigum ze ningnui ’nteumena peireige tew gai gu lei,” kacheu de lei.
Currently Selected:
MATHAI 18: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
